Lama ‘Buswe Bobe Bubajinji’
Lama ‘Buswe Bobe Bubajinji’
“Uminina ku kino kyōdi nakyo.”—KUS. 3:11.
1, 2. Lelo weivwene ku mutyima namani powaikele kujingulula abe mwine amba myanda itala padi Yehova yowadi wifunda i ya bine?
LELO ukivulukile musunsa umbajinji owasapwidilwe mulao wa kutendelwa ulaile Yehova ku bantu ba kikōkeji? Shi wadi kala mu kipwilo kingi, le waivwene namani ku mutyima pobakushintulwidile mu bisonekwa mpango ya Leza nansha pobakutōkejeje senene mfundijo kampanda yadi ikukōmene kwivwana? Padi wamwene amba bine wadi mongolwe. Bine, pano wi musepelele bininge pa kuyuka bino byonso! Shi watamijibwe na bambutwile Bene Kidishitu, lelo uvulukile mowaivwanine ku mutyima powaikele kujingulula abe mwine amba myanda itala padi Yehova yowadi wifunda i ya bine ne kutyiba watyiba mbila ya kwiilonda mu būmi?—Loma 12:2.
2 Banabenu bavule ba ku mushipiditu bakakulombola’mba nabo baivwene nsangaji ne kwimona bu abafwena kudi Yehova ne kusaka kumufwija’ko mwanda wa kukoka kwaebakokele. (Yoa. 6:44) Nsangaji yabo yebafikije ku kwingila mingilo ya Bwine Kidishitu. Badi na nsangaji mivule yebatonwene kusapwila bantu bonso byobaivwene. Le nobe ye mowalongele?
3. I ngikadilo’ka yādi mu kipwilo kya mu Efisesa pātumine Yesu musapu?
3 Yesu pa kutuma musapu ku kipwilo kya mu myaka katwa kabajinji kya mu Efisesa, wānene myanda itala ‘buswe bubajinji.’ Bene Efisesa badi na ngikadila mivule miyampe, inoko buswe bobādi baswele Yehova dibajinji bwādi ke butalale. O mwanda Yesu wēbanene amba: “Ndyūkile bilongwa byobe, ne mīngilo yobe yōputuminamo, ne kutūkija mutyima kobe, ne byo kuswele kufwenwa na babi, ne byo watompele bakwitela bu-batumibwa, nanshi kebadipo batumibwa, mhm, nobe webasokola bubela bwabo. Kabidi watūkija mutyima, ne kwifula abe mwine ponka pa dijina dyami, ne kwenda ukōka mpika. Ino nanshi, ngidi na mwanda kudi abe, i uno na’mba, washīle lusa [“buswe,” NW] lobe lubajinji.”—Kus. 2:2-4.
4. Mwanda waka musapu wātumine Yesu kudi Bene Efisesa udi na kamweno dyalelo?
4 Madingi ādingile Yesu Bene Efisesa ne bipwilo bikwabo adi mu mukanda wa Kusokwelwa i makwatañane na ngikadilo yadi umbukata mwa Bene Kidishitu bashingwe māni tamba mu 1914. (Kus. 1:10) Nansha ke pano pene, Bene Kidishitu bamo babwanya kujimija ‘buswe bwabo bubajinji’ bobadi baswele Yehova ne bubinebine bwa Bwine Kidishitu. Byotwayuka kino, tubandaulei muswelo okokeja kulama, kukabija, ne kutamija buswe ne bupyasakane bowadi wingidila nabo Leza ne kulonda bubinebine dibajinji, na kuvuluka ne kulangulukila pa myanda yowemwenine umbūmi.
I Bika Byakufikije ku Kwitabija Amba Buno I Bubinebine?
5, 6. (a) Le Mwine Kidishitu ufwaninwe kukulupila aye mwine bika? (b) I bika byakukulupije amba Batumoni ba Yehova bafundijanga bubinebine? (c) I bika bibwanya kukwasha muntu akabije buswe bwandi bubajinji?
5 Ense wipāna kudi Yehova ufwaninwe bidi “kuyuka” aye mwine “kyasaka’mba i kiyampe, kimusangaja, kadi’mba i kibwanyinyine.” (Loma 12:1, 2, MB) Kino kilomba ne kufunda bubinebine bwa mu Bible. Myanda yakulupije muntu kampanda’mba Batumoni ba Yehova bafundijanga bubinebine ikokeja kwishila na ikulupija muntu mukwabo. Bamo bavuluka’mba batengelwe ku mutyima pa kutanga dijina dya Leza mu Bible nansha kadi i pobaivwanije mwine mwikadile bafwe. (Mit. 83:18; Mus. 9:5, 10) Bakwabo nabo batengelwe na buswe bwiswele bantu ba Yehova. (Yoa. 13:34, 35) Bangi nabo balangulukile pa buluji bwa kubulwa kwikala wa ino ntanda. Bafudile ku kuyuka’mba Bene Kidishitu ba bine kebafwaninwepo kwikuja mu bimyanda bya politike nansha mu mavita elwa mizo.—Is. 2:4; Yoa. 6:15; 17:14-16.
6 Ku bavule, buno bubinga ne bukwabo bo bwakabije buswe bwabo bubajinji bobaswele Leza. Nobe witudile’ko kitatyi kya kuvuluka myanda yakunekenye abe witabije bubinebine. Nobe udi na ngikadilo mishile na ya bakwabo, nanshi bubinga bubajinjibajinji bwakutonwene uswe Yehova ne kwitabija milao yandi kebubulwepo kwishila na bwa bakwabo. Padi, bubinga bumo bonka’bwa bukikunekenya ne dyalelo na mobwakunekeninye pobakusapwidile’bo dibajinji. Bubinebine kebushintyilepo. O mwanda kubandaula dipya yoya milangwe ne moyakutengele ku mutyima kukokeja kushinsakanya ne kukabija buswe bowadi uswele dibajinji bubinebine.—Tanga Mitōto 119:151, 152; 143:5.
Tamija Buswe Bobe Bubajinji
7. Mwanda waka tufwaninwe kutamija buswe bubajinji botwadi tuswele bubinebine, ne tukebutamija namani?
7 Padi kudi myanda mivule yashinta mu būmi bobe tamba wipāna kudi Yehova. Buswe bubajinji bowadi uswele bubinebine bwadi na kamweno, ino mwenda mafuku, byadi bikulomba kutamija buswe bobe mwa kulwila na bikoleja bitūla lwitabijo lobe pa ditompo. Inoko, Yehova wadi ukukwasha. (1 Kod. 10:13) Nanshi, myanda yowimwenine mu bula bwa myaka nayo idi na mvubu kodi. I mikukwashe utamije buswe bobe bubajinji, kadi i muswelo mukwabo okokeja kuyuka abe mwine kiswa-mutyima kya Leza amba i kiyampe kadi kitabijibwe.—Yos. 23:14; Mit. 34:8.
8. Lelo Yehova wēyukenye namani kudi Mosesa, ne i muswelo’ka wāfikile Bene Isalela ku kuyuka senene bumuntu bwa Leza?
8 Tulete kimfwa, langa’po bidi mwēivwanine Bene Isalela pēbalombwele Yehova mpango ya kwibakūla mu bupika mu Edipito. Leza wēyukenye kudi Mosesa amba: “Ami ngidi enka aye udi.” (Div. 3:7, 8, 13, 14) Na bubine Yehova wādi unena’mba usa kulonga kyonso kisakibwa mwanda wa kukūla bantu bandi. Binkumenkume byāmwene Bene Isalela, ne ngikadilo yobātenwe’mo byēbakweshe kusokola ngikadila mishileshile ya bumuntu bwa Yehova—Mwine Mukatakata Mwine, Mutyibi, Mwendeji, Umpandiji, Kalāla ka mavita, kadi wa Buntu.—Div. 12:12; 13:21; 14:24-31; 16:4; Neh. 9:9-15.
9, 10. I bintu’ka bibwanya kukukwasha kuyuka Leza, ne mwanda waka i biyampe kuvuluka myanda yowemwenine?
9 Ngikadilo yobe i mishile na ya Bene Isalela ba kala. Nansha nabya, kudi bintu byowemwenine byākukulupije bine amba Leza ukutele mutyima, ne byakankamikile lwitabijo lobe. Padi Yehova wemwekeje kodi mu muswelo kampanda amba i wa buntu, Musengi, nansha Mufundiji. (Tanga Isaya 30:20b, 21.) Nansha kadi padi wemwenine muswelo waakulondolwele ku milombelo kampanda. Kepabulwe padi watenwe na bikambija ne kukwashibwa na banabenu Bene Kidishitu. Padi kadi, i bisonekwa byowatene mu kifundwa kyobe kya kasuku byakukweshe.
10 Shi usekunwine bakwenu ino myanda padi kebakatulumuka’yopo. Ayo’ko i ya binebine, ke kingelengelepo. Ino abe wiimone bu ya kamweno. Bine, Yehova waikele enka mwaadi usakila kwikala kodi. Langulukila bidi pa myaka yopityije mu bubinebine. Le ubwanya kuvuluka bitatyi kampanda byoweivwene amba Yehova ukutele mutyima mu būmi bobe, a? Shi i amo, kuvuluka ino myanda ne muswelo oweivwene kubwanya kubweja’ko buswe bwa kuswa Yehova mu mutyima obe’nka na pabajinji’pa. Ikala na mutyima wa kufwija’ko pangala pa ano madyese. Langulukila’po. Alombola’mba Yehova ukutele mutyima bine ne i kutupu ubwanya kunyoñomona kino kikulupiji.
Wibandaule
11, 12. I bika bikokeja kulengeja buswe bwadi buswile Mwine Kidishitu bubinebine butalale, ne i madingi’ka āletele’po Yesu?
11 Shi ubemone amba kukiswilepo Leza ne bubinebine na pabajinji, kekunenapo amba Leza washinta, mhm. Yehova kālamukangapo. (Mal. 3:6; Yak. 1:17) Ukikutele mutyima ne dyalelo dine enka na mwaadi ukutelele’o. Le shi ubamone amba kukipwenepo na Yehova na mowadi upwanine nandi le? Lelo pano umona amba kodi na mitabakano mivule ne kukambakanibwa na njia? Padi dibajinji wadi ulombelanga na kininga, wifunda na kusumininwa ne kulangulukila’po kitatyi ne kitatyi. Lelo wadi na bupyasakane mu mwingilo wa busapudi ne kutanwa ku kupwila kwa pa kipwilo kutabuka molongela dyalelo?—2 Kod. 13:5.
12 Kyaba kimo kubwanyapo kuyuka amba ubashinta, ino shi ubayuka nabya, i bika byalengeja ushinte? Lelo myanda myendele’mo kimfwa ya kusasaketa kyobe kisaka, kwiundapija, nansha bikwabo bidi namino, yo yalengeje wilwe’ko amba difuku dya Yehova dibafwena bukidi bonka? Yesu wādyumwine batumibwa bandi amba: “Mwikale kudyumuka bānwe bene, mwanda wa kunena’mba mityima yenu yakaīle kulemenenwa, ne mu dyopolo, ne bunkolwankolwa, ne byakūmininwa bya buno būmi ino dyodya difuku dikemupulumukila bitupu, enka na lufimbo lwa kwimuponena. Ke-pantu i yenka nabya dikaponena bonso bakwikala panopanshi ponso. Dyumukai mafuku onso, ne kulombela’mba mukafwaninwa kupanda ku byobya byonso bisa kufika, kadi mukēmana ku meso a Mwanā muntu.”—Luka 21:34-36.
13. Lelo Yakoba wādingakenye Kinenwa kya Leza na bika?
13 Yakoba wāpelwe mushipiditu sandu pa kulemba Bible, wādyumuna banababo betabije bebandaule bya binebine mungya Kinenwa kya Leza. Wāsonekele amba: “Mwikale bakulonga mwanda, ke konka ku kwivwana bitupu, ne kwiongola ponka, mhm. Ke-mwi-bantu shi umo ēkale wakwivwana bitupu mwanda, ne kulonga’o mpika, nabya udi pamo bwa muntu utala mpala ya ngitu yandi mu kitalo; mwanda witalanga aye mwine’mba, mfundukepo, kala wēilwa ne muswelo wa mwāikadile. Nanshi aye wakutadija, talē, monka mu kijila kibwane kya bu-mwana-pabo ukeselwako dyese dya pa bilongwa byandi, ke-muntu aye kadipo wakwivwana wavulaminwa, mhm, i wakulonga wa mīngilo.”—Yak. 1:22-25.
14, 15. (a) Bible ubwanya kukukwasha muswelo’ka ulemunune ngikadilo yobe ku mushipiditu? (b) I bipangujo’ka byokokeja kulangulukila’po?
14 Muntu ubwanya kwitala mu kitalo nansha dikalashi mwanda wa kuyuka shi umweka senene. Kimfwa shi mwana-mulume wamone amba kalafwanda kandi i kanyengakane ubwanya kwikōlola. Mwana-mukaji nandi shi wamone amba nywene yandi i misalakane, ubwanya kusakula’yo. Mo monka ne Bisonekwa nabyo bitukwashanga twibandaule motwikadile. Kitatyi kyotudingakanya ngikadilo yetu na binena Bible nabya twitalanga mu kitalo. Ino le i bika byotukamwena mu kwitala mu dikalashi kwampikwa kwilongolola popa potwimona bibi? I biyampe tulonge bintu kukwatañana na byotumona mu “kijila kibwane” kya Leza ne kwikala ‘bakulonga’kyo.’ Nanshi ense umona amba buswe bwandi bubajinji bwaadi uswele Leza bubatalala, i biyampe alangulukile pa bino bipangujo: ‘Lelo i makambakano’ka ontananga mu būmi, ne noñanga’po namani? Lelo nadi noñanga’po namani? Lelo kudi kintu kyashinta?’ Shi tubemone na bilubo kampanda mu kwibandaula kwetu, ketukibitalai bitupu. Shi bitusakilwa kulemununa, nankyo tulongei bukomo bwetu bonso bwa kwilemununa pampikwa kwija.—Bah. 12:12, 13.
15 Kulanguluka kwa uno muswelo kubwanya kadi ne kukukwasha witungile bitungo bya ku mushipiditu biyampe mwa kwendelela ku mushipiditu. Mutumibwa Polo wātumine Temote madingi a ku bukomo bwa mushipiditu, mwanda wa kulumbulula mwingilo wandi. Wāsoñenye uno nsongwalume amba: “Pyasakena ku bino bintu bino’bi; wielelele monka; amba bantu bonso bamone mōendela utamina.” Netu i biyampe tulanguluke mungya Kinenwa kya Leza ne kuyuka i bika byotufwaninwe kulonga mwanda wa kutama.—1 Tem. 4:15.
16. I kyaka’ka kyofwaninwe kudyumuka kitatyi kyowibandaula kupityila ku Bisonekwa?
16 Kwibandaula kwa binebine kubwanya kusokola bukōkekōke bwetu bumobumo. Kino kibwanya padi kuzozeja muntu mutyima, ino kokaleka kikuzozeje. Yuka’mba kyo twibandawila i kuyuka popa potufwaninwe kwilemununa. Kunena na bubine Satana usakanga Mwine Kidishitu emone bu kadipo na mvubu pa mwanda wa kutupatupa kwandi. Kadi Satana unenanga’mba Leza upelekele bukomo bonso bulonga bantu mwanda wa kumwingidila. (Yoba 15:15, 16; 22:3) Buno’bu bo bubela bwāmujingulwile Yesu na kininga; Leza umwene amba muntu yense umbukata mwetu udi na mvubu. (Tanga Mateo 10:29-31.) Kwiyuka amba udi na bukōkekōke kufwaninwe kukutonona wilemunune senene na kwityepeja, ne Yehova ukakukwasha. (2 Kod. 12:7-10) Shi kukibwanyapo kulonga bintu bimobimo pa mwanda wa misongo nansha bununu, nabya witungile bintu byokokeja kufikila’po, ino kokapungila nansha kuleka buswe bobe butalale.
Udi na Bivule bya Kufwijija’ko Leza
17, 18. I kamweno’ka kadi mu kutamija buswe bobe bubajinji?
17 Shi wendelele na kutamija buswe bobe bubajinji ukamwena’mo bivule. Ukekala na buyuki buvule bwa Leza ne kwikala na mutyima wa kufwija’ko pangala pa buludiki bwandi bwa buswe. (Tanga Nkindi 2:1-9; 3:5, 6.) Kaimba wa mitōto wānene amba: “Mu kulama [kutyiba mambo kwa Yehova] mo mudi ne mpalo mikatakata.” “Busapudi bwa Yehova i busumininwe, budyumuna bendalale ke badyumuke.” Kadi amba “kebo ba katōkwe kabo, shabo! boba babwanininye mu dishinda, bananga mu mukanda-wa-bijila wa Yehova.”—Mit. 19:7, 11; 119:1.
18 Bine uketabija amba udi na bintu bivule byofwaninwe kufwijija’ko Leza. Kodi mwivwanije buluji bwa bintu bipita pano pa ntanda. Umwenanga mu bulami bwa Leza bwa ku mushipiditu bwalama bantu bandi mu ano mafuku. Ne kadi binebine ukafwija’ko Yehova mwanda wa kukufwenya kwakufwenyenye mu kipwilo kyandi kya ntanda yonso ne pangala pa dyese dyodi nadyo dya kwikala Kamoni wandi. Bine i madyese keabadikapo kashā! Shi wiabale, i mavule kutabuka. Kubala’o kitatyi ne kitatyi kekukabulwepo kukukwasha ulonde ano madingi anena’mba: “Uminina ku kino kyōdi nakyo”—Kus. 3:11.
19. Kutentekela pa kulangulukila pa kipwano kyobe na Leza, i bika bikwabo bidi na mvubu pa kwikala mukomo nyeke ku mushipiditu?
19 Kulangulukila pa muswelo wadi wenda utama lwitabijo lobe mu bula bwa myaka, i muswelo umo ukakukwasha ūminine ku kino kyodi nakyo. Dino dipepala dikokelanga ñeni yetu kitatyi ne kitatyi ku bintu bya mvubu biketukwasha tulame bukomo bwetu bwa ku mushipiditu. Mu bino bintu mubadilwa ne milombelo, kutanwa ku kupwila kwa Bwine Kidishitu ne kunena’ko, ne kutambila mu mwingilo wa busapudi na bupyasakane. Bino bintu bibwanya kukukwasha wendelele kukomeja buswe bobe bubajinji, kwibukabija, ne kwibutamija.—Ef. 5:10; 1 Pet. 3:15; Yude 20, 21.
Ukokeja Kulondolola Namani?
• Bubinga bwakufikije ku kuswa Yehova i nsulo ya bukankamane namani dyalelo?
• Kulangulukila pa bintu byowimwenine mu bula bwa myaka kukuletelanga kikulupiji’ka?
• Mwanda waka ufwaninwe kubandaula mwikadile buswe boswele Leza?
[Bipangujo bya Kifundwa]
[Kifwatulo pa paje 29]
Lelo i bika byakukokele ne kukulupija amba buno bo bubinebine?
[Kifwatulo pa paje 31]
Lelo kudi bintu byomona kodi bu bifwaninwe kulemununwa?