Kunekenya Bikoleja Bidi mu Busapudi bwa ku Njibo ne Njibo

“Twakankamene ne kukankamana mudi Leza wetu kwisamba nenu myanda-miyampe ya Leza, mu bulwi bwa ntanda ne ntanda.”—1 TES. 2:2.

1. I bikoleja’ka byātene Yelemia, ne wānekenye’byo namani?

 YELEMIA i muntu monka motwikadile batwe. Yehova pa kumutuma akengile bu “mupolofeto wa ku mizo,” wādidile amba: “A Mfumwetu Leza! Talapo bidi, nkikōkejapo kwisamba: mwanda ne mwanuke.” Inoko, pa kukulupila mudi Yehova wāitabije uno mwingilo. (Yel. 1:4-10) Mu bula bwa myaka 40 ne kupita, Yelemia wātenwe na buñumauma, wāpelwa, wāpunikwa, ne kusanshijibwa ku ngitu. (Yel. 20:1, 2) Kyaba kimo wāsakile ne kuleka’byo. Ino, wāendelele na kusapula musapu mweni ku bantu bavule ba mityima myūmu. Yelemia wāvuije na bukwashi bwa Leza byobya byakādipo ubwanya kulonga na bukomo bwandi.—Tanga Yelemia 20:7-9.

2, 3. I muswelo’ka utanwa bengidi ba Leza dyalelo na bikoleja na byatene Yelemia?

² Bengidi ba Leza bavule dyalelo badi pamo bwa Yelemia. Pobela milafwe ku busapudi bwa ku njibo ne njibo, bamo balañanga  amba: ‘Kino i kintu nkyokyadipo nanga’mba mbwanya’kyo.’ Ino, byotuyukile amba kusapula myanda miyampe i kiswa-mutyima kya Yehova, o mwanda ketwikalangapo na moyo wa kusapula bininge. Nansha namino, batwe bavule, tutanwanga kyaba kimo na bikoleja bilengeja kusapula kwikale kukomo. Kunena na bubine, kushilula kusapula ku njibo ne njibo ne kwendelela na busapudi kutūla ne ku mfulo kekupēlangapo, ehe.—Mat. 24:13.

³ Bikekala namani shi wifundanga Bible na Batumoni ba Yehova, ino kitatyi kimo utanwa ne ku kupwila, ino wikaka kusapula ku njibo ne njibo? Kadi bikekala namani shi wi Kamoni mubatyijibwe, ino umona’mba i bikomo kusapula ku njibo ne njibo nansha byodi mukomo nkē? Kulupila amba bantu ba miswelo yonso banekenyanga bikoleja mu busapudi bwa ku njibo ne njibo. Na bukwashi bwa Yehova, nobe ubwanya.

Ufwaninwe Kukankamana

4. I bika byākweshe mutumibwa Polo esambe myanda miyampe pampikwa moyo?

⁴ Ujingulwile amba mwingilo wingilwa ntanda yonso ufikidilanga na bukwashi bwa mushipiditu wa Leza, ke na bukomopo nansha tunangu twa bantu. (Zek. 4:6) Kino ye mokikadile ne ku mwingilo wa Mwine Kidishitu umo ne umo. (2 Kod. 4:7) Tala kimfwa kya mutumibwa Polo. Pa kuvuluka kitatyi kyobebasuswile, aye ne balunda nandi bamishonele kudi balwana, wāsonekele amba: “Pa kupwa kumonamona byamalwa, ne kulongwa bibibibi bya bumvu monka mu Fidipai, . . . twakankamene ne kukankamana mudi Leza wetu kwisamba nenu myanda-miyampe ya Leza, mu bulwi bwa ntanda ne ntanda.” (1 Tes. 2:2; Bil. 16:22-24) Padi tumonanga amba i bikomo kulanga’mba musapudi mupyasakane mwikadile Polo ubwanya kulwa pa kusapula. Polo nandi pamo bwa batwe, wādi ufwaninwe kwiubija mudi Yehova pa kwisamba myanda miyampe pampikwa moyo. (Tanga Efisesa 6:18-20.) I muswelo’ka otukeula kimfwa kya Polo?

5. Lelo i muswelo’ka umo ukokeja kwitukwasha tusapule pampikwa moyo?

⁵ Muswelo umo otukokeja kwitukwasha tusapule pampikwa moyo i kulombela. Kaka umo pania wānene amba: “Nombelanga mwanda wa nesambe na kikulupiji, nombelanga mwanda wa ntenge mityima ya bantu, kadi nombelanga mwanda wa ntane nsangaji mu mwingilo. Le kadi i mwingilo wa Yehova, ke wetupo, o mwanda ketwingila’opo pampikwa bukwashi bwandi.” (1 Tes. 5:17) Batwe bonso tufwaninwe kulomba nyeke mushipiditu sandu wa Leza, mwa kusapwila kwampikwa moyo.—Luka 11:9-13.

6, 7. (a) I kimonwa’ka kyāmwene Ezekyele ne kishintulula namani? (b) I bufundiji’ka bumwena bengidi ba Leza dyalelo ku kimonwa kya Ezekyele?

⁶ Mukanda wa Ezekyele usokola kintu kikwabo kibwanya kwitukwasha tusapule pampikwa moyo. Mu kimonwa kimo, Yehova wāpele Ezekyele muvungo mwandike munda ne panja “madilo a kumutyima, ne madilo, ne malwa mene,” kadi wamunena adye’o amba: “A mwana muntu, dīsha difu dyobe, uyuje mila yobe ne muvungo uno’u o nakupa.” Le kino kimonwa kishintulula namani? Ezekyele wādi ufwaninwe kudya musapu waādi unenwe kusapula. Wāikele bwa kipindi kya ku ngitu yandi, nkulwe ya mwiimvwanino wandi. Mupolofeto usekununa’mba: “Ebiyampe ami nadya’o, ino mu kyakanwa kyami wādi utobala’nka bwa buki.” Kusapwila bantu musapu wa Leza kwātobadile Ezekyele pamo bwa buki. Wādi umwene amba kwimanina Yehova ne kuvuija mwingilo waāmupele i dyese dikatampe, nansha byo byādi bilomba kusapula uno musapu mukomo ku bantu ba mityima myūmu.—Tanga Ezekyele 2:8–3:4, 7-9.

⁷ Kino kimonwa kidi na bufundiji bwa kamweno ku bantu ba Leza dyalelo. Netu tupelwe musapu mukomo wa kusapwila bantu bampikwa kusepelela nyeke bukomo botulonga. Pa kusaka twendelela kumona mwingilo wa Bwine Kidishitu bu dyese ditupele Leza, tufwaninwe kudya senene ku mushipiditu. Bibidiji bya kwifunda na dimodimo kadi bya kūlukūlu, kebikokejapo kwitukwasha twimvwanije  Kinenwa kya Leza ne pa mfulo. Le wabulwa’po nobe kwikala na kibidiji kya kwifunda kwa pa kasuku ne kutanga Bible kitatyi kyonso? Kadi wabulwa’po ne kulangulukila pa byotanga?—Mit. 1:2, 3.

Mwa Kushilwila Mīsambo ya mu Bible

8. I musapwilo’ka umo ukwashanga basapudi ba bulopwe bashilule mīsambo ya mu Bible mu mwingilo wa ku njibo ne njibo?

⁸ Kwimona musunsa mubajinji na mwinē njibo kyo kintu kikomene basapudi bavule mu mwingilo wa ku njibo ne njibo. I bine, mu myaba imo i bikomo kushilula mīsambo. Basapudi bamo bamonanga’mba pa kushilula kwisamba na bantu ku njibo, i biyampe kutonga tubishima twa kushilula nato nansha kupa mwinē njibo trakte, na mokilombwedilwe mu kapango kadi mu kino kishinte. Mutwe wa mwanda wa trakte ne bifwatulo bya misombelo bitobala bikokeja kusangaja mwinē njibo ne kwitupa mukenga wa kulombola kyotwiidile nansha kumwipangula kipangujo. Muswelo mukwabo i wa kulombola mwinē njibo matrakte asatu nansha aná meshileshile ne kumunena atonge’po amusangaja. Bine kitungo kyetu ke’nkapo kupāna matrakte nansha kulombola’o ku kibelo ne kibelo, ino i kushilula mīsambo ya mu Bible itutwala tushilule bifundwa bya Bible.

9. Mwanda waka kwiteakanya senene kudi na mvubu?

 ⁹ Nansha shi tudi na musapwilo o-onso, kwiteakanya senene ko kuketukwasha tusapule ku njibo ne njibo na buzanzamuke ne kutuyuka mpika. Tutu umo pania wānene amba: “Ngikalanga na nsangaji shi ne mwiteakanye senene. Nkimba’nka wa kusapwila.” Tutu pania mukwabo unena’mba, “Shi napu kuyuka myanda idi mu bitabo byankapāna, ngikalanga nkimba’nka wa kupa’byo.” Nansha kupituluka mundamunda byotusaka kukanena byokudi kwa kamweno, ino bavule i bamone amba i kipite buya kupituluka’mo na kawi mbilambila. Kulonga namino kwibakwasha bape Yehova bilumbuluke byobadi nabyo.—Kol. 3:23; 2 Tem. 2:15.

10. I bika bikalongwa pa kusaka’mba kupwila kwa kwenda mu busapudi kwikale kwa kamwene kadi kufike’po?

¹⁰ Kupwila kwa mushike kwa kwenda mu busapudi kulundilanga’ko bwino ne nsangaji mu busapudi bwa ku njibo ne njibo. Shi kisonekwa kya difuku kikwatañene na mwingilo wa busapudi, i biyampe kutanga’kyo ne kwisambila’po mu kīpi. Inoko, tutu wendeja kupwila kwa kwenda mu busapudi ufwaninwe kuleya’ko kitatyi kya kwisambila pa musapwilo upēla ne kulonga kya kumwena’ko kikwatañene na mwaba nansha kubandaula myanda mikwabo ikengidijibwa mu busapudi difuku’dya. Kino kikakwasha boba bonso bakatanwa’ko babwanye kupāna bukamoni bufike’po. Shi bakulumpe ne boba bendeja kuno kupwila bekale beteakanya senene, nankyo bakendeja ne kufudija kuno kupwila pa kitatyi kitungilwe.—Loma 12:8.

Mvubu ya Kuteja

11, 12. Kuteja na lusa kuketukwasha namani tutenge mityima ya bantu na myanda miyampe? Leta bimfwa.

¹¹ Kintu kitukwasha tushilule mīsambo ya Bible ne kutenga mityima ya bantu mu busapudi, ke’nkapo kwiteakanya senene, ino i ne kuta bantu mutyima. Muswelo umo wa kuta bantu mutyima i kwibateja. Mutadi umo wendakana wānene amba: “Kutūkija mutyima ne kuteja bantu na mutyima umo kudi na bukomo bukoka bantu ne ko kwine kwibata mutyima mu muswelo wa kutendelwa.” Kuteja mutyima na lusa lo lufungulo lwitushitwila bidi mu mutyima wa muntu, monka mulombwela mwanda ulonda’ko.

¹² Mu mukanda walupwilwe mu julunale Le Progrès, wa Saint-Étienne mu France, Lolo umo walombwele’mo bantu babidi baile kukokola ku yandi njibo kinondanonda na kufwilwa mwana mwana-mukaji wa myeji isatu. Unena’mba: “Nebayukile’tu kala amba i Batumoni ba Yehova. Nadi na mutyima wa kwibapanga bya bulēme, ino namona boloshile yobadi bapāna. Yadi inenena pa kine kilekele’ko Leza masusu. Nebatweja na mulangwe wa kupela milangwe yabo. . . . Twashikete na Batumoni’ba kintu kya minite 30. Bauntejeje na lusa lukatampe, ne pa kunshiya, neivwana biyampe mpata, o mwanda naitabije bāye kupempula dikwabo.” (Loma 12:15) Mwenda mafuku uno lolo waitabija kifundwa kya Bible. Kino kitulombola amba, byavulukile yewa lolo mu kwitana kubajinji, kebinenwapo bya bakaka’ba, ino i muswelo obadi bamwimvwana.

13. I muswelo’ka otukakwatañanya musapwilo wetu wa myanda miyampe na bantu botutana?

¹³ Potwimvwana na lusa, na bubine tulekanga bantu betulombole kine kyobasakilwa Bulopwe. Kino kitukwashanga tumone mwa kwisambila nabo myanda miyampe. Padi nobe kodi muyuke amba basapudi bayukile’byo i boba bayukile kuteja. (Nk. 20:5) Batanga bantu mutyima bya binebine, ponso pobetana nabo mu mwingilo. Kebalembangapo enka majina ne maadelese abo, ino i ne bisakibwa byabo ne bintu byobatele’ko mutyima. Shi muntu webalombola kintu kyatele’ko mutyima, bakaloñanga bukimbi ne kujoka bukidi kumushintulwila’byo. Pamo bwa mutumibwa Polo, nabo bakwatañanya musapwilo wabo wa musapu wa Bulopwe na bantu bobatana. (Tanga 1 Kodinda 9:19-23.) Kuta bantu mutyima bya binebine uno muswelo kwibakokelanga ku myanda miyampe, kadi kwikalanga  bu kilomboji kya “mutyima wa lusa lwa Leza wetu.”—Luka 1:78.

Kwikala na Mumweno Muyampe

14. I muswelo’ka otukalombola ngikadila ya Yehova, potwingila mwingilo wetu?

¹⁴ Yehova witukwete na mutyika pa kwitupa bwanapabo bwa kwitongela. Nansha byadi Leza Mwine bukomo bonso, kaningilangapo bantu bamwingidile ino wibakokelanga kwadi na buswe, ne kwesela boba betabija mpango yandi ya kutendelwa. (Loma 2:4) Byotudi bengidi bandi, tufwaninwe kusapula myanda miyampe mu muswelo upeja Leza wetu wa lusa bulēme kitatyi kyonso kyotupāna bukamoni. (2 Kod. 5:20, 21; 6:3-6) Ku mfulo, tukimbanga kumona biyampe bantu botutana mu mwaba wetu. I bika biketukwasha tunekenye uno mwanda?

15. (a) Lelo Yesu wāsoñenye balondi bandi kulonga bika shi bantu abapele musapu? (b) I bika biketukwasha twendelele kutana boba bafwaninwe?

¹⁵ Yesu wālombwele balondi bandi baleke kuzumbija mutyima bipitepite shi bantu bamo abapele musapu ino abo bendelele’tu na kukimba boba bafwaninwe. (Tanga Mateo 10:11-15.) Kwitungila bitungo bipēla, byotubwanya kufikila’po kuketukwasha. Tutu umo wedingakenye na musokodi. Ulanga’nka kulanga’mba “Poso nsokole padi nsahabu dyalelo.” Tutu mukwabo i mwitungile kitungo kya “kusokola yenga ne yenga muntu usangela musapu ne kumujokela’ko mwanda wa kusamuna mu mafuku matyetye kyaka kya muntu’wa.” Basapudi bakwabo nabo i beelele’ko ponso po bikokejika kutangila mwinē njibo yense kisonekwa. Le nobe i kitungo’ka kipotoloke kyobwanya kwitungila?

16. Le i bubinga’ka bwitulengeja twendelele na kusapula?

¹⁶ Kusapula senene ku njibo ne njibo kekulondangapo mungya mwitabilo wa bantu badi mu mwaba wetu. I bine, mwingilo wa kusapula udi na kamweno pa kupandija bantu ba mityima myoloke, ino kadi udi na kamweno ne mu myanda mikwabo ya mvubu. Mwingilo wa Bwine Kidishitu witupanga mukenga wa kulombola motuswidile Yehova. (1 Yoa. 5:3) Witukwashanga tuleke kulambikwa mashi. (Bil. 20:26, 27) Udyumunanga bantu bampikwa bwine Leza amba “kitatyi kya kidye [kya Leza] kibafika.” (Kus. 14:6, 7) Kutentekela pa bino byonso, dijina dya Yehova dikatendelwa pano pa ntanda ponso kupityila konka ku busapudi bwa myanda miyampe. (Mit. 113:3) Nanshi, bemvwane, kebemvwene, batwe tufwaninwe kwendelela kusalaja musapu wa Bulopwe. Na bubine, Yehova unengelelwe bukomo bonso botulonga bwa kusapula myanda miyampe.—Loma. 10:13-15.

17. Lelo bantu basa kuyuka bika?

¹⁷ Nansha bavule byo bafutulula mwingilo wetu wa busapudi, panopano ponka basa kumona mvubu yao. (Mat. 24:37-39) Yehova wākulupije Ezekyele amba pakafikidila butyibi bwasapula, njibo mitomboke ya Isalela ‘ikayuka’mba mupolofeto wadi umbukata mwayo.’ (Ezek. 2:5) Mo monka ne pasa kufikidija Leza butyibi bwandi pa ino ngikadilo ya bintu, bantu basa kuyuka’mba musapu wadi usapula Batumoni ba Yehova mu bikwe ne ku mobo ku mobo i mutambe kudi Yehova, Leza wa bine, ne amba ye Aye Mwine wadi utumine bano Batumoni. Bine i dyesepo kashā kwityilwa pa dijina dyandi ne kusapula musapu wandi mu kino kitatyi kya kamfulankonko! Pano twendelelei kunekenya na bukomo bwa Yehova, bikoleja bidi mu busapudi bwa ku njibo ne njibo.

Usa Kulondolola Namani?

• Le i muswelo’ka otukokeja kusapula pampikwa moyo?

• I bika biketukwasha tushilule mīsambo ya Bible potusapula ku njibo ne njibo?

• Le i muswelo’ka otukata bantu mutyima bya binebine?

• Lelo i bika biketukwasha twikale na mumweno muyampe ku bantu botutana mu mwaba wetu?

[Bipangujo bya Kifundwa]

[Kapango/Kifwatulo pa paje 17]

Muswelo Umo wa Kushilula Mīsambo ya mu Bible

Mwa kushilwila:

◼ Shi ubapu kwimuna mwinē njibo, mutambike trakte ne kunena’mba, “Kyonaila kukunangila dyalelo i mwanda wa kukulombola mulangwe umo ukankamika udi mu kino kishinte kya mvubu.”

◼ Nansha ukokeja kupāna trakte ne kunena’mba, “Nakunangila dyalelo bya bukidikidi mwanda wa kuyuka byolanga pa uno mwanda.”

Shi waitabija trakte:

◼ Mwipangule pampikwa kwija kipangujo kipela kya kuloba tudi mu kanwa kimanine pa mutwe wa trakte.

◼ Teja na katentekeji mwanda wa wimvwane milangwe ya mwinē njibo. Mufwije’ko pa byaanena.

Pa kwendeleja mīsambo:

◼ Tanga ne kwisambila pa kisonekwa kimo nansha bivule, ne kukwatañanya musapwilo obe na bisakibwa bya muntu’wa ne bintu byatele’ko mutyima.

◼ Shi wasepelela, mupe dipepala ne kumulombola mwifundilwanga Bible shi bibwanika. Mulaije kukemona dikwabo.