Noa ne Dilobe—I Mwanda wa Bine, ke wa Kufwatakanyapo

LELO wabilanga ntanda milumbuluke—mwikele bantu mu ndoe abo bene na bene, ntanda yakubulwa’mo divita, bupolapola, ne kasusu kene mpika? Shi wabilanga’yo, ukakankamikwa na ino nsekununi ya mānga yoyukile kala. I nsekununi ya Noa, muntu muyampe mpata, wāubakile safini mwanda wa kwipandija aye ne kyandi kisaka ku dilobe dya ntanda yonso dyākubije babi.

Kudi mānga mityetye kete iyukilwe konso konso. Nsekununi ya byāfikile Noa itanwa mu mukanda wa Ngalwilo, shapita 6 kufika ku wa 9, kadi i minenwe ne mu Koran ne mu ñano mivulevule ya bantu ba pi na pi. Lelo bine Dilobe dyāikele’ko, nansha i lufumo bitupu mwanda wa kukankamika bantu balonge biyampe? Befundi bya teoloji ne ba sianse i banenene’po bininge mu bula bwa tutwa twa myaka. Ino Bible, Kinenwa kya Leza, akyo i kitōkeje uno mwanda patōka amba i wa bine, ke wa kufwatakanyapo. Tala:

Nsekununi ya Ngalwilo itulombola mwaka, kweji, ne difuku dine dyāshilwile Dilobe, kitatyi ne kifuko pāshikile safini, ne kitatyi kyāūmine mema pano pa ntanda. Ne myanda itala safini nayo i mipotoloke—mupungilo, bipimo, bingidilwa byāūbakile nabyo. Ino mfumo ayo keishintululangapo bino byonso.

Nsekununi ya misuku ibidi ya mu Bible ibingija amba Noa i muntu wādi’ko bine. (1 Bilongwa 1:4; Luka 3:36) Ba Ezela ne Luka, bādi bakimbi ba binebine ne bābungile pamo ino nsekununi ya misuku. Luka i mulombole musuku wa Yesu Kidishitu kubadila’mo ne Noa.

Mupolofeto Isaya ne Ezekyele, mutumibwa Polo ne Petelo, bano bonso batelele kwikala’ko kwa Noa ne Dilobe.—Isaya 54:9; Ezekyele 14:14, 20; Bahebelu 11:7; 1 Petelo 3:19, 20; 2 Petelo 2:5.

Yesu Kidishitu nandi wātelele Dilobe pa kunena’mba: “Monka mo kyadi kīkadile mu myaka ya Noa, ino ne mu myaka ya Mwanā muntu kikēkalanga’nka nabya. Badi badya, batoma, bakusonga na kusonga, bakusongwa na kusongwa kutūla ku difuku dyātwelele Noa mu safini ne dilobe dyafikile kwibalobeja bonsololo!” (Luka 17:26, 27) Shi Dilobe kekyādi’kopo, nankyo binenwa bya Yesu bya amba “mu myaka ya Mwanā” byādi byakubulwa buluji.

Mutumibwa Petelo wālaile amba kukayanga “bakibengo” ba kupatakanya binena Bible. Wāsonekele amba: “Monka mupityila bilokoloko bya abo bene,” “bavulaminwe’kyo ne mutyima ponka’mba, . . . ko konka kwaonekele ne yoya ntanda yadiko’ya [ya Noa] pa kulobelwa’yo mu mema.” Lelo netu tufwaninwe ‘kuvulaminwa’kyo’? Leka, leka, leka! Petelo wendelela na kunena’mba: “Madiulu akidipo ne pano, ne ntanda mīne kumo, . . . nabyo i bibīkilwe mudilo, bilaminwe ku difuku dya kidye kya konakanya bantu bakubulwa bwine-Leza.”—2 Petelo 3:3-7.

Pano napo, Leza usa konakanya babi, kadi monka kukekala ne ba kupanda. Shi twiule būmi bwādi na Noa tukokeja kubadilwa mu boloke bakapandijibwa ne kutwela mu ntanda miyampe.