Ñeni Yotuboila Kudi Yesu

Mwa Kwikadila na Bakwetu

Mwanda waka tufwaninwe kwikala biyampe na bantu?

Lelo wikalanga biyampe na bantu nansha shi abo kebadipo nobe biyampe? Shi tusaka kwiula Yesu, tufwaninwe kwikala biyampe nansha ke na boba betushikilwe bene. Yesu wānene amba: “Shi kadi mwikale kusanswa bemusanshilwe, nankyo lelo po mukadilapo i paka le? ke-bantu babipya-mambo nabo baloña’nka nenki. . . . Ino mwikale kusanswa bemushikidilwe . . . , kadi bānwe nenu mukēkala bāna ba yewa Wamūlumwine, mwanda aye i wa lusa lwa ku bonso, ne bakubulwa kumufwijako, ne ku babi bēne.”—Luka 6:32-36; 10:25-37.

Mwanda waka tufwaninwe kwikala na lulekelo?

Kitatyi kyotuluba, tusakanga Leza etulekele. Yesu wāfundije amba i biyampe kulomba Leza etulekele. (Mateo 6:12) Inoko, Yesu wānene kadi amba Leza uketulekela enka shi netu tulekela bakwetu. Wānene amba: “Shi mulekele bantu byo bemujilula, nankyo nenu Shenu wa mūlu ukemulekela. Ino wivwane kemulekele bantu byo bemujilula, nabya nenu nankyo Shenu  wa mūlu nandi kakemulekelapo byo mujilula, ehe.”—Mateo 6:14, 15.

Lelo bisaka bibwanya kwikala na nsangaji namani?

Nansha Yesu byakādipo musonge, tukokeja kuboila ñeni mivule kwadi pa kwikala na būmi bwa nsangaji mu kisaka. I mwitushile kyelekejo kya kwiula mu binenwa ne mu bilongwa. Tubandaulei’ko bidi myanda isatu ilonda’ko’i:

1. Mulume ufwaninwe kuswa mukaji pamo bwa ngitu yandi. Yesu i mushile balume kimfwa. Wānene bandi bana ba bwanga amba: “Mwanda mupya uno o nemulaya na’mba: ‘Mwisanswei banwe bene na bene.’” Muswelo’ka? Aye amba: “Monka mo nemusanshilwe ami.” (Yoano 13:34, Myanda Miyampe ku Bonso) Bible panena balume kulonda uno musoñanya, unena’mba: “Balume nenu sanswai bakaji benu, monka musanshilwe Kidishitu kipwilo, wēpanine ponka pa akyo; e monka mufwaninwe ne balume nabo kusanswa bakaji babo abo bene pamo bwa ngitu ya abo bene. Wakusanswa mukaji wisanshilwe aye mwine; ke-kuntu kekudipo muntu wa kwishikwa ngitu ya aye mwine, nansha umo, wīdisha biyampe, ne kwiīlela senene, shē, pamo ponka mulongela Kidishitu ku kipwilo.”—Efisesa 5:25, 28, 29.

2. Ba mulume ne mukaji bafwaninwe kwilamata abo bene. Kulala na muntu panja pa busongi i bubi kudi Leza ne konakanyanga bisaka. Yesu wānene amba: “Lelo kemwatangile . . . amba, po pa mwanda wa kulonga mwana-mulume ukashia shandi, ne inandi mwine, walamatyididila mukajandi, kabidi bubidi bwabo bakēkalanga ke mubidi umo. Nanshi pano ke bakidi ne bubidi bwine ke mubidi’tu umo. I binebine kadi, kyokya kyasambakanya Leza pamo kokakolwa kwikikalañanya, nansha wi muntu ka, nansha wi muntu ka. . . . Nami nemunena’mba: Yewa wakapanga mukajandi kwa kubulwa mwanda wa busekese, kakasonge mukwabo, nabya wapi mambo a makoji.”—Mateo 19:4-9.

3. Bana bafwaninwe kukōkela bambutwile babo. Nansha byādi Yesu mubwaninine na bambutwile bambulwa kubwaninina, wādi mwana mukōkele kobadi. Pādi Yesu na myaka 12, Bible unena’mba: “Watūkile nabo [bambutwile], wafikile ku Nazala, ino wadi wibakōkelela.”—Luka 2:51; Efisesa 6:1-3.

Mwanda waka tufwaninwe kulonda ino misoñanya?

Yesu wānene pa bitala bufundiji bwaāfundije bandi bana ba bwanga amba: “Wivwane muyūke byabyo ne kwibilonga monka, nabya mwi badyese ne dyesepo.” (Yoano 13:17) Tufwaninwe kulonda madingi a Yesu a mwa kwikadila na bakwetu shi tusaka kwikala Bene Kidishitu ba bine. Wānene amba: “Po ponka po bakemuyūkila bu-bāna-bami-babwanga ponka pa kwisanswa mo mwikadile bānwe bene.”—Yoano 13:35.

Shi usaka kuyukila’ko bikwabo, tala dibuku Lelo I Bika Bine Bifundija Bible?, * shapita 14.

[Kunshi kwa dyani]

[Kifwatulo pa paje 18]

Lukindi lwa Yesu lwa mwana wa kisūpa lwitufundija mvubu ya kwikadila biyampe na bantu ne kwikala na lulekelo.—Luka 15:11-32

[Kifwatulo pa paje 19]

Ba mulume ne mukaji bafwaninwe kwilamata abo bene