Lelo Ubadikilanga Kulēmeka Bakwenu?
Lelo Ubadikilanga Kulēmeka Bakwenu?
“Tabukidilai kwilemeka banwe bene na bene.”—LOMA 12:10, MB.
1. I kika kekikidipo mu bifuko bivule pano pa ntanda?
MU BIFUKO bimo, banuke badi na kibidiji kya kulēmeka batame na kwibafukatyila na bulēme. Mu uno muswelo, kebamwekangapo bu balampe kupita batame. Kadi mu bino bifuko, i kubulwa bulēme shi mwanuke wela nyuma kudi mutame. Nansha shi bulēme bulombolwanga mu miswelo mivule mu bishi bishileshile, bulēme bwa uno muswelo bwituvuluja Bijila bya Mosesa. Mu bino bijila mwādi mubadilwa ne kino: “Ukamutalukila [na bulēme] wa mvwi ku mutwe ne kukafwa kipala mpala ya mununu.” (Levi 19:32) I kya bulanda, mwanda mu bifuko bivule kemukidipo bulēme bwa kulēmeka bakwabo. Bine, bulēme bubasakana mu ano etu mafuku.
2. Kinenwa kya Leza kitusoñanya tulēmeke bāni?
2 Kinenwa kya Leza kilombola patōka mvubu ya kulēmeka bantu. Kitusoñanya tulēmeke Yehova ne Yesu. (Yoa. 5:23) Kadi twi basoñanibwe kulēmeka ba mu kisaka kyetu ne banabetu betabije ne boba badi panja pa kipwilo. (Loma 12:10; Ef. 6:1, 2; 1 Pet. 2:17) Lelo i mu miswelo’ka imoimo motukokeja kulombola’mba tulēmekele Yehova? I muswelo’ka otukokeja kulēmeka pakatampe batutu ne bakaka Bene Kidishitu? Tubandaulei bino bipangujo ne bikwabo bikwatañene nabyo.
Lēmeka Yehova ne Dyandi Dijina
3. Lelo i muswelo’ka umo wa mvubu wa kulēmeka Yehova?
3 Muswelo umo wa mvubu wa kulēmeka Yehova i kulēmeka mobyendele dijina dyandi. Ne kadi, twi bantu “ba dijina dyandi.” (Bil. 15:14) I bulēme bukatampe kotudi kutelelwa pa dijina dya Yehova, Leza mwine bukomo bonso. Mupolofeto Mika wānene amba: “Bantu bonsololo bakananga, enselele mu dijina dya leza wandi, enselele mu dijina dya leza wandi, kabidi batwe netu tukananga mu dijina dya Yehova Leza wetu nyeke ne nyeke-ke.” (Mika 4:5) ‘Tunañanga mu dijina dya Yehova’ na kulonga bukomo bwa kwiendeja difuku ne difuku mungya dijina dyotuselele. Enka na mwāvulwijije Polo Bene Kidishitu ba mu Loma, shi ketwiendejepo mungya myanda miyampe yotusapula, dijina dya Leza ‘dikatukibwa bya malwa,’ ne kufutululwa.—Loma 2:21-24.
4. Le i muswelo’ka omwene dyese dya kusapula bukamoni butala padi Yehova?
4 Kadi tulēmekanga Yehova potutwala bukamoni ku bantu. Pa kala, Yehova wānene Bene Isalela bekale bandi batumoni, ino abo bakomenwa kuvuija owa mwingilo. (Is. 43:1-12) Bādi bavundamina nyeke Yehova ne “kusomba Mwine Mupandulwemo wa Isalela.” (Mit. 78:40, 41) O mwanda, Isalela wājimije kipwano na Yehova. Batwe netu dyalelo, tufwijanga’ko pa mwanda wa dyese dyotupelwe dya kusapula bukamoni butala padi Yehova ne kuyukanya dijina dyandi. Tusapulanga mwanda tumusenswe ne tusakanga dijina dyandi ditumbijibwe. Le tukaleka’byo namani kusapula batwe koku tuyukile bubinebine butala padi Tata wetu wa mūlu ne pa mpango yandi? Twiivwananga na mwēivwanine mutumibwa Polo paānene amba: “Kūminwamo ko kwami; yō! i malwa ami shi nkisapwile myanda-miyampe!”—1 Kod. 9:16.
5. Kwitabija Yehova kukwatañene muswelo’ka na kumulēmeka?
5 Davida mulembi wa mitōto wānene amba: “Boba bakuyūkile dijina dyobe bakakukulupilanga; ke-wi-muntu, abe Yehova, kwebēlelepo bakukukimba, mhm.” (Mit. 9:10) Shi bine tuyukile Yehova ne kulēmeka buluji bwa dijina dyandi, nabya tukamukulupila na mwādi mumukulupidile bengidi bandi ba kikōkeji pa kala. Kwikala na kino kikulupiji ne lwitabijo mudi Yehova nao i muswelo mukwabo wa kumulēmeka. Tala Kinenwa kya Leza mokikwatañenya kukulupila Leza na kumulēmeka. Yehova wāipangwile Mosesa pālekele Isalela wa kala kukulupila mwadi, amba: “Lelo i ku mwaka ka o bakaleka kumfutulula? Le i ku mwaka ka kadi o bakangitabijapo, nansha byobya biyukeno byonso byo nalongele mubukata mwabo?” (Umb. 14:11) Ne kumulēmeka nako mo monka. Tulombolanga’mba tulēmekele Yehova potumukulupila amba usa kwitukinga ne kwitukwatakanya mu matompo.
6. I kika kitutonona tulēmeke pakatampe Yehova?
6 Yesu wālombwele amba kulēmeka Yehova kufwaninwe kutamba ku mutyima. Yesu paādi unena na boba bādi batōta Leza na kajilwilo bitupu, wāpitulukile byānene Yehova amba: “Bano bantu bano bamfwenanga ne kyakanwa kyonka bandemeka ku milomo, ino mutyima wabo kulampe kwine na ami.” (Mat. 15:8) Kulēmeka Yehova bya bine kutambanga ku buswe butamba ku mutyima. (1 Yoa. 5:3) Kadi tuvulukanga mulao wa Yehova wa amba: “Boba bandemeka, nami nkebalemeka.”—1 Sam. 2:30.
Boba Betutangidile Balēmekanga Bakwabo
7. (a) Mwanda waka batutu bapelwe biselwa mu kipwilo bafwaninwe kulēmeka boba bobatala? (b) Lelo Polo wālēmekele namani banababo betabije?
7 Mutumibwa Polo wāsoñenye banababo betabije amba: “Kadi mu kwilemeka namo, tabukidilai kwilemeka banwe bene na bene.” (Loma 12:10, MB) Batutu bapelwe biselwa mu kipwilo bafwaninwe kuleta kimfwa—‘kutabukidila’—na kulēmeka boba bobatala. Mu uno mwanda, boba badi na madyese bafwaninwe kulonda kimfwa kya Polo. (Tanga 1 Tesalonika 2:7, 8.) Batutu ba mu bipwilo byādi bipempulwa na Polo bādi bayukile amba kakokejapo kwibanena balonge bintu byaketabijapo aye mwine kulonga. Polo wādi ulēmekele banababo betabije, o mwanda nabo bādi bamulēmekele. Pānenene Polo amba: “Nemwisashila mwikale kungelekeja,” tukulupile amba bavule bamwengelekeje mwanda wa kimfwa kyandi kiyampe.—1 Kod. 4:16.
8. (a) Lelo i mu muswelo’ka umo wālēmekele Yesu bandi bana ba bwanga? (b) Le batadi ba ano etu mafuku bakokeja kwiula kimfwa kya Yesu namani?
8 Muswelo mukwabo ulombola tutu upelwe biselwa amba ulēmekele boba batala i na kwibashintulwila bubinga bwa byalomba kulonga nansha bwa buludiki bwaebapa. Ukeula Yesu shi alonge namino. Kimfwa, Yesu pa kunena bandi bana ba bwanga balombe bengidi bavule batumwe mu mwangulo wēbalombwele ne mwanda waka. Wānene amba: “Byakwangula umbudimi i bivule bīne, nanshi bakuputuminamo i batyetye. I binebīne, lombelai bidi amba mwine byangulwa alundule bakuputumina mu byangulwa byandi.” (Mat. 9:37, 38) Mo monka, ne paānene bandi bana ba bwanga amba “endelelai na kukesha,” wēbalombwele ne bubinga. Wānene amba: “Mwanda kemuyukilepo difuku dine dīya Mfumwenu.” (Mat. 24:42, NW) Divule dine, Yesu wādi ulombola bandi bana ba bwanga ke enkapo bya kulonga, ino i ne mwanda waka bādi bafwaninwe kulonga’byo. Ye mwāebalēmekele namino. Bine, kino i kimfwa kiyampe kifwaninwe kulonda batadi Bene Kidishitu!
Lēmeka Kipwilo kya Yehova ne Bwendeji Bwakyo
9. Potulēmeka kipwilo kya Bwine Kidishitu kya ntanda yonso i āni otulēmeka? Shintulula.
9 Shi tusaka kulēmeka Yehova, tufwaninwe kulēmeka kipwilo kya Bwine Kidishitu kya ntanda yonso, pamo ne bantunguluji bakyo. Kitatyi kyotulonda madingi a mu Bisonekwa etupa kabumbo ka umpika wa binebine, tulombolanga’mba tulēmekele mpangiko ya Yehova. Mu kipwilo kya Bwine Kidishitu kya myaka katwa kabajinji, mutumibwa Yoano wāsakile kukankaja boba kebādipo balēmeka batutu batongwe. (Tanga 3 Yoano 9-11.) Binenwa bya Yoano bilombola’mba kebādipo bafutulula enka batadi kete ino i ne bufundiji ne bwendeji bwabo bwine kumo. Na bya dyese, Bene Kidishitu bavule kebādipo uno muswelo. Kitatyi kyādi batumibwa bōmi, i bimweke amba banabetu bādi balēmekele bikatampe boba bādi bebatangidile.—Fid. 2:12.
10, 11. Shintulula kukwatañana na Bisonekwa mwanda waka i kyendele’mo bamo bekale na lupusa mu kipwilo kya Bwine Kidishitu.
10 Bamo balañanga’mba pānene Yesu bandi bana ba bwanga amba “banwe bonso mudi bana na bana,” kekufwaninwepo kwikala bapelwe lupusa mu kipwilo kya Bwine Kidishitu. (Mat. 23:8) Inoko, Bisonekwa bya Kihebelu ne bya Kingidiki i bitele bimfwa bya bantu bāpelwe lupusa na Leza. Nsekununi itala bakulutuba, batyibi, ne balopwe mu Bahebelu ba kala i bukamoni bulombola’mba Yehova wendejanga kupityila ku bantu batongele. Bantu pobādi babulwa bulēme bwendele’mo ku bano bantu batongelwe, Yehova wādi wibapa mfuto.—2 Bal. 1:2-17; 2:19, 23, 24.
11 Ne Bene Kidishitu ba mu myaka katwa kabajinji nabo bādi balēmekele lupusa lwa batumibwa. (Bil. 2:42) Kimfwa, Polo wāpele banababo bwendeji. (1 Kod. 16:1; 1 Tes. 4:2) Inoko, nandi wāitabije kulonda buludiki bwa boba bādi bamwendeja. (Bil. 15:22; Ngat. 2:9, 10) Bine, Polo wādi na mumweno muyampe pa lupusa mu kipwilo.
12. I ñeni’ka ibidi yotuboila ku bimfwa bya mu Bible mu mwanda utala lupusa?
12 Kudi ñeni ibidi yotuboila’ko. Dibajinji, i kikwatañane na Bisonekwa “umpika wa binebine, udi na manwa” kupityila ku Kitango Kyendeji ape bana-balume bamo biselwa, kadi kudi bakwabo badi na lupusa pa bana-balume batongwe. (Mat. 24:45-47; 1 Pet. 5:1-3) Dya bubidi, batwe bonso, kubadila’mo ne bana balume batongwe, tufwaninwe kulēmeka boba badi na lupusa potudi. Penepa, i miswelo’ka imoimo mimweke yotukokeja kulēmeka boba bapelwe biselwa bya butadi mu kipwilo kya Bwine Kidishitu kya ntanda yonso?
Lēmeka Batadi Bendakana
13. I muswelo’ka otukalēmeka bantunguluji ba kipwilo kya Bwine Kidishitu?
13 Polo wānene amba: “Bānwe bāna betu, tubemwisashilapo, lemekai boba baputumina mu mīngilo umbukata mwenu, bakwimulelela mudi Mfumwetu, ne kwimudingila madingi; ne kwibatumbika pene pakatampe mu lusa, pa mwanda wa mīngilo yabo. Kadi pwanai ne bānwe bene na bene.” (1 Tes. 5:12, 13) Batadi bendakana bine babadilwa mu “boba baputumina mu mīngilo.” Nanshi, ‘twibalēmekei pakatampe pene.’ Muswelo umo wa kwibalēmeka i kuteja na mutyima umo pobetudingila ne kwitukankamika. Shi mutadi wakokela ñeni yetu pa bwendeji buleta kabumbo ka umpika, “ñeni mitūke mūlu” iketutonona twikale “ne kikōkeji.”—Yak. 3:17.
14. Kipwilo kilombolanga namani amba kilēmekele batadi bendakana, ne kino kiletanga bika?
14 Le bikekala namani shi abetulombola kulonga bintu mu muswelo mwishile na otuloñanga’byo? Pano bulēme bulomba tuleke kupatanya’mba, “Kuno ketuloñangapo nankyo,” nansha amba “Shi ku bifuko bikwabo bikokejika ino kuno kwetu, kijila!” Ino, tufwaninwe kwikankila’ko kulonda bwendeji’bwa. Kuvuluka’mba kipwilo i kya Yehova ne Yesu ye Mutwe wakyo kuketukwasha tukōkele. Shi tutambula na nsangaji bwendeji bwitupa mutadi wendakana ne kwibulonda mu kipwilo, nabya tukalombola bulēme bwa binebine. Mutumibwa Polo wāfwijije’ko banababo ba mu Kodinda pa kukōkela kobākōkele na bulēme ku bwendeji bwēbapele Tetusa, mukulumpe mupempudi. (2 Kod. 7:13-16) Dyalelo, tukulupile amba kulonda na kampeja buludiki bwendeji bwa batadi bendakana kuletanga nsangaji mikatampe mu mwingilo wa busapudi.—Tanga 2 Kodinda 13:11.
“Lemekai Bantu Bonso”
15. Lelo i miswelo’ka imoimo yotukokeja kwilēmeka na banabetu betabije?
15 Polo wāsonekele amba: “Kokafutulula mukulumpe, ehe, umwisashila pamo bwa shobe; bansongwalume nabo pamo bwa bāna benu. Bāna-bakaji bakulumpe nabo pamo bwa bainobe; bansongwakaji nabo bwa bāna benu, ne mutyima onso tō. Lemeka bakaji-ba-bafu bafudilwe binebine.” (1 Tem. 5:1-3) Eyo, Kinenwa kya Leza kitusoñanya kulēmeka muntu ye-yense pa kipwilo. Ino bikekala namani shi ubepi myanda na tutu nansha kaka? Le kino kikakukankaja uleke kulēmeka mwanenu Mwine Kidishitu? Nansha ukasendulula mumweno obe ne kujingulula ngikadilo ya ku mushipiditu ya uno mwingidi wa Leza? Kutabukidila boba badi na lupusa bafwaninwe kulēmeka nyeke banababo—kebafwaninwepo nansha dimo ‘kusomanya bumfumwabo luombe.’ (1 Pet. 5:3) Bine, mu kipwilo kya Bwine Kidishitu, kiyukena ku buswe bwa binebine budi mubukata bwa bene badi’mo, tudi na mikenga ya kwilēmeka batwe bene na bene.—Tanga Yoano 13:34, 35.
16, 17. (a) Mwanda waka i kya mvubu kulēmeka boba botusapwila ne betulwa bene kumo? (b) Lelo i muswelo’ka otukokeja ‘kulēmeka bantu bonso’?
16 Bine, bulēme bwetu kebukadikilepo enka mu kipwilo, mhm. Polo wāsonekēle Bene Kidishitu ba mu abo mafuku amba: “Monka mo twakamwena mwakulongela, tulonge biyampe ku bakwetu bonso.” (Ngat. 6:10) Bine, kulonda uno musoñanya kubwanya kumweka bu kukomo shi mwingidi nobe nansha mukwenu wa ku masomo kadipo nobe biyampe. Mu bino bitatyi, tufwaninwe kuvuluka binenwa bya amba: “Kokijingwa mutyima pa mwanda wa balonga bibibibi.” (Mit. 37:1) Kulonda ano madingi kuketukwasha tulondolole na bulēme boba betulwa. Ne potudi mu busapudi napo mo monka, kwityepeja kuketukwasha tulondolole bonso “senene ne butuukanye ne kilemeko ponka.” (1 Pet. 3:15, MB) Nansha ke mumwekelo ne muvwadilo wetu nao ukokeja kulombola amba tulēmekele boba botusapwila.
17 Nanshi, twikale na banabetu betabije nansha na bambulwa kwitabija, twielelei’ko kulonda kino kidyumu: “Lemekai bantu bonso, sanswai banabenu betabije. Tyinai Leza, lemekai mulopwe.”—1 Pet. 2:17.
Usa Kulondolola Namani?
I muswelo’ka okokeja kulēmeka:
• Yehova?
• Bakulumpe pa kipwilo ne batadi bendakana?
• Mwanenu umo ne umo mu kipwilo?
• Boba bosapwila?
[Bipangujo bya Kifundwa]
[Kifwatulo pa paje 23]
Bene Kidishitu ba mu myaka katwa kabajinji bālēmekele butadi bwa kitango kyendeji
[Kifwatulo pa paje 24]
Bakulumpe ba mu matanda onso balēmekanga batadi bendakana, batongelwe na Kitango Kyendeji