Lelo I Ani Ubwanya Kuyuka bya Kumeso?

“Ami ne Leza . . . , Ufumika bya kungalwilo ne bya kumfulo, ne ku byaba bya kalakala bintu kebyalongelwepo.”—Isaya 46:9, 10.

MU INO ntanda ya tuvutakanya, babandaudi ba myanda ya politike, ya bya busunga, ne ngikadilo ya bantu befundanga mānga ne bilonga bantu mwanda wa kuyuka mukekadila bya kumeso. Bakwabo nabo, pa kukomenwa kuyuka bikebafikila kumeso, ke banyemena ku lubuko lwa malumba a ñenyenye nansha ku majende. Bantu ba uno muswelo batyumukwanga mutyima na bilupuka’ko. Le kebibwanikapo kuyuka byobya bikafikila ino ntanda, bisaka byetu, nansha muntu ne muntu? Ne kya mfulo, lelo kudi bine muntu ubwanya kuyuka bya kumeso?

Yehova, Leza Mwine Bukomo Bonso wālombwele bukomo bwandi bwa kulaya bya kumeso mu binenwa bitelelwe kūlu’ku byaālombwele mupolofeto Isaya. Leza wālaile kupityila kudi Isaya kukūlwa kwa Bene Isalela ba pa kala mu bupika bwa Bene Babiloni ne kujokejibwa mwanda wa kukōbakulula Yelusalema ne tempelo. Lelo buno bupolofeto bwālombwele mwine mobukafikidila? Kintu kya myaka 200 kumeso, Isaya wātelelele ne dijina dya mwine mushindañani wa Babiloni ukaya’ko, amba i Shilusa. Pakwabo napo, Isaya wālombwele kwampikwa kwitupa ne manwa mene akengidija Shilusa—a kulalulula Munonga wa Ufalete, mwine wādi ukingile kibundi. Wālaile’nka ne kulaya amba Shilusa ukatana binjilo bya kibundi bishitulwe, bikalengeja Shilusa ekale kushinda.—Isaya 44:24–45:7.

Muntu kadipo na bukomo pamo bwa Leza bwa kuyuka bya kumeso. Solomone, Mulopwe wa tunangu wāsonekele amba: “Koketumbijapo abe mwine bya dyakesha, mwanda kuyukilepo ne mo bukakila.” (Nkindi 27:1) Uno mwanda i wa bine ne pano pene. I kutupu muntu ubwanya kuyuka bikamutana mu kitatyi kya kumeso. Lelo Leza i mwishile na bantu mu bika? Aye uyukile ne pa mfulo kintu kyo-kyonso kyapangile, kubadila’mo ne ngikadila ne mifwatakanyo ya muntu mine. Shi Leza wasake, ubwanya kuyuka byobya bikalonga muntu ne muntu nansha mizo yonsololo. Kadi, udi na bukomo bwampikwa mpwilo bwa kwimika binkumenkume biya kumeso. Shi walaya bapolofeto bandi amba kintu kampanda kisa kulongeka, wiloñanga ke “wakukomeja kinenwa kya mwingidi wandi, ne kufikija kukala-ñeni kwa mikendi yandi.” (Isaya 44:26) Enka Yehova Leza kete ye ubwanya binebine kwisasula namino.

Isaya wāikele’ko myaka 700 ne musubu kumeso kwa kwiya kwa Yesu, Meshiasa. Isaya wānene bupolofeto butala kwiya kwa Meshiasa. Inoko, tamba mu myaka ya katwa ka 18 ne kwendelela kumeso, basantaudi ba Bible baikele kupatanya bubinebine bwa dibuku dya Isaya. Banene amba na bubine bupolofeto  bwa Isaya ke bwālailepo myanda ya kumeso, mwanda bwāsonekelwe ke mungya kala, mulembi kasoneka’tu myanda mipwe kupita kala. Lelo i amo? Mu mwaka wa 1947 mukanda wa Isaya wasokwelwe pamo ne mivungo mikwabo ya kala mu muta, pabwipi na Kalunga Kafwe. Balembi ba Bible bajingulwile amba uno mukanda wālembelwe myaka katwa ne musubu kumeso kwa kubutulwa kwa Meshiasa wālailwe, nansha Kidishitu. Bine, Bible i musokole bya kumeso!

Isaya pamo ne balembi bakwabo ba Bible kebādipo babwanya kuyuka myanda ya kumeso mungya ñeni yabo. Ino, “banenene monka mo batwadilwetwadilwe kudi Mushipiditu Sandu.” (2 Petelo 1:21) Mu bishinte bilonda’ko, tusa kwisambila nakampata pa myanda imo imo ya būmi bwa Yesu yālailwe kupityila kudi Isaya. Ebiya kupwa ketubandaula binkumenkume bya mu ano etu mafuku ne a kumeso byālaile Yesu ne bandi bana ba bwanga.