Musa Kwikadila Būmi Bwetu bwa Kumeso

MUTUMIBWA Petelo pa kwisambila pa mukekadila būmi bwa kumeso bwa bantu ne ntanda, wāsonekele amba: “Bātwe, monka mwendele mwanda-wamulao wandi [wa Leza], tutengele madiulu mapya, ne ntanda īngi mipya mo mwikalanga boloke.” (2 Petelo 3:13) Mulao wa “madiulu mapya, ne ntanda īngi mipya” wālailwe dibajinjibajinji kupityila kudi mupolofeto Isaya.  (Isaya 65:17; 66:22) Petelo pa kutela buno bupolofeto, wālombwele amba mu kine kitatyi’kya bwādi kebwāfikidile bonso.

Pa kupwa, kubwipi na mwaka wa 96 K.K., Kusokwelwa kwāsokwedilwe mutumibwa Yoano, kwālombwele amba ‘ntanda mipya’ ikaleta madyese munshi mwa Bulopwe bwa Leza. (Kusokwelwa 21:1-4) Binenwa bya Yesu ne bya mutumibwa Polo bitala pa ngikadilo ya ntanda yadi ya kubadikila kwiya kwa Bulopwe bwa Leza bifikidilanga pano. Nanshi, tukokeja kukulupila amba buno Bulopwe busa kuleta ntanda mipya pano pano ponka. Lelo ntanda mipya ikekala namani? Mukanda wa Isaya witulombola’kyo.

Madyese mu Ntanda Mipya

Ndoe ne Bumo bwa Mutōtelo Ntanda Yonso. “Bakabunda bipete byabo ke makasu, ne mikobe yabo ke mpete ya kukukula mityi; muzo keukatalulapo kipete pa muzo mukwabo, nansha kwilombolapo bulwi monka, ehe.”—Isaya 2:2-4.

Ndoe Umbukata bwa Bantu ne Banyema. “Mpumpi ukekalanga ne kana-kamukōko pamo, ngé nandi ukalāla ne kana-kambuji pamo; kadi mwana-ñombe ne ntambo-mwana ne nyema munune bikekalanga pamo; ino kāna katyetye kakebyendejanga. Kabidi ñombe-mukaji ne kimbwi bakadyanga mu madyo amo, bāna babo bakalāla pamo; kadi ntambo ukadyanga biyombo’nka bwa ñombe-mulume. . . . Ino pano namino kebakasanshijapo, nansha kōna kwine, monsomonso mu lūlu lwami lwa bu-ujila; mwanda panopanshi pakayula ne kuyukidija kwa Leza’nka bwa mema ayuja kalunga-kamema.”—Isaya 11:6-9.

Bidibwa Bivule ku Bonso. “Penepa mu luno lūlu luno’lu Yehova wa bibumbo ukatēkeja masobo a bintu binune a bantu bonso, ne a vinyu misāse, bintu binune biyule bya māni a mikondo, vinyu misāse mitōkejibwe to-o.”—Isaya 25:6.

Lufu Ke Kutupu’lo. “Wapu kumininina lufu nyeke ne nyeke; ino Mfumwetu Leza ukapampula mipolo ku mapala onso; kadi ukafundula mutōnko wa bandi bantu panopanshi ponsololo; mwanda Yehova wanena’kyo.”—Isaya 25:8.

Bafu Bakasangulwa. “Bafwe bobe bakekala bōmi, ngitu mifwe yami ikasanguka. Langukai mwimbei banwe bekalanga mu luvumbi; . . . ino panopanshi pakeela bafwe.”—Isaya 26:19.

Meshiasa, Mutyibi wa Boloke. “Kakatyibilapo mwendele kutala kwa meso andi, nansha kutopeka mwendele kūmvwana kwa matwi andi; ino nanshi ukatyibila balanda ne boloke, ne kutopeka ne buluji bakōkekōke ba panopanshi.”—Isaya 11:3, 4.

 Bampofu ne Babitwi Bakabelulwa. “Penepa kadi meso a bampofu akapūtulwa, ne matwi a babitwi akajikulwa.”—Isaya 35:5.

Ntanda Myūmu Keidi na Bumeni. “Muntanda mutuputupu ne panshi pōmu bikasangala, ne ntanda yampikwa bumeni ikasepelela ne kutōya buluba pamo bwa diluba diyampe. Kikatōya buluba bwa ntanda ne ntanda, kikasepelela ne tusepo ne kwimba.”—Isaya 35:1, 2.

Ntanda Mipya. “Talapo bidi, byo mpanga madiulu mapya [umbikalo mupya wa mūlu] ne ntanda mipya [muzo mupya wa bantu boloke], kabidi bintu bya kala kebikavulukwapo, nansha kwikalapo kumutyima kwine mpika. Ino nanshi sangalai ne kusepelela nyeke mu kyokya kyo mpanga ami; . . . kadi bakōbaka [bekadi ba ntanda mipya ilaile Leza] mobo ne kwikala monka; kadi bakadima madimi a mañanza ne kudya bipa byayo. Kebakōbakapo amba ungi ekalemo, ehe; kadi kebakadimapo amba ungi adyeko, ehe; mwanda mwendele mafuku a mityi a monka mukekadila mafuku a bantu bami, ne batongwe bami bakalēpejeja biyampe mingilo ya makasa abo. Kebakengilapo bitupubitupu, nansha kubutulapo babimona malwa; mwanda i lukunwa lwa badyese ba Yehova, ne bukunge bwabo pamo nabo. Ino pano kadi kikafika enka nenki, abo po kebaityile, ami naitaba kala; kabidi po bakisamba ami nkevwana.” “Ino monka mwendele madiulu mapya ne ntanda mipya, byo nkapanga ami, mo bikekadila kumeso ami; i Yehova unena; e monka mukekadila ne lukunwa lwenu ne dijina dyenu.”—Isaya 65:17-25; 66:22.

Būmi bwa Kumeso Bukekala Buyampe Kutabuka

Mu Bible, ke’nkapo mukanda wa Isaya kete ulaile madyese a kumeso. Mu Bible mudi bupolofeto buvule bulombola bintu bilumbuluke bikalonga Leza kupityila ku Bulopwe bwandi bupelwe Kidishitu. * Lelo nobe usangelanga kwikala mu ino ngikadilo mu paladisa? Bine, ubwanya kwikala’mo! Yuka bidi byobya bine bifundija Bible pa bitala mpango miyampe ya Leza ya kumeso’ku, ne kuyuka byobwanya kulonga pa kubadilwa’mo. Batumoni ba Yehova bakasangela kukukwasha na nsangaji.

[Kunshi kwa dyani]

[Kifwatulo pa paje 8]

Bantu bakekala mu ndoe pamo ne na banyema bene

[Kifwatulo pa paje 9]

Bafwe bakekala ke bōmi monka

[Kifwatulo pa paje 10]

Ntanda yonso ikekalanga ke paladisa