Mwibakwashei Bajoke Kwampikwa Kwija!
Mwibakwashei Bajoke Kwampikwa Kwija!
“Le tukenda kudi ani? Abewa wi wa binenwa bya muya wa nyeke ne nyeke.”—YOA. 6:68.
1. Lelo Petelo wānene bika bana ba bwanga bavule pobānyemene Yesu?
BANA ba bwanga bavule ba Yesu Kidishitu bāpelele bufundiji bwandi ne kumunyema. Nandi wāipangula batumibwa bandi amba: “Lelo ne bānwe musaka kufunduka’ni?” Petelo wālondolola’mba: “Abe Mfumwami, le tukenda kudi ani? Abewa wi wa binenwa bya muya wa nyeke ne nyeke.” (Yoa. 6:51-69) Kebādipo na kukwabo kwa kwenda. Mutōtelo wa Bayuda kewādipo na “binenwa bya muya wa nyeke ne nyeke” penepa, ne kadi dyalelo bino binenwa kebibwanyapo kutanwa mu Babiloni Mukatakata, umbikalo wa ntanda yonso wa bipwilo bya bubela. Yewa yense upalukile ku luombe lwa Leza ino usaka kusangaja Yehova, ayuke’mba kino kyo ‘kitatyi kya kulanguka mu tulo’ ne kujokela ku luombe.—Loma 13:11.
2. Lelo i bika byotufwaninwe kulama mu ñeni pa bitala myanda mifwame nansha yoya ifwaninwe butyibi?
2 Yehova wādi utele mikōko ya Isalela mutyima. (Tanga Ezekyele 34:15, 16.) Mu muswelo umo onka, bakulumpe Bene Kidishitu badi na kiselwa ne mutyima wa kukwasha boba badi bwa mikōko mipaluke ku luombe. Shi abanena musapudi umo kwifunda na muntu wadi kakingilangapo ino witabije kukwashibwa, lelo i bika bifwaninwe kulonga shi mwendeji wayuka amba muntu’wa i mulonge bubi bukatampe? Pa kyaba kya kumupa madingi pa mwanda ufwaninwe butyibi nansha pa mwanda mufyame, musapudi’wa ufwaninwe kumukankamika akalombole bakulumpe. Shi kakebalombwelepo, nabya musapudi’wa ufwaninwe kukayukija bakulumpe uno mwanda.—Levi 5:1; Ngat. 6:1.
3. Lelo i bika byālongele yewa mwana-mulume wādi na mikōko 100 pa kutana umo wādi mujimine?
3 Mu kishinte kibadikile’ki, twisambile’mo kyelekejo kya Yesu kya muntu wādi na mikōko 100. Kitatyi kyājimine umo mu luombe, wāshile bidi yoya 99, wāenda kukakimba umo mujimine’wa. Bine, uno muntu wāsangele bininge pa kwiumona! (Luka 15:4-7) Netu twikalanga na nsangaji ya muswelo umo onka kitatyi kijoka mukōko wa Leza wadi mujimine mu luombe. Bakulumpe, ne bakwabo mu kipwilo bakunkwanga na buswe ne kukapempula yewa wadi kakingilangapo. Ne kadi, basakanga kumona muntu’wa ujokela ku luombe ne kusangela bukwashi bwa Leza, bulami, ne madyese andi. (Kup. 33:27; Mit. 91:14; Nk. 10:22) Shi badi na kyaba kya kupāna bukwashi bwa uno muswelo, lelo i bika byobafwaninwe kulonga?
4. Lelo i bika byotwajingulula mu Ngalatea 6:2, 5?
4 Padi bakokeja kukwasha muntu ajokele ku kipwilo na kumulombola na kanye amba Yehova uswele mikōko yandi, ne amba witusakila kulonga enka byobya byotubwanya. Mu bino bintu mubadilwa ne kwifunda Bisonekwa, kutanwa ku kupwila kwa Bwine Kidishitu, ne kusapula myanda miyampe ya Bulopwe. I biyampe padi kutanga Ngalatea 6:2, 5 ne kulombola’mba nansha shi Bene Kidishitu bakokeja kwikwasha na kwiseleja bya kwibalemenena abo bene na bene, inoko “bonsololo bakaselanga byakwibalemena, wa kyandi, wa kyandi,” ke biselwa bya ku mushipiditu kadi. I kutupu muntu mukwabo ubwanya kwitulamina kikōkeji kyetu kudi Leza pa kyetu kyaba.
Lelo “Byakūmininwa bya Buno Būmi” byo Bibajokeja Kunyuma?
5, 6. (a) Mwanda waka kuteja na katentekeji binena banabetu betabije kebakingilangapo kudi na mvubu? (b) Le ubwanya kukwasha namani boba kebakingilangapo bamone amba kubulwa kwikala pamo na bantu ba Leza kwibaletela kyaka?
5 Bakulumpe ne basapudi bakwabo bapye bafwaninwe kuteja na katentekeji myanda itamba ku mutyima inena banababo mu lwitabijo badi kebakingilangapo, mwa kwibakwashisha. Langa’po bidi shi wi mukulumpe, ukapempula ba mulume ne mukaji babulwanga kupwila pa mwanda wa “byakūmininwa bya buno būmi” bibajokeja kunyuma. (Luka 21:34) Kubulwa musokwe nansha kuvudilwa biselwa bya mu kisaka kubwanya kwibaponeja mu tulo twa ku mushipiditu. Padi bamonanga uno bu o muswelo wa kupeleja kiselwa, inoko wibalombole amba kwitolola ke’kopo kupwa mwanda. (Tanga Nkindi 18:1.) Ukokeja kwibepangula na bwino amba: “Lelo kuleka kwenda ku kupwila i kwimwikadije na nsangaji mipite yomwadi nayo? Lelo pano būmi bwenu bwa kisaka bubalongoloka kupita? Lelo tusepo twa Yehova tukidi bukomo bwenu?”—Neh. 8:10.
6 Kulangulukila pa bino bipangujo kubwanya kukwasha boba badi kebakingilapo bamone amba, kubulwa kwikala pamo na kipwilo ko ako kwatyepeja kwendelela kwabo kwa ku mushipiditu ne nsangaji yabo mine. (Mat. 5:3; Bah. 10:24, 25) Ukokeja ne kwibalombola’mba kubulwa kusapula myanda miyampe nako kujimijanga nsangaji. (Mat. 28:19, 20) Shi ke pano, lelo i biyampe abo kulonga bika?
7. Lelo tufwaninwe kukankamika boba bapalukile ku luombe kulonga bika?
7 Yesu wānene amba: “Mwikale kudyumuka bānwe bene, mwanda wa kunena’mba mityima yenu yakaīle kulemenenwa, ne mu dyopolo, ne bunkolwankolwa, ne byakūmininwa bya buno būmi . . . Dyumukai mafuku onso, ne kulombela’mba mukafwaninwa kupanda ku byobya byonso bisa kufika.” (Luka 21:34-36) Boba bapaluke ku luombe ne basaka kwikala monka na nsangaji yobadi nayo pa kala, bafwaninwe kukankamikwa bekale balomba mushipiditu sandu ne bukwashi bwa Leza, ne kulonga bintu kukwatañana na milombelo yabo.—Luka 11:13.
Lelo Kudi Kibakukeje
8, 9. Lelo i muswelo’ka ukokeja mukulumpe kulanguluka na muntu wadi mukukale?
8 Byotudi bantu bampikwa kubwaninina, tubwanya kwitupa, ne kino kibwanya kukukaja muntu. Bamo bakukulanga pa mwanda wa kilongwa kyampikwa kwendela’mo kilonga muntu mulēmekibwe mu kipwilo. Shi yewa kakingilangapo wakukajibwe mu uno muswelo, mukulumpe ukamupempula’wa ukokeja kumulombola’mba Yehova mwine kakukajangapo muntu nansha umo. Penepo kikalekela muntu kupwāna na Leza ne na bantu bandi i kika, le? Pa kyaba kya kuleka’byo kwingidila Leza, mwene i biyampe kukulupila amba “mutyibi mwine wa panopantanda” uyukile byonso bilongeka ne amba kakabulwepo kolola myanda? (Ngal. 18:25; Kol. 3:23-25) Shi muntu wakukala ne kupona, kakasakepo kushadidila enka nabya kwampikwa kubūka’po.
9 Mu bukomo bulongwa mwanda wa kwibakwasha ku mushipiditu, mukulumpe ukokeja kulombola amba shi kitatyi kibapite, bamo bamonanga’mba kyokya kibakukeje kewadipo’tu mwanda mukatampe. Padi, ne kine kibakukeje kekikidi’kopo monka. Shi muntu wakukele pa mwanda wa kudingilwa, kulanguluka ne milombelo ponka kubwanya kumukwasha ayuke amba i aye mwine walongele bibi, aleke kukukala pa mwanda wa madingi.—Mit. 119:165; Bah. 12:5-13.
Lelo Bakolejibwe na Bufundiji?
10, 11. I milangwe’ka ikokeja kukwashibwa nayo muntu wadi mwivwanakanye bufundiji kampanda bwa Bible?
10 Bamo padi bapalukile mu luombe lwa Leza mwanda wa bufundiji kampanda bwa mu Bisonekwa bo kebaitabijepo. Bene Isalela bākudilwe mu bupika bwa Edipito “bavulaminwe mīngilo [ya Leza]” yāebalongele, kadi “kebakungilepo ñeni yandi, mhm.” (Mit. 106:13) I biyampe kuvuluja mwanetu kakingilangapo amba “umpika wa binebine, udi na manwa” upānanga bidibwa bya ku mushipiditu biyampe mpata. (Mat. 24:45) Uno o muswelo wafundile muntu’wa bubinebine. Lelo kyakakokejijapo monka kusumininwa kunangila mu bubinebine i kika?—2 Yoa. 4.
11 Mukulumpe palonga buninge bwa kukwasha boba bapaluka ku luombe lwa Leza, ukokeja kwisambila pa kimfwa kya bana ba bwanga bānyemene Yesu pa mwanda wa kupela kobāpelele bufundiji bwandi. (Yoa. 6:53, 66) Bajimijanga bukomo bwabo bwa ku mushipiditu ne nsangaji pobaleka kupwana na Kidishitu ne balondi bandi. Lelo boba baleka kwikala pamo na kipwilo kya Bwine Kidishitu i batane kuntu kukwabo kudi bidibwa bilumbuluke bya ku mushipiditu? Mhm, i kutupu kukwabo kobitanwa!
Lelo Kyebakoleje I Bubi?
12, 13. Shi muntu wadi mupaluke ku luombe waitabija’mba i mulonge bubi bukatampe, le ukakwashibwa namani?
12 Bantu bamo balekanga’byo kusapula ne kupwila pa mwanda wa bubi bukatampe bobalongele. Balañanga’mba shi bakesāse bubi bwabo ku bakulumpe, nabya bakebapanga mu kipwilo. Inoko, kebabwanyapo kupangwa mu kipwilo shi baleke bilongwa bipeleja bisonekwa ne kwisāsa bya binebine. (2 Kod. 7:10, 11) Pa kyaba kya kupangwa, bakatundailwa senene, kadi bakulumpe bakebakwasha biyampe ku mushipiditu.
13 Shi wi musapudi mupye, abakunena kukakwasha muntu wadi kakingilangapo, le i bika byofwaninwe kulonga shi muntu’wa wakulombola’mba wadi mulonge bubi bukatampe? Monka motwapwilanga kala kwikimona, pa kyaba kya kukimba kupwija mwanda abe mwine, munene akalombole bakulumpe. Shi wapele kukebalombola, abe ukalonda madingi a Leza mu myanda ya uno muswelo, mwanda wa kulombola’mba utele mutyima ku dijina dya Yehova ne ngikadilo miyampe ya kipwilo. (Tanga Levi 5:1.) Bakulumpe bakamona mwa kukwashisha muntu yense ukimba kujoka ne kwikala na būmi bukwatañane na kiswa-mutyima kya Leza. Bakamupa madingi a buswe. (Bah. 12:7-11) Shi muntu waitabija amba i mulubile Leza, waleka kulonga kilubo’kya, ne kwisāsa bya binebine, nabya bakulumpe bakamukwasha, ne Yehova nandi ukamufwila lusa.—Is. 1:18; 55:7; Yak. 5:13-16.
Kujoka kwa Mwana Kuletanga Nsangaji
14. Wisambile pa kyelekejo kya Yesu kitala mwana wa kisupa, mu bishima bya abe mwine.
14 Yewa unenwe kukwasha mukōko mupaluke ukokeja kwisambila pa kyelekejo kya Yesu kisonekelwe mu Luka 15:11-24. Mu kino kyelekejo, nsongwalume umo wasupakenye bupyani bwandi ku mwiendelejo mubi. Būmi bwandi bwadi’nka ke bwa kulonga busekese. Pano kadi na nzala, pa kulāla mpika, kawilanga—amba leka’tu nkajokele kwetu! Aye’tu ukidi kulampe, shandi wamumone, wanyema lubilo ne kuponena wandi mwana peshingo, kamwimuna lwimu lwa ku kanwa, ne kusepelela. Kulangulukila pa kino kyelekejo kukokeja kukunka yewa wadi ke mwēje ajokele ku luombe. Ino ngikadilo ya bintu byoisa konakanibwa pano pano, ufwaninwe ‘kujokela kwabo’ kwampikwa kwija.
15. I bika bimo bifikijanga bamo ku kupaluka ku kipwilo?
15 Bantu bavule bapaluke ku kipwilo kebadipo pamo’tu enka bwa yewa mwana wa kisupa. Bamo bapalukanga bityebitye pamo’nka bwa bwato bwēja bityebitye ne kwenda kulampe. Bakwabo balemenenwanga na bya kuzumbazumba bya būmi, kebakimone biyampe bintu bya ku mushipiditu. Bakwabo nabo bakukajibwanga na muntu kampanda mu kipwilo, nansha kadi balekanga’byo pa mwanda wa kubulwa kwivwanija bufundiji kampanda bwa mu Bisonekwa. Batyetye’ko bo baponenanga mu mwiendelejo mubi. Inoko, madingi aletwa pa ino myanda yonso akokeja kukupa muswelo wa kukwasha boba bapaluka ku luombe pangala pa bubinga kampanda bajoke pakidi mema mu manwi pano.
“Wako, Wako Kwenu, Wami Mwana!”
16-18. (a) Le mukulumpe umo wakweshe namani tutu umo wadi kakingilangapo mu bula bwa myaka? (b) I kika kyafikije uno tutu ekale kakingilapo, ebiya wakwashibwe namani, ne watundailwe namani na kipwilo?
16 Mukulumpe umo Mwine Kidishitu unena’mba: “Kitango kya bakulumpe kya kyetu kipwilo kikalanga kite mutyima bininge boba kebakingilangapo. Mvulukanga tutu umo onefundile nandi ne kumukwasha afikile ku kuyuka bubinebine. Wadi kakingilangapo umbula bwa myaka 25, watanwa na bikoleja bikomo mpata, ebiya namushintulwila muswelo ubwanya kumukwasha misoñanya ya mu Bible shi wiilonda. Kupwa kitatyi kampanda, washilula kwiya monka ku Njibo ya Bulopwe, waitabija kifundwa kya Bible, kine kyamukomeje wasumininwa kujokela mu luombe.”
17 Lelo i kika kyalekeje uno tutu kwingila? Aye mwine unena’mba: “Nashilwile kuta mutyima bininge ku bintu bya ino ntanda, pa kyaba kya kuta’o ku bya ku mushipiditu. Ebiya naleka kwifunda, kutambila mu busapudi, ne kupwila kwine. Kupwa namona amba, nkikidipo monka mu kipwilo kya Bwine Kidishitu. Ino kyankweshe njoke i kuta kwantele bakulumpe mutyima bininge.” Pa kupwa kwitabija kifundwa kya Bible, makambakano a uno tutu atyepa ne kutyepa. Aye mwine unena’mba, “Nafikile pa kumona’mba kyonadi mbudilwe mu būmi i buswe ne buludiki bwa Yehova ne bwa bulongolodi bwandi.”
18 Lelo uno tutu watambwilwe namani mu kipwilo? Unena’mba: “Neivwene pamo’nka bwa mwana wa kisupa wisambilwe’po na Yesu Kidishitu. Na bubine, kaka umo mununu wadi ke mwije’mo pano ke myaka 30 ukingidila Leza na bukomo wandubula amba, ‘Wako, wako kwenu, wami mwana!’ Kino kyantengele ku mutyima binebine. Nemona’mba pano nafika kwetu bine. Ne mfwija’ko na mutyima umo pangala pa buswe, kusangelwa, kuntūkijija mutyima, ne kunta mutyima kwa yewa mukulumpe ne kwa kipwilo kyonso kituntulu. Bine, buswe bwabo bobasenswe Yehova ne bakwabo bo bwankweshe njokele mu luombe.”
Mwibakankamikei Bajoke Bukidi!
19, 20. Lelo i muswelo’ka obwanya kukankamika boba kebakingilangapo bajokele ku luombe kwampikwa kwija, ne i muswelo’ka okokeja kwibalombola’mba Leza ketusakilangapo kulonga bitupite bukomo?
19 Pano tudi mu mafuku a mfulo, kadi mfulo ya ino ngikadilo ya bintu keidi pabwipi. Pa kino, kankamikai boba kebakingilangapo baye ku kupwila. Mwibazenzei bashilule kwampikwa kwija. Mwibavulujei amba Satana ukimbanga konakanya kipwano kyabo na Leza ne kwibapa milangwe ya amba kuleka mutōtelo wa bine kubwanya kwibapēlejeja būmi. Mubwanya kwibakulupija amba bakamona kutūkijibwa mutyima enka shi i balondi ba kikōkeji ba Yesu.—Tanga Mateo 11:28-30.
20 Vulujai boba kebakingilangapo amba Leza witusakilanga kulonga byobya byotubwanya. Madia, kaka wandya Lazalasa, pa kutopekwa pa mwanda wa kushinga Yesu māni a lupoto lukomo, Yesu wānene amba: “Mulekei, . . . walongela monka mwāyūkila aye mwine kulongela.” (Mako 14:6-8) Yesu wātendele mukaja mufu mulanda wātūdile kyabuntu kityetye mu tempelo. Nandi wālongele enka byobya byaābwenye kulonga. (Luka 21:1-4) Batwe bavule tubwanya kutanwa ku kupwila ne kutambila mu mwingilo wa kusapula Bulopwe. Bavule mu boba kebakingilangapo nabo babwanya kulonga bino bintu na bukwashi bwa Yehova.
21, 22. Lelo i bika byobwanya kukulupija boba bajokela kudi Yehova?
21 Shi muntu udi bwa mukōko wadi mupaluke ku luombe utyina kwitana na banababo, ukokeja kumuvuluja muswelo wātundailwe mwana wa kisupa kwabo na nsangaji. Boba bajokela ku kipwilo nabo basangelwanga muswelo umo onka. Mwibakankamikei bajoke tamba pano mwanda wa kukomena Dyabola ne kufwena kudi Leza.—Yak. 4:7, 8.
22 Boba bajokela kudi Yehova bakatundailwa na nsangaji. (Mad. 3:40) Myanda yobadi bemwenanga mu mwingilo wa Leza kunyuma keikabulwepo kwibaletela nsangaji. Ku meso’ku, kudi madyese keabadika atengele boba bonso bajokela ku luombe kwampikwa kwija!
Usa Kulondolola Namani?
• I muswelo’ka okokeja kukwasha Mwine Kidishitu wakukajibwe waikala kakingilapo?
• I milangwe’ka ikokeja kukwasha muntu mupaluke ku luombe lwa Leza pa muswelo wamona bufundiji kampanda?
• Lelo i muswelo’ka ukokeja kukwashibwa muntu utatana kujokela ku kipwilo?
[Bipangujo bya Kifundwa]
[Kifwatulo pa paje 23]
Kulangulukila pa kyelekejo kya mwana wa kisupa kubwanya kukunka bamo bajokele ku luombe