Lelo I Bika Byobalonga Popa?

KINO kyo kipangujo kyadi kipangula bashofele bavule badi bapita pa mobo a Batumoni ba Yehova adi mu Kibundi kya Mogale (Krugersdorp), kubwipi na Johannesburg, mu Afrika wa Kunshi. Batumoni basakile kwita beni bāye bapempule mobo a bilo ya musambo mu mafuku abidi matuntulu, mu dya 12 ne dya 13 Kweji 10, 2007. Bebetyile pa mwanda wa bintu bibidi—kubepulula binena bantu ne kulombola bonso amba byonso bilongwa ku bilo ya musambo i mwanda wa kukwatakanya mwingilo wāsoñenye Yesu Kidishitu.—Mateo 28:19, 20.

Boba bengila ku bilo ya musambo balamikile byandikwa bikatampe bya kutundaila nabyo bantu, ne kupāna tukanda twa lwito lwa pa bula ku balondakani. Bansunga ne bisaka byabo nabo baityilwe’ko. Byaikala namani? Bantu 500 ne musubu ke Batumonipo bapempwile mobo onso.

Kintu kyasangeje bantu bininge i bitampilo bitwa bu MAN Roland Lithoman, bitampa mapepala 90 000 mu nsaa imo. Njibo mikatampe yomekelwa’mo ne kutuma bitabo mantoni 14 ne musubu ku difuku nayo yatulumwine bantu, mo monka ne kifuko kilamikilwa’mo bitabo. Batumoni ba mu mingilo palapala nabo bateakenye bintu bisangaja bya kulombola bantu, kubadila’mo ne byobya bilombola mu kīpi mānga ya bitampilo, kushilwila ku kya Gutenberg kutūla ku kya panopano kya litho-offset. Kilomboji kikwabo kyalombwele muswelo ulama musambo kifuko, mema, ne luvula. Kimfwa, kudi bipungwa bya pa bula bikoka luvula lwa sumu ne luvumba lubi lutamba ku mashini ōmija mapapye ku bitampilo, ne kufundula luvumbi lwa mapapye.

Julunale umo walupwile kishinte kinena’mba bantu ba kwituma 700 bekalanga mu lubanza lumo “i bengidi batombolwe kadi bepāne kudi Yehova.” Wesambile kadi ne pa “dyangi dya katutu ne muswelo wingilwa bintu byonso bukidibukidi” mu bitampilo. Muntu umo wadi upela Batumoni ba Yehova nandi waile kupempula musambo. Kupwa wasoneka mukanda unena’mba: “Mwi bana-balume. Ke divulepo ku muntu kwimwena bintu bilumbuluke mpata uno muswelo.”

Bantu bavule mu baitabile lwito bafwijije’ko nakampata pa kupempula ano mobo ne batulumukile pa kumona musambo ubikile bitabo bīsambila pa Bible mu ndimi 151 ne utampanga bitabo bya kutuma mu matanda 18 a kunshi ne pa bukata bwa Afrika. Mabilo a misambo ya Batumoni ba Yehova kujokoloka ntanda yonso etabijanga kupempulwa mu masaa a mingilo. Lelo ubulwe’po kwitūdila’ko kitatyi mwanda wa kukapempula musambo wa mu yenu ntanda?

 [Kifwatulo pa paje 10]

Mobo a musambo wa Afrika wa Kunshi, mu Kibundi kya Mogale

[Kifwatulo pa paje 10]

Kulamikilwa bitabo

[Kifwatulo pa paje 10]

Kitampilo kya MAN Roland Lithoman web-offset

[Kifwatulo pa paje 10]

Komekwa bitabo

[Kifwatulo pa paje 11]

Bantu bāya kupempula mobo a musambo

Lwito