Yesu—Kitompekejo Kibwaninine kya Kulonda

MWENE wabilanga kwikala muntu mulumbuluke, wa nsangaji? Mutumibwa Petelo ushintulula kyotufwaninwe kulonga. Usoneka’mba: “Kidishitu nandi wemususukile, wemushia bu-kitompekejo kya kumulonda bānwe mu māyo andi.” (1 Petelo 2:21) Na bubine, Yesu Kidishitu wādi na būmi bwa kutendelwa botukokeja kuboila’ko ñeni. Shi twifunde kuyuka Yesu ne kumwiula, nankyo bine tukekala bantu balumbuluke ne ba nsangaji. Nanshi twelei meso pa ngikadilo imoimo yādi na uno muntu mukatakata ne kutala muswelo otukokeja kumwena mu kimfwa kyandi.

Yesu wādi na būmi bujalale. Nansha byānene Yesu amba ‘kadipo ne pa kusamina mutwe wandi,’ ino kāikelepo na būmi bwa kwisusula, kadi kāfundije’bopo. (Mateo 8:20) Wākatenwe ku masobo. (Luka 5:29) Kingelengele kyandi kibajinji kisonekelwe—kya kwalamuna mema ke vinyu milumbuluke ku masobo a butundaile—kilombola’mba kādipo kisungu nansha muntu upela kwisangaja. (Yoano 2:1-11) Shako, Yesu wālombwele patōkelela kintu kya mvubu ku meso andi. Wānene amba: “Bidibwa byami i byonka bino’mba: Ngube kiswa-mutyima kya yewa wakuntuma, ne kumupwila mīngilo yandi.”—Yoano 4:34.

❑ Lelo wibandaulanga mu būmi bobe shi udi na bujalale mu bintu bya ku ngitu ne bya ku mushipiditu?

Yesu wādi ufwenwa na bantu. Bible utela Yesu bu muntu wa kyanga ne wa bulunda. Kādipo ukoka pādi pamufwena bantu na makambakano abo nansha na myanda mikomo. Difuku dimo pamujokolokela kibumbo, mwana mukaji umo wādi ususuka na misongo umbula bwa myaka 12 wāmutengele ku mutwelo wandi, amba padi atane’ko bukomo. Ino Yesu kāmupangilepo amba ubalonga bibi, ino wāmunene na kanye amba: “Abe mwana’mi lwitabijo lobe lubakupandija.” (Mako 5:25-34) Enka ne bana batyetye bādi baloelelwe kwikala nandi, mwanda bādi bayukile amba kasapo kwibapanga. (Mako 10:13-16) Kadi wādi ushikete na bandi bana ba bwanga biyampe, wisamba nabo bya bulunda. O mwanda kebādipo bekaka kumufwena.—Mako 6:30-32.

❑ Le nobe bantu bakufwenanga pambulwa kukutyina?

Wādi na kinyenye, kadi wa lusa. Mwikadila umo wa Yesu mu mikadila yandi mikatampe i kwitūla kwaādi witūla pa kyaba kya bakwabo, kutenekwa pamo bwa abo, ne kwibakwasha ponka. Mutumibwa Yoano witulombola’mba Yesu pa kumona Madia udila mwanabo Lazalasa wafwile, penepa Yesu “wēyaya mumutyima ne wāfitwa,” “ne impolo yāmusuma.” Bantu bādi bamutala bājingulula’mba Yesu wādi usenswe kino kisaka, kisanso kyāmulengeje adile ne bumvu  mpika. Bine, lolwa shalo lo lusa lwāmukwete, penepa wāsangula mulunda nandi!—Yoano 11:33-44, Myanda Miyampe ku Bonso.

Difuku dikwabo, mwana-mulume ubela makopo—misongo ilenga moyo, yādi itolwelwa muntu kufula—wālomba Yesu amba: “Abe Mfumwami, shi uswele nankyo uyūkile kuñundapa.” Kilondololwa kya Yesu kikabija’nka ne ku mutyima: “Watekwine kuboko wamutenga’mba: Nswele, ino pwibwa!” (Mateo 8:2, 3) Yesu kāundapilepo bantu enka mwanda wa kufikidija bupolofeto. Wādi uswele kwibapampula impolo. Byonso byaālongele byādi bifikidija binenwa byandi bivulukwa nyeke bya amba: “Longelai bantu bakwabo’nka mwine mo musakila’mba bemulongele nenu’mwa.”—Luka 6:31, MB.

❑ Lelo bakwenu bamonanga lusa lobe mu byowibalongela?

Yesu wādi wivwanija ne kusansanya. Nansha Yesu byakālongelepo bubi, ino kādipo usakila bakwabo bekale babwaninine nansha kwimona bu mwibapite; ne kadi kālongelepo bintu kwampikwa kwimvwanija. Dyuba dimo, mwana-mukaji uyukene “mu kibundi [bu] kipya-mambo” wālombwele lwitabijo lwandi ne kufwija’ko na koija Yesu ku maulu na impolo yandi. Yesu wāmulekele amoije, ino kino kyatulumuja mufikilwa wātopekele mwana-mukaji. Yesu wāivwanije kubulwa budimbidimbi kwa mwana-mukaji, wāleka kumutopeka pangala pa bubi bwandi. Ino wānena’mba: “Lwitabijo lobe lubakupandija enda biyampe.” Kilondololwa kya kyanga kya Yesu kyālengeje uno mwana-mukaji aleke mwikadila wandi wa būmi wa kala.—Luka 7:37-50.

❑ Lelo uyukene bu wa kampeja-bukidi kufwija’ko, ino wija pa kutopeka?

Yesu kādipo na mboloji, ino wādi na bulēme. Padi Yesu wādi usenswe bininge mwanā bwanga Yoano mwanda bādi beimvwanika nansha mwanda bādi babutulwa. * Nansha nabya Yesu kādipo na mboloji, nansha ntondo na bana ba bwanga bakwabo. (Yoano 13:23) Ke-pantu kitatyi kyālombele Yoano ne mwanabo Yakoba bitenta mu Bulopwe bwa Leza, Yesu wālondolwele amba: “Nanshi kushikata kwa au ku lundyo, au nandi ku lunkuso kyokya kekidipo kyami kupana.”—Mako 10:35-40.

Yesu wādi nyeke ulēmekele bakwabo. Kadipo na mfwatakani na yādi na bantu ba mu yabo myaka. Kimfwa, mwana-mukaji wādi  umonwa na bavule bu mupitwe na mwana-mulume. Ino Yesu aye wāpele bana-bakaji bulēmantu bufwaninwe. Musunsa mubajinji wāetelele patōkelela bu Meshiasa, wēsokwedile kudi mwana-mukaji, ke Muyudapo, ino i Mwine Samadia, wādi ubengelwe na Bayuda, ne kumwimuna kwine pakwabo kukola. (Yoano 4:7-26) Kadi i konka ku bana-bakaji kwēmwekeje Yesu musunsa umbajinji pa kupwa kusanguka.—Mateo 28:9, 10.

❑ Lelo usañunanga bantu mu bilongwa byobe pa mwanda wa lukoba, luntu, ludimi, nansha muzo wabo?

Wāvuije kiselwa kyandi kya bu mwana ne bu tutu. Mobimwekela, Yosefa shandya Yesu wa bulelwa wāfwile Yesu ukidi mwanuke. O mwanda padi Yesu wālelele inandi ne bankasandi bana-balume ne bana-bakaji na kwingila bu sendwe wa bibalu. (Mako 6:3) Kumeso kwa aye kufwa, wāpa Yoano mwanā bwanga kiselwa kya kutala inandi.—Yoano 19:26, 27.

❑ Le ubwanya kwiula Yesu na kuvuija biselwa bya kisaka kyobe na mwaālongele?

Yesu wādi mulunda wa bine. Yesu wādi mulunda wa kutendelwa. Namani? Kādipo wela balunda nandi mwanda’potu abamulubila, nansha shi abajokela mu kilubo’kya misunsa mivule. Bana bandi ba bwanga kebādipo balonga nyeke enka byasaka. Ino wēlombwele bu mulunda wabo na kwimanina pa ngikadilo yabo miyampe pa kyaba kya kwibafwatakenya bibi. (Mako 9:33-35; Luka 22:24-27) Pa kyaba kya kwibaningila balonde milangwe yandi, wādi wibanena balupule milangwe yabo pakubulwa moyo.—Mateo 16:13-15.

Ne kadi, Yesu wāswele balunda nandi. (Yoano 13:1) Kufika ne pepi? Unena’mba: “Kekudi nansha umo udi na lusa lutabukile luno’lu lwa kwelela balunda nandi muya wandi.” (Yoano 15:13) Le kudi muntu ubwanya kwelela balunda nandi kintu kya mvubu pamo bwa būmi bwandi?

❑ Le ulamanga bulunda na bakwenu nansha shi abakulobeja ne kukulubila?

Wādi mwana-mulume, kadi wa kininga. Yesu i mwishile kulampe kwine na muntu muzoze, wa katalela, ufwatulwanga na basendwe bamobamo. Maevanjile etulombola amba wādi nkanka, mukomo. Misunsa ibidi mituntulu, Yesu wāpangile basunga ne bintu byabo mu tempelo. (Mako 11:15-17; Yoano 2:14-17) Pāile bibumbo kukwata “Yesu mwine Nazala,” wāimene na kininga ne kwiyukanya mwa kulamina bana bandi ba bwanga, wānena na kusumininwa amba: “Ami uno. Wivwane shi munsaka ami nankyo lekaiko bano bende.” (Yoano 18:4-9) Ke kya kutulumukapo shi Pontyusa Pilato wāmwene kininga kya Yesu pobāmukwete ne kumususula, wānena’mba: “Talai, muntu au!”—Yoano 19:4, 5, MB.

❑ Lelo nobe pomona byofwaninwe kulonga, uloñanga’byo na kininga ne kusumininwa?

Ino ngikadilo ya kutendelwa ya Yesu ne mikwabo’po yoimwikadije bu kitompekejo kibwaninine kotudi. Shi batwe netu twikale na uno mwiendelejo pamo na wandi, nabya tukekala bantu balumbuluke ne ba nsangaji. I pa kino pāletele mutumibwa Petelo madingi ku Bene Kidishitu balonde mu mayo a Yesu. Lelo nobe ulondanga mu mayo a Yesu pangya bukomo bobe?

Kādipo’tu Enka Kitompekejo kya Kulonda

Kunena na bubine, Yesu kādipo’tu enka kitompekejo kya kulonda. Wānene amba: “Ami enka ne dishinda, ne bīne, ne būmi, kekudi nansha umo wakukafikila kudi Tata poso ponka pa ami.” (Yoano 14:6) Kutentekela pa kuyukanya bubinebine bwa Leza, ne kushitwila bantu dishinda dya kufwena kwadi, Yesu i mupe ba kikōkeji mukenga wa kumona būmi bwa nyeke.—Yoano 3:16.

 Yesu wālombwele kine kyaāidile pano panshi amba: “Monka mwaīdile Mwanā muntu, aye kaīdile’mba ēngidilwe mīngilo, mhm poso’mba ayeko ēbēngidile, ne kupana muya wandi ke kikūlwa kya bavule bene.” (Mateo 20:28) Yesu pa kupāna būmi bwandi bu kitapwa, wāadile kyalwilo kya bantu bamone būmi bwa nyeke. Le i bika bifwaninwe kulonga muntu shi usaka kukamona būmi bwa nyeke? Yesu wāshintulwile amba: “Ebiya’mba, bakuyūke, abe Leza enka wa binebine, ne Yesu Kidishitu o watumine nankyo bo būmi ne būmi bwine bwa kulādila nyeke na nyeke.”—Yoano 17:3.

I amo, kuyuka Yesu, kwiula būmi bwandi, ne kwitabija lufu lwandi lwa bu kitapwa byo bisakibwa pa kumona būmi bwa nyeke. Tukwita nobe witūdile’ko kyaba kya kwifunda Bible, nsulo ya buno buyuki, ne kulonga bukomo bwa kwingidija bidi’mo, monka mwālongele Yesu. *

Kimfwa kyāshile Yesu mu būmi kitufundija muswelo otufwaninwe kwikala. Lufu lwandi lwa bu kitapwa lwitunyongolanga ku bubi ne mpalo yabo, ke lufu kadi. (Loma 6:23) Bine, i kya bulanda shi Yesu Kidishitu kadipo na lupusa potudi! Kokolwa kuleka mingilo ne bikoleja bya mu būmi bikubudije kyaba kya kubandaula ne kulonda kimfwa kya muntu mukatakata wa kasha ne kashele—Yesu Kidishitu.

[Kunshi kwa dyani]

[Kifwatulo pa paje 7]

◼ Yesu kādipo na mboloji, ino wādi ulēmekele bonso

◼ Wādi mulunda wa bine kufika ne ku mfulo

◼ Wādi na kininga

Lelo nobe ulondanga mu mayo a Yesu pangya bukomo bobe?

[Kapango/Bifwatulo pa paje 5]

Yesu wādi na būmi bujalale . . .

ufwenwa na bantu . . .

wa lusa