Mwingilo wa Madia mu Mpango ya Leza

PĀDI pengila Yesu mwingilo wandi, mwana-mukaji umo wātulwile diwi dikatampe umbukata mwa kyungwe kya kibumbo kanena’mba: “Kemo mwadyese momwa munda mwakubutwile ne oa mabele akwamwishe!” Shi Yesu wādi usaka inandi atōtwe, uno owādi mukenga mupite kulumbuluka wa kwikilombola patōka. Ino aye wālondolwele amba: “Mhm, poso nena’mba: Badyese ne dyese, i bakwivwana uno mwanda wa Leza, ne kulama balame’o.”—Luka 11:27, 28.

Yesu kāpelepo inandi bulēme bwa pa bula; nansha kusoñanya balondi bamupe’bo. Le kino i kikwatañane namani na butōtyi butōtwa Madia na betabije bavule? Tubandaulei munenena Bisonekwa Bikola pa luno lufundijo lutumbe lutala inandya Yesu.

“Uyudile Grasia” “Dyese . . . mu Bāna-Bakaji”

Mwikeulu Ngabudyele wāsapwidile Madia mwingilo wakengila mu mpango ya Leza. Penepa wāmwimwine amba: “Wakamapo! abe wakupebwa katōkwe, Yehova udipo nobe.” (Luka 1:28) Bwalamuni bukwabo bunenena pa luno lwimu amba: “Nakwimuna, abe uyudile grasia, Vidye udi nobe.” Kupwa papo, Edisabeta wāimwine Madia amba: “Dyese dyobe abe mu bāna-bakaji, ne kya munda mobe nakyo i kya dyese monka.” (Luka 1:42) Lelo mwene bino binenwa bilombola’mba Madia ufwaninwe kutōtwa?

Mhm, ke amopo. Nansha bino binenwa byobitwejibwe mu lulombelo lulombelanga Bene Katolika kudi Madia, Bible aye kaletelepo bubinga bwa kumulomba. Ba Ngabudyele ne Edisabeta bāyukile kyepelo kikatampe kipelwe Madia kya kubutula Meshiasa, ino mulangwe wa kumulomba keudipo mu Bisonekwa. Ino, bana ba bwanga pobāipangwile Yesu ebafundije mwa kulombela, aye wēbalombwele amba bafwaninwe kulombela kudi Shandi. Kadi lulombelo lwa Yesu lutumbe lushilula namino amba: “Abe Tata wetu wa mūlu.”—Mateo 6:9.

Ubadilwa mu Balopwe

Lufundijo lukwabo luyukilwe na bavule pangala pa Madia i lwa amba pano ke “Inamfumu wa mūlu.” Bible kāmupelepo nansha dimo kino kitenta. Inoko unena’mba udi na kifuko kya pa bula mu mpangiko ya Leza ya momwa mūlu. Lelo i kifuko’ka?

Yesu wānene amba bamo mu bandi bana ba bwanga ba kikōkeji bakabikala pamo nandi mu Bulopwe bwandi. (Luka 22:28-30) Yesu ukapa bano batongwe dyese dya kwingila bu “bapidishitu kudi Leza wetu, bakukabikala panopantanda.” (Kusokwelwa 5:10) Bible witwivwanija patōkelela amba Madia ubadilwa mu boba bapelwe dino dyese dikatampe. Mwanda waka tunena namino?

Vuluka amba Yesu pa kupwa kufwa, Madia, pamo ne bana ba bwanga ne banababo na Yesu, bādi “ne mutyima umo onka, batele mu kulombela.” Kintu kya bantu 120 bētene mwanda wa kulombela, ne “bāna-bakajipo.” (Bilongwa 1:12-15) Bible unena’mba “mu difuku dya Pentekosa . . . bonso babungakanine pantu pamo ponka,” kitatyi kyāpungulwilwe mushipiditu sandu pobadi, ne kwibapa bukomo bwa kwisamba mu ndimi ingi.—Bilongwa 2:1-4.

Madia byaādi umbukata mwa boba bātambwile dino dyese, nanshi aye ne bana-bakaji bakwabo bāpelwe mushipiditu sandu, bātongelwe kukabikala mu Bulopwe bwa mūlu bwa Yesu. O mwanda tudi na bubinga bwa kukulupila amba Madia pano ushikete mu ntumbo ya mūlu pamo na Yesu. (Loma 8:14-17) Ivwana pano madyese amoamo aketupa Madia ne balopwe bakwabo ba kubikala pamo na Yesu mungya mpango ya Leza.

 Madyese a Kutendelwa Obakapāna

Mukanda wa mu Bible wa Kusokwelwa unena’mba bantu 144000 bakasangulwa ne kwikala mu ntumbo ya mūlu mobakengila pamo na Yesu bu bapidishitu, batyibi, ne balopwe. (Kusokwelwa 14:1, 4; 20:4, 6) Byobadi bapidishitu, bakengidija byabuyabuya bya kitapwa kya Kidishitu pa bantu bonso ba kikōkeji, kwibatwala ku bubwaninine bwa ku mushipiditu, bwa mu mwikadilo, ne bwa ku ngitu. (Kusokwelwa 21:1-4) Bine, i dyese’po kashā dya kubadilwa mu batōtyi bonso ba kikōkeji mu kino kitatyi kya kutendelwa! *

Madia wādi na mwingilo mu mpango ya Yehova, ukidi nao ne pano potunena. Nanshi i biyampe twiule kwityepeja kwandi, lwitabijo, kikōkeji ne kwipāna kwandi kwa bu mbutwile, kwampikwa kwilwa kūminina kwandi mu matompo. Tufwaninwe kadi kumulēmeka bikatampe mwanda ye wābutwile Meshiasa kadi ukapa bantu madyese mavule.

Inoko, ñeni mikatampe yotuboila kudi Madia ne bengidi bakwabo ba Leza ba kikōkeji, i ya’mba kebatōtelepo leza ungi, poso’nka Yehova kete. Madia i mulunge diwi na balopwe bakwabo bakabikala na Yesu momwa mūlu, amba: “Katōkwe, ne buleme, ne ntumbo, ne bulopwe, bīkale kudi [ Yehova Leza] ushikete pa lupona ne ku kāna-ka-mukōko [ Yesu Kidishitu] kwa nyeke na nyeke.”—Kusokwelwa 5:13; 19:10.

[Kunshi kwa Dyani]

[Bushintuludi pa paje 4]

I biyampe twiule kwityepeja, lwitabijo, ne kikōkeji kya Madia