Mwanda wa Yehova I Mūmi

Myanda Mikatampe ya mu Mukanda wa Kusokwelwa—II

LELO i bika bitengele boba batōta Yehova Leza ne boba kebamutōtapo? Le i bika bikafikila Satana ne bademona bandi? I madyese’ka akeselwa bantu ba kikōkeji mu Umbikalo wa Myaka Kanunu wa Kidishitu? Malondololo ku bino bipangujo ne bikwabo bya mvubu atanwa mu Kusokwelwa 13:1–22:21. * Ano mashapita esambila pa bimonwa 9 bya mfulo mu bimonwa 16 byāmwene mutumibwa Yoano dya ku mfulo kwa myaka katwa kabajinji K.K.

Yoano walembe amba: “Wa katōkwe kandi i yewa utangamo, ne boba bēvwana myanda ya mu uno umbangilo uno, ne kulama bisonekwe bidimo.” (Kus. 1:3; 22:7) Kutanga ne kwingidija byobya byotutanga mu Mukanda wa Kusokwelwa kwitukunkanga ku mityima, kukomeja lwitabijo lwetu mudi Leza ne Yesu Kidishitu wandi Mwana, kadi kwitupa lukulupilo lwa kumeso. *—Bah. 4:12.

NGESO ISAMBA-IBIDI YA BUKALABALE BWA LEZA IBAMWANGWA

(Kus. 13:1–16:21)

Kusokwelwa 11:18 unena’mba: “Mizo yakalabele, ino bukalabale bobe [Leza] nabo bubafika, ne mwaka . . . wakwibonakanya boba bonakanya panopanshi.” Pa kwala mwadijo wa kino kimonwa, kimonwa kya 8 kilombola mwingilo wa “kinyema . . . kya masengo dikumi, ne mitwe yandi īsamba-ībidi.”—Kus. 13:1.

Mu kimonwa kya kitema, Yoano wamone “Kāna-kamukōko kēmene pa lūlu lwa Ziona” pamo ne “tununu katwa, pādi ne tununumo makumi aná ne tuná.” Bano bo “bakūdilwe umbukata mwa bantu.” (Kus. 14:1, 4) Ebiya pabalonda misapu ya bamwikeulu. Mu kimonwa kilonda’po, Yoano wabandila “bamwikeulu basamba-babidi ba mpupo īsamba-ībidi.” Bimweka amba Yehova ye uludika aye mwine bano bamwikeulu mwanda wa kupungulula “ngeso īsamba-ībidi ya bukalabale” bwandi pa mitamba palapala ya ntanda ya Satana. Ino ngeso idi na misapu ne bidyumu bya butyibi busa kutyiba Leza. (Kus. 15:1; 16:1) Bino bimonwa bibidi bishintulwila’ko kamo ne kamo katala pa butyibi bwa Bulopwe bukwatañene na kyamalwa kya busatu ne kuvuma kwa bimpungidi kya busamba-bubidi.—Kus. 11:14, 15.

Bipangujo bya mu Bisonekwa Bilondolwelwe:

13:8—Lelo “mukanda wa būmi wa Kāna-ka-mukōko” i mukanda’ka? Uno i mukanda wa kyelekejo udi’nka na majina a boba bakabikala na Yesu Kidishitu mu Bulopwe bwa mūlu. Mu ano majina, mubadilwa ne a Bene Kidishitu bashingwe māni badi pano pa ntanda, bakulupile kukatambula būmi momwa mūlu.

13:11-13—Lelo kinyema kya masengo abidi kinenanga namani bwa mukishi ne kunokeja mudilo mūlu muswelo’ka? Kunena kunena kinyema kya masengo abidi—Umbikalo wa Ntanda wa Angeletele-Amerika—pamo bwa mukishi kulombola’mba uningilanga bantu betabije bulopwe bwakyo na kwibatyinija, kwibangadika ngitu, ne na kwibasusula. Kinokejanga mudilo mūlu na  kwitūla bu mupolofeto weaninye kupwija bibi mu mavita abidi a ntanda a mu myaka tutwa 20 ne kushinda bwendeji bwa Kikoministe.

16:17—Lelo “luvula” lwamwangilwa lweso lwa busamba-bubidi i luvula’ka? Luno “luvula” lwelekeja mulangilo wa Satana, “mushipiditu [ñeni ibikēle bantu] wa kulonga mudi bāna bampikwa kikōkeji.” Luno luvula lwa bulembe lo lwesa ngikadilo yonso imbi ya bintu ya Satana.—Ef. 2:2.

Ñeni Yotuboila’ko:

13:1-4, 18. “Kinyema” kyelekeja imbikalo ya bantu ivubuka “pa mema,” ke pa bantu bakubulwa kwishinkija kadi. (Is. 17:12, 13; Dan. 7:2-8, 17) Kino kinyema kyāpangilwe ne kupebwa bukomo na Satana, kidi na kibalwa kya 666 kilombola kubulwa kubwaninina mu ludingo lwa peulu. Kujingulula kino kinyema kuketukwasha tuleke kwikilonda nansha kwikitōta na mulongela bavule.—Yoano 12:31; 15:19.

13:16, 17. Ketufwaninwepo kuleka kinyema kiludika būmi bwetu nansha shi tubatanwa na bikoleja’ka mu mingilo yetu ya bukile-bukya, kimfwa “kupota, nansha kupotolola.” Kwitabija ‘kiyukeno kya kinyema pa kuboko kwa lundyo nansha pa mpala yetu’ i kwitabija kiludike bilongwa ne milangwe yetu.

14:6, 7. Lubila lwa mwikeulu lwitufundija’mba tufwaninwe kusapula na kampeja-bukidi myanda miyampe ya Bulopwe bwa Leza bushimikilwe. Tufwaninwe kukwasha botwifundanga nabo Bible bakamwe Yehova Leza ne kumupa ntumbo.

14:14-20. “Pakunoa pa pano panshi,” ko kunena’mba mwangulo wa boba bakapanda, pa kuvuika, kikekala ke kitatyi kya mwikeulu kwela “mu kyengelo kikatakata kya bukalabale bwa Leza” “mañanza a panopanshi” ongwijibwe. Ano mañanza—i ngikadilo ya imbikalo mibole ya Satana ibikadile bantu pamo ne “bisansa” bya bipa bibi—akonakanibwa fututu. Tufwaninwe kusumininwa kutyina’mba twakongolwa na mañanza a pano panshi.

16:13-16. ‘Bibanda bibibibi’ byelekeja lunsamfwakanwa lwa bademona lutonona balopwe ba pano panshi bapele kwitabija kumwangwa kwa ngeso isamba-ibidi ya bukalabale bwa Leza, ino lwibatonwena ku kulwa na Yehova.—Mat. 24:42, 44.

16:21. Mfulo ya ino ntanda byoyenda ifwena, kusapulwa kwa butyibi bwa Yehova pa ngikadilo imbi ya Satana kusa kwikala kwa binenwa bya butyibi bisansa byelekejibwe na mema makamankate. Nansha nabya bavule basa kwendelela na kutuka leza.

MULOPWE MUSHINDAÑANI WABIKALA

(Kus. 17:1–22:21)

“Babiloni Mukatakata,” umbikalo wa ntanda yonso wa mitōtelo ya bubela, i kipindi kya disubi kya ntanda imbi ya Satana. Kimonwa kya 11 kimutela bu “wabwitwa mukatampe”—ndumba mwana-mukaji—“ushikete pa kinyema kityila, pyā.” Usa konakanibwa lonso na “masengo dikumi” a kyonka kinyema’ki kimuselele. (Kus. 17:1, 3, 5, 16) Kimonwa kilonda’ko, pa kudingakanya uno wabwitwa na “kibundi kikatampe,” kisapula kupona kwandi ne kwita na kampeja-bukidi bantu ba Leza’mba “mulupukeimo.” Bavule abadila pa kupona kwapona kino kibundi kikatampe. Ino kudi nsangaji momwa mūlu mwanda “butundaile bwa Kana-ka-mukōko bubafika.” (Kus. 18:4, 9, 10, 15-19; 19:7) Mu kimonwa kya 13, yewa utentamine pa “kabalwe katōka, tō” watambe mizo divita. Wafudija ntanda imbi ya Satana.—Kus. 19:11-16.

Le “nyoka wa kala ne kalā, ke dyabola, Satana” kadi nandi le? Usa kwelwa “mu dijiba dya mudilo” kitatyi’ka? Uno i mwanda wisambilwe’po mu kimonwa kya 14. (Kus. 20:2, 10) Bimonwa bibidi bya mfulo bitulombola mukekadila būmi mu Myaka Kanunu. Kumeso kwa “kusokwelwa” kufika ku mfulo, Yoano wamone ‘munonga wa mema a būmi ukuka mu bukata bwa mukenza,’ kadi waivwana  ne lwito lwa kyanga lwita yense “yewa wa kyumwa.”—Kus. 1:1; 22:1, 2, 17.

Bipangujo bya mu Bisonekwa Bilondolwelwe:

17:16; 18:9, 10—Mwanda waka “balopwe ba panopanshi” abadila pa mwanda wa kintu kyobaonakanya abo bene? Kyobadidila i mwino. Balopwe ba pano panshi pa kupwa konakanya Babiloni Mukatakata abajingulula’mba abajimija kadilo kabo. Bipwilo byabo byobyadi bilengeja bantu betabije bilongwa byabo bya kasusu. Kadi Babiloni Mukatakata e wadi wibakongela banuke ba kukalwa divita. Pakwabo kadi, ye wibakwasha mu kulama bantu mu kikōkeji.

19:12—I muswelo’ka uyukile Yesu aye mwine dijina dyampikwa kuyukibwa na muntu? Mobimwekela, dino dijina i kitenta ne madyese adi nao mu difuku dya Mfumwetu, na oa atelelwe mu Isaya 9:6. I kutupu uyukile dino dijina poso’nka aye mwine upelwe madyese a pa bula, ne kwivwanija buluji bwa kino kyepelo kikatakata. Inoko, Yesu upanga ne kabumbo ka mutundaile madyese amoamo, o mwanda ‘i musoneke dijina dyandi dipya pobadi.’—Kus. 3:12.

19:14—Lelo i bāni bakalwa ku mutamba wa Yesu ku Amakedona? Mu “mavita adi mūlu” akelunga na Yesu mu divita dya Leza mubadilwa bidi bamwikeulu ne bashingwe māni bashindañani bapwile kala kupebwa mpalo yabo momwa mūlu.—Mat. 25:31, 32; Kus. 2:26, 27.

20:11-15—Le i majina a bāni alembelwe mu ‘mukanda wa būmi’? Uno mukanda ulembelwe’mo majina a bonsololo bakapebwa būmi bwa nyeke—Bene Kidishitu bashingwe māni, ba mu kibumbo kikatampe, ne bengidi ba Leza ba kikōkeji bakabilwa ‘lusangukilo lwa boloke.’ (Bil. 24:15; Kus. 2:10; 7:9) Boba ‘bampikwa koloka bakasanguka’ bakalembwa majina abo mu ‘mukanda wa būmi’ enka shi abalonda “bintu bisonekwe mu mikanda” ya misoñanya ikaletwa mu Myaka Kanunu. Inoko ano majina akokeja kubulwa’mo. Majina a bashingwe māni ashalanga’mo lonso shi abalama kikōkeji kyabo kufika ne ku lufu. (Kus. 3:5) Majina a boba bakapebwa būmi pano panshi akekala’mo nyeke enka shi abanekenya matompo a mfulo ku mfulo kwa myaka kanunu.—Kus. 20:7, 8.

Ñeni Yotuboila’ko:

17:3, 5, 7, 16. “Ñeni mitūke mūlu” i tukwashanga twivwanije “kifībwe kya mwana-mukaji’wa, ne kya kyokya kinyema [kityila, pyā] kimuselele’kya.” (Yak. 3:17) Kino kyelekejo kya kinyema kyashilwile bu Kitango kya Mizo, kupwa kyaikala ke Kitango kya Bumo bwa Mizo. Mwene i biyampe kuno kusokolwa kwa kifibwe kwitutonone tusapule na bupyasakane myanda miyampe ya Bulopwe bwa Leza ne difuku dya butyibi bwa Yehova?

21:1-6. Tukulupilei na mutyima umo amba madyese alailwe kukekala’ko mu buludiki bwa Bulopwe akafikidila bine. Mwanda waka? Mwanda i kilaijibwe amba: “Kibalongeka!” (MB).

22:1, 17. “Munonga wa mema wa būmi” welekeja mpangiko ya Yehova ya kukūla bantu ba kikōkeji ku bubi ne lufu. Ano mema adi’ko bidi dyalelo. Bine, twitabijei na kufwija’ko lwito lwa kwiya kuyata “buntu bitupu, mema a būmi” kadi twite ne bakwetu nabo bayate’o!

[Kunshi kwa dyani]

[Kifwatulo pa paje 25]

Bine ano i madyese a kutendelwa akeselwa bantu ba kikōkeji mu buludiki bwa Bulopwe!