“Kekyadipo Kitatyi Kyami kya Kufwa”

Shofele wendeja motoka mukatampe wakomenwa kolola ndalakisho. Penepa motoka ubaponena kufula kwa dishinda ne kukonga ba mulume ne mukaji, ne nsongwalume wa myaka 23 wadi upityila dya kufula. Mungya lapolo wa julunale wa New York City ba mulume ne mukaji bafwididile kiponka na ponka, ebiya nsongwalume wajimija ñeni. Aye pa kupumputumuka ne kujingulula byamufikile, wanena kala amba: ‘Nkyadipo nanga’mba nsa kupanda. A Leza wami mpandije mu kino kyamalwa.’ Kupwa wabweja’ko amba, “Kekyadipo kitatyi kyami kya kufwa.”

PADI kodi mwimvwane mānga ya uno muswelo. Kitatyi kipanda muntu mu kitulumukila ku kyamalwa, bantu banenanga’mba, ‘Kitatyi kyandi kyadi kekyabwene,’ ino shi muntu wafu na akishida, banena kala’mba, ‘Kyaba kyandi kibabwana,’ nansha amba ‘I kiswa-mutyima kya Leza.’ Nansha’tu abanena amba kyalongeka’kya kyadi kitungo, kishoto, ye mokilembelwe, nansha amba i Leza, mulangwe udi’po i umo’tu. Bavule bakulupile amba byonso bilongeka mu būmi ne bilupuka’ko i bilaibwe kala ne kekudipo kyobabwanya kulonga mwanda wa kushinta’byo. Uno mulangilo keutalepo enka pa lufu lwa muntu nansha pa akishida, ino i mulangwe udi’ko tamba kala kutūla ne dyalelo.

Kimfwa, Bene Babiloni wa kala bādi bakulupile amba byonso bilonga bantu biludikwanga na ñenyenye ne munangilo wayo. O mwanda bādi batala biyukeno bya mūlu ne miloto mwanda wa kwibaludika. Bangidiki ne Bene Loma nabo bādi batōta baleza bakaji ba kitungo, badi na bukomo bwa kulombola shi muntu kampanda ukafikilwa na kibi nansha na kiyampe, kadi bakokeja kupatanya kiswa-mutyima kya Zeuse ne Yupita, mukata wa baleza.

Kutunduka nako, Bene Hindu ne Bene Buddha bakulupile amba byobya bitana muntu dyalelo i myanda ilupuka ku byaalongele kala, kadi byalonga dyalelo nabyo bilombola byobya bikamutana mu būmi bukwabo. Bipwilo bikwabo—kubadila’mo ne Bipwilo bya Kine Kidishitu—nabyo bitabije ino nkulupilo ya kutungilwa kitungo.

Nanshi ke kya kutulumukapo shi bantu mu ino myaka yobamona bu ya kitōkeji ne bujinguludi bendelelanga na kukulupila amba myanda ibatana umbūmi ne byobya bilupuka ku byobalonga, ne kyonso kibatana mu kitulumukila, biludikwanga na kitungo ne amba kebadipo na kintu kyobabwanya kulonga’po. Le nobe ye molangilanga? Lelo binkumenkume ne myanda ya mu būmi, byobwanya ne byokomenwa—nansha kubutulwa ne lufu—i bitungilwe kala kitungo? Le būmi bobe buludikwanga na kitungo? Tumonei muswelo witukwasha Bible kulondolola bino bipangujo.

[Kutambile Kifwatulo pa paje 3]

Ken Murray/New York Daily News