4 Komena Kutatana Kobe

“Lwitabijo i lutyetye nanshi! Le kika kyōzumbakenya mutyima [kyotatena, New World Translation]?”—Mateo 14:31.

BIBAKOLEJA I BIKA? Nansha ke bana ba bwanga ba Yesu bādi batatana kyaba kimo. (Mateo 14:30; Luka 24:36-39; Yoano 20:24, 25) Na bubine, Bible utela kubulwa lwitabijo bu “bubi bwitūminine.” (Bahebelu 12:1) Mutumibwa Polo wālembele amba: “Bonso kebadipo ne kwitabija, mhm.” (2 Tesalonika 3:2) Kino ke kilombolapo amba bamo kebabwanyapo kwikala na lwitabijo. Inoko bavule, kebalongele bukomo bwa kwikala nalo. Leza weselanga boba balonga buninge bwa kwikala na lwitabijo.

LE UKANEKENYA BINO BIKOLEJA NAMANI? Jingulula bintu bilengeja utatane. Kimfwa, Tomase, mwana wa bwanga, wātatene kusanguka kwa Yesu, nansha ke pāmulombwele  bana ba bwanga bakwabo amba abamumonanga. Tomase wādi usaka’nka kwimwena. Byāikala namani? Yesu wamumwekela mwaādi usakila mwanda wa kukomeja lwitabijo lwandi.—Yoano 20:24-29.

Yehova Leza witupanga kupityila ku Bible byonso bitusakilwa tuleke kutatana. Kimfwa, bantu bavule i babulwe lwitabijo mudi Leza mwanda bamutopekanga patōkelela nansha mu muswelo mukwabo amba ye aye uleteja mavita, bupolapola, ne bufudile bususula bantu. Le i bika binena Bible pa uno mwanda?

Leza kaludikangapo kupityila ku imbikalo ya bantu. Yesu wātelele kipangwa kya ku mushipiditu kekimweka, ke Satana kadi, amba ye “mwine panopantanda.” (Yoano 14:30) Satana wāsakile kupa Yesu lupusa lwa malopwe onso a pano pa ntanda kupityila ku kilongwa kimo kete kya kutōtwa, kanena’mba “Nkakupa lupusa lwa byobya byonso ne ntumbo yabyo, ke-pantu i bifikidijibwe kudi ami, kadi o nswele nkamupa’byo.” Yesu wādi uyukile amba Satana udi na luno lupusa. Inoko, wānene amba: “Kyasonekwa’mba: Ukafukatyila kutōta Yehova Leza obe, ye enka okēngidila mīngilo.” (Luka 4:5-8) Satana ne bantu bo abo balambikwa masusu adi mu ino ntanda, ke Lezapo mhm.—Kusokwelwa 12:9, 12.

Panopano ponka, Yehova Leza usa kutalula’ko kintu kyonso kileta masusu. I muteakanye’ko kala Bulopwe, nansha umbikalo, bukaludika bantu kupityila kudi wandi Mwana, Kidishitu Yesu. (Mateo 6:9, 10; 1 Kodinda 15:20-28) Pa kufikidija buno bupolofeto bwa Bible, pano myanda miyampe ya Bulopwe isapulwanga ntanda yonso. (Mateo 24:14) Panopano buno Bulopwe busa kutalula’ko bonso bebupela ne kufundula bintu byonso bisusula bantu.—Danyele 2:44; Mateo 25:31-33, 46; Kusokwelwa 21:3, 4.

LE I KAMWENO’KA KAMWENWA’MO? Boba batatana badi pamo bwa mabimbi asunkanibwa na “bivula byonso bya lufundijo, ku budyumuku bwa bantu bwa buzazangi.” (Efisesa 4:14; 2 Petelo 2:1) Inoko, boba batana malondololo ku bipangujo byabo bakokeja ‘kūminina monka mu lwitabijo.’—1 Kodinda 16:13.

Batumoni ba Yehova, balupwile uno julunale, basaka kukukwasha utane bilondololwa ku bipangujo byobe bikoleja lwitabijo lobe. Abakwite upwile pamo nabo ne kubandaula byobafundija. Kulonga namino kukaningija lwitabijo lobe mudi Leza.

Shi usaka kuyukila’ko myanda mikwabo, tala dibuku Lelo I Bika Bine Bifundija Bible? * shapita 8, unena’mba “Bulopwe bwa Leza I Bika?,” ne shapita 11, unena’mba “Mwanda Waka Leza Ulekele’ko Masusu?”

[Kunshi kwa dyani]

[Kifwatulo pa paje 9]

Boba batana malondololo ku bipangujo byabo bekalanga na kyalwilo kikomo kya lwitabijo lwabo