Bisaka bya Bene Kidishitu, Londai Kimfwa kya Yesu!
Bisaka bya Bene Kidishitu, Londai Kimfwa kya Yesu!
“Kidishitu . . . [wemushidile] bu-kitompekejo kya kumulonda bānwe mu māyo andi.”—1 PET. 2:21.
1. (a) Lelo i mwingilo’ka wāingile Mwanā Leza mu bupangi? (b) Lelo Yesu umwene bantu namani?
LEZA pa kupanga diulu ne ntanda wāndi Mwana umbedi wādi pabwipi nandi pamo “bwa sendwe mwine mukata.” Kadi Mwanā Leza wāingile pamo na Shandi Yehova paādi ufwatakanya ne kupanga miswelo ne miswelo ya banyema ne mityi pano pa ntanda kadi ne paādi ulongolola Paladisa ikale ke kīkalo kya bipangwa bya mu kyelekejo ne mu kimfwa kya Yehova. Mwanā Leza, wāyukene mwenda mafuku bu Yesu, wādi uswele bininge bantu. “Kuloelelwa [kwandi] kwādi ne bāna ba bantu.”—Nk. 8:27-31; Ngal. 1:26, 27.
2. (a) I bika Yehova byapele bantu bakubulwa kubwaninina? (b) Lelo Bible uletanga bwendeji mu mwanda’ka umo wa mu būmi?
2 Bantu babidi babajinji pa kupwa kuluba, kikūlwa kya kukūla bantu ba būmi kyāikele ke kipindi kikatampe mu mpango ya Yehova. Pa kusaka amba kikūlwa kikale’ko, Yehova wāelele Yesu bu kitapwa. (Loma 5:8) Kadi, Yehova i mulete Bible, Kinenwa kyandi, kya kupa bantu madingi a mwa kulwila na kubulwa kubwaninina kobapyene. (Mit. 119:105) Yehova upānanga bwendeji kupityila ku Kinenwa kyandi mwanda wa bantu bandi bakankamane ne kwikala na nsangaji mu bisaka byabo. Pa mwanda utala busongi, mukanda wa Ngalwilo unena amba mulume “ukalamata kudi wandi mukaji, ino abo bonso babidi ke ngitu imo yonka.”—Ngal. 2:24.
3. (a) Lelo i bika byāfundije Yesu pa mwanda utala busongi? (b) Lelo i bika byotukabandaula mu kino kishinte?
3 Yesu paādi wingila pano pa ntanda, wākomeneje amba busongi i bunenwe kwikala’ko nyeke. Wāfundija misoñanya amba shi balonde’yo mu kisaka, nabya bonso badi’mo bakepuka mwikadilo ne bilongwa byādi bivutakanya busongi ne nsangaji ya kisaka kyabo. (Mat. 5:27-37; 7:12) Kino kishinte kikēsambila pa bufundiji bwa Yesu ne kimfwa kyaāshile paādi pano pa ntanda mobikokejeja kukwasha balume, bakaji, bambutwile, ne bana bekale na nsangaji mu būmi ne mu byobalonga.
Muswelo Ukokeja Mulume Mwine Kidishitu Kulēmeka Wandi Mukaji
4. Lelo mwingilo wa Yesu wiifwene namani na wa balume Bene Kidishitu?
4 Leza utūdile mulume bu mutwe wa kisaka, monka mwikadi Yesu Mutwe wa kipwilo. Mutumibwa Polo wānene amba: “Mulume e mutwe wa mukaji monka mwikadile Kidishitu i mutwe wa kipwilo; nandi i wakupandija ngitu. Balume nenu sanswai bakaji benu, monka musanshilwe Kidishitu kipwilo, wēpanine ponka pa akyo.” (Ef. 5:23, 25) Na bubine, muswelo wādi wikele Yesu na bandi bana ba bwanga ulombola mwa kwikadila balume Bene Kidishitu na bakaji babo. Pano tubandaulei miswelo imoimo yāingidije Yesu lupusa lwāmupēle Leza.
5. Lelo Yesu wāingidije namani lupusa lwandi pa bana bandi ba bwanga?
5 Yesu wādi “mutuukanye kadi ne wa mutyima wa kwipelula.” (Mat. 11:29, MB) Kadi wādi muntu ukwata butyibi ne kufikidija’bo. Kādipo wepuka mingilo yandi. (Mako 6:34; Yoa. 2:14-17) Wādingile bana bandi ba bwanga na kanye, ponso pokyādi kifwaninwe. (Mat. 20:21-28; Mako 9:33-37; Luka 22:24-27) Kadi, Yesu kādipo wibafunina nansha kwibafwija bumvu, nansha kwibalengeja bemone bu Yesu kebasenswepo ne bu kebakabwanyapo kulonga byonso byaādi wibafundija. Inoko, wādi utendela ne kukankamika bana bandi bwanga. (Luka 10:17-21) O mwanda Yesu wālengeje bana bandi ba bwanga bamulēmeke pa kwikala nabo biyampe ne na buswe!
6. (a) Lelo mulume ubwanya kwifunda bika ku muswelo wādi wikele Yesu na bandi bana ba bwanga? (b) Lelo Petelo i mukankamike balume balonge bika?
6 Kimfwa kya Yesu kifundija balume amba bumutwe mu Bwine Kidishitu ke kitentapo kya kususujañana. Inoko, i mwingilo wa bulēme ne wa kwipāna na buswe. Mutumibwa Petelo wākankamikile balume beule buswe bwa Yesu na ‘kwikala muswelo umo onka’ na babo bakaji, “kwibalemeka buleme.” (Tanga 1 Petelo 3:7.) Penepa i muswelo’ka ukokeja mulume kwingidija lupusa koku kadi wikele na wandi mukaji bu muntu ufwaninwe kulēmekwa?
7. Lelo mulume ubwanya kulēmeka mukajandi namani? Leta kimfwa.
7 Muswelo umo ubwanya mulume kulēmeka mukajandi i wa kuta mutyima ku milangwe ne mwiivwanino wandi kumeso kwa kukwata butyibi butala kisaka. Padi i butyibi butala kuviluka, kushinta kaji nansha bwa mu myanda mikwabo, kimfwa kulomba konje, mwa kwingidijija lupeto mu kisaka pano pakanda bei ya bintu. Byoudi mwanda utala kisaka, i biyampe mulume ate mutyima ku mulangwe wa mukaji, amba umukwashe akwate butyibi bujalale, bufwaninwe, bukalengeja mukaji apelelwe kumukwasha’ko. (Nk. 15:22) Balume Bene Kidishitu balēmeka bakaji babo bamwenanga’mo buswe ne bulēme bwa bakaji babo, ne kupityidila betabijibwanga na Yehova.—Ef. 5:28, 29.
Muswelo Ukokeja Mukaji Kulēmeka Mulumyandi Bininge
8. Mwanda waka ke biyampepo kulonda kimfwa kya Eva?
8 Bakaji Bene Kidishitu bamwene Yesu bu kimfwa kibwaninine kya kukōkelelela lupusa. Bine, muswelo umwene Yesu lupusa i mwishile kulampe na wa mwana-mukaji umbajinji! Eva wākomenwe kushiya kimfwa kilumbuluke amba bakaji balonde’kyo. Wāpelwe muntu ekale bu mutwe wādi uletela’mo Yehova bulombodi. Ino Eva kādipo ulēmekele ino mpango. Wākomenwe kulonda bulombodi bwāmupēle Adama. (Ngal. 2:16, 17; 3:3; 1 Kod. 11:3) Eva shandi wāongwelwe; ino wādi wa kwipangula bidi mulumyandi shi i biyampe kulonda diwi dya yewa wādi umulombola bintu bine ‘biyukile Leza.’ Ino yō, wāsakile kwendeja mulumyandi.—Ngal. 3:5, 6; 1 Tem. 2:14.
9. Lelo i kimfwa’ka kiletele Yesu pa kukōkelelela kwandi?
9 Ino Yesu aye wāletele kimfwa kibwaninine kya kukōkelelela ku Mutwe wandi. Mwikadilo ne būmi bwandi bilombola amba “kafwatakenyepo’mba: Kudingakana pamo ponka na Leza kuno i kintu kya kusompola, mhm.” Ino, “wēbudija aye mwine, pa kwalamuka mu ludingo lwa bupika.” (Fid. 2:5-7) Ne pano pene pabikele bu Mulopwe, Yesu ukidi na mwikadilo umo onka. Ukōkelelanga Shandi na kwityepeja mu byonso ne kukwatakanya bumutwe Bwandi.—Mat. 20:23; Yoa. 5:30; 1 Kod. 15:28.
10. I muswelo’ka ukakwatakanya mukaji bumutwe bwa wandi mulume?
10 Mukaji Mwine Kidishitu ukalumbulula shi wiula Yesu na kukwatakanya bumutwe bwa mulumyandi. (Tanga 1 Petelo 2:21; 3:1, 2.) Langa mu mwanda umo mwakokeja kukwatakanya’bo. Wandi mwana walombe lupusa lwa kukalonga kintu kampanda kilomba poso bambutwile bamwitabije. Bidi uno mwanda kewesambilwe’po na bambutwile bonso, i biyampe lolo amwipangule amba, “Le wadi ubalombola ne shobe?” Shi mwana kalombwelepo shandi, nabya mukaji ukesamba uno mwanda na mulume kumeso kwa kulondolola mwana. Kadi, mukaji Mwine Kidishitu ukepuka kwipatanya nansha kufutulula mulangwe wa mulume ku meso a bana. Shi ketabijepo byanena mulume, i biyampe kwisamba nandi kufula.—Ef. 6:4.
Yesu I Kimfwa ku Bambutwile
11. Lelo Yesu i mushile bambutwile kimfwa’ka?
11 Nansha Yesu byakādipo na mukaji ne bana, aye’ko i kimfwa kitabukile kunengela ku bambutwile Bene Kidishitu. Muswelo’ka? Wāfundije bana bandi ba bwanga na buswe mu binenwa ne na kimfwa. Wēbalombwele mwa kuvuila mwingilo waēbapēle. (Luka 8:1) Muswelo waādi wikele na bana bandi ba bwanga ne waādi wibamona wēbafundije mwa kwikadila na bantu.—Tanga Yoano 13:14-17.
12, 13. I bika bilombwa bambutwile shi basaka kutamija bana mu kwakamwa Leza?
12 Bana bekalanga beula bambutwile babo mu biyampe ne mu bibi. Nanshi, a bambutwile, mwiipangulei bidi amba: ‘I bika byotufundijanga betu bana pa bitala kitatyi kyotupityija mu kutala Televijo ne mu kwipwija mukose ne kitatyi kyotupityija mu kwifunda Bible ne mu kusapula? Le na bubine i bika byotubadikije kumeso mu kisaka kyetu? Lelo twibashilanga kimfwa kilumbuluke na kuta mutyima ku butōtyi bwa bine mu būmi ne mu butyibi botukwata?’ Bijila bya Leza bifwaninwe kwikala dibajinji mu mityima ya bambutwile shi basaka kutamija bana mu kwakamwa Leza.—Kup. 6:6.
13 Shi bambutwile balonga bukomo bwa kulonda misoñanya ya mu Bible mu būmi bwa difuku ne difuku, ne bana kebakabulwepo kujingulula. Binenwa ne bufundiji bwa bambutwile bibakwashanga bininge. Inoko, shi bana bamone amba bambutwile banenanga’byo bitupu, nabya bakafula ku kulanga’mba misoñanya ya mu Bible i ya bitupubitupu, keidipo na kamweno. Mfulo mfulō, bana kebakakomenapo lupusa lwa ino ntanda.
14, 15. I bintu’ka bifwaninwe bambutwile kutamija mu babo bana, ne i muswelo’ka obakatamija’byo?
14 Bambutwile Bene Kidishitu bayukile amba kutamija mwana ke enkapo kumudisha ne kumuvwika. Nanshi, kufundija mwana alondelonde bitungo bikwasha enka ku ngitu i kubulwa kumona kulampe. (Mus. 7:12) Yesu wāfundije bandi bana ba bwanga balondelonde bintu bya ku mushipiditu ne kwibitūla pa kifuko kibajinji. (Mat. 6:33) O mwanda, bambutwile Bene Kidishitu nabo, bakeula Yesu na kulonga bukomo bwa kukankamika babo bana bekale na mutyima wa kulondalonda bitungo bya ku mushipiditu.
15 Muswelo umo ubwanya bambutwile kwibakankamika i kwibidija divule babo bana na boba bengila mwingilo wa kitatyi kyonso. Langa’po mobikokeja kukankamikila nkasampe wapwana na bapania nansha na mutadi wa kipindi ne wandi mukaji. Kunangilwa na bamishonele, bengidi ba ku Betele, ne boba batambile mu matanda angi bengila mu lūbako kukokeja kulengeja misambo ikankamika ya nsangaji idi mu kwingidila Yehova. I bine bano bengidi pobetunangila, baketusekunwina myanda isangaja yobemwenine. Kimfwa kyabo kya kwipāna kikokeja kukwasha bininge bobe bana bakwate butyibi bwa ñeni, betūdile bitungo bitendelwa, ne kutonga masomo mafwaninwe akebakwasha mwa kwingidila mwingilo wa kitatyi kyonso.
Bana—I Bika Bikemukwasha Mulonde Kimfwa kya Yesu?
16. Lelo Yesu wālēmekele namani bambutwile ba pano panshi ne Shandi wa mūlu?
16 Banwe bana nenu, Yesu i kimfwa kilumbuluke komudi. Yosefa ne Madia bo bāpelwe kulela Yesu, nandi wēbakōkele. (Tanga Luka 2:51.) Wādi uyukile amba nansha i bampikwa kubwaninina, Leza i mwibape kiselwa kya kumulela. Byo kyādi namino, o mwanda wēbalēmekele. (Kup. 5:16; Mat. 15:4) Nansha ke paādi wenda utama, Yesu wādi ulonga nyeke bintu bisangaja Shandi wa mūlu. Kino kyādi kimulomba kukomena matompo. (Mat. 4:1-10) Banwe bankasampe mubwanya kutompibwa amba muleke kukōkela bambutwile. Penepo, i kika kikemukwasha mulonde kimfwa kya Yesu?
17, 18. (a) Lelo i matompo’ka atananga bankasampe ku masomo? (b) Le i bika bikavuluka bankasampe pa kusaka bakomene matompo?
17 Bimweka amba bakwenu bavule ba ku masomo kebalondangapo misoñanya ya mu Bible. Padi bakokeja kukukoka mulonge bintu byampikwa kufwaninwe, shi upele, kebakusepa. Lelo bakwenu ba ku masomo ke bakwinike dijina dingi pa mwanda upelanga kulonga bintu bimo byobalonga? Shi i amo, uloñanga’po namani? Uyukile amba shi wibazakale ne kulonda kibumbo, nabya ukafītyija mutyima wa bambutwile bobe ne wa Yehova mwine. Lelo ukafula kwepi shi wikale kulonda bakwenu ba ku masomo? Padi wi mwitungile bitungo kampanda, kimfwa bu pania nansha bu mwingidi wa mingilo, kwingila kokwa kusakilwa basapudi ba Bulopwe nansha kukengila ku Betele. Lelo kisense na bakwenu ba ku masomo kikakukwasha ufikile pa byobe bitungo?
18 Lelo banwe bankasampe badi mu kipwilo kemudi batane myanda imutompa mu lwitabijo? Mwalongele’po namani? Vulukai kimfwa kyenu, ke Yesu kadi. Wāpelele kunekenibwa na matompo kadi wāimanija pototo mu byawādi uyukile amba i byoloke. Kuvuluka kino kukemukwasha mumone bukankamane bwa kulombola patōkelela bakwenu ba ku masomo amba mwi bapele kulonga byobalonga byomuyukile amba i bibi. Pamo bwa Yesu, endelelai na kuvuluka bitungo byenu bya būmi bwa kwingila na nsangaji ne kukōkela Yehova.—Bah. 12:2.
Lufungulo lwa Būmi bwa Nsangaji mu Kisaka
19. Lelo i mwikadilo’ka wa umbūmi uleta nsangaji?
19 Yehova Leza ne Yesu Kidishitu basakilanga bantu bekale biyampe. Nansha byotukidi bakubulwa kubwaninina tukokeja kwikala na nsangaji. (Is. 48:17, 18; Mat. 5:3) Yesu wāfundije bubinebine bwa mu kipwilo bulengeja bantu bekale na nsangaji, ino kudi ne bikwabo byaāfundije ku bandi bana ba bwanga. Wēbafundije ne muswelo mulumbuluke wa mwa kwikadila. Kutentekela’po, wēbashila kimfwa kiyampe kya kwikala na būmi ne mumweno mujalale. Batwe bonso, nansha twikale na mwingilo’ka mu kisaka, tukokeja kumwena mu kulonda kimfwa kyandi. Shi ke pano, banwe balume, bakaji, bambutwile, ne bana bene kumo, londai kimfwa kya Yesu! Kwitabija bufundiji bwa Yesu ne kulonda kimfwa kyandi kukaleta būmi bwa nsangaji mu kisala.
Usa Kulondolola Namani?
• Lelo balume bafwaninwe kwingidija namani lupusa lwibapele Leza?
• Le mukaji ukokeja kwiula kimfwa kya Yesu namani?
• Lelo bambutwile bakokeja kwifunda bika ku muswelo wādi wikele Yesu na bandi bana ba bwanga?
• Lelo bankasampe bakokeja kwifunda bika ku kimfwa kya Yesu?
[Bipangujo bya Kifundwa]
[Kifwatulo pa paje 13]
I bika bikalonga mulume wa buswe kumeso kwa kukwata butyibi butala kisaka?
[Kifwatulo pa paje 14]
I mu mwanda’ka mukokeja mukaji kukwatakanya bumutwe bwa mulumyandi?
[Kifwatulo pa paje 15]
Bana beulanga bibidiji biyampe bya babo bambutwile