Kipwilo Kiyampe Kifundija Mwikadilo Muyampe

KIPWILO kiyampe kilumbululanga milangwe yetu ne kwitulombola mwa kunengejeja mwikadilo wetu. Kitukwashanga mu bulwi botulwa pa kulonga biyampe ne kwitwikadija bu bantu bayampe. Tubayuka namani amba ye mulongelanga kipwilo kya bine?

Yuka’mba mutumibwa Polo wāsonekēle mukanda Bene Kidishitu ba mu myaka katwa kabajinji bādi bashikete mu Kodinda, ntanda ya Ngidiki. Kino kibundi kya kala kyādi kitumbīle kulonga bibi. Polo wādyumwine amba: “Babusekese, nansha batota bankishi, nansha bamakoji, nansha bana-balume ne bana-balume belonga bya bumvu, nansha bangivi, nansha balwiso lubi, nansha bankolwankolwa, nansha bantukanyi, nansha bangivi-ntapanyi, bonso bano kebakekalapo mu Bulopwe bwa Leza nansha dimo.” Ebiya Polo wābwejeje’ko amba: “E mo mwadi ne bamo ba umbukata mwenu’nka nankyo! Nanshi, mu dijina dya Mfumwetu Yesu Kidishitu ne ku Muya wa Leza wetu, mo mwaoijibwe bubi bwenu, mwatokejibwa senene kadi mwaikadijibwa bu boloke ku mpala ya Leza.” (1 Kodinda 6:9-11, MB) Langa—kipwilo kiyampe kyākweshe bamo bādi na mwikadilo mubi bekale ke bengidi ba Leza batōka kadi boloke.

Inoko Bible udyumuna kadi amba: “Kitatyi kikafika kikapela bantu kuteja ku lufundijo lwa bine, ino kebalonda’ko bilokoloko bya abo bene kadi bakekongela abo bene bafundiji ba milwi na milwi, ba kwibafundija enka bisaka matwi abo kwimvwana.”—2 Temote 4:3, Today’s English Version.

Lelo bipwilo byoyukile biloñanga namani pa uno mwanda? Lelo bifundijanga misoñanya ya peulu idi mu Bible itala mwikadilo muyampe? Nansha le bipumpunyanga madingi mayampe adi mu Kinenwa kya Leza na kufundija bantu enka byobya “bisaka matwi abo kwimvwana”?

Le ubulwe’po bidi kushikata tulondolole bino bipangujo bilonda’ko mwanda wa kukukwasha ujingulule shi kipwilo kampanda kilupulanga bipa biyampe?

MWANDA: Buluo

BIFUNDIJA BIBLE: “Buluo bwikale bulemekwe na bonso, ne butanda bwa buluo bwikale bwampikwa disubi; ku mwanda Leza ukaketa mambo a ba busekese ne a ba makozi.”—Bahebelu 13:4, BB.

KIPANGUJO: Lelo kino kipwilo kisoñanyanga balume ne bakaji badi’mo besonge mungya bijila bya Leta?

MWANDA: Dilubu.

BIFUNDIJA BIBLE: Yesu, pobamwipangwile shi kudi buluji bwa kwilubwila, wānene amba: “Yewa wakapanga mukajandi kwa kubulwa mwanda wa busekese, kakasonge mukwabo, nabya wapi mambo a makoji; kadi yewa wakasonga mupingwe aye wapi mambo a makoji.”—Mateo 19:9.

KIPANGUJO: Lelo kino kipwilo kikōkele byānene Yesu ne kwitabija dilubu ne kusonga nansha kusongwa monka—enka shi padi walonga makoji?

MWANDA: Busekese.

BIFUNDIJA BIBLE: “Nyemai busekese! Bubi bonso bulonga muntu kapi’bopo ne ku ngitu, ino yewa ulonga busekese upya bubi ne ku ngitu yandi mine.”—1 Kodinda 6:18, MB.

“Kadi po pa mwanda ne mwanda pano webapanine Leza ku byakusakasaka bikobakane, ne bakaji babo bene abālamunako mwakulongela longela bya bu-muntu ku bingi  byakubulwa kulongibwa ku bantu. Ino bāna-balume nabo monka, pa kuleka mulongela bantu bonso ku bakaji bēkomwako abo bene meso byamalwa; bāna-balume na bāna-balume bēlonga byampikwa kwendelamo, batambwila monka abo bene ne mpalo ya kujilula kwabo myolokele monka.”—Loma 1:26, 27.

KIPANGUJO: Le kino kipwilo kifundijanga’mba busekese, bwikale bwa mwana-mulume na mwana-mukaji, nansha bwa bantu ba ngitu imo i bubi?

MWANDA: Bantu badi mu kipwilo balamata na kininga ku misoñanya ya mu Bible.

BIFUNDIJA BIBLE: “Kemukinangai na muntu utelwa bumwanenu, shi ēkale wabusekese, shi wakilokoloko, shi wakutōta bakishi, shi wabutukani, shi wakukolwakolwa, shi wakudimba; wivwane shi udi namino, nankyo kemukadya nandi, ehe.” (1 Kodinda 5:11) Lelo i bika bisa kufikila boba betela bu Bene Kidishitu ino kebesāsapo bubi bwabo? Kinenwa kya Leza kinena’mba: “Pangai muntu mubi udi mwenu.”—1 Kodinda 5:13, The Holy Bible—New International Version.

KIPANGUJO: Lelo kino kipwilo kipañanga muntu upela kwisāsa na kupumpunya misoñanya ya mu Bible?

[Bushintuludi pa paje 6]

Lelo i kipwilo’ka kiyukene bu kilamete bininge ku misoñanya ya mu Bible itala pa mwikadilo muyampe?