Bipangujo bya Batangi

Le i bufundiji’ka buletelwe mu Nkindi 24:27?

Mulembi wa Nkindi, pa kupa nkasampe madingi, unena’mba: “Longolola mwingilo obe panja, kadi longa’o mu budimi; penepa kulonda ubaka njibo yobe.” Le mwanda mwine wimanine’po luno lukindi lwa ku mushipiditu i mwanda’ka? Mwana-mulume ufwaninwe kwilongolola senene kumeso kwa kusonga ne kubutula bana; mwanda uyukile amba bino bitwikañananga biselwa.

Pa kala, uno vese wadi ushintululwa kyaba kimo amba mulume ne shabana kebafwaninwepo’nka kuta mutyima twaji twabo, ino bafwaninwe kuta’o ne ku kūbaka, kukankamika, kisaka kyabo, kimfwa na bufundiji bwa ku mushipiditu. Shako, uno mulangwe i wa bine ne wa mu Bisonekwa, inoko mobimwekela ke aopo mwanda mukatampe mwine wimanine’po uno vese. Mwanda waka? Tala buno bubinga bubidi.

Bubinga bubajinji, uno vese kesambilangapo pa kūbaka mu buluji bwa kukankamika nansha kukomeja kisaka kidi’ko kala. Ino i kūbaka’nka njibo miluji’i. Kishima “ubaka” kikokeja kwikala ne na buluji bwa kyelekejo, bwa kūbaka, kushimika kipango—ko kunena’mba kusonga ne kwikala na bana.

Bubinga bwa bubidi, uno vese ukomeneja kulonga bintu mobilondela, ko kunena amba. “Longa kyoki kupwa ke kyokya.” Mu uno muswelo, le luno lukindi lubwanya kuleta mulangwe wa kushilula na biselwa bya ku ngitu kumeso kwa biselwa bya ku mushipiditu? Mhm, ke amopo!

Mu myaka isekunwinwe mu Bible, shi mwana-mulume ukimba ‘kūbaka njibo yandi’ nansha kushimika kisaka na kusonga mukaji, ufwaninwe kwiipangula’mba, ‘Le ne mwilongolole kuta mutyima ne kulela mukaji ne bana botukabutula?’ Kumeso kwa kushilula kisaka, muntu ufwaninwe kwingila bininge na kudima madimi. O mwanda Bisonekwa Bitokele binena’po amba: “Ingila bidi yobe mingilo ya panzya, uteakanye yo mu bobe budimi, penepa ukabwanya kubaka yobe nzibo.” Lelo uno musoñanya witutala ne dyalelo?

Eyo. Muntu usaka kusonga ufwaninwe kwilongolola senene mwa kuselela biselwa. Shi i mukomo mu ngitu, nabya ukabwanya kwingila. Bine, mingilo ya muntu keifwaninwepo kwimanina enka pa kulama kisaka ku ngitu kete. Kinenwa kya Leza kilombola amba muntu ufwaninwe kulela kisaka kyandi ku ngitu, mu ñeni, ne ku mushipiditu, shi bitupu wabipa kutabuka ne wa kubulwa kwitabija! (1 Tem. 5:8) Shi ke pano, nkasampe ulongolola busongi ne būmi bwa kisaka, ufwaninwe kwiipangula bino bipangujo, amba: ‘Lelo ne mwiteakanye senene kuvuija bisakibwa bya ku ngitu bya kisaka kyami? Le ne mwilongolole kwikala mutwe wa kisaka mu myanda ya ku mushipiditu? Lelo nkavuija kiselwa kya kwendeja kitatyi kyonso kifundwa kya Bible na mukaji ne bana?’ Na bubine, Kinenwa kya Leza kinena kikoma kamweno kadi mu bino biselwa.—Kup. 6:6-8; Ef. 6:4.

Nanshi nkasampe ukimba mukaji ufwaninwe kulangulukila bya binebine pa musoñanya utanwa mu Nkindi 24:27. Mo monka ne nkasampe ukimba kusongwa nandi ufwaninwe kwiipangula shi i mwiteakanye mwa kuvuijija biselwa bya bu mukaji ne bu inabana. Ba mulume ne mukaji bakisongasonga nabo bafwaninwe kwiipangula muswelo umo onka, kitatyi kyobakimba kubutula bana. (Luka 14:28) Kulonda buno buludiki bwa ku mushipiditu kukokeja kukwasha bantu ba Leza bepuke njia mivule ne kusangela būmi bwa kisaka buyampe.

[Bushintuludi pa paje 10]

Lelo i bipangujo’ka bya busongi bifwaninwe kwiipangula nkasampe?