Bupeta Butamba Kudi Leza

SHI udi na lwitabijo mudi Leza, le ukakwesela na bya bupeta? Padi, ino pakwabo ukakupa bupeta bokulangilapo. Tala kimfwa kya Madia, inandya Yesu. Mwikeulu Ngabudyele wāmumwekele ne kumunena’mba wi “wakupebwa katōkwe” na Leza kadi amba ukabutulanga Mwanā Leza. (Luka 1:28, 30-32) Papo Madia kādipo mpeta. Mwanda pa kupwa kubutula Yesu, wālambwile kitapwa kya “tukutyi tubidi nansha twana twa nkunda tunga? tubidi,” mungya mwādi mulambwila balanda kudi Yehova.—Luka 2:24; Levi 12:8.

Lelo kwikala kwādi kwikele Madia mulanda kushintulula amba kādipo weselwe na Leza? Mhm, mwanda paākapempwile Edisabeta mulongo wandi, “Edisabeta . . . wayūlwa Mushipiditu Sandu. Penepo waningija kunena diwi dikatampe’mba: Dyese dyobe abe [Madia] mu bāna-bakaji, ne kya munda mobe nakyo i kya dyese monka.” (Luka 1:41, 42) Madia wādi na dyese dya kwikala pano panshi bu inandya Mwanā Leza muswedibwe.

Yesu aye mwine kādipo mpeta. Ke pa mwandapo’tu wābutwilwe ne kulelwa na balanda, ino wādi mulanda mu būmi bwandi bonso. O mwanda wālombwele muntu umo wādi usaka kwikala mwanā bwanga amba: “Bamizeu badi ne mikembo, ne byoni bya mūlu bidi ne pakulāla, ino Mwanā muntu aye kadi ne pakusamina mutwe.” (Luka 9:57, 58) Inoko byālongele Yesu pa kwiya pano panshi byo byālengeje bana ba bwanga bekale na bupeta bukatampe. Mutumibwa Polo wāsonekele amba: “Pa mwanda wenu wālamuka kādi mulanda, amba pa bulanda bwandi bānwe mwikale bampeta.” (2 Kodinda 8:9) Lelo Yesu wāpele bandi bana ba bwanga bupeta bwa muswelo’ka? Le bidi namani dyalelo?

Bupeta bwa Muswelo’ka?

Divule bupeta bwa ku ngitu kebo kujikakanya lwitabijo, mwanda mpeta ukulupile lupeto lwandi kupita’ko kukulupila mudi Leza. Yesu wānene amba: “Kebyo kukola pa walupeto kutwela mu bulopwe bwa Leza!” (Mako 10:23) Bibamweka nanshi amba Yesu kāpelepo balondi bandi bupeta bwa ku ngitu.

Na bubine, Bene Kidishitu bavule mu myaka katwa kabajinji, bādi na misokwe mityutyutyutyu. Kilema umo watamba ubutulwa, wālombele Petelo lupeto, ino Petelo wāmutentulula’mba: “Ndalama, nansha nsahabu, nkidipo nabyo, nanshi kyonka kino kyo ndi nakyo nakupe’kyo. Mu dijina dya Yesu Kidishitu wa mu Nazala, taluka wende!”—Bilongwa 3:6.

Binenwa bya Yakoba mwanā bwanga nabyo bilombola amba kipwilo kya Bwine Kidishitu kyādi kibundwe na balanda. Wāsonekele amba: “Ivwanai, bānwe bāna betu, baswedibwe, lelo Leza katongelepo boba balanda monka mwikadile bya panopantanda, bēkale bampeta mu kwitabija, bampyana ba bulopwe bwālaīle boba bamusenswe’ni, a?” (Yakoba 2:5) Mutumibwa Polo nandi wānenene amba ke bavudilepo “badi ne ñeni ya ngitu” nansha  “badi ne bukomo” nansha “badi na buleme” betyilwe kwikala mu kipwilo kya Bwine Kidishitu.—1 Kodinda 1:26.

Shi Yesu kāpelepo balondi bandi bupeta bwa ku ngitu, le wēbapele bupeta bwa muswelo’ka? Mu mukanda wātumine Yesu ku kipwilo kya Semilena, wānenene amba: “Ndyūkile byamalwa byobe, ne bulanda bobe (nanshi wi mpeta).” (Kusokwelwa 2:8, 9) Bene Kidishitu ba mu Semilena nansha byobādi balanda, ino bādi na bupeta butabukile bulēme ndalama ne nsahabu. Bādi bampeta mwanda wa lwitabijo ne bululame bwabo kudi Leza. Lwitabijo’tu bidi i kya bulēme mwanda “bonso kebadipo ne kwitabija, mhm.” (2 Tesalonika 3:2) Na bubine, boba bonso kebadipo na lwitabijo i balanda ku meso a Leza.—Kusokwelwa 3:17, 18.

Bupeta Buletwa na Lwitabijo

Le lwitabijo i lulēme mu mashinda’ka? Boba badi na lwitabijo mudi Leza bamwenanga’mo “bupeta bwa būmuntu bwa Leza, ne kwifula kwandi, ne kutūkija-mutyima kwandi.” (Loma 2:4) Kadi bamonanga “kulekelwa kwa myanda” yabo mwanda betabije mu kitapwa kya kikūlwa kya Yesu. (Efisesa 1:7) Pakwabo kadi badi na tunangu twa “mwanda wa Kidishitu” twikalanga enka na boba badi na lwitabijo. (Kolose 3:16) Byobalomba Leza na lwitabijo, “ndoe ya Leza, ya kutabuka ñeni yonso,” ilamanga mityima yabo, ne kufwatakanya kwabo; ne kino kibaletelanga kuloelelwa ne nsangaji.—Fidipai 4:7.

Kadi kutentekela pa tuno tumweno tonso, boba bonso badi na lwitabijo mudi Leza kupityila mudi wandi Mwana, Yesu  Kidishitu, bādi na lukulupilo lwa kutendelwa lwa būmi bwa nyeke. Bino i binenwa bya Yesu Kidishitu biyukene senene amba: “Mwanda aye Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.” (Yoano 3:16) Kino kyepelo kikatampe kikalanga ke kikomo shi muntu waikala na buyuki bwa binebine bwa Tata, ne bwa Mwana, ke-muntu Yesu wānene kadi amba: “Bakuyūke, abe Leza enka wa binebine, ne Yesu Kidishitu o watumine nankyo bo būmi ne būmi bwine bwa kulādila nyeke na nyeke.”—Yoano 17:3.

Shako madyese a Leza i a ku mushipiditu, ino ketubudidilwangapo ku ngitu ne mu malango. Ivwana kimfwa kya Dalídio wa mu Brezile. Kumeso kwa kwikala na buyuki bwa binebine bwa mpango ya Leza, wādi ntondwe. Butondwe bwaletele kavutakanya mu kisaka kyandi. Mfulo mfulō, ne misokwe yapalakana. Ebiya washilula kwifunda Bible na Batumoni ba Yehova ne kino kyamulengeja ashinte bikatampe.

Buno buyuki bwafikija Dalídio ku kuleka bibidiji bibi. Waendelela ku mushipiditu ne kunena’mba: “Nadi ñendanga ku bala ne bala; ino pano ke ñendanga ku njibo ne njibo.” Kupwa waikala ke mufundiji wa Kinenwa kya Leza wa kitatyi kyonso. Kuno kushinta kwalumbulwile būmi bwandi ne misokwe yandi mine. Dalídio wanene amba, “Lupeto lonadi njimija ku kutoma, pano nkenkwashanga nalo bakwetu basakilwa’lo nansha kupota nalo byobya byonsakilwa.” Kadi pano kadi na balunda ba binebine bamona bintu na mwibimwena Leza. Pano Dalídio udi na ndoe ya mutyima ne kuloelelwa kutabuka byonso byaadi ulanga kumeso kwa kuyuka Leza.

Kimfwa kikwabo kya muntu waikele na būmi buyampe pa kwitabija mudi Yehova Leza i Renato. Shi umone nsangaji ne mimungomungo yadi nayo dyalelo, kulangapo amba wadi kimonyamalwa tamba kubutulwa. Paadi kana ka lukeke, inandi wamwelele. Wamushiya ulēle mu mufuko munshi mwa kibasa, mwikande mala bibibibi ne kwilopola, kadi musuku nao kuketwa mpika. Bana-bakaji babidi pa kupityila dya kubwipi bamona kafuko kajina munshi mwa kibasa. Balanga dibajinji amba kudi muntu washiyanga kapushi kana. Ino pa kupwa kumona amba i kana ka lukeke, bekaselela bukidi ku lupitalo lwa pabwipi amba kondapwe.

Umo pa bano bana-bakaji wadi Kamoni wa Yehova, penepa wakalombola Rita, Kamoni mukwabo myanda ya uno mwana. Rita wādi ususuka na lubutulo lwa lukunde, ne wadi’nka na kana kamo kana-kakaji. Wadi wabilanga mwana mwana-mulume, o mwanda watongele kulela Renato.

Rita walombola Renato ukidi nkasampe amba ami nkidipo inobe ukubutwile. Ino wamulelele na buswe ne kisanso kadi wakuna mwadi misoñanya ya ku mushipiditu. Renato pa kutama, washilula kusangela myanda ya mu Bible. Kadi wafwija’ko ne pa muswelo utulumukwa waapandijibwe  ne kutamijibwa. Meso andi ayulanga impolo kitatyi kyonso kyatanga binenwa bya Davida mulembi wa mitōto bya’mba: “Ke-bantu batata ne lolo abandekelela, nanshi Yehova ukamboyanga.”—Mitōto 27:10.

Renato pa kufwija’ko Yehova pa byonso byamulongele, wabatyijibwe mu 2002 ne kwikala mwingidi Mwine Kidishitu wa kitatyi kyonso mu mwaka walondele’po. Ne pano kayukilepo shandi ne inandi kimubutula, pakwabo padi kakebayukapo nansha dimo. Inoko, Renato umona amba kintu kya bulēme kyaatambwile i kuyuka Yehova ne kwikala na lwitabijo mwadi pamo bwa Shandi wa buswe ne umutele mutyima.

Padi wabilanga nobe kupwana bininge na Leza ne kwiswa nandi mwa kwikadila mpeta umbūmi. Mukenga wa kupwana na Yehova Leza ne wandi Mwana, Yesu Kidishitu, i mushitwilwe bonso—bampeta ne balanda. Padi kukekalapo mpeta ku ngitu, inoko ukamona ndoe ya mutyima ne kuloelelwa bintu kebikokejapo kupotwa ku lupeto lwa ino ntanda. Bino binenwa bitanwa mu Nkindi 10:22 i byabine binena’mba: “Dyese dya Yehova dipeteja bupeta, kadi kalundilekopo kanjia nansha kamo kene.”

Yehova Leza utele boba bāya kwadi mutyima: “E-e, shi watejeje ku bijila byami! longa nankyo ndoe yobe yaikele’nka bwa munonga, ne boloke bobe bwa mantanki a kalunga-kamema.” (Isaya 48:18) Kadi Yehova ulaile amba boba bonso baya kwadi na mutyima ne mwikadilo muyampe bakeselwa mpata: “Mpalo ya kwityepeja ne kwakamwa Yehova e bupeta ne bulēme ne būmi.”—Nkindi 22:4.

[Bushintuludi pa paje 5]

Kisaka kya Yesu kyādi kilanda ku ngitu, inoko kyāeselwe mpata na Leza

[Kifwatulo pa paje 6]

Lwitabijo mudi Leza luletanga ndoe, kuloelelwa, ne nsangaji