Butōtyi bwa Kisaka—Bwa Kamweno pa Kupanda!

LANGA’PO bidi “divita dya difuku dikatakata dya Leza, Mwinebukomobonso” modikaletela nzuba! (Kus. 16:14) Mupolofeto Mika wāsonekele na kwingidija byelekejo bitenga mutyima’mba: “Ngulu ikasungululwa . . . , ne misanza ikasuba’nka bwa bupula pa mudilo, bwa mema mapungululwe pa impulumuko.” (Mika 1:4) Lelo i musala’ka ukafikila boba bantu kebengidilapo Yehova? Kinenwa kya Leza amba: “Kabidi bepaibwe na Yehova bakekala pa dyodya difuku’dya kushilwila ku mfulo imo ya panshi kutūla ne ku mfulo mikwabo ya panshi.”—Yel. 25:33.

Mungya bino bidyumu, i biyampe mitwe ya bisaka—bavule i bambutwile balela bana kasuku—iipangule pangala pa babo bana batame ne babwanya kulanga, amba, ‘Lelo bakapanda pa kino kinkumenkume?’ Bible ukulupija amba bakapanda shi i bemanije kadi bakomo ku mushipiditu pangya ludingo lwa kimano kyabo.—Mat. 24:21.

Kamweno ka Kwitūdila’ko Kitatyi kya Butōtyi bwa Kisaka

A mbutwile, longa bukomo bobe bonso bwa kulela bana “mu lufundijo lwa Mfumwetu.” (Ef. 6:4) Ketuleka’byopo kukomeneja mvubu ya kwifunda Bible pamo na bobe bana. Tusaka betu bana bekale pamo bwa Bene Kidishitu ba mu Fidipai, batendelwe na Polo pangala pa kikōkeji kyabo kudi Yehova ne mutyima tō. Wāsonekele amba: “Bānwe baswedibwe bami, monka mwikadile bakōkele nyeke, kadi napo keponka po ndi nenu mu meso ami, mhm, pano byo ndi mufunduke kwako, nanshi umbatabukidilamo, fikijijai bidi lupandilo lwenu ne moyo ne luzakalo.”—Fid. 2:12.

Lelo bana bobe balondanga bijila bya Leza ne kitatyi kyokudipo? Le pobadi ku masomo napo? I muswelo’ka okakwasha bobe bana bayuke tunangu tudi mu bijila bya Yehova amba twibaludike enka ne kitatyi kyokudipo?

Butōtyi bwa kisaka bukokeja kukwasha bininge mu kūbaka lwitabijo lwa obe mwana mu uno mwanda. Nanshi twisambilei pa bintu bisatu bya mwa kulumbulwila kifundwa kyenu kya Bible.

Longa’kyo Mafuku Onso

Bible ulombola amba bana ba Leza bana-balume betananga ku meso andi pa kitatyi kitungwe. (Yoba 1:6) Nobe tunga kitatyi na bobe bana. Tonga difuku ne nsaa ya Butōtyi bwa Kisaka bwa kyolwa ne kulama’kyo. Kadi tūlai’ko kitatyi kikwabo kya kwifunda shi kibajinji’kya kibapalakanibwa na ngikadilo yambulwa kulaya.

Kemwakikalai na nkikosela mwenda mafuku. Vuluka amba bana i bifundwa byobe bya Bible bibajinji. Ino Satana aye usaka kwibakwata. (1 Pet. 5:8) Shi muleke Butōtyi bwenu bwa Kisaka bwa kyolwa ke mubandila’ko televijo nansha mingilo mikwabo ya bwine ntanda, Satana ukemunekenya.—Ef. 5:15, 16; 6:12; Fid. 1:10.

Kikale Kikwasha

Butōtyi bwa Kisaka bwa kyolwa kebufwaninwepo kwikala bwa kajilwilo bitupu. Longa bukomo bwikale bukwasha. Muswelo’ka? Kitatyi kimo, tonga myanda ikatana benu bana mafuku nansha mayenga kumeso. Kimfwa, wabulwa’po kutweja’mo ka kya kumwena’ko ka mwa kusapwila? Bana basangelanga bintu byobabwanya. Kwengelekeja misapwilo ne miswelo ya mwa kulondolwela ku bijika kukebakwasha bekale bekulupile pobatambila mu miswelo yonso ya  mwingilo wa kusapula Bulopwe.—2 Tem. 2:15.

Kadi ukokeja kupituluka na bobe bana mu myanda ikebakwasha bakomene kuningilwa na bakwabo. Mukokeja kwisamba na kisaka myanda idi mu dibuku Les jeunes s’interrogent — Réponses pratiques, volime 2, shapita 15. Pa paje 132 ne 133 panena amba “contre la pression du groupe” padi milangwe ikwasha mwana kadi ikokeja kumupa mukenga wa kuleta byalanga kulonga. Myanda idi kunshi kwa paje 133 ikankamika bankasampe amba: “Entrainez-vous avec votre père, votre mère, ou un(e) ami(e) mûr(e).” (Wiibidije na shobe, inobe, nansha na mulunda nobe mupye.) Kyaba ne kyaba, ubulwe’po kupituluka’byo mu Butōtyi bwa Kisaka kyobe bwa kyolwa?

Butōtyi bwa kisaka bupanga bambutwile mukenga wa kukomeneja mvubu ya kwitungila bitungo bya ku mushipiditu. Pano napo, Les jeunes s’interrogent, volime 2, udi na myanda miyampe mu shapita wa 38 unena’mba “Que vais-je faire de ma vie ?” (Le I Bika Byonsa Kulonga na Bwami Būmi?) Pomwisambila pa uno shapita, kwasha mwana aloelelwe amba nanshi kwingidija būmi mu mwingilo wa Yehova kyo kintu kitabukile kunengela. Kuna mu mutyima wa mwana buya bwa kwingila bu pania, kwingila ku Betele, kufunda Masomo a Bufundiji bwa Mingilo, nansha kwingila miswelo mikwabo ya mwingilo wa kitatyi kyonso.

Kidyumu: Bambutwile basakila mwana biyampe kebeje kuta mutyima enka pa byobasakila wabo mwana ekale ne kubulwa kuta mutyima ku byalonga. Na bubine, i biyampe kukankamika benu bana betungile bitungo biyampe pamo bwa mwingilo wa Betele, nansha mwingilo wa bumishonele. Inoko, pomwibakankamika namino, kemwakisomba bana na kwibapa mutyima wa kyakunga ngulube, mfulo mfulō bazoza. (Kol. 3:21) Vulukai nyeke amba wenu mwana ufwaninwe kuswa Yehova na mutyima wandi onso—ke na wenupo. (Mat. 22:37) Nanshi fwijai’ko mwana pa bilumbuluke byalonga, kadi lekai kwimanina enka pa bintu byakaloñanga. Tamijai mutyima wa kufwija Yehova pa bintu byalongele kala. Kupwa, kwashai mwana nandi ekale na mutyima wa kwitaba ku buyampe bwa Yehova.

Kikale Kisangaja

Kintu kya busatu kibwanya kulumbulula Butōtyi bwa Kisaka bwa kyolwa i kwikilonga kikale kisangaja. Le mukalonga’byo namani? Padi kyaba kimo mukokeja kuteja drame nansha kutala video ilupwilwe na Batumoni ba Yehova ne kwisambila’po. Mukokeja nansha kutanga pamo Bible, na kwiabila binenwa bya vese ku muntu ne muntu.

Kudi mitwe ya myanda imo idi mu Kiteba kya Mulami ne Réveillez-vous !, ikokeja kwisambilwa’po mu kisaka. Kimfwa, mukokeja kwingidija myanda idi pa paje 31 ya Réveillez-vous !, mu mutwe wa mwanda unena’mba “Que répondriez-vous ?” Mu manimelo a bantu bonso a Kiteba kya Mulami mudi bishinte binena amba “Ku Betu Bana.” Bino bishinte bipingakanyanga na bikwabo bitala bana binena’mba “Fundija Bobe Bana.”

 Bishinte bikwabo bilupulwanga mu Réveillez-vous ! binena amba “Les jeunes s’interrogent” pamo ne dibuku Les jeunes s’interrogent, volime 2, bikakwasha nakampata bambutwile badi na bana bansongwa. Pomwingidija dino dibuku, kemwakilengwa kapango kanena’mba “Qu’en pensez-vous ?” kadi ku mfulo kwa shapita ne shapita. Kano kapango, ke enkapo kupituluka’mo kete, mhm. Bipangujo bidi’mo bikokeja kwikala bu mwadijo wa mīsambo mu kisaka.

Ta mutyima, kokyalamuna kifundwa kya kisaka ke kidye kya kusambija bana. Kimfwa, kokaningila obe mwana kutanga na diwi ditunduke byobya byasonekele pa paje unena’mba “mon journal” nansha mu bipindi bikwabo bya dibuku bilombele muntu kuleta milangwe yandi. Mu ntwelelo inena’mba “Un mot aux parents” pa paje 3, munena’mba: “Mwanda wa kukankamika bobe bana bansongwa kulemba mu dibuku dyabo pampikwa budimbidimbi, i biyampe witabije aleke kukulombola’byo. Mwenda mafuku padi ukakusokwela milangwe yaasonekele.”

Shi mwikale mutōta butōtyi bwa kisaka mafuku onso, bwikele bukwasha, ne kadi busangaja, nankyo Yehova kakabulwepo kwimwesela. Kino kitatyi kya pa bula kyomwatonga mu kisaka kikakwasha baswe bobe bekale bemanije, kadi bakomo ku mushipiditu.

[Kapango pa paje 31]

Loeja’bo

“Potwadi twifunda na betu bana bana-bakaji, ami ne wami mulume twadi twilongolola myanda ya kukefunda ku kupwila, kupwa twanena betu bana bana-bakaji balombole mu kīpi myanda yotwefunda. Kyaba kikwabo twadi twengelekeja myanda ya mu Bible nansha kulonga bya kumwena’ko bya mwa kusapwila mu mwingilo wa budimi. Twadi twifunda bintu bikwatañene na myaka yabo, bisangaja, bikankamika, kadi bisepeja.”—J.M., Etats-Unis.

“Pa kukwasha mwana wa mwifundi wami wa Bible emvwanije mobyadi bikadile pa kwingidija mivungo ya Bible pa kala, twatampile mukanda wa Isaya, kupwa twabula bibalwa bya mashapita ne bya mavese. Ebiya twalunga māni pamo ne kwela tupingo ku mfulo ne mfulo. Penepa nkasampe’wa washilula kwengelekeja byadi bilonga Yesu mu shinakoka mu Nazala. Nsekununi ya Luka 4:16-21 ilombola amba Yesu ‘pa kuvungulula mukanda [wa Isaya] watēne’ kisonekwa kyaadi ukimba. (Is. 61:1, 2) Ino mwana watompa nandi kukimba, byamukomena kutana padi Isaya 61 mu uno muvungo wampikwa bibalwa bya mashapita ne mavese. Pa kutulumuka bwino bwa Yesu bwa kwingidija senene muvungo, nkasampe wanena’mba: ‘Yesu wādi palele!’”—Y.T., Jampani.

[Kifwatulo pa paje 30]

Kupituluka mu myanda kukakwasha bobe bana bakomene kuningilwa

[Kifwatulo pa paje 31]

Longa bukomo Butōtyi bwa Kisaka bwa kyolwa bwikale busangaja