Le Wi Mwitūdile’ko Kitatyi kya Kifundwa kya Bible?

MWAKA wadi’mo, Kitango Kyendeji kyashintyile mpangiko ya kupwila mwa kwitushila kitatyi kya kulonga kifundwa kya Bible ne kwisambila pamo na kisaka. Shi wi mutwe wa kisaka, longa bukomo kifundwa kya Bible na mukaji ne bobe bana kikale kya kamweno ku kisaka kadi kya kitatyi ne kitatyi. Balume ne bakaji bakubulwa bana nabo bakengidija kino kitatyi na kwifunda Bible pamo. Batutu ne bakaka bankunga bakubulwa bana bakengidija kino kitatyi senene mwanda wa kulonga kifundwa kya Bible kya kasuku.

Bavule i bafwije’ko pangala pa ino mpangiko ya Butōtyi bwa Kisaka bwa kyolwa. Kimfwa, Kevin, mukulumpe wasonekele amba: “Kunena’tu amba ‘mwafukoi’ kekubwenepo pa kulombola muswelo wiivwana kipwilo. Batwe bakulumpe twesambile pa mwa kwingidijija kyolwa kyashala pululu’kya monka mwanenene Kitango Kyendeji—kwifunda na bisaka byetu.”

Jodi, mukaja mukulumpe wasonekele amba: “Tudi na bana basatu, wa myaka 15, 11, ne wa myaka 2. Panopano ponka twavilukile mu kipwilo kya ludimi lwa batumama. Kwiteakanya kupwila konso kwadi kulomba kitatyi kivule ne bukankamane. Pano, byashinta mpangiko, tubamone kyolwa kikwabo kya kupityija butōtyi bwa kisaka!”

Ba John ne JoAnn, ba mulume ne mukaji bengila bu bapania ba lonso, basoneka amba: “Kifundwa kyetu kya kisaka kyadi kya nabyanabya o mwanda twadi twikikuja divule mu mingilo mikwabo ya kipwilo. Ino mpangiko impya i kyabuntu kyetupa Yehova kilengeja tutūje ku mushipiditu—shi twikale kwikingidija mokifwaninwe.”

Tony, nkungulume wa myaka isenselela ku 25, watūdile kyolwa kya Dya Bubidi bu dya kwifunda kifundwa kya kasuku. Bitatyi bikwabo e byo byaingidija pa kwiteakanya kupwila. Inoko Tony unena’mba, “Ngabilanga Dya Bubidi difike bukidi.” Mwanda waka? “Mwanda kyolwa’ki kyo kitatyi kyami kya pa bula na Yehova.” Tony ushintulula’mba: “Nefundanga mu mansaa abidi myanda ilengeja bulunda bwami na Yehova butyite. Byondi na nsaa mivule ya kwifunda, ngijanga pa mavese a mu Bible ontanga.” Penepa? “Madingi a Yehova atwelanga mu nkulwe ya mutyima wami kupita ne pabajinji.” Le ukokeja kuleta kimfwa? “Natangile mu dibuku perspicace myanda itala bulunda bwa ba Davida ne Yonafane. Naboile ñeni mu kubulwa kwisakila kwa Yonafane. Kimfwa kyandi kyaunkweshe mone senene mushintulwila bulunda bwa bine. O mwanda ngabilanga kusokwela’ko bya bulēme bivule mu kyolwa kya Dya Bubidi!”

Bine ne bine ponka, bengidi bonso ba Yehova bakamwena bininge mu kwingidija senene kitatyi kya mbwejo kyebapebwa, na kifundwa kya Bible ne butōtyi bwa kisaka bumwenwa’mo kamweno.