Lelo Lupeto Yo Nsulo ya Nsangaji ya Binebine?

SONIA wabutwidilwe mu Eshipanye. Pa bwanuke, wadi utanwa ku kupwila kwa Batumoni ba Yehova pamo na inandi. Ino pa kutama, wavilukila mu Londoni, mu Angeletele, ne ku mfulo washilula kwingila kaji kakukimbila kompani yabo bampotyi.

Sonia wadi usenswe kaji kandi. Wadi umwena’mo lupeto luvule ne kuta mutyima bandi bampotyi. Kaji kadi kayampe, kendelela senene. Sonia wadi wingila divule mansaa 18 ku difuku, kyaba kimo ulāla mansaa abidi nansha asatu. Kaji bo bwadi būmi bwandi. Ebiya na mu kukopa kwa diso, bintu byonso byavutakana. Sonia wabela bulebe bukatampe—padi i pa mwanda wa kutyintyidilwa na mingilo. Papo wadi’nka na myaka 30.

Sonia wādi na bulebe mutamba umo wa umbidi wandi, kadi badokitele kebadipo bakulupile amba ukanena dikwabo. Ponka’po inandi waenda mu Angeletele kukamulama. Sonia washilula kunanga, inandi wamunena amba, “Ami nkeñenda ku kupwila, byadi biyampe longa tubaenda nobe mwanda nkidipo mwa kukushila bunka.” Sonia waitabija kwenda nandi. Byafula kwepi?

Sonia uvuluka amba: “Byonso byonaivwene’ko byadi bya bine. Byadi bya kwana. Nasangele kwitabija kifundwa kya Bible na umo wa mu boba bañimwine musunsa umbajinji onaendele ku Njibo ya Bulopwe. Bantu boneyukile nabo batyibile lwayo kwami, ino bano balunda bonatana pano badi na kyanga ne kisanso.”

Bityebitye, Sonia washilula kwisamba, ne kwendelela waendelela bukidibukidi ku mushipiditu. Mu mwaka’tu umo, wabatyijibwa. Balunda nandi ba panopano badi bengidi Bene Kidishitu ba kitatyi kyonso, ne webamwene amba badi na nsangaji. Sonia walangile amba: ‘Nkimba kwikala bwa abo. Nsaka kupa Yehova Leza bintu byonso byombwanya kumupa!’ Panenwa pano, Sonia i mwingidi wa kitatyi kyonso.

Le i bika byefundile Sonia pa byamutene? “Nansha byonamwene lupeto luvule, njia ne kubulwa mutyima-ntenke mu kaji byampele malangatyima ne kubulwa nsangaji. Namwene amba kintu kya kamweno mu būmi i kupwana senene na Yehova, Tata wa mūlu. Pano ndi na nsangaji ya binebine.”

Polo wālembele amba: “Kusanswa kwa lupeto kyo kitako kya bubi bonso miswelo ne miswelo; mo mudi kongwelwa bamobamo ku lwitabijo pa kupyasakena monka, abapu kwitapatapa ku misongo ya ntanda ne ntanda.” (1 Temote 6:10) Sonia ubingija bubinebine bwa bino binenwa.