“Mwi Balunda Nami”
“Mwi Balunda Nami”
“Bānwe mwi balunda nami, wivwane mulongele monka mo nemujidikila.”—YOA. 15:14.
1, 2. (a) Lelo balunda na Yesu bātambile kwepi? (b) Mwanda waka kwikala balunda ba Yesu kudi na mvubu?
BANA-BALUME bādi bashikete na Yesu mu kyumba kya peulu bādi batambe mu bifuko ne mingilo palapala. Ba Petelo ne Andele, bana na bana, bādi babiluwe. Mateo wādi dibajinji musonkeji wa musonko—mwingilo obādi bafutulwile kudi Bayuda. Bakwabo, kimfwa, ba Yakoba ne Yoano, bādi bayukile Yesu tamba pa bwanuke. Bangi nabo, pamo bwa Natanela, kebādipo beyukile na Yesu tamba kala. (Yoa. 1:43-50) Ino, bano bonso bādi bebungile mu Yelusalema kyolwa kya Pashika bādi bayukile amba Yesu i Meshiasa wālailwe, Mwanā Leza mūmi. (Yoa. 6:68, 69) Bine, ye bano bāsangele pa kwivwana Yesu wibanena’mba: “Pano nemutela bu-balunda nami, mwanda bintu byonso byo naivwene kudi Tata nemuyūkija’byo.”—Yoa. 15:15.
2 Binenwa byānene Yesu ku batumibwa bandi ba kikōkeji, bitalanga nakampata Bene Kidishitu bashingwe māni dyalelo, inoko bibwanya kutala ne bapwani nabo “mikōko mikwabo.” (Yoa. 10:16) Nansha twikale ba kwepi, bengila shi mingilo’ka, shi mingilo’ka, tubwanya kwikala balunda na Yesu. Bulunda bwetu na aye budi na mvubu mpata mwanda kupwana na Yesu i kupwana na Yehova. Bine, i bikomo kufwena kudi Yehova pakubulwa kufwena kudi Kidishitu. (Tanga Yoano 14:6, 21.) Shi ke pano, i bika byotufwaninwe kulonga pa kwikala ne kushala nyeke balunda na Yesu? Kumeso kwa kwisambila pa uno mwanda wa mvubu, lekai bidi tubandaule kimfwa kya Yesu mwine kya kwikala mulunda muyampe ne kuboila ñeni ku muswelo wāitabije bandi bana ba bwanga kupwana nandi.
Kimfwa kya Yesu kya Kwikala Mulunda Muyampe
3. Le Yesu wādi muyukane pa mwanda wa bika?
3 “Balunda ba mpeta i ba ntanda ne ntanda,” mo mwāsonekele Solomone Mulopwe wa tunangu. (Nk. 14:20) Uno o mumweno udi na bantu bakubulwa kubwaninina, wa kupwana enka na boba bakokeja kwibapa bintu, pampikwa kutala byobakokeja kupāna. Inoko Yesu kādipo na kano kato. Wādi upwene na bampeta ne balanda, batōkane ne bakelenge. Eyo, Yesu wāswile nsongwalume umo mpeta, wāmwita ekale mulondi wandi. Inoko, Yesu wāmusoñanya akapotoloje byonso byaādi nabyo ne kupāna’byo ku balanda. (Mako 10:17-22; Luka 18:18, 23) Shi wādi muyukane, ke pa mwandapo wa kupwana na bampeta ne bantu ba ntumbo, ino i pa kupwana na balanda ne bantu bafutululwe.—Mat. 11:19.
4. I kika kinenenwa amba balunda na Yesu bādi bantu ba kutupatupa?
4 Bine, balunda ne Yesu bādi bantu ba kutupatupa. Difuku dimo Petelo wātuninye kwikala na mumweno wa ku mushipiditu mu mwanda kampanda. (Mat. 16:21-23) Ba Yakoba ne Yoano nabo bāikele na mushipiditu wa kwisakila, bānena Yesu ebape bifuko bya ntumbo mu Bulopwe. Kino kyobālongele kyākaleje batumibwa bakwabo, penepa bāshilula kwipatanya pa mwanda utala bukata. Inoko Yesu wālemunwine milangwe ya balunda nandi na kitūkijetyima, ne kwibakalabelapo bukidi mpika.—Mat. 20:20-28.
5, 6. (a) Mwanda waka Yesu wāshele mulunda na batumibwa bavule? (b) Mwanda waka Yesu wātyibile kipwano na Yudasa?
5 Yesu kāshelepo mulunda wa bano bantu bakubulwa kubwaninina pa mwanda wa kilomo-nyeka nansha kupūta meso pa kwabo kubulwa kubwaninina, mhm. Ino aye wātele mutyima bininge pa malangatyima ne ngikadilo yabo miyampe. Kimfwa, ba Petelo, Yakoba, ne Yoano, pa kyaba kya kulama Yesu mu kitatyi kyandi kya kutompibwa kwa malwa, abo baponena mu tulo. Yesu wādi na bubinga bwa kwibatopeka. Nansha nabya wāmwene malangatyima abo adi mayampe, amba: “Mutyimako, uteleko ino mubidi i wa buzoze.”—Mat. 26:41.
6 Ku mutamba mukwabo, Yesu wātyibile kipwano na Yudasa Isakadiota. Nansha Yudasa byaādi umweka panja bu mulunda, ino Yesu wājiwile amba uno wādi mulunda nandi wāonene mutyima wandi. Yudasa pa kwikala mulunda na ino ntanda, wepa mushikwa kudi Leza. (Yak. 4:4) O mwanda mwine Yesu wāpangile Yudasa kumeso kwa kupwana na batumibwa 11 ba kikōkeji.—Yoa. 13:21-35.
7, 8. I muswelo’ka wālombwele Yesu amba uswele balunda nandi?
7 Yesu kādipo ubambile meso pa bilubo bya kala bya balunda nandi ba kikōkeji ino wādi wibalongela biyampe. Kimfwa, wālombele Shandi ebalame mu matompo. (Tanga Yoano 17:11.) Yesu wādi uta mutyima ne pafudile bukomo bwa ngitu yabo. (Mako 6:30-32) Ne kādipo wimanina enka pa kwibalombola byalanga ino kadi i ne pa kuteja ne kwivwanija byobalanga ne mobeivwanina.—Mat. 16:13-16; 17:24-26.
8 Yesu wādi ulongela balunda nandi biyampe mu būmi bwandi kadi wēbafwidile. Bine wāyukile amba ufwaninwe kupāna būmi bwandi mungya bisakibwa bya misoñanya myoloke ya Shandi. (Mat. 26:27, 28; Bah. 9:22, 28) Ino Yesu wāpēne būmi bwandi pa mwanda wa buswe. Wānene amba: “Kekudipo udi ne kisanso kipityile kino kya kwelela balunda nandi bumi bwandi.”—Yoa. 15:13, MB.
Le Bana ba Bwanga Bāitabije Namani Kupwana na Yesu?
9, 10. Lelo bantu bālongele namani pa kwimwena buntu bwa Yesu?
9 Yesu wādi upāna kitatyi, kisanso, ne bintu bya ku ngitu ku buntu. Pa kino, bantu bādi batutyikila kwadi ne kusangela nabo kumupa bya kumupa. (Luka 8:1-3) Yesu wānenene bintu byāemwenine amba: “Mwikale kupanapo, ebiya bikemupebwapo mudingo muyampe mukomene munyunyeko ne kunyunya, muyūle’tu, bā! ukemupebwa ne mu kyadi kyenu, ke-kintu kyokya kitompekejo kyo mutompelapo nakyo kadi e kyonka kyo mukatompelwapo.”—Luka 6:38.
10 Na bubine, bamo bādi bāya kupwana na Yesu mwanda’tu wa kumwena’ko. Balunda ba bubela bānyemene Yesu mwanda wakubulwa kwivwanija bintu byaānenene. Pa kyaba kya kukulupila Yesu, abo bāfula kala ku mulangwe umbi ne kumuvundamina. Batumibwa abo bādi na lulamato. Bulunda bwabo na Yesu bwātūdilwe divule dine pa matompo, ino bālonga bukomo bwa kumulamata mu bitatyi biyampe ne bibi mwine. (Tanga Yoano 6:26, 56, 60, 66-68.) Mu kyolwa kya mfulo, Yesu wāfwijije’ko balunda nandi, kanena amba: “Bānwe mudi boba bakushikilwa nami mu kutompwa kwami konso.”—Luka 22:28.
11, 12. Le Yesu wākulupije namani bana bandi ba bwanga, ne nabo bālongele’po namani?
11 Yesu pa kupwa’tu kufwija’ko bana bandi ba bwanga mwanda wa lulamato lwabo, nabo bamunyema. Mu kitatyi kityetye, kityino kya bantu kyebālemenene kupita’ko kuswa Kidishitu. Pano napo Yesu wēbalekele. Aye pa kupwa kufwa ne kusanguka, wēbamwekela ne kwibakulupija amba i mulunda nabo nyeke. Kadi, wēbapa ne mwingilo ukola—wa kulonga “mizo yonso ya bantu” nabo bekale bana ba bwanga ne wa kwikala batumoni bandi “ne kulampe kwine kumfulo kwa ntanda.” (Mat. 28:19; Bil. 1:8) Le bana bwanga bālongele’po namani?
12 Bana ba bwanga bēpēne ne mutyima umo ne muya onso mu kusapula musapu wa Bulopwe. Na bukwashi bwa mushipiditu sandu wa Yehova, bāsambakanya ne kwija mpika Yelusalema yense na kufundija kwabo. (Bil. 5:27-29) Ne kyaka kya lufu kine kekyēbankakejepo kukōkela lubila lwa Yesu lwa kulonga bana ba bwanga. Mu myaka makumi abala-anga pa kupwa’tu kupebwa luno lubila na Yesu, mutumibwa Polo wāsoneka amba myanda miyampe isapulwanga “mu bipangibwa byonso bya muno munshi.” (Kol. 1:23) Na bubine, bano bana ba bwanga bālombwele amba basangedile bininge bulunda bobapwene na Yesu!
13. Bana ba bwanga ba Yesu bāshintyile namani pa kwivwana bufundiji bwandi?
13 Boba bāikele bana ba bwanga nabo bāitabije bufundiji bwa Yesu mu būmi bwabo. Ku bavule, kino kyāshintulwile kushinta kukatampe mu mwikadilo wa bumuntu bwabo. Bana ba bwanga bamo bādi bana-balume balāla na bana-balume, bamakoji, bankolwankolwa, ne bangivi. (1 Kod. 6:9-11) Bangi nabo bādi banenwe kushinta mulangilo wabo pa bantu ba musaka ungi. (Bil. 10:25-28) Inoko, bakōkele Yesu. Bāvudile bu muntu wa kala ne kuvwala muntu mupya. (Ef. 4:20-24) Bājingulwile biyampe “mutyima wa Kidishitu,” ne kwivwanija mulangilo ne mulongelo wandi wa bintu ne kumwiula bamwiula.—1 Kod. 2:16.
Bulunda na Kidishitu Dyalelo
14. Lelo Yesu wālaile kulonga’ka “pamfulo ya panopantanda”?
14 Bavule mu myaka katwa kabajinji bāmwene Yesu mpala na mpala, kadi bamo bāmumona pa kupwa kusanguka. I kimweke patōka’mba batwe ketudipo na dino dyese. Penepa tukekala balunda na Kidishitu muswelo’ka? Muswelo umo, i kukōkela ku buludiki bwaetupa kupityila ku kabumbo ka umpika wa binebine, udi na manwa, kabundilwe na banababo na Yesu bashingwe māni a mushipiditu bakidi bōmi pano panshi. Yesu wālaile amba “pamfulo ya panopantanda,” ukatūla umpika wa kutala “lupeto lwandi lonso.” (Mat. 24:3, 45-47) Dyalelo, bavule bene bakimba kwikala balunda na Kidishitu kebabadilwapo mu kano kabumbo ka umpika. Lelo muswelo obamonanga bwendeji butamba kudi kabumbo ka umpika wa binebine ulombolanga namani mwikadile bulunda bwabo na Kidishitu?
15. Le i bika bilombola amba muntu i mukōko nansha mbuji?
15 Tanga Mateo 25:31-40. Yesu wātelele boba bakabunda kabumbo ka umpika wa binebine bu banabetu. Mu kyelekejo kya kusansanya mikōko mu bambuji, Yesu wānene patōkelela amba ukata mutyima ku muswelo ulongelwa banababo bintu. Wēsambile amba muswelo umo wa kuyuka mwishidile mukōko ne mbuji i wa kumona mulongela muntu “ku kamo katyutyu ka boba [banababo].” Nanshi boba badi na lukulupilo lwa pano panshi bakalombola dibajinji amba basaka kupwana na Kidishitu na kukwatakanya kabumbo ka umpika wa binebine.
16, 17. I muswelo’ka otukalombola bulunda bwetu na banababo na Kidishitu?
16 Shi ukulupile kwikala pano panshi mu Bulopwe bwa Leza, le ukalombola namani kipwano kyobe na banababo na Kidishitu? Tutalei’tu miswelo isatu. Umbajinji, i na kwingila mwingilo wa kusapula na mutyima umo. Kidishitu wāsapwidile banababo kusapula myanda miyampe pano pa ntanda ponso. (Mat. 24:14) Inoko, bashingwe māni bashele’ko dyalelo pano pa ntanda kebwanyapo kuvuija kino kiselwa pampikilwa bukwashi bwa bapwani nabo, mikōko mikwabo. Bine, ponso patambila mikōko mikwabo mu mwingilo wa kusapula, ikwashanga’ko banababo na Kidishitu kuvuija mwingilo wabo ukola. Kabumbo ka umpika wa binebine, udi na manwa, kafwijanga’ko bininge pa buno bulunda, monka mufwijija’ko Kidishitu.
17 Muswelo wa bubidi ukokeja boba badi mu kabumbo ka mikōko mikwabo kukwasha’ko banababo na Kidishitu i na kukwatakanya mwingilo wa busapudi na lupeto. Yesu wākankamikile balondi bandi amba basambe bulunda na “lupeto lwa bukondame.” (Luka 16:9) Shako ketukokejapo kupota bulunda bwetu na Yesu ne na Yehova. Ino shi twingidija bituntwa byetu mwanda wa kwendeleja kumeso tumweno twa Bulopwe, nabya tulombolanga bulunda ne buswe bwetu, ke enkapo mu binenwa, ino i ne “mu bilongwa bya binebine.” (1 Yoa. 3:16-18) Tukwatakanyanga na luno lupeto, kitatyi kyotutambila mu mwingilo wa kusapula, kitatyi kyotutūla lupeto lwa kūbaka mobo a kupwidila’mo ne kwialongolola, ne kyotutūla mukōlo wa kukwasha mwingilo wa busapudi wingilwa ntanda yonso. Tutūle lupeto luvule nansha lutyetye, Yehova ne Yesu bafwijanga’ko na bubine potupana na mutyima tō.—2 Kod. 9:7.
18. Mwanda waka tufwaninwe kukōkela buludiki bwimanine pa Bible buletwa na bakulumpe mu kipwilo?
18 Muswelo wa busatu otukokeja batwe bonso kulombola amba twi balunda ba Kidishitu i wa kulonda bwendeji buletwa na bakulumpe mu kipwilo. Bano bana-balume i batongwe na mushipiditu sandu mu buludiki bwa Kidishitu. (Ef. 5:23) Mutumibwa Polo wāsonekele amba: “Kōkelai boba bemulelele, ne kwibakōkelelela.” (Bah. 13:17) Kyaba kimo, bikalanga bikomo kukōkela buludiki bwimanine pa Bible bwitupebwa na bakulumpe. Ke twi bantu tuyukile kubulwa kubwaninina kwabo, ne kino kibwanya kunyengakanya muswelo otumona madingi abo. Inoko Kidishitu, Mutwe wa kipwilo, usangelanga kwingidija bano bana-balume bakubulwa kubwaninina. O mwanda muswelo otumona lupusa lwabo utalanga bulunda botupwene na Kidishitu. Shi tuleke kumona’nka bilubo bya bakulumpe ne shi tulonda buludiki bwabo na nsangaji, nabya tubalombola amba tuswele Kidishitu.
Kwa Kutana Balunda Bayampe
19, 20. Lelo i bāni botukokeja kusokola mu kipwilo, ne i bika byotukabandaula mu kishinte kilonda’ko?
19 Yesu witutele mutyima, ke enkapo kupityila ku butadi bwa bakumbi ba buswe, ino i ne kupityila ku balolo, batutu, ne bakaka ba ku mushipiditu botudi nabo mu kipwilo. (Tanga Mako 10:29, 30.) Powashilwile kwilunga ku bulongolodi bwa Yehova, lelo babutule bobe balongele’po namani? Na bya dyese bakukwatakenye mu bukomo bowadi ulonga bwa kufwena kudi Leza ne kudi Kidishitu. Ino kyaba kimo Yesu wādyumwine amba “muntu ukashikibwa’nka na ba mu njibo yabo.” (Mat. 10:36) Bine, buya’byopo pa kuyuka amba mu kipwilo mudi bantu bakokeja kwitulamata kupita ne bamwanetu ba ku mashi!—Nk. 18:24.
20 Polo wāpwene na bantu bavule, monka mwikilombwela lwimu lwāimwine bantu ku mfulo kwa mukanda wandi ku kipwilo kya mu Loma. (Loma 16:8-16) Mutumibwa Yoano nandi uvuya mukanda wandi wa busatu na bino binenwa amba: “Naimunapo balunda nāmi pa dijina pa dijina.” (3 Yoa. 14) I kimweke patōka’mba nandi wādi na balunda bavule ba pa mutyima. Le tukeula namani kimfwa kya Yesu ne kya bana ba bwanga babajinji kya kutamija ne kulama bulunda buyampe na batutu ne bakaka ba ku mushipiditu? Kishinte kilonda’ko kikaleta malondololo ku kino kipangujo.
Ukalondolola Namani?
• Lelo Yesu wāshile kimfwa’ka kya kwikala mulunda muyampe?
• I muswelo’ka wāitabije bana ba bwanga bulunda bwa Yesu?
• Le tukelombola namani amba twi balunda na Kidishitu?
[Bipangujo bya Kifundwa]
[Kifwatulo pa paje 21]
Yesu wādi uta mutyima ku bilanga balunda nandi ne mobeivwanina
[Kifwatulo pa paje 23]
Le tukalombola namani mutyima wetu wa kupwana na Kidishitu?