Le Milombelo Yobe Ilombola Namani Byodi?
Le Milombelo Yobe Ilombola Namani Byodi?
“Ē! abe wivwananga kulombela, kudi abe ko kukāya bantu bonso.”—MIT. 65:2.
1, 2. Mwanda waka bengidi ba Yehova bamulombanga na kikulupiji?
YEHOVA kadipo na kapukutwi pamulomba bengidi bandi ba kikōkeji. Tukulupile amba witwivwananga. Nansha shi midiyo ne midiyo ya Batumoni ba Yehova abalombe Leza mu kitatyi kimo, milombelo keikokejapo ‘kwikonga.’
2 Davida, kaimba wa mitōto wādi ukulupile amba Leza wivwananga kulomba kwandi, paāimbile amba: “Ē! abe wivwananga kulombela, kudi abe ko kukāya bantu bonso.” (Mit. 65:2) Milombelo ya Davida yāimvwenwe mwanda wādi mutōtyi wa Yehova wa kikōkeji. Penepa tukokeja kwiipangula amba: ‘Lelo milombelo yami ilombola amba nkulupile mudi Yehova ne amba ntele mutyima bininge ku mutōtelo utōka? Le milombelo yami ilombola namani byondi?’
Fwena Kudi Yehova na Kwityepeja
3, 4. (a) Lelo tufwaninwe kufwena Leza mu milombelo na ngikadilo’ka? (b) Le tukalonga bika shi “mifwatakanyo” yetu itususula pangala pa bubi bukatampe?
3 Tufwaninwe kufwena kudi Leza shi tusaka emvwane milombelo yetu. (Mit. 138:6) Tufwaninwe kulomba Yehova etubandaule’nka na mwaābandawidile Davida wānene amba: “Mandaule, abe Leza, uyūkile mutyima wami, untompe, uyūke mifwatakanyo yami. Kadi umone shi kudi dishinda dya bubi mudi ami, kadi unkunkuje mu dishinda dya nyeke.” (Mit. 139:23, 24) Ketwakalomba’nka bitupu ino kadi twitabijei kubandaulwa na Leza ne kwitabija madingi a Kinenwa kyandi. Yehova ‘witukunkujanga mu dishinda dya nyeke,’ na kwitukwasha tulonde dishinda ditwala ku būmi bwa nyeke.
4 Le bikekala namani shi “mifwatakanyo” yetu itususula pangala pa bubi bukatampe? (Tanga Mitōto 32:1-5.) Kukimba kubalaja mutyima wa mundamunda witutopeka kukokeja kwitupwa bukomo pamo bwa mutyi ūma mu mulanga wa bushipo. Davida wājimije nsangaji yandi, pakwabo ne kubela, mwanda wa bubi bwandi. Bine, kwisāsa kwandi ku meso a Leza kwāmusengele! Langa’po bidi nsangaji yāimvwene Davida paāyukile amba, ‘walekelwa ku kujilula kwandi,’ ne amba Yehova wamufwila lusa. Kwisāsa bubi kudi Leza kukokeja kuleta busengi, kadi bukwashi bwa bakulumpe Bene Kidishitu nabo bukomejanga muntu ulubile ku mushipiditu.—Nk. 28:13; Yak. 5:13-16.
Wisāshile Leza ne Kumufwija’ko
5. Lelo kwisāshila Yehova kushintulula bika?
5 Shi mutyima wituzumbazumba pa mwanda kampanda, tulondei madingi a Polo anena’mba: “Kemukizumbazumba, nansha pamo pene; ino mu byonso byo musaka muyūkije’byo kudi Leza monka mu kulombela, ne mu kumwisashilapo, ne kumufwija ponka.” (Fid. 4:6) ‘Kwisāshila’ i “kuzenza na kwityepeja.” Tufwaninwe kukimba bukwashi ne buludiki bwa Yehova, nakampata potudi mu kyaka nansha mu kupangwapangwa.
6, 7. I buluji’ka bukwabo botufwijijanga’ko Leza mu milombelo yetu?
6 Inoko shi tulombela enka potusaka kintu, kino kikalombola bika? Polo wānene amba muyūkije’byo kudi Leza monka mu kulombela “ne kumufwija ponka.” Bine tudi na bubinga bwa kufwija’ko pamo bwa Davida wānene amba: “A Yehova, bukatampe bo bobe ne bukomokomo, ne ntumbo, ne bushindañani, ne bulopwebo; mwanda byonsololo bidi mūlu ne panopanshi i byobe; bulopwe bo bobe, a Yehova, kadi wazunzulwa bwa mutwe peulu pa byonsololo. . . . Ino pano namino Leza wetu, tubakufwija, ne kutendela dijina dyobe dya ntumbo.”—1 Bil. 29:11-13.
7 Yesu wāfwijije’ko Leza pangala pa byakudya, ne pa mukate ne vinyu ya pa Bidibwa bya Kyolwa bya Mfumwetu. (Mat. 15:36; Mako 14:22, 23) Kutentekela pa kino, ‘tufwijanga Yehova’ “pa mwanda wa mīngilo yandi ya kutendelwa pa bāna ba bantu,” “pa mwanda wa kutyiba-mambo [kwandi] koloke,” ne pa kinenwa kyandi, ko kunena’mba, musapu utanwa mu Bible.—Mit. 107:15; 119:62, 105.
Kulombela pa Mwanda wa Bakwabo
8, 9. Mwanda waka tufwaninwe kulombela pa mwanda wa bakwetu Bene Kidishitu?
8 Na bubine tulombelanga pa myanda yetu, ino tufwaninwe kwela’mo ne bakwetu—enka ne Bene Kidishitu boketuyukilepo pa majina. Mutumibwa Polo nansha byakādipo uyukile betabije bonso ba mu Kolose wāsonekele amba: “Tubafwijako Leza shandya Mfumwetu Yesu Kidishitu, ne kwimulombelela nyeke, pa kwivwana mo mwaitabijija kwitabija kwenu mudi Kidishitu, ne lusa lo mudi nalo kudi bapandulwemo bonso.” (Kol. 1:3, 4) Kadi Polo wālombelele Bene Kidishitu ba mu Tesalonika. (2 Tes. 1:11, 12) Milombelo ya uno muswelo ilombolanga byotudi ne motumwenine batutu ne bakaka mu lwitabijo.
9 Milombelo yotulombela pa mwanda wa Bene Kidishitu bashingwe māni ne bapwani nabo “mikōko mikwabo,” ilombolanga amba tutele bulongolodi bwa Leza mutyima. (Yoa. 10:16) Polo wālombwele batōtyi nabo bamulombelele amba apebwe “kyakanwa kya kwasama mu kyakanwa [kyandi], kya kwibalombola, ne moyo mwine mpika, kyokya kifībwe kya myanda-miyampe.” (Ef. 6:17-20) Lelo tulombelanga pa mwanda wa Bene Kidishitu bakwabo?
10. Kulombela mwanda wa bakwetu kulombola bika potudi?
10 Kulombela pa mwanda wa bakwabo kukokeja kushinta muswelo otwibamona. Shi ketusenswepo muntu kampanda inoko tulombela pa mwanda wandi, le tubwanya namani kubulwa buswe kwadi? (1 Yoa. 4:20, 21) Milombelo ya uno muswelo ikankamikanga ne kulengeja bumo bwa bu bana na bana. Kadi, ino milombelo ilombola’mba tudi na buswe na bwa Kidishitu. (Yoa. 13:34, 35) Ino ngikadilo ibadilwa mu kipa kya mushipiditu wa Leza. Lelo tulombanga kupebwa mushipiditu sandu, tulomba Yehova etukwashe twikale na “buswe, nsangaji, ndoe, kitūkijetyima, kanye, buyampe, lwitabijo, kutalala, kwīfula”? (Luka 11:13; Ngat. 5:22, 23, New World Translation) Shi i amo, binenwa byetu ne bilongwa byetu bikalombola’mba tunangilanga ne kumwena būmi mu mushipiditu.—Tanga Ngalatea 5:16, 25.
11. I kika kinenenwa amba i biyampe kunena bakwetu balombele pa mwanda wetu?
11 Shi tuyukile amba betu bana bekalanga na mutyima wa kutentula pobalonga ekizame, nabya tufwaninwe kulombela pa mwanda wabo ne kwibapa madingi a mu Bisonekwa amba bekale bampikwa budimbidimbi ne kuleka kulonga bibi. Polo wānene Bene Kidishitu ba mu Kodinda amba: “Nombelanga kudi Leza na’mba mwakoba kibi.” (2 Kod. 13:7) Milombelo ya kwityepeja namino isangajanga Yehova ne kulombola amba tudi biyampe. (Tanga Nkindi 15:8.) Pamo bwa mutumibwa Polo, tukokeja kunena banabetu balombele pangala petu. Wāsonekele amba: “Mwikale kwitulombelelapo; ke-twi-bantu bātwe tusumininwe twa’mba, tudi ne mutyima wa mundamunda mulumbuluke wakusaka kulumbuluka biyampe, senene, shē, umbintu byonso.”—Bah. 13:18.
Milombelo Yetu Ilombola Bivule
12. Le i bika bifwaninwe kubadilwa mu milombelo yetu?
12 Lelo milombelo yetu ilombola amba twi Batumoni ba Yehova ba nsangaji ne bapyasakane? Lelo kulomba kwetu kwimanine mpata pa kiswa-mutyima kya Leza, pa kusapula musapu wa Bulopwe, pa kubingija bubikadi bwa Yehova, ne pa kuyukanya buujila bwa dijina dyandi? Bino byobifwaninwe kubadilwa mu milombelo yetu, monka mwikilombwela lulombelo lwa kulondela’po lwa Yesu lushilula namino amba: “Abe Tata wetu wa mūlu, dijina dyobe dijile kijila. Bulopwe bobe bufike. Muswidile mutyima obe mūlu ne panopantanda pene i monka.”—Mat. 6:9, 10.
13, 14. Lelo milombelo yetu isokola bika potudi?
13 Milombelo yetu kudi Leza isokola bidi mu mityima, byotutele’ko mutyima, ne byotwabila. Yehova uyukile bidi munda mwetu. Nkindi 17:3 inena amba: “Mutēko wa kulengula i wa ndalama, kadi ne nkelwa i ya nsahabu; ino nanshi Yehova utompanga mityima’ya.” Yehova umonanga bidi mu mutyima wetu. (1 Sam. 16:7) Ujingulwile motumwena kupwila, busapudi, ne batutu ne bakaka mu kipwilo. Yehova kedilwepo byotulangila ‘banababo’ na Kidishitu. (Mat. 25:40) Yehova upotolwele shi bine tusaka kwibalombelela nansha tupitulukanga’mo bitupu. Yesu wānene amba: “Pa kulombela napo kokipituluka bitupu bitupu, wa dimo kō dimo, monka mulongelanga baJentaila, mwanda abo batwala [bya bubela] ku mutyima’mba: Twivwanibwe pa kuvudija byakunena.”—Mat. 6:7.
14 Byotunena mu milombelo bisokola kadi ne muswelo otwiubije mudi Leza. Davida wānene amba: “Abe [Yehova] wadi mpakala yami. Kitēba kikomo ku walwana nami. Nkashikilwanga nyeke mu dipema dyobe; nkobanga padi fututu mu mapapa obe.” (Mit. 61:3, 4) Twikalanga na mutyima-ntenke ne kulamibwa na Leza, kitatyi ‘kyaetuputa dipema dyandi.’ (Kus. 7:15) Bine buya’byopo kufwena kudi Yehova mu milombelo koku tukulupile amba ‘udi padi batwe’ mu matompo onso a lwitabijo lwetu!—Tanga Mitōto 118:5-9.
15, 16. Lelo milombelo ikwasha tuyuke bika pa madyese otwabila kufikila’po mu kipwilo?
15 Kulomba Yehova pampikwa budimbidimbi kwitukwasha tujingulule mwine mwikadile bine byotulanga mu mutyima. Kimfwa, shi tusaka kwingila bu batadi mu bantu ba Leza, lelo i pa mwanda tukimbanga kukwasha ne kwendeleja tumweno twa Bulopwe kumeso? Nansha i pa mwanda “wakusanswa bukatampe” ne ‘kubikadila bakwenu na lupusa’? Bino ke abyopo bifwaninwe kwikala mu bantu ba Yehova. (Tanga 3 Yoano 9, 10; Luka 22:24-27, MB.) Shi twabila madyese na mutyima umbi, kulomba Yehova Leza pambulwa budimbidimbi kukasokwela’o patōka ne kwitukwasha tushinte pokewaadile miji.
16 Bakaji Bene Kidishitu bakokeja kwabila amba babo balume bekale bengidi ba mingilo pakwabo nansha bu batadi, bakulumpe. Bano bakaka babwanya kulongela mungya ano malangatyima obatela mu milombelo ya pafula na kwikankila’ko kuleta kimfwa kya mwiendelejo muyampe. Kino i kya kamweno, mwanda binenwa ne mwiendelejo wa ba mu kisaka kya tutu udi na lupusa mu muswelo obamumona mu kipwilo.
Kwimanina Bantu mu Milombelo
17. Mwanda waka kwikokela pa bunka i kuyampe kitatyi kyotulombela?
17 Divule Yesu wādi ushiya kibumbo ne kwikokela pa bunka mwanda wa kulombela kudi Shandi. (Mat. 14:13; Luka 5:16; 6:12) Netu tusakilwa ne kwikokela pa bunka. Tubwanya kukwata butyibi busangaja Yehova ne bwitukwasha ku mushipiditu, potulombela kwatalala, kwampikwa lunwa. Inoko Yesu wālombele mu kitango kya bantu, o mwanda tufwaninwe kubandaula mwa kulongela kino mu muswelo mwendele’mo.
18. Le i bintu’ka bifwaninwe kulama batutu mu ñeni pobemanina kibumbo mu milombelo?
18 Bana-balume ba kikōkeji bemaninanga kipwilo mu milombelo. (1 Tem. 2:8) I biyampe kupa banabetu mukenga wa kunena ku mfulo kwa milombelo amba, “amena,” ko kunena’mba “mo monka.” Pa kusaka banene’ye, bafwaninwe kwitabija byanenwa. Mu milombelo ya kulondela’po ya Yesu, kemwādipo kikukaja nansha kisanshija. (Luka 11:2-4) Kadi Yesu kāsasawilepo bisakibwa ne makambakano onso a boba bādi bateja. Kwisambila pa bitala muntu kampanda i kwendele’mo mu milombelo ya pa kasuku, ke ya mu kibumbopo. Kadi potwimanina kibumbo tufwaninwe kwijiba kusokola bifyame.
19. Le tufwaninwe kwikala namani kitatyi kilombelwa mu kibumbo?
19 Pobetwimanina mu milombelo, tufwaninwe kwikala na kityino kya ‘kwakamwa Leza.’ (1 Pet. 2:17) Bintu bimo i biyampe kulonga kitatyi kampanda ne mu kifuko kampanda, ino shi ke mu kupwila kebyendele’mopo. (Mus. 3:1) Kimfwa, shi muntu ukimba bantu bonso mu kibumbo bekwate ku makasa kitatyi kilombelwa, au mu dya mukwabo, au mu dya mukwabo. Kino kikokeja kusanshija bamo nansha kwibapuakanya, nakampata beni bampikwa kwitabija baile kwitupempula. Balume ne bakaji bamo bakokeja kwikwata mu bufyafya, ino shi abefumbakanya palombelwa mu kibumbo, boba bebamona bakokeja kukukala pa kino. Bakamona amba balume ne bakaji’ba batele mutyima bininge ku bukena bwabo pa kyaba kya kulēmeka Yehova. Nanshi byotumupele bulēme, tulongelei ‘byonsololo monka mu ntumbo ya Leza’ ne kwepuka mwiendelejo ukokeja kulabika, kusanshija nansha kukukaja bantu.—1 Kod. 10:31, 32; 2 Kod. 6:3.
Kulomba Bika?
20. I muswelo’ka okokeja kushintulula Loma 8:26, 27?
20 Kitatyi kimo tukokeja kukomenwa kuyuka bya kunena mu milombelo ya pa kasuku. Polo wāsonekele amba: “Mushipiditu nandi wakwasha bukōkekōke bwetu; ke-twi-bantu ketuyūkilepo nansha mwakulombela mwitufwanine, ehe; ino Mushipiditu, aye mwine, witusengela ne imbinzo yakubulwa ne mwakunenena. Ino aye [Leza] wakubandaula mityima uyūkile ne mutyima wa Mushipiditu.” (Loma 8:26, 27) Yehova wāsonekeje milombelo mivule mu Bisonekwa. Witabijanga ino milombelo ya kuzenza pamo bwa itamba kotudi ne kulonga walongela monka. Leza wituyukile batwe ne buluji bwa bintu byālengeje mushipiditu wandi wisambe kupityila ku balembi ba Bible. Yehova ulondololanga milombelo yetu ‘petusengela’ nansha kwitunenena mushipiditu. Mu kwenda twifunda biyampe Kinenwa kya Leza, mo mu kwenda tuvuluka bukidi bya kulombela.
21. I bika byotukabandaula mu kishinte kilonda’ko?
21 Monka motwefundila, milombelo yetu ilombolanga byotudi. Kimfwa ilombolanga muswelo otufwenene kudi Yehova ne otuyukile senene Kinenwa kyandi. (Yak. 4:8) Mu kishinte kilonda’ko, tukabandaula milombelo imoimo ne binenwa bya mu milombelo bilembelwe mu Bible. Lelo kubandaula Bisonekwa kukokeja kutenga namani muswelo otufwenanga Leza mu milombelo?
Usa Kulondolola Namani?
• Lelo tufwaninwe kufwena Yehova namani?
• Mwanda waka tufwaninwe kulombela pa mwanda wa banabetu betabije?
• Milombelo yetu isokola namani byotudi ne bidi mu mutyima?
• Tukeendeja namani kitatyi kilombelwa milombelo mu kibumbo?
[Bipangujo bya Kifundwa]
[Kifwatulo pa paje 11]
Lelo utendelanga nyeke Yehova ne kumufwija’ko?
[Kifwatulo pa paje 13]
Mwikadilo wetu potulombela mu kibumbo ufwaninwe nyeke kulēmekeja Yehova