Sanswa Kifuko Kyobe Mu Kipwilo
Sanswa Kifuko Kyobe Mu Kipwilo
“Leza watūlamo byakungitu monka mu ngitu, aki pakyo, aki pakyo, monka muswidile mutyima wandi.”—1 KOD. 12:18.
1, 2. (a) Le i bika bilombola amba muntu ne muntu ukokeja kwikala na kifuko kyasangela mu kipwilo? (b) Lelo i bipangujo’ka byotusa kubandaula mu kino kishinte?
TAMBA mu mafuku a Isalela wa kala, Yehova wātūdile’ko kipwilo bu mpangiko ya kudishisha’mo bantu bandi ku mushipiditu ne kwibaludika. Kimfwa, Bene Isalela pa kupwa kunekenya kibundi kya Ai, Yoshua “walombola myanda yonsololo ya kijila, dyese ne mafingo, mungya byonso bilembelwe mu mukanda wa kijila . . . ku meso a kipwilo kya Isalela.”—Yos. 8:34, 35.
2 Mu myaka katwa kabajinji K.K., Polo wāsapwidile Temote mukulumpe Mwine Kidishitu amba kipwilo kya Bwine Kidishitu i “njibo ya Leza,” “kipanda, ne kyalwilo kya binebine.” (1 Tem. 3:15) “Njibo” ya Leza dyalelo i bu bana na bana bwa Bene Kidishitu ba bine. Mu mukanda umbajinji wa ku bukomo bwa mushipiditu wātumine Polo ku Bene Kodinda, wādingakenye mu shapita wa 12 kipwilo na ngitu ya muntu. Unena amba nansha bya ku ngitu byobingila mingilo mishileshile, ino byonso bidi na mvubu. Polo usoneka’mba: “Leza watūlamo byakungitu monka mu ngitu, aki pakyo, aki pakyo, monka muswidile mutyima wandi.” Kupwa wanena ne kunena’mba “byobya byakungitu byo tufwatakanya’mba: Byo bileme patyetye, abyo twibibīkilangapo buleme bwa kutabukamo.” (1 Kod. 12:18, 23) Nanshi mwingilo wingila muntu moloke mu njibo ya Leza ke muyampepo kadi ke mubipo kutabuka wa Mwine Kidishitu mukwabo wa kikōkeji. I kwishila bitupu kwayo. Kadi, i muswelo’ka otukokeja kutana kifuko mu mpangiko ya Leza ne kusanswa’kyo ne kwikisangela? I bintu’ka bilengeja kifuko kyetu kikale kishile na kikwabo? Ne i muswelo’ka ukokeja ‘bantu bonso kumona motwendela tutamina’?—1 Tem. 4:15.
Tusangele Kifuko Kyetu—Namani?
3. I muswelo’ka umo wa kutana kifuko kyetu mu kipwilo ne kulombola amba twikisenswe?
3 Muswelo umo wa kutana kifuko kyetu mu kipwilo ne kulombola amba tusenswe’kyo i kwingidila pamo na “umpika wa binebine, udi na manwa” ne kyandi Kitango Kyendeji. (Tanga Mateo 24:45-47.) Tusakilwa kubandaula muswelo otwitaba ku buludiki bwitupa kano kabumbo ka umpika. Kimfwa, umbula bwa myaka, tutambulanga madingi atala pa muvwadilo, mwidyangwilo, kwipwija mukose, ne mwingidijo umbi wa Entelenete. Lelo tutejanga na katentekeji ano madingi mayampe amba tulamwe ku mushipiditu? Le madingi atala kwikala na kibidiji kya kutōta nyeke butōtyi bwa kisaka nao le? Lelo tulamine ano madingi ku mutyima ne kwitūdila’ko kitatyi kya kutōta kyolwa? Shi twi bankunga, le twitūdile’ko kitatyi kya kwifunda Bible pa kasuku? Yehova ukesela muntu ne muntu ne bisaka byonso shi tulonda buludiki bwa kabumbo ka umpika.
4. Lelo i ku bintu’ka kotufwaninwe kubanga shi tutonga bintu bitutala?
4 Muntu ubwanya kulanga amba myanda ya kwipwija mukose, kuvwala ne kwidyangula i myanda imutala aye mwine. Ino ku Mwine Kidishitu mwipāne usangedile kifuko kyandi mu kipwilo, kwitongela bintu byasaka ke akopo kete kufwaninwe kumuludika mu butyibi bwandi. Ufwaninwe nakampata kubanga mumwena’po Yehova, monka mokilombwedilwe mu Bible, Kinenwa kyandi. Musapu wa mu Bible ufwaninwe kwikala bu ‘kinanu kya ku maulu etu, kadi kitōkeji kya mu dishinda dyetu.’ (Mit. 119:105) Kadi potutonga bintu bitutala, tufwaninwe kadi kubanga mwingilo wetu, ne bantu bakwabo, ba munda ne ba panja pa kipwilo.—Tanga 2 Kodinda 6:3, 4.
5. Mwanda waka tufwaninwe kwilama ku mushipiditu wa bwanapabo?
5 “Mushipiditu wa kulonga mudi bāna bampikwa kikōkeji” ubasambakana pamo bwa luvula lotufoma. (Ef. 2:2) Uno mushipiditu ubwanya kwitulengeja tumone amba ketusakilwapo kuludikwa na bulongolodi bwa Yehova. Na bubine, ketusakilepo kwikala bwa Deotefese, wādi ‘upela kusepelela kyonso kinene mutumibwa Yoano.’ (3 Yoa. 9, 10) Tusakilwa kwilama ku mushipiditu wa bwanapabo. Ketukikolwa kulwa mu binenwa nansha mu bilongwa na mukola wingidija Yehova dyalelo. (Umb. 16:1-3) Ino pa kyaba kya kino, tufwaninwe kusangela dyese dyetu dya kwingidila pamo na kabumbo ka umpika. Ne mwene tufwaninwe kulonga bukomo bwa kukōkela ne kukōkelelela boba betulelele mu kipwilo kyetu?—Tanga Bahebelu 13:7, 17.
6. Mwanda waka tufwaninwe kubandaula ngikadilo yotudi’mo?
6 Muswelo mukwabo wa kulombola amba tusangedile kifuko kyetu mu kipwilo i kubandaula ngikadilo yotudi’mo ne kulonga byonso byotubwanya mwanda wa ‘kutumbija bwingidi bwetu’ ne kupeja Yehova bulēme. (Loma 11:13) Bamo bakokeja kwingila bu bapania ba lonso. Bakwabo nabo bengilanga mu mwingilo wa kitatyi kyonso, bu bamishonele, batadi bendakana, ne bu bengidi ba ku Betele kujokoloka ntanda yonso. Batutu ne bakaka bavule bene bakwashanga’ko mu lūbako lwa Mobo a Bulopwe. Bantu ba Yehova bangi bene bengilanga mwanda wa kuvuija bisakibwa bya ku mushipiditu bya bisaka byabo koku kadi bengila yenga ne yenga mu mwingilo wa busapudi. (Tanga Kolose 3:23, 24.) Tukulupile amba potwipāna ne mutyima tō mu mwingilo wa Leza ne kulonga bukomo bwa kumwingidila na mutyima onso, ketukabulwepo kifuko mu mpangiko yandi.
Bintu Bilengeja Kwikale Kwishila
7. Kifuko kyotudi’po mu kipwilo kilondanga mungya ngikadilo yetu, shintulula.
7 I kipite buya kubandaula ngikadilo yetu mwanda mu ludingo kampanda, kifuko kyetu mu kipwilo kilondanga mungya byobya byotubwanya ne byotufwaninwe kulonga. Kimfwa, kifuko kidi’po tutu mu kipwilo i kishile na kidi’po kaka mu ludingo kampanda. Myaka, bukomo, ne bintu bikwabo nabyo bikokeja kushiyañanya byotubwanya kulonga mu mwingilo wa Yehova. Nkindi 20:29 inena’mba: “Ntumbo ya bansogwalume i bukomo bwabo: Kabidi būya bwa banunu bana-balume i mvwi pa mutwe.” Bansongwa mu kipwilo bengilanga kaji kavule mwanda badi na lupaka, ino banunu abo bakokeja kukwasha kipwilo bininge mwanda badi na tunangu ne bwino. Kadi tunenwe kuvuluka amba kintu kyonso kyotulonga mu bulongolodi bwa Yehova i buntu bwandi bitupu.—Bil. 14:26; Loma 12:6-8.
8. Lelo byotusaka bitala namani byobya byotulonga mu kipwilo?
8 Tala kimfwa kya bana-bakaji babidi, ba mukulu ne nkasa, kilombola kintu kikwabo kilengeja kwikale kwishila kwa kifuko mu kipwilo. Bonso i batambule mapolome. Kadi badi mu ngikadilo imo. Bambutwile babo i balonge bukomo bwa kwibakankamika bonso bubidi bengile mwingilo wa bu pania wa lonso shi abapu masomo. Ino pa kupwa masomo, umo wāshilula mwingilo wa bupania, ino mukwabo watwela pa kaji ka kyaba kyonso. Penepa i kika kyebashalañanya? I byobasaka. Le kadi, muntu ne muntu walongele enka byasaka. Mwene ye mobikadile ne kotudi? O mwanda tufwaninwe kulanguluka na kusumininwa pa byotusaka kulonga mu mwingilo wa Leza. Le tubulwe’po kwingila’o bininge, pakwabo twasendulula ne ngikadilo yetu?—2 Kod. 9:7.
9, 10. I bika byotufwaninwe kulonga shi tubabulwe mutyima wa kusaka kulonga bivule mu mwingilo wa Yehova?
9 Le bikekala namani shi ketudipo na mutyima wa kulonga bivule mu mwingilo wa Yehova ne kulonga bityetye mu kipwilo? Polo unena mu mukanda wandi ku Bene Fidipai amba: “Leza uningije mudi bānwe ne pa kusaka, ne pa kuningija kwine kumo, ku mutyima wandi mulumbuluke.” Eyo, Yehova ukokeja kwituningija ne kushinta kusaka kwetu.—Fid. 2:13; 4:13.
10 Shi ke pano, tubulwe’po kulomba Yehova mutyima wa kusaka kulonga kiswa-mutyima kyandi? Mo mwālongele Davida, Mulopwe wa Isalela wa kala. Wālombele amba: “Bandaīje mashinda obe, abe Yehova; ne kumfundija makoka obe. Banombole mu byabinebine byobe, umfundije, ke-wi-muntu abe wi Leza wa lupandilo lwami; kudi abe e ko nkungila dyuba dyonso ne bukata.” (Mit. 25:4, 5) Tukokeja kulonga namino shi tulomba Yehova etupe mutyima wa kusaka kulonga bimusangaja. Potulangulukila pa mumwena Yehova Leza ne wandi Mwana byobya byotulonga mu kwingidila tumweno twabo, mityima yetu ibafwijanga’ko mpata. (Mat. 26:6-10; Luka 21:1-4) Uno mutyima wa kufwija’ko o witutonona tulombe Yehova etupe mutyima wa kusaka kwendelela ku mushipiditu. Mupolofeto Isaya wāshile kimfwa kya uno mutyima otunenwe kutamija. Paāivwene diwi dya Yehova dipangula amba: “Lelo o nkatuma i ani; i ani le uketwendela, a?” wālondolwele amba: “Ami uno, ntume bidi.”—Is. 6:8.
Endelela Kumeso—Namani?
11. (a) Mwanda waka batutu basakilwa kufikila pa kusela biselwa mu bulongolodi? (b) Lelo tutu ukafikila namani pa ano madyese a mingilo?
11 I kimweke amba kusakilwa batutu ba kusela biselwa, mwanda mu mwaka wa mingilo wa 2008 kwābatyijibwe bantu 289678 ntanda yonso. Lelo tutu ukokeja kwitaba namani pa kino kisakibwa? Mu kīpi, ufwaninwe kwielela’ko kubwanya bisakibwa bya mu Bisonekwa pa kwikala mwingidi wa mingilo nansha mukulumpe. (1 Tem. 3:1-10, 12, 13; Tet. 1:5-9) Le tutu ukeelela’ko namani pa kubwanya bino bisakibwa bya mu Bisonekwa? Na kutambila bininge mu busapudi, na kukankamena mingilo yobamupa pa kipwilo, na kwipānina mu kulumbulula bilondololwa byaleta ku kupwila, ne na kuta mutyima banababo betabije. Nankyo walombola amba usenswe kifuko kyandi mu kipwilo.
12. Le i muswelo’ka ukokeja kulombola bankasampe bupyasakane bwa mu bubinebine?
12 Lelo banwe batutu bankasampe nenu, kutabukidila, boba badi na myaka munshi mwa makumi abidi, mubwanya namani kwendelela kumeso mu kipwilo? Mukokeja kulonga bukomo bwa kutama “mu ñeni yonso ya mushipiditu, ne mu manwa a kuyūkidila” na kwikala na buyuki bwa mu Bisonekwa. (Kol. 1:9) Kwifunda na kininga Kinenwa kya Leza ne kulondolola ku kupwila kukalengeja na bubine mwikale nabyo. Bankasampe bakokeja kadi kwielela’ko kufikila pa bisakibwa bya kutwela pa “kibelo kikatampe kya mīngilo” palapala ya kitatyi kyonso. (1 Kod. 16:9) Kununupila mu mwingilo wa Yehova o mwikadila wa umbūmi usangaja kadi dyo dishinda dileta madyese a ntanda ne miseke.—Tanga Musapudi 12:1.
13, 14. Le i mu miswelo’ka mukokeja bakaka kulombola amba basangedile mwingilo wabo mu kipwilo?
13 Bakaka nabo bakokeja kulombola amba basenswe mwingilo wabo wa kufikidija byobya binenwe mu Mitōto 68:11, mutangwa’mba: “Mfumwetu upana mwanda; bāna-bakaji bakusapula myanda i kibumbo kya ntanda ne ntanda.” Nanshi muswelo umo wa kamweno wa bakaka kulombola amba bafwijanga’ko pangala pa kifuko kyabo mu kipwilo i na kwingila mwingilo wa kulonga bana ba bwanga. (Mat. 28:19, 20) Pa kino, patambila bakaka mu mwingilo wa busapudi ne pa mfulo, ne pobepāna mu uno mwingilo, balombolanga amba basenswe mwingilo wabo mu kipwilo.
14 Polo pa kusonekēla Tetusa, wānenene amba: “Bāna-bakaji bakulumpe nabo mo monka, . . . bēkale bafundiji ba bilumbuluke; amba bafundije bansongwakaji kusanswa balume babo, ne bāna babo bēne kumo, ne kwilemeka senene, abo bene, ne kwikala bakutōka tō, bakuloeja mu mōbo, ne luya lwa kukōkela balume babo, amba mwanda wa Leza wakatukwa.” (Tet. 2:3-5) Bine, bakaka batame bakokeja kulonga bilumbuluke mu kipwilo! Pobalēmeka batutu badi na biselwa ne pobakwata butyibi buyampe mu muvwadilo, mwidyangwilo ne mu kwipwija mukose, bashilanga bakwabo kimfwa kiyampe ne kulombola amba bakwete na mutyika kifuko kyabo mu kipwilo.
15. Lelo kaka nkunga ubwanya kunekenya namani bukunga bwandi?
15 Kyaba kimo, kaka wampikwa kusongwa ukokeja kukolelwa kutana kifuko mu kipwilo. Kaka umo wakolelwe namino, unena’mba: “Bunka bukola, bukokeja kukulengeja wimone bu polo wa kyenda bunka.” Pobamwipangwile muswelo walwa na buno bukunga, unena’mba: “Milombelo ne kwifunda byo bintu binkwasha kulama kifuko kyami. Nefundanga kuyuka mumwena Yehova. Ebiya nalonga bukomo bwa kukwasha bakwetu mu kipwilo. Kino kinkwashanga ndeke kulangalanga pa bukunga bwami.” Yehova wālombwele Davida mungya Mitōto 32:8, amba: “Nkakupanga ñeni ne dīso dyami ponka padi abe.” Bine, Yehova utele mutyima bengidi bandi bonso, kubadila’mo ne bakaka bankunga, kadi wibakwasha bonso batane kifuko kyabo mu kipwilo.
Lama Kifuko Kyobe
16, 17. (a) Mwanda waka kwitabija lwito lwa Yehova lwa kubadilwa mu bulongolodi bwandi i butyibi bulumbuluke botukwete? (b) Le tukalama namani kifuko kyetu mu bulongolodi bwa Yehova?
16 Yehova i mwite na buswe mwingidi wandi umo ne umo amba apwane nandi. Yesu wānene amba: “Nansha umo wakwila kwami aye mwine, poso’nka Tata wakuntuma amukokele ko ndi.” (Yoa. 6:44) Mu midiyo ne midiyo ya bantu badi pano pa ntanda, Yehova i mwitwite muntu ne muntu bwa pala twikale mu kipwilo kyandi dyalelo. Kwitabija luno lwito i butyibi buyampe botukwete. Bo būmi ne kitungo kyetu kine kya umbūmi. Bine, nsangaji bungi’yo ne kuloelelwa byotwimwena potulamine kifuko kyetu mu kipwilo!
17 Kaimba wa mitōto wāimbile amba: “Abe Yehova, nswele mwikadilo wa munjibo mobe.” Kadi wabweja’ko amba: “Lwayo lwami lwimene padingakane; mu bipwilo nkatōtanga Yehova.” (Mit. 26:8, 12) Leza wa bine utūdīle umo ne umo kifuko mu bulongolodi bwandi. Wivwane twendelele kulonda buludiki bwandi ne kuputumina mu mwingilo wandi, tukalama kifuko kyetu kilēme mu mpangiko ya Yehova.
Lelo Ukivulukile?
• Mwanda waka i biyampe kulanga amba Bene Kidishitu bonso badi na kifuko mu kipwilo?
• Tukalombola namani amba tusenswe kifuko kyetu mu bulongolodi bwa Yehova?
• I bintu’ka bilengeja kwishila kwa bifuko mu kipwilo?
• Lelo Bene Kidishitu bankasampe ne batame bakokeja kulombola namani amba basenswe kifuko kyabo mu mpangiko ya Leza?
[Bipangujo bya Kifundwa]
[Kifwatulo pa paje 21]
Le batutu babwanya namani kufikila pa biselwa mu kipwilo?
[Kifwatulo pa paje 22]
I muswelo’ka ukokeja bakaka kulombola amba basenswe kifuko kyabo mu kipwilo?