Ñeni Yotuboila Kudi Yesu

Mu Būmi bwa Kisaka

Lelo bisaka bikekala na nsangaji shi bimwene busongi namani?

Busongi i kijimba kijila. Pobāipangwile Yesu shi i biyampe kwilubula, wānenene amba: “Lelo kemwatangile pa mwine, webapangile ku ngalwilo, webapangile ba mulume ne mukaji? Kadi amba, po pa mwanda wa kulonga mwana-mulume ukashia shandi, ne inandi mwine, walamatyididila mukajandi, kabidi bubidi bwabo bakēkalanga ke mubidi umo. Nanshi pano ke bakidi ne bubidi bwine ke mubidi’tu umo. I binebine kadi, kyokya kyasambakanya Leza pamo kokakolwa kwikikalañanya, nansha wi muntu ka, nansha wi muntu ka. . . . Yewa wakapanga mukajandi kwa kubulwa mwanda wa busekese, kakasonge mukwabo, nabya wapi mambo a makoji; kadi yewa wakasonga mupingwe aye wapi mambo a makoji.” (Mateo 19:4-6, 9) Shi ba mulume ne mukaji balonde madingi a Yesu ne kwilamata abo bene na bene, nabya kisaka kikekala na mutyima-ntenke ne nsangaji.

I kika kinenenwa amba kuswa Leza kuletelanga kisaka nsangaji?

Yesu wānene amba: “Ukasanswa Yehova Leza obe, ne mutyima obe onso, ne muya obe onso, ne manwa obe onso. Kino kyo kibajinji kidipo ne bukata’kyo.” Penepa kya bubidi kikatampe nakyo i kijila’ka? Yesu wānene amba: “Ukasanswa mukwenu [kubadila’mo ne yewa oshikete nandi—mu kisaka kyenu] na abe mwine.” (Mateo 22:37-39) Nanshi kine kileta nsangaji mu kisaka i kupwana biyampe na Yehova mwanda kuswa kotumuswele kwitutononanga twisanswe batwe bene na bene.

 Lelo balume ne bakaji bakekala na nsangaji muswelo’ka?

Balume bakokeja kusangaja bakaji babo shi balonda kimfwa kya Yesu. Na buswe bwandi, wēpānine mukajandi wa kyelekejo, ke kipwilo kadi. (Efisesa 5:25) Yesu wānene amba: “Monka mwaīdile Mwanā muntu, aye kaīdile’mba ēngidilwe mīngilo, mhm poso’mba ayeko ēbēngidile.” (Mateo 20:28) Yesu kādipo na kasusu nansha kalobolobo na boba balelele, ino wādi wibatūkija mutyima. (Mateo 11:28) O mwanda balume bafwaninwe kwingidija lupusa lwabo na kanye mwanda wa kisaka kituntulu kimwene’mo.

Bakaji nabo bakokeja kumwena mu kimfwa kya Yesu. Bible unena amba: “Kadi mutwe wa Kidishitu nao, i Leza.” Kadi unena monka amba: “Mutwe wa mwana-mukaji, i mulume.” (1 Kodinda 11:3) Yesu kādipo umona kwikala munshi mwa Leza bu ko kumulengeja akōkele. Wādi ukokele Shandi bininge. Wānene amba: “noñanga byonka bya kumutōkeja ku mutyima wandi mafuku onso.” (Yoano 8:29) Mukaji ukōkele bu mutwe bwa mulumyandi mwanda wa buswe ne kukōkela Leza uloñanga bivule mwa kwikadijija kisaka kyandi na nsangaji.

Lelo bambutwile bakaboila ñeni’ka ku muswelo wādi umwene Yesu bana?

Yesu wādi upityija kitatyi na bana ne kuta mutyima ku milangwe ne malango abo. Bible unena’mba: “Yesu pa kwibēta ba bwipi, webanena’mba: Lekai bidi, twana-twalukeke twiye kwami kemutukankaja, mhm.” (Luka 18:15, 16) Kitatyi kimo bantu bātopekele banuke bamo bālombwele na mawi makatampe lwitabijo lwabo mudi Yesu. Ino Yesu wāfwijije’ko banuke, kanena bādi bebatopeka amba: “Kemwatangile nanshi amba, mu kyakanwa kya twana, ne mu twalukeke tukyamwa, mo muneñenye mitōto.”—Mateo 21:15, 16.

Lelo bana bakaboila ñeni’ka kudi Yesu?

Yesu wāshidile bana kimfwa kilumbuluke kya kuswa bintu bya ku mushipiditu. Paādi na myaka 12, bakamutene “mu njibo ya Leza ushikete mubukata mwa bafundiji kwibomvwana, ne kwibēpangula byakwipangula.” Byāfula kwepi? “Abo bonso bakumūmvwana batendela pa ñeni yandi ne mwēbalondolwedīle.” (Luka 2:42, 46, 47) Shako buyuki bwa Yesu kebwāmwikadijepo na mitatulo. Ino, bwāmulengeje alēmeke bambutwile bandi. Bible unena amba: “Wadi wibakōkelela.”—Luka 2:51.

Shi usaka kuyukila’ko bikwabo, tala dibuku Lelo I Bika Bine Bifundija Bible? * shapita 14.

[Kunshi kwa dyani]