Bine Buludiki bwa Satana Bubakomenwa

“Ino nanshi kekukekalapo biyampe ne mubi.”—MUS. 8:13.

1. Mwanda waka kutyibilwa kusa kutyibilwa babi mambo i mwanda muyampe?

 DYAKADILWE kantu dino’di, babi bakatyibilwa mambo. Bafwaninwe kukeshintulwila pa bilongwa byabo. (Nk. 5:22; Mus. 8:12, 13) Uno i mwanda ukankamika, kupityidila ku boba basenswe boloke ne boba basusuka mwanda wa bukondame ne kasusu ka babi. Umbajinji mu boba babi bakatyibilwa mambo i Satana Dyabola shandya bibi.—Yoa. 8:44.

2. Mwanda waka kwādi kusakilwa kitatyi pa kupwija mwanda wālupukile mu Edena?

² Mu Edena, Satana muyulwe na mutyima wa kwitatula, wātonwene bantu bapele buludiki bwa Yehova. Ku mfulo, bambutwile betu babajinji bēlunga kudi Satana mu kulwa na bwendeji boloke bwa Yehova, bāikala ke babipya-mambo kwadi. (Loma 5:12-14) Na bubine, Yehova wāyukile mwādi mwa kufudila kibengo ne butomboki bwabo. Inoko, ne bipangwa byonso bya ñeni byadi bya kwimwena bipa byampikwa kwepukwa byadi bya kwibafikila. Nanshi kwādi kusakilwa kitatyi pa kupwija uno mwanda ne kulombola mu muswelo keupatanibwapo amba bano bantomboki i balube.

3. Lelo tumonanga namani maludiki a bantu?

³ Bantu byobāpelele kwendejibwa na Yehova, bādi bafwaninwe nanshi kwitūdila’ko buludiki kampanda. Mutumibwa Polo pa kusonekela banababo betabije ba mu Loma, wātelele maludiki a bantu bu “bakatampe balupusa.” Mu mafuku adi’ko Polo, bakatampe ba lupusa bādi bidi buludiki bwa Loma bwendejibwa na Mbikavu Nero, wābikele tamba 54-68 K.K. Polo amba bano bakatampe “i baboībwe na Leza.” (Tanga Loma 13:1, 2.) Le kino kishintulula’mba Polo wādi utendela buludiki bwa bantu amba i butabuke bwa Leza? Mhm, nansha dimo. Aye, wadi ukimba kulombola’mba pano pakilekele’ko Yehova maludiki a bantu, Bene Kidishitu bafwaninwe kulēmeka “kino kiboywe kya Leza” ne kwitabija bano bendeji.

Kashinda Katwala ku Musala

4. Shintulula mwanda waka buludiki bwa bantu bine i bukomenwe.

⁴ Shako, buludiki bwa bantu bwendejibwa na Satana i bukankalwe bine. Mwanda waka? Kimo bidi, mwanda kebwimaninepo pa tunangu twa Leza. Enka Yehova kete ye wa tunangu tubwaninine. O mwanda, e Muludiki umo kete ukulupilwa uyukile i umbikalo wa muswelo’ka muyampe. (Yel. 8:9; Loma 16:27) Yehova i mwishile na bantu, baboilanga ñeni divule ku bya kutompa ne ku bilubo, aye uyukile kala muswelo mulumbuluke wa kulonga bintu. Buludiki bonso bupela bwendeji bwandi i bufwe. Pa buno’tu bidi bubinga bumo—pampikwa kubadila’mo kukanina kubi kwa mutyima—muludikilo onso wa Satana kupityila ku bantu wadi wa kukankalwa tamba ku ngalwilo.

5, 6. Le mobimwekela i bika byafikije Satana alwe Yehova?

⁵ Divule muntu wa ñeni upelanga kwiela mu kintu kyamona’mba kekisapo kwendeka. Shi endele’mo ku bukomo, ukafula ku kwialakanya mwanda wa kilubo kyandi. Manga i milombole pavule pene amba kulwa na Umpangi mwine bukomo bonso kekudipo  na mvubu. (Tanga Nkindi 21:30.) Inoko, Satana pa kusabwa meso na mutyima wa kwitumbika ne kwitatula, wāvundamine Yehova. Nanshi Dyabola wātwelele pampikwa ñeni mu kashinda katwala enka ku musala.

⁶ Mwenda mafuku, kibengo kya Satana kyāmwekele mu mulopwe wa Babiloni utelelwe bu wādi witatula’mba: “Nkakanda kūlu nkazunzula kipona kyami kūlu kwine, ñenyenye ya Leza munshi; ino nkashikata pa kalūlu ka kitango, mu mutamba mulampe mwine wa kungala; ebiyampe nkakanda pangala pa makumbi’pa, makumbi muno munshi, ami kūlu; ami nkefwane Mwinemukatakatamwine.” (Is. 14:13-15) Ino milangwe mifwe ya mulopwe yākomenwe, ne musuku mwine wa bulopwe bwa Babiloni wāfula bya bumvu. Mo monka, Satana ne ntanda yandi basa kupona panopano ponka, kakangabanga!

Kine Kyobulekelwe

7, 8. Lelo kuleka kulekele Yehova bibi bikale’ko mu kitatyi kampanda i kulete byabuyabuya’ka bimo?

⁷ Bamo bakokeja kwiipangula mwanda waka Yehova kakankejepo bantu kwilunga ku mutamba wa Satana ne kulonda mpango yandi ya buludiki bwadi bwa kukankalwa. Leza byadi Mwinē bukomo bonso, wādi ukokeja kwibakankaja. (Div. 6:3) Inoko wāleka. Tunangu twandi twāmutonwene amba kuleka kukankaja butomboki bwa muntu mu kyaba kampanda kwadi kwa kukafula kuyampe. Bityebitye, Yehova wadi wa kubingijibwa amba eye Mwendeji wa boloke ne buswe, kadi amba bantu ba kikōkeji badi ba kumwena byabuyabuya mu butyibi bwa Leza.

⁸ Bine, muzo wa muntu wadi wa kwepuka bumonya-malwa shi wapelele bongojani bwa Satana ne shi wāitabije kuludikwa nyeke na Leza! Ino, butyibi bwa Yehova bwa kuleka bantu beludike mu kitatyi kampanda budi na kamweno. I bupe bininge bantu ba mityima myoloke ñeni ya kwivwana binena Leza ne kumukulupila. Pano ke myaka tutwa na tutwa, bantu batompa maludiki kapwila, ino i kutupu nansha bumo bubwenye byonso. Kino i kikwashe kukomeja batōtyi ba Leza mu lukulupilo lobadi nalo amba buludiki bwa Yehova bo bulumbuluke kutabuka. I bine, kuleka kulekele Yehova bwendeji bubi bwa Satana i kuletele bantu masusu, kubadila’mo ne batōtyi ba kikōkeji ba Leza. Inoko, kuleka kulekelwe bubi mu kitatyi kityetye i kulete kadi byabuyabuya ku bano batōtyi ba kikōkeji.

 I Butomboki Bwalengeja Yehova Atumbijibwe

9, 10. Shintulula buludiki bwa Satana mobulengejije ntumbo ya Yehova.

⁹ Kuleka kulekelwe bantu bendejibwe na Satana ne kwiludika abo bene kekushintyilepo buludiki bwa Yehova. Ino, mānga ibingija amba binenwa byānene Yelemia ku bukomo bwa mushipiditu i bya bine, bya amba bantu kebabwanyapo kwiludika abo bene. (Tanga Yelemia 10:23.) Kadi, butomboki bwa Satana bwāpele Yehova mukenga wa kulombola patōkelela ngikadila Yandi miyampe. Muswelo’ka?

¹⁰ Pano potumona musala wa buludiki bwa Satana, tumonanga padi tō ngikadila mibwaninine ya Yehova kupita moyadi ya kumwekela shi kekwadipo musala. Mu uno muswelo, Yehova i mutumbijibwe ku meso a boba bamuswele. Shabyo, bimweka bu kebitabijibwapo, ino na bubine buludiki bwa Satana bubalengeja Leza atumbijibwe. I bulombole patōka muswelo muyampe kutabuka upwa Yehova buno bulwi bulwibwa bubikadi bwandi. Pa kwelekeja buno bubinebine, tubandaulei bityetye ngikadila imoimo ya Yehova ne kumona buludiki bubi bwa Satana mobutonwenine Yehova alombole ino ngikadila mu miswelo mikwabo.

11. Lelo buswe bwa Yehova i bumweke namani?

¹¹ Buswe. Bisonekwa bitulombola amba “Leza i lusa [buswe].” (1 Yoa. 4:8) Dibajinji, kupangwa kwa bantu i kilomboji kya buswe bwa Leza. Pakwabo kadi, kupangwa kotupangilwe mu muswelo wa kingelengele ne wa kutendelwa i bukamoni bwa buswe bwa Leza. Kadi Yehova i mupe bantu kīkalo kinengele kidi’mo byonso bibasakilwa mwanda wa kwisangaja. (Ngal. 1:29-31; 2:8, 9; Mit. 139:14-16) Ino bubi pa kutwela mu muzo wa muntu, Yehova wālombwele buswe bwandi mu miswelo mikwabo. Namani? Mutumibwa Yoano upituluka mu binenwa bya Yesu amba: “Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.” (Yoa. 3:16) Lelo kudi’po muswelo mukwabo wādi wa kulombola’mo Leza buswe bwaswele bantu utabukile wa kutuma wandi Mwana wa bunka pano pa ntanda mwanda wa kukūla babipya-mambo? (Yoa. 15:13) Kino kilomboji kikatampe kya buswe i kimfwa kya bantu kulonda, kibapa mukenga wa kumwekeja difuku ne difuku buswe bwa kwipāna, na mwālongele Yesu.—Yoa. 17:25, 26.

12. Lelo bukomo bwa Yehova i bumweke muswelo’ka?

¹² Bukomo. Enka “Leza, Mwinebukomobonso,” ye udi na bukomo bwa kupanga būmi. (Kus. 11:17; Mit. 36:9) Muntu pa kubutulwa, ushilulanga pamo bwa papye wampikwa kulemba’po. Pa kufwa, wayuja uno papye na butyibi, bilongwa, ne myanda yaemwenine mu būmi yashintyile būmi ne ngikadilo yandi. Ino myanda ikokeja kutwela mu luté lwa Yehova. Pa kitatyi kifwaninwe, Yehova ubwanya kwalwija muntu būmi enka na mwaadi  wikadile. (Yoa. 5:28, 29) Nansha lufu byokelwādipo mu mpango imbajinji ya Leza pa bantu, ino i lupe Yehova mukenga wa kulombola amba bukomo bwandi i butabuke bwa kibundu. Bine Yehova i “Leza, Mwinebukomobonso.”

13. Lelo kitapwa kya Yesu kyālombwele namani boloke bubwaninine bwa Yehova?

¹³ Boloke. Yehova kabepangapo nansha kulonga bukondame. (Kup. 32:4; Tet. 1:2) Ulamete nyeke ku misoñanya yandi ya peulu ya bubinebine ne boloke, nansha shi kulonga namino kumweka bu kumulomba kwisuminwa. (Loma 8:32) Langa’po mobyasanshile Yehova pa kumona wandi Mwana muswedibwe ufwa ku mutyi wa masusu pamo bwa muntu wambulwa kikōkeji utuka Leza! Kutentekela pa buswe bwa kuswa bantu bampikwa kubwaninina, Yehova wāsakile kuleka uno mwanda usansa ulongeke mwanda wa kukwatakanya misoñanya yandi mibwaninine ya boloke. (Tanga Loma 5:18-21.) Ino ntanda miyule bukondame i mipe Yehova mukenga wa kwilombola bu mwinē boloke.

14, 15. Lelo tunangu tukatampe ne kitūkijetyima kya Yehova byāmwekele mu miswelo’ka imoimo?

¹⁴ Tunangu. Kupwa’tu kwa ba Adama ne Eva kujilula, Yehova wālombwele muswelo wakalongolola bibi byonso bilupukile ku butomboki bwabo. (Ngal. 3:15) Kino kilongwa kya kampeja-bukidi, ne muswelo waenda usokwela bityebitye bengidi bandi ino mpango, bilombola patōka tunangu twa Yehova. (Loma 11:33) I kutupu kintu kibwanya kukalakanya Leza apwije senene myanda. Mu ino ntanda iyudile’mo busekese, mavita, kubulwa bujalale, kubulwa kikōkeji, yampikwa lusa, mboloji, ne buzazangi, Yehova udi na mikenga mivule ya kulombola bipangwa byandi mwikadile tunangu twa bine. Mwanā bwanga Yakoba wānene amba: “Īno ñeni mitūke mūlu ayo kibajinji i kutōka tō, ebiya ke talala, nyā, ne kikōkeji, kukolelwa pa kwisasa mpika, kuyūla kanye ne bipa bilumbuluke, kwakubulwa lupata, ne buzazangi bwine mpika.”—Yak. 3:17.

¹⁵ Kitūkijetyima ne Kutyumwina mu Manwi. Ngikadilo ya Yehova ya kitūkijetyima ne kutyumwina mu manwi i mimweke patōka, shi bitupu, byadi bya kukola pa kwikala na bantu bakubulwa kubwaninina, ba bubi, ne ba bilubo. Yehova pa kwitabija kwikala nabo uno muswelo myaka na myaka, ulombola amba udi na ino ngikadilo ya kutendelwa pa ludingo lubwaninine, ne pa kino tufwaninwe kumufwija’ko bininge. Mutumibwa Petelo wādi na bubinga pa kunena amba tufwaninwe kumona amba “kutūkija mutyima kwa Mfumwetu lo lupandilo.”—2 Pet. 3:9, 15.

16. Mwanda waka mutyima wa Yehova wa kulekela wituletelanga nsangaji mikatampe?

¹⁶ Mutyima wa Kulekela. Batwe bonso twi babipya-mambo, kadi tukukalanga divule. (Yak. 3:2; 1 Yoa. 1:8, 9) Bine, tufwaninwe  kufwija’ko Yehova pangala pa mutyima wandi wa kulekela “byamwiko’tu”! (Is. 55:7) Imvwana uno mwanda nao: Byotubutwilwe bu babipya-mambo bampikwa kubwaninina, tudi na dyese dya kwimwena nsangaji yotwivwana pa kulekelwa na Leza bilubo byetu. (Mit. 51:5, 9, 17) Kwimwena ino ngikadila ya Yehova itenga ku mutyima kukomejanga buswe botumuswele ne kwitukankamika tulonde kimfwa kyandi mu muswelo otwikele na bakwetu.—Tanga Kolose 3:13.

Kine Kibelela Ntanda

17, 18. Lelo buludiki bwa Satana i bukomenwe mu miswelo’ka?

¹⁷ Ngikadila yonso ya ntanda ya Satana—ilombola muludikilo wandi—ikankalwanga misunsa mivule kadi kyaba ne kyaba mu bula bwa myaka tutwa na tutwa. Mu 1991, julunale The European wanene’mba: “Lelo ntanda ibelanga? Bine ibelanga, ino . . . ke na kilongwapo kya Leza—misongo ya ntanda i milengwe na bantu bayo.” Buno ke bubelapo! Bambutwile betu babajinji pa kongolwa na Satana, bātongele kuludikwa na bantu kupita’ko kuludikwa na Yehova. Mu uno muswelo, bātongele muludikilo wadi wa kukankalwa. Masusu ne bumonya malwa bwa bantu ntanda yonso i biyukeno bilombola amba bulopwe bwa bantu i buponene mu misongo ya lufu.

¹⁸ Buludiki bwa Satana i bwa mwino. Inoko, mwino keukokejapo kutādila buswe, pene pemanine buludiki bwa Yehova. Bwendeji bwa Satana i bukomenwe kujadika bintu, kuleta nsangaji ne mutyima-ntenke. Leka, buludiki bwa Yehova bubabinga! Lelo tudi na bukamoni mu ano mafuku bulombola’kyo? Eyo, enka na motusa kwikimwena mu kishinte kilonda’ko.

I Ñeni’ka Yotuboila Pangala pa Buludiki Potutanga . . .

• Loma 13:1, 2?

• Nkindi 21:30?

• Yelemia 10:23?

• Kolose 3:13?

[Bipangujo bya Kifundwa]

[Bifwatulo pa paje 25]

Bantu kebamweninepo nansha dimo mu buludiki bwa Satana

[Kutambile Bifwatulo 25]

U.S. Army photo

WHO photo by P. Almasy

[Kifwatulo pa paje 26]

Bukomo bwa Yehova i butabuke ne bwa kibundu

[Kifwatulo pa paje 27]

Buswe ne boloke bwa Yehova byāmwekēle mu kitapwa kya wandi Mwana