Bine Leza Utele Bantu Mutyima—Kyotwanenena Namino

KINO i kipangujo kya tamba kala kadi kya kamweno kyekoka nakyo bantu myaka na myaka: Shi Leza witusenswe, mwanda waka kudi masusu mavule uno muswelo? Padi uketabija amba shi usenswe muntu kampanda, kukamusakilapo masusu, ne shi udi mu makambakano ukalonga bukomo bwa kumukwasha. I bine, bantu bavule balañanga amba byokudi masusu mavule mu ino ntanda, Leza ketutelepo mutyima. Nanshi, i biyampe, tumone bidi bukamoni bulombola amba bine Leza wituswele, ne amba utele bantu mutyima.

Bipangwa Bilombola Buswe bwa Leza

Yehova Leza ye “wapangile ne dyulu, ne ntanda, ne dijiba dīne, ne byonsololo bidimo.” (Bilongwa 4:24) Potubandila bintu bipangile Yehova, tukamona amba bine witutele mutyima. Langa’po bidi, kimfwa, bintu byakupele mwanda wa kukusangaja. Lelo usenswe byakudya bilumbuluke? Yehova wādi ukokeja kuleta’tu byakudya bya muswelo umo mwanda wa kukwatakanya būmi bwetu. Ino, wāpangile bidibwa bya miswelo ne miswelo mwanda wa kilango kyetu kiloelelwe. Kadi, Yehova wāneñenye ino ntanda na mityi, maluba, ne ntanda ya biyombo amba tusangale ne kuloelelwa mu būmi.

Kadi tutalei ne muswelo otupangilwe. Kusangela bisela, bukomo bwetu bwa kuloelelwa minjiki, ne kunengelelwa bintu byotumona ke abyopo bikimbwa pa kwikala na būmi—ino Leza i mwitupe’byo mwanda wa kunengeja būmi bwetu. Kadi langulukila pa kipwano kyobe na bakwenu. Lelo i ani kasangelangapo kwikala pamo na balunda bayampe ne kwipamba bipa na muntu wasenswe mpata? Umwene, bukomo bwa kuswa i kyabuntu kitamba kudi Leza wa buswe! Leza byaapangile muntu na bukomo bwa kuswa, ino ngikadilo ifwaninwe kubadilwa mu bumuntu bwa Leza.

 Bible Witukulupija Amba Leza I Buswe

Bible witulombola amba Leza i buswe. (1 Yoano 4:8, Bisonekwa Bitokele) Buswe bwandi kebumwekelangapo enka mu bupangi, ino i ne mu Bible, Kinenwa kyandi. Kimfwa, Bible uleta misoñanya itwepeja misongo, ukankamika bujalale mu byonso, ne kwitudyumuna ku bunkolwankolwa ne mudyopolo.—1 Kodinda 6:9, 10.

Kadi Bible witupa madingi a tunangu pa mwa kupwanina na bantu, witusoñanya twisanswe batwe bene na bene ne kwikala ne bulēme, kalēmo ne kanye na bakwetu. (Mateo 7:12) Upelejanga bibidiji ne ngikadilo ilengeja masusu—makomwa-meso, lubabo, kwabila, makoji, ne butapani. Shi muntu ne muntu wadi ulonda madingi mayampe a mu Bisonekwa, longa masusu i matyetye ntanda yonso.

Inoko, kilomboji kikatampe kya buswe bwa Leza i kupāna kwapēne wandi Mwana, Yesu, bu kikūlwa kya kukūla bantu. Yoano 3:16 unena amba: “Mwanda aye Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.” Nanshi Yehova kemutūle’ko kala mpangiko ya kupwija lonso lufu ne masusu a miswelo yonso.—1 Yoano 3:8.

Ne kutatana kwine mpika, kudi bintu bivule bilombola amba Yehova wituswele. Bibamweka nanshi amba, kasangalangapo pa kwitumona tususuka. Ukalonga’po kintu mwanda wa kupwija masusu. Ketudipo ne kyotupwila mata mu kanwa pa uno mwanda—Bible witulombola biyampe muswelo ukapwija Leza masusu.

[Kifwatulo pa paje 4]

Bukomo bwa kuswa i kyabuntu kitamba kudi Leza wa buswe