“I ku Mwaka ka O Nkakwabija?”

Jayne wadidile amba “Nsaka misanshi ipwe!” Wadi na dyaya, kadi dyadi dyenda dinanga ngitu yandi yonso. Bine kisaka ne balunda nandi badi babila misongo ne imbizo bimupwe! Badi balomba Leza amukwashe. Lelo wadi wibemvwana? Le wadi utele’ko mutyima?

LEZA uyukile ngikadilo idi’mo kisaka kya bantu. Bible, Kinenwa kyandi amba: “Bipangwa byonsololo bibinzanga, nabyo i bikwatwe ne misongo ne pano pēne.” (Loma 8:22) Leza uyukile amba kudi midiyo ne midiyo ya bantu babinza difuku ne difuku, pamo bwa Jayne, na misongo ya mu ngitu, mu malango, ne mu ñeni. Leza umwene bantu midiyo 800 balāla na nzala difuku ne difuku, bakwabo nabo basusulwa kwabo, ne bambutwile bavule bakambakana mwanda wa būmi bwa babo bana bwa dyalelo ne bwa kumeso. Lelo kodi mwiipangule shi Leza ukapwanga ino myanda? I amo, batwe byotusakanga kukwasha bantu botuswele, lelo Leza abulwe’po kusaka kukwasha kisaka kya bantu, bipangwa byandi?

Shi kodi mwiipangule bipangujo pamo bwa bino, kudipo bunka. Pano ke padi kintu kya myaka 2600, Habakuka, mwana-mulume wa kikōkeji wēivwene pamo na mwiivwaninanga bantu bavule dyalelo, kupwa wāipangula Leza amba: “A Yehova, i ku mwaka ka o nkakwabija, nobe kwivwana mpika, a? Nakwabija mwanda wa bingojila, ino abe kumpandijapo mpika. Lelo i mwanda ka o wandaija bukondame ne kutala bupupakane, a? mwanda kutūta ne bingojila bidi ku meso ami; kudi lupata, ne midiululo itāluka.” (Habakuka 1:2, 3) Habakuka mupolofeto Muhebelu, wēmwenine bilongwa bisansa bya bupolapola bwa mu meso fututu ne kwitamba kwa bantu ba mu andi mafuku. Dyalelo, myanda isapulwa ya bilongwa bya uno muswelo isanshijanga bantu ba lusa.

Lelo Leza wāsūdile bipangujo bya Habakuka? Mhm. Wātejeje bipangujo byambulwa budimbidimbi bya Habakuka ebiya wāmusenga ne kumukankamika uno mwana-mulume mukambakanibwe. Yehova Leza wākomeje lwitabijo lwa Habakuka na kumulaya amba usa kupwija masusu. Musapu wa Leza wa lukulupilo ukokeja kukukankamika pamo na mowakankamikile Jayne ne kyandi kisaka. Bishinte bilonda’ko bisa kulondolola ku bino bipangujo: Le tubwanya kukulupila namani amba Leza bine witutele mutyima? Lelo i bika bisa kulonga Leza pa kupwija masusu, ne ukeapwa kitatyi’ka?