Ingidija “Lupete Lwa Mushipiditu” na Bwino

“Mutekunei . . . lupete lwa Mushipiditu, o mwanda mwine mwine wa Leza.”—Ef. 6:17.

1, 2. Lelo i muswelo’ka otuketaba ku lwito lwa kukimba basapudi ba Bulopwe bavule?

 YESU pa kumona bisakibwa bya ku mushipiditu bya kibumbo, wāsapwidile bandi bana ba bwanga amba: “Byakwangula umbudimi i bivule bīne, nanshi bakuputuminamo i batyetye. I binebīne, lombelai bidi amba mwine byangulwa alundule bakuputumina mu byangulwa byandi.” Yesu wālongele bivule ke enkapo kwisamba bitupu. Paāpwile kwisamba bino binenwa, ‘waita kadi bana-bandi-babwanga ba dikumi ne babidi’ ne kwibatuma mu mwingilo wa kusapula, nansha wa kwangula. (Mat. 9:35-38; 10:1, 5) Kupwa, Yesu “watongelepo bangi bakwabo makumi asamba-abidi, kadi webatalwile babidi babidi” bakengile uno mwingilo.—Luka 10:1, 2.

² Dyalelo nadyo kusakilwa basapudi ba Bulopwe bavule. Bantu batenwe ku kivulukilo mu mwaka wa mwingilo wa 2009 kujokoloka ntanda yonso badi 18168323. Kino kibalwa kipityile’ko kibalwa kya Batumoni ba Yehova pa midiyo 10 ne musubu. Na bubine madimi a kwangula ke mapwe kwela. (Yoa. 4:34, 35) O mwanda tufwaninwe kulomba ba mingilo bavule. Lelo i muswelo’ka otukokeja kulongela mungya kuno kulomba? Tubwanya kulonga namino shi twikale bengidi bafwaninwe kitatyi kyotusapula na bupyasakane musapu wa Bulopwe ne kulonga bana ba bwanga.—Mat. 28:19, 20; Mako 13:10.

3. Le i kika kinenenwa amba mushipiditu wa Leza udi na mvubu pa kwitukwasha twikale bengidi balumbuluke?

³ Kishinte kishele kunyuma kyesambile pa kuludikwa na mushipiditu wa Leza mokukokejeja kwitukwasha ‘tusapule mwanda wa Leza pa kubulwa moyo.’ (Bil. 4:31) Uno mushipiditu ukokeja kadi kwitukwasha twikale bengidi ba bwino. Muswelo umo wa kulumbulula bwino bwetu mu mwingilo i kwingidija senene kingidilwa kilumbuluke kiletele Yehova Leza—Bible, Kinenwa kyandi kisonekwe. I kisonekwe ku bukomo bwa mushipiditu sandu. (2 Tem. 3:16) Musapu udi’mo i wa ku mushipiditu wa Leza. Nanshi, kushintulula bubinebine bwa mu Bisonekwa na bwino mu mwingilo wetu kulombola’mba tuludikwanga na mushipiditu sandu. Kumeso kwa kubandaula mwa kulongela, tulangulukilei pa bukomo budi na kino Kinenwa.

‘Mwanda wa Leza I wa Bukomo’

4. Lelo musapu wa Leza udi mu Bible ukokeja kulengeja muntu ashinte namani?

⁴ Bine, mwanda wa Leza nansha bu musapu wandi i wa bukomo! (Bah. 4:12) Mu muneneno wa kyelekejo, musapu utamba mu Bible i wa bui kutabuka kupita lupete lo-lonso lupungilwe na muntu, mwanda ubwanya kusaba ne kulala aku mikupa aku mikondo mu muswelo wa kyelekejo. Bubinebine bwa mu bisonekwa buteñanga mutyima mwinemwine wa muntu ne kutwela mu milangwe ne malango andi, kadi usokolanga bine byakanina mu mutyima. Buno bubinebine budi na bukomo bukokeja kushinta muntu bya binebine. (Tanga Kolose 3:10.) Bine, Mwanda wa Leza ukokeja kushinta būmi bwa bantu!

5. Lelo Bible ukokeja kwituludika mu muswelo’ka ne i bipa’ka bikokeja kulupuka’ko?

⁵ Pakwabo kadi, Bible dyo dibuku didi’mo tunangu tonso. Mudi musapu ukwasha ukokeja kulombola muntu mwa kwikadila mu ino ntanda ya tuvutakanya. Kinenwa kya Leza kekitumunikilangapo enka potutabula, ino i ne kumeso kotwenda. (Mit. 119:105) Kidi na bukwashi buyampe kitatyi kyotulwa na makambakano nansha potukwata butyibi butala pa  kutonga balunda, kwipwija mukose, kaji, bisandi, ne bikwabo’po. (Mit. 37:25; Nk. 13:20; Yoa. 15:14; 1 Tem. 2:9) Kwingidija misoñanya idi mu Kinenwa kya Leza kwitulengejanga twikale senene na bakwetu. (Mat. 7:12; Fid. 2:3, 4) Shi mu dishinda dyetu dya kyelekejo mudi tō, nabya tukayuka byobya bikalupuka kumeso pa butyibi botukwata. (1 Tem. 6:9) Kadi Bisonekwa nabyo bilombolanga mpango ya Leza ya kumeso, bitukwashanga twikale nyeke na būmi bukwatañene na ino mpango. (Mat. 6:33; 1 Yoa. 2:17, 18) Bine, buno bo būmi bukokeja kusangela muntu shi aleke misoñanya ya Leza i muludike!

6. Lelo Bible udi pamo bwa kyabulwi namani mu bulwi bwetu bwa ku mushipiditu?

⁶ Langa kadi pa muswelo wikele Bible pamo bwa kyabulwi kikomokomo mu bulwi bwetu bwa ku mushipiditu. Polo utela Mwanda wa Leza bu “lupete lwa Mushipiditu.” (Tanga Efisesa 6:12, 17.) Kitatyi kyotusapula senene, musapu wa mu Bible ukokeja kunyongolola bantu ku bupika bwa ku mushipiditu bwa Satana. Luno lupete lupandijanga būmi pa kyaba kya kwibonakanya. Le tubulwe’po kwilwingidija na bwino?

Olokela mu Mwanda wa Binebine

7. Mwanda waka kwifunda mwa kwingidijija senene “lupete lwa Mushipiditu” kudi na mvubu?

⁷ Mushidika ukokeja kwingidija byabulwi byandi mu divita enka shi i mwiibidije kala ne kuyuka mwa kwibingidijija senene. Mo monka ne pa kwingidija senene “lupete lwa Mushipiditu” mu bulwi bwetu bwa ku mushipiditu pene. Polo wāsonekele amba: “Pyasakana umone kwitabijibwa kudi Leza busendwe, wampikwa ne kyāfwijibwa bumvu, wakolokela monka mu mwanda wa binebine.”—2 Tem. 2:15.

8, 9. Lelo i bika biketukwasha twivwanije byobya binena Bible? Leta kimfwa.

⁸ Lelo i bika biketukwasha ‘tolokele mu mwanda wa binebine’ mu mwingilo wetu? Kumeso kwa kusapwila bakwetu byobya binena Bible, i biyampe bidi batwe bene twibivwanije senene. Bino bitulomba tute mutyima bininge ku myanda idi kūlu nansha kunshi kwa vese nansha kwa kisonekwa. Mungya dibuku dimo dishintulula bishima, “myanda isambilwe pa kishima kapanda, musemwa, nansha bilembwa kabidye ikokeja kwikala bishima, misemwa, nansha bilembwa bya kūlu ne kunshi bikwashanga twivwanije buluji bwine bwine”

⁹ Pa kwivwanija Kisonekwa senene bitulomba tubandaule ne myanda isambilwe’po kūlu ne kunshi. Binenwa bya Polo bidi mu Ngalatea 5:13 bisambila pa uno mwanda. Wāsonekele amba: “Ke-mwi-bantu, bānwe bamwanetu, mwaityilwe ku bwana-pabo; ino kemukyalamuna bwana-pabo bwenu ke bwa ku ngitu, ehe, nanshi mwikale kwīngidila mīngilo, bānwe bene na bene, mu lusa.” Lelo i bwanapabo’ka bwisambile’po Polo pano? Lelo wādi ulangila pa bwanapabo bwa kunyongololwa ku bubi ne lufu, ku bupika bwa nkulupilo ya bubela, nansha ku bintu bikwabo? Myanda idi kūlu ne kunshi ilombola amba Polo wādi wisambila pa bwanapabo butamba ku ‘kukūlwa ku mafingo a mukanda-wabijila.’ (Ngat. 3:13, 19-24; 4:1-5) Wādi ulangila pa bwanapabo bwa Bwine Kidishitu.  Boba basangela buno bwanapabo beingidilanga abo bene na bene mu lusa. Boba bādi beelele mu lupata nansha mu lupotopoto kwampikwa lusa.—Ngat. 5:15.

10. Pa kwivwanija nshintulwilo ya Bisonekwa senene, i bufundiji bwa muswelo’ka botufwaninwe kubandaula, ne tukebusokola namani?

¹⁰ Bishima “kūlu ne kunshi” bidi na nshintulwilo mikwabo. Mu ino nshintulwilo mubadilwa ne “twanda tufyame, ngikadilo, . . . mwanda.” Pa kwivwanija nshintulwilo ya kisonekwa senene, tufwaninwe kubandaula bufundiji budi kūlu ne kunshi, kimfwa kuyuka yewa mwine wāsonekele mukanda wa mu Bible, kitatyi ne ngikadilo yaādi’mo paāsonekele’o. Kadi i kya kamweno kuyuka kine kyāsonekelwe mukanda’wa, ne shi bibwanika, mwingilo wādi na mulembi, ngikadila yandi, ne mutōtelo waādi’mo mu mafuku’a. *

11. Lelo tufwaninwe kuta mutyima ku bika potushintulula bisonekwa?

¹¹ ‘Kolokela mu mwanda wa binebine’ kulomba bivule kupita’ko kushintulula bubinebine bwa mu bisonekwa monka mobyolokele. Tufwaninwe kuta mutyima kutyina twakengidija Bible mu muswelo utuyula bantu. Nansha byotukokeja kwingidija Bisonekwa mwanda wa kubingija bubinebine, na mwālongele Yesu paātompelwe na Dyabola, inoko Bible ke muletwepo mwanda wa kusanshija bemvwaniki betu. (Kup. 6:16; 8:3; 10:20; Mat. 4:4, 7, 10) Tufwaninwe kuta mutyima ku madingi a mutumibwa Petelo anena’mba: “Kidishitu ēkale mupandulwemo na mityima yenu ke Mfumwenu; pa kwikala na kampeja bukidi ka kutentulwila bantu bonso bemwipangula monka mwikadile kukulupila ko mudi nako munda, napo ne kikōkeji ne moyo ponka.”—1 Pet. 3:15.

12, 13. Lelo “bishimikwa bīne bya bukomo” bibwanya kutūtwa na bubinebine bwa Mwanda wa Leza i bika? Leta kimfwa.

¹² Lelo bubinebine bwa Mwanda wa Leza bukalonga bika kitatyi kyotolokela monka? (Tanga 2 Kodinda 10:4, 5.) Bubinebine bwa mu Bisonekwa bukokeja kutūta “ne bishimikwa bīne bya bukomo,” ko kunena amba, kujingulula bufundiji bwa bubela, bilongwa bibi, ne mafilozofi alombola tunangu twa bantu bampikwa kubwaninina. Tubwanya kwingidija Bible mwanda wa kufundula milangwe yo-yonso ‘mitentekwe kūlu ya kufutulula ñeni ya Leza.’ Bufundiji bwa Bible bubwanya kwingidijibwa mwanda wa kukwasha bantu bakwatañanye milangwe yabo na bubinebine.

¹³ Tala kimfwa kya lolo umo wa myaka 93 wa mu India. Tamba bunkasa, wafundijibwe kukulupila mu lufundijo lwa bungudi. Paashilwile kwifunda Bible kupityila ku mikanda na wandi mwana wikalanga ku ntanda-bene, kaijikepo kwitabija byaafundile pa bitala Yehova ne milao yandi. Inoko, lufundijo lwa bu ngudi lwadi kala lwandabile mu ñeni yandi, pa kino wapatenye byamwandikile wandi mwana bilombola ngikadilo idi’mo bafu. Pa kino wanene amba: “Nkibwanyapo kwitabija buno bubinebine bwa  Bisonekwa byobe’byo. Bipwilo byonso bifundijanga amba munda mudi kintu kampanda kekibwanyapo kufwa. Ngikalanga nkulupile nyeke amba umbidi shao ufwanga, ne amba kipindi kampanda kekibwanyapo kumweka kialamunanga ne kubutuka bu imbidi mikwabo ibwanya kuvula misunsa ne misunsa kufika ne ku 8 400 000. Le kino kibwanya kwikala kya bubela namani? Lelo bipwilo byonso i bya bubela?” Lelo “lupete lwa Mushipiditu” lubwanya kutūta lukulupilo lwa bishimikwa bikomo na luno? Pa kupwa kwisambila pa uno mwanda kupityila ku Bisonekwa, mayenga kampanda pa kupita’po, walemba amba: “Pano nashilula kwivwanija bubinebine bwine pa mwanda wa lufu. Bibansangaja mpata pa kuyuka amba kitatyi kya lusangukilo, tukemonanga na bakena betu bafwile. Nakulupila pano amba Bulopwe bwa Leza busa kufika panopano ponka.”

Nekenya Bantu na Lupete lwa Mushipiditu

14. Lelo kunekenya bemvwaniki betu kushintulula bika?

¹⁴ Kwingidija Bible senene mu mwingilo ke’nkapo kutela bisonekwa bitupu. Polo wādi ‘unekenya’ bantu paādi wisamba, netu mo motufwaninwe kulongela. (Tanga Bilongwa 19:8, 9; 28:23.) “Kunekenya” kushintulula “kubwina.” Muntu munekenibwe i yewa “witabije ne kutūla kikulupiji kyandi mu kintu kampanda” Potunekenya muntu etabije bufundiji bwa mu Bible, nabya tubamubwina akulupile mu buno bufundiji. Pa kufikila pa kino, tusakilwa kunekenya bemvwaniki betu na bubinebine bwa binenwa byotunena. Tukokeja kulonga kino mu ino miswelo ilonda’ko’i.

15. Lelo i muswelo’ka okokeja kukokela milangwe ya Bible mu muswelo ukalengeja muntu alēmeke’ye?

¹⁵ Kuta mutyima ku Mwanda wa Leza mu muswelo wa kwiulēmeka. Kitatyi kyotushilula mīsambo na kisonekwa, i kiyampe kuta mutyima ku kamweno kadi mu kuyuka milangwe ya Leza pa mwanda mwine wisambilwa’po. Pa kupwa kwipangula kipangujo ne kuteja malondololo a mwine njibo, ubwanya kunena namino amba, ‘Tutale bidi mulangila Leza pa uno mwanda.’ Ukokeja kwipangula nansha amba, ‘Lelo Leza unena bika pa uno mwanda?’ Kushilula na kisonekwa uno muswelo kumwekejanga amba Bible i mutambe kudi Leza kadi kukwashanga mwimvwaniki amumone na bulēme bukatampe. Kushilula na kisonekwa kudi kadi na mvubu nakampata kitatyi kyotusapwila muntu ukulupile mudi Leza aye’ko kuyuka bifundija Bible mpika.—Mit. 19:7-10.

16. Le i bika bikakukwasha ushintulule bisonekwa biyampe?

¹⁶ Longa bivule kupita’ko’tu kutanga bisonekwa kete; shintulula’byo. Polo wādi na kibidiji kya ‘kushintulula ne kulombola mo kyadi kisakile’ byobya byaādi ufundija. (Bil. 17:3) Divule dine mu bisonekwa mudi myanda mivule, kadi padi i biyampe ushintulule myanda mikatampe ikwatañene na byobya byomwisambila’po. Ubwanya kushotolola na kupituluka mu myanda mikatampe nansha kwipangula bipangujo bikakwasha mwine njibo ajingulule mwanda’wa. Penepa, lombola mushintulwila kisonekwa. Kupwa kwa kushintulula, kwasha mwimvwaniki amone muswelo umutala kisonekwa.

17. I muswelo’ka okokeja kulangulukila pa Bisonekwa mu muswelo unekenya?

¹⁷ Langulukila mu Bisonekwa mu muswelo unekenya. Polo wādi usenga ne kwingidija buluji buyampe paādi ‘ulanguluka na bakwabo mu Bisonekwa,’ mu muswelo unekenya. (Bil. 17:2, 4) Pamo bwa Polo, wikankile’ko kutenga mutyima wa bemvwaniki bobe. ‘Teka’ bidi mu mutyima na kwipangula bipangujo na kanye, mu uno muswelo ukalombola amba utele mwimvwaniki umo ne umo mutyima. (Nk. 20:5) Epuka lupata. Nena mu muswelo upēla kadi muluji. Bifwaninwe  kukwatakanibwa na bukamoni busangaja. Binenwa byobe bifwaninwe kwimanina mpata pa Kinenwa kya Leza. I kiyampe kwingidija kisonekwa senene na kuleta nshintulwilo ne kwelekeja mwanda omwisambila’po pa kyaba kya kutanga bisonekwa bibidi nansha bisatu wadi mu kyoki ke kyokya. Kuleta bukamoni bubingija mwanda kukokeja nako ‘kulunda bulombodi ku milomo yobe.’ (Nk. 16:23) Kyaba kimo, kikekala kya mvubu kulonga bukimbi ne kuleta bufundiji bwa ntentekelo. Lolo wa myaka 93 utelelwe kūlu, wadi usakilwa kuyuka kine kitumbīle lufundijo lwa muya nansha (mushipiditu) keufu. Wanekenibwe na bifundija Bible pa uno mwanda pa kupwa kujingulula kwine kutambile luno lufundijo ne molwatwelele mu bipwilo bivule bya ino ntanda. *

Endelela Kwingidija’lo na Bwino

18, 19. Mwanda waka tufwaninwe kwendelela kwingidija “lupete lwa Mushipiditu” na bwino?

¹⁸ Bible unena amba: “mwikadilo wa panopantanda upityidilanga.” Bantu babi abatabuka kubipila’ko. (1 Kod. 7:31; 2 Tem. 3:13) O mwanda i kya mvubu twendelele kutūta “bishimikwa bīne bya bukomo” na kwingidija “lupete lwa Mushipiditu, o mwanda mwine mwine wa Leza.”

¹⁹ Bine tudi na dyese pa kwikala na Bible, Mwanda wa Leza, ne kwingidija musapu wa bukomo udi’mo mwanda wa kujula miji ya mfudijo ya bubela ne kutenga mityima ya boba ba mityima myoloke. Kekudipo kishimikwa kitabukile uno musapu bukomo. Nanshi, tulongei bukomo bwa kwingidija luno “lupete lwa Mushipiditu” na bwino mu mwingilo witupele Leza wa kusapula bulopwe.

[Kunshi kwa dyani]

Lelo I Bika Byowefunda?

• I muswelo’ka udi Mwanda wa Leza na bukomo?

• I muswelo’ka otukokeja ‘kolokela mu mwanda wa binebine’?

• Lelo i bika bilonga musapu wa mu Bible mwanda wa kutūta “bishimikwa bīne bya bukomo”?

• Lelo i muswelo’ka obwanya kulombola amba unekenyanga mu mwingilo?

[Bipangujo bya Kifundwa]

[Kapango/Kifwatulo pa paje 21]

Mwa Kwingidijija Mwanda wa Leza mu Muswelo Unekenya

▪ Lemeka Bible

▪ Shintulula Bisonekwa

▪ Languluka mu muswelo unekenya mwa kutengela mutyima

[Kifwatulo pa paje 20]

Wifunde mwa kwingidijija “lupete lwa mushipiditu” biyampe