“Kutoma’mo Dikwabo”

ALLEN washilwile koneka na malwa paakidi na myaka 11. * Aye ne bakwabo badi bakaya mu mityi, beula byobamona mu mafilime. Byobadi beula mu filime kebyadipo bintu bya bine, inoko Allen ne balunda nandi badi batoma bya bine.

Tony wadi na myaka 40 paadi katome bininge, wadi utoma ntyupa umo nansha abidi ku difuku ino pano ke atano nansha asamba. Mwenda mafuku, kakiyuka ne buvule bwa matyupa atoma ku difuku.

Allen wakakimbile bukwashi pa mutomeno wandi wa malwa. Tony wapelele kukwashibwa na kisaka ne na balunda badi bamutele mutyima. Allen ukidi mūmi ne didi kūlu dino dyaetusapwila ino myanda; ino Tony aye kaijijepo kala wafwa mu akishida na tukutuku pa kupwa kutoma bininge malwa.

Nansha shi muntu witomenanga bibi malwa aye mwine, ino bintu bilupuka’ko biteñanga būmi bwa bakwabo, divule dine mu muswelo umbi. * Mutomeno-mpata wa malwa uletanga minenakanya ne koneka kwa ngitu, kutambañana ne kutapañana, kulengeja maakishida ne makambakano ku kaji, pakwabo kadi kwikadijanga muntu ke kabole wabelabela. Kutoma malwa bibi kujimijanga midiyala ne midiyala ya madolala pa mwaka, pampikwa kubadila’mo njia ne mfwani yokuletela bantu, bisaka ne bana.

Kitango kya Bumo bwa Mizo Kitala Bukomo bwa Ngitu, kinenene amba “ke muntupo yense utomanga malwa kitatyi ne kitatyi udi na makambakano a mutomeno, kadi ke bonsopo badi na makambakano a mutomeno batomanga difuku ne difuku.” Bavule bampikwa kwitobwa malwa baibidile bityebitye kutoma’o bininge abo kwiyuka mpika. Bakwabo batomanga na dimo dimo inoko dyatoma’o wapwa matyupa atano ne kupita pa kifuko.

Shi usaka kutoma malwa, le ukakadikila pa matyupa anga? Lelo i muswelo’ka okayuka amba pano nkikifwaninwepo “kutoma’mo dikwabo”? (Nkindi 23:29, 30, Contemporary English Version) Bishinte bilonda’ko bikesambila pa bintu bikwabo bikwasha mu uno mwanda.

[Kunshi kwa dyani]