‘Tusapulei Mwanda wa Leza Kwakubulwa Moyo’

“Bayūlwa Mushipiditu Sandu ke basapula mwanda wa Leza kwa kubulwa ne moyo mwine.”—BIL. 4:31.

1, 2. Mwanda waka tufwaninwe kwikankila’ko kwingila mwingilo wetu senene?

 YESU wāsapwidile bandi bana ba bwanga mafuku asatu kumeso kwa lufu lwandi amba: “īno myanda-miyampe ya buno bulopwe īkasapwila panopantanda ponso, ke kiyūkeno kya kuyūkila pa kusapwila’yo ku mizo yonso. Penepo nankyo po pakafikidila ne pamfulo pene.” Kumeso kwa kukanda mūlu, Yesu musanguke wāpele balondi bandi mwingilo wa ‘kulonga mizo yonso ya bantu ke bana ba bwanga, kwibafundija balame byonso byāebalaile.’ Wēbalaile amba ukekala nabo “mafuku onso nyeke, ne kumfulo kwine kwa panopantanda.”—Mat. 24:14; 26:1, 2; 28:19, 20.

² Batwe Batumoni ba Yehova, tunenwe kwingila mwingilo wāshilwile mu myaka katwa kabajinji. Kekudipo mwingilo wa mvubu kupita uno mwingilo upandija būmi wa kusapula Bulopwe ne kulonga bana ba bwanga. Bine, i kya mvubu twingile’o senene! Tusa kumona mu kino kishinte kuludikwa na mushipiditu mokwitukwashija tusapule kwakubulwa moyo kitatyi kyotudi mu mwingilo. Bishinte bibidi bilonda’ko bikesambila pa muswelo wituludika mushipiditu wa Yehova tufundije na bwino ne kusapula kitatyi kyonso.

Tusakilwa Kubulwa Moyo

3. I kika kinenenwa amba kwingila mwingilo wa kusapula Bulopwe kulomba kubulwa moyo?

³ Mwingilo wetu witupele Leza wa kusapula Bulopwe i dyese dikatampe kedidingakanibwapo. Inoko, keubulwangapo bikoleja. Nansha bitabija bamo uno mwanda muyampe wa Bulopwe bwa Leza, bantu bavule nabo badi pamo bwa boba ba mu mafuku a Noa. Yesu wānene amba, abo “ne kuyūkapo mpika, ino pa kufika dilobe dyatukija bonso.” (Mat. 24:38, 39) Kudi bantu betufutulula ne kwitulwa. (2 Pet. 3:3) Lwana lukokeja kutamba ku balupusa, ku balunda ba ku masomo nansha ba ku kaji, ne ku babutule betu. Kutentekela pa bino, kudi bukōkekōke bwetu, kimfwa bumvu ne moyo wa kupelwa. Kudi bintu bivule bikokeja kwitulengeja tukomenwe “kwasama mu kyakanwa” ne kwisamba mwanda wa Leza “kwa kubulwa ne moyo.” (Ef. 6:19, 20) Kwendelela kwisamba mwanda wa Leza kulomba kubulwa moyo. I bika bikokeja kwitukwasha tubulwe’o?

4. (a) Lelo kubulwa moyo i bika? (b) Lelo mutumibwa Polo wākankamene namani pa kusapwila Bene Tesalonika?

⁴ Kishima kya Kingidiki kyalamwinwe bu “kubulwa moyo” kishintulula “kunena kwampikwa kafinda, patōkelela, ne bipotoloke.” Kino kishima kileta mulangwe wa “bukankamane, kikulupiji, . . . kubulwa kwakamwa.” Kubulwa moyo kekushintululapo bikandangobo nansha kipuni. (Kol. 4:6) Nansha byotudi bakubulwa moyo, tusakanga kwikala ne ndoe ku bantu bonso. (Loma 12:18) Pakwabo kadi, potusapula myanda miyampe ya Bulopwe bwa Leza, tunenwe kulama bujalale pa bukata bwa kubulwa moyo ne bunwa amba twakasanshija muntu bya bituputupu. Na bubine, kubulwa moyo kwendelanga pamo na  ngikadilo ilomba kininga pa kwiitamija. Kubulwa moyo kwa uno muswelo kekwiilangapo ako kwine nansha ku kwikulupila abe mwine. Kupwa kwa mutumibwa Polo ne bengidi nandi “kulongwa bibibibi bya bumvu mu Fidipai,” le ‘bakankamene ne kukankamana’ namani pa kusapwila Bene Tesalonika? Polo wāsonekele amba, i “mudi Leza wetu.” (Tanga 1 Tesalonika 2:2.) Yehova Leza ukokeja kwitupwa moyo ne kwitupa bukomo bwa uno muswelo.

5. I muswelo’ka Yehova waāpele Petelo, Yoano, ne batumibwa bakwabo bukankamane?

⁵ Mutumibwa Petelo ne Yoano pa kusambijibwa na “bambikavu [ba bantu] ne bakulumpepo, ne basonekeji,” bānene amba: “Tyibai uno mwanda nanshi; shi momo kyolokele ku meso a Leza, nankyo twimwivwaneko bānwe, Leza ashale munyuma. Ino bātwe ketudipo mwakutalela, tunena’nka kunena byo twamwene ne byo twaivwene.” Pa kyaba kya kulomba Leza emike kupangwapangwa kwabo, abo ne banababo mu lwitabijo bāzenzele Yehova, ke banena’mba: “Ino pano abe Yehova, talapo bidi byo bakifuna mifunino yabo! Nanshi betupe mityima, bātwe bapika bobe, tunene mwanda obe kwa kubulwa moyo.” (Bil. 4:5, 19, 20, 29) Lelo Yehova wālondolwele namani milombelo yabo? (Tanga Bilongwa 4:31.) Yehova wēbapele bukankamane kupityila ku mushipiditu wandi. Mushipiditu wa Leza ubwanya kwitukwasha netu. Penepo, i muswelo’ka otubwanya kutambula mushipiditu wa Leza ne kuludikwa nao mu mwingilo wetu?

Twikalei Bakubulwa Moyo

6, 7. Lelo i muswelo’ka upēla wa kutambula mushipiditu sandu wa Leza? Leta bimfwa.

⁶ Muswelo upēla wa kutambula mushipiditu wa Leza i kwiulomba. Yesu wāsapwidile bemvwaniki bandi amba: “Lelo ino bānweko babi, muyūkile kupa bāna benu byakwibapa biyampe, lelo Shenu wa mūlu ke pepi, keye mwine ukakija kupana Mushipiditu Sandu ku bakumulomba?” (Luka 11:13) Bine, tufwaninwe kulomba mushipiditu sandu na kininga. Shi miswelo kampanda ya busapudi—busapudi bwa mu bipito, bwa kiponka na ponka, nansha bwa mu mwaba wa busunga—itukomena, tukokeja kulomba Yehova etupe mushipiditu wandi ne kwitukwasha tukomeje mutyima wa kubulwa moyo otusakilwa.—1 Tes. 5:17.

⁷ Kino kyo kyalongele mwana-mukaji Mwine Kidishitu witwa dya bu Rosa. * Difuku dimo padi Rosa ku kaji, mwadimu waadi wingila nandi wadi utanga lapolo ya bipita ku masomo makwabo pa muswelo obasusula bana ba masomo. Mwadimu wafitwa pa byaadi utanga, waela lubila amba, “Le ino ntanda isa kufula kwepi?” Rosa kadipo wa kubwanya kupityija uno mukenga wa kupāna bukamoni. Lelo walongele namani pa kumona bukankamane bwa kwisamba? Rosa amba: “Nalombele Yehova ampe mushipiditu wandi wa kunkwasha.” Wabwenye kupāna bukamoni buyampe ne kwilaa dikwabo. Tala kadi kimfwa kya Milane, mwana mwana-mukaji wa myaka itano wa mu New York City. Milane unena amba: “Kumeso kwa kwenda ku masomo twadi tulombelanga pamo na mama kudi Yehova.” Balomba bika? Badi balomba amba Milane ekale na kininga kya kwimanija ne kwisamba myanda ya Leza! Inandi unena amba: “Kino kyadi kikwasha Milane ashintulule mwimanino wandi mu myanda ya noele ne mafetyi ne kupela kufeta nabo mu ano mafetyi.” Lelo bino bimfwa kebilombolapo amba milombelo idi na mvubu pa kumona bukankamane?

8. I ñeni’ka yotuboila ku kubulwa moyo kwa mupolofeto Yelemia?

⁸ Langulukila kadi pa byākweshe mupolofeto Yelemia ekale wa kubulwa moyo. Pāmutongele Yehova bu mupolofeto wa ku  mizo, Yelemia wālondolwele amba: “Nkikōkejapo kwisamba: mwanda ne mwanuke.” (Yel. 1:4-6) Kyaba pa kupita’po, Yelemia wātakamana ne kukankamena mu mwingilo wandi wa kusapula kufika’nka ne byāmumwene bantu amba wikadile’ko’nka kwibasanshija. (Yel. 38:4) Yelemia wāsapwile butyibi bwa Yehova na bukankamane mu bula bwa myaka 65 ne kupita. Wāyukene mu Isalela pa mwanda wa busapudi bwandi bwakubulwa moyo ne bwa bukankamane, enka ne myaka 600 pa kupita’po, kitatyi kyēsambile Yesu pa kubulwa moyo, bamo ke balanga’mba i Yelemia wasanguka. (Mat. 16:13, 14) Lelo mupolofeto Yelemia wānekenye namani moyo wāadi nao ku ngalwilo? Aye mwine unena amba: “[Mwanda wa Leza] umutyima wami mudi pamo bwa mudilo utēma, ushityilwa mu bikupa byami, ino nakōka pa kwitūkija, nkikōkejapo kwikala.” (Yel. 20:9) I amo, mwanda wa Yehova wāpele Yelemia bukomo ne kumusukuma anene.

9. I kika kinenenwa amba mwanda wa Leza ubwanya kwitukwasha na mowakwāshishe Yelemia?

⁹ Mutumibwa Polo wālembele mu mukanda waātumīne Bahebelu amba: “Mwanda wa Leza i wa būmi ne bukomo, mutabuke buī bwa lupanga lwa buī kubidi, wa kusaba ne kulala aku mutyima aku mushipiditu, aku maningo, aku mani a umikondo, kadi i wa kampeja bukidi kakuyūkidila kufwatakanya ne kukanina kwa mutyima.” (Bah. 4:12) Musapu, nansha mwanda wa Leza ukokeja kwitukwasha na mowakwashishe Yelemia. Vuluka’mba, nansha byāingidijibwe bantu pa kusoneka Bible, Bible ke tunangupo twa bantu tubungilwe pamo, ino wāsonekelwe ku mushipiditu wa Leza. Tutanga mu 2 Petelo 1:21 amba: “Kubanga manga kekwaīlepo, nansha patyetye pene, monka muswidile mutyima wa muntu, mhm, ino bantu bapandulwemo ba Leza banenene monka mo batwadilwetwadilwe kudi Mushipiditu Sandu.” Shi twitūdile’ko kitatyi kya kwifunda Bible pa kasuku, musapu wa ku mushipiditu sandu ukayula mu ñeni yetu. (Tanga 1 Kodinda 2:10.) Uno musapu ukekala bwa “mudilo utēma” motudi, enka nenki ketukabwanyapo kwiushityila’mo.

10, 11. (a) Lelo bibidiji byetu bya kwifunda bifwaninwe kwikala namani shi tukimba kwikala bakubulwa moyo potwisamba? (b) Tela ditabula dimo dyowetungila mwanda wa kulumbulula kifundwa kyobe kya kasuku.

¹⁰ Pa kusaka amba kifundwa kya Bible kya kasuku kitukwashe, kifwaninwe kulongwa mu muswelo utwela musapu wa Bible munda mwetu, utengelelela ne muntu wetu wa munda. Kimfwa, mupolofeto Ezekyele wāpelwe kimonwa mwaālombelwe kudya muvungo wa mukanda udi’mo musapu mukomo wa kunyongolola bantu ba mutyima mūmu. Ezekyele wādi ufwaninwe kutwelwa na uno  musapu, wikale ke kipindi kya ngitu yandi. Kutwelwa’o namino, kwadi kwa kumulengeja asangele mwingilo wa kupāna musapu—pamo bwa kudya buki.—Tanga Ezekyele 2:8–3:4, 7-9.

¹¹ Tudi mu ngikadilo na yādi’mo Ezekyele. Dyalelo bantu kebaswilepo kwimvwana binena Bible. Shi tusaka kwendelela na kwisamba mwanda wa Leza, i biyampe twifunde Bisonekwa mu muswelo otubwanya kutwelwa ne pa mfulo na musapu udi’mo. Kibidiji kyetu kya kwifunda kifwaninwe kwikala kya difuku ne difuku—ke kya kwilaijapo’tu kitatyi kya kusoloka mutyima. Mutyima wetu ufwaninwe kwikala na wa kaimba wa mitoto wāimbile amba: “Myanda ya kyakanwa kyami, ne mifwatakanyo ya mutyima wami, ītabijibwe kudi abe mu kifuko kyobe, Abe Yehova, kidibwe kyami, ne mukūdi wami.” (Mit. 19:14) I kya mvubu mikatampe kwitūdila kitatyi kya kulangulukila pa byotutanga, amba bubinebine bwa mu Bible butwele mu nkulwe ya mutyima wetu! Bine, twielelei’ko kulumbulula kifundwa kyetu kya kasuku. *

12. Mwanda waka kupwila kwitukwashanga tuludikwe na mushipiditu sandu?

¹² Muswelo mukwabo wa kumwena mu mushipiditu sandu wa Yehova i wa kwita “mityima bātwe bene na bene ya pa kwisombela ku lusa ne mīngilo miyampe; ne kuleka’byo kubungakana mpika.” (Bah. 10:24, 25) Kwielela’ko kwenda ku kupwila kyaba kyonso, kuteja na katentekeji, ne kwingidija byotufunda, i miswelo miyampe ya kuludikwa na mushipiditu. Le kadi, mwene mushipiditu wa Yehova wituludikanga kupityila ku kipwilo?—Tanga Kusokwelwa 3:6.

Bipa Biyampe Bitamba ku Kubulwa Moyo

13. I ñeni’ka yotukokeja kuboila ku byālongele Bene Kidishitu ba mu myaka katwa kabajinji mu mwingilo wa kusapula?

¹³ Mushipiditu sandu i bukomo butabukile bonso mu diulu ne ntanda, kadi upanga bantu bukomo bwa kulonga kiswa-mutyima kya Yehova. Bene Kidishitu ba mu myaka katwa kabajinji bāvuije mwingilo mukatampe wa kusapula na bukwashi bwa mushipiditu. Bāsapwile myanda miyampe “mu bipangibwa byonso bya muno munshi.” (Kol. 1:23) Shi tutale biyampe, bavule mobadi bādi “bakubulwa kufundijibwa, bampikwa ñeni,” i kimweke patōka amba bātonwenwe na bukomo butabukile bukata.—Bil. 4:13.

14. Lelo i bika biketukwasha twikale “ne mutyima wa kutunta [ku mushipiditu]”?

¹⁴ Kwikala na būmi bulengeja mushipiditu sandu wituludike kubwanya kwitutonona tuvuije mwingilo wetu na bukankamane. Mvubu mivule idi mu kulomba mushipiditu  kitatyi ne kitatyi, kwielelela na kininga mu kifundwa kisumininwe kya pa kasuku, kulangulukila ne milombelo ponka mu byotutanga, ne kupwila nyeke bibwanya kwitukwasha twikale na “mutyima wa kutunta.” (Loma 12:11) Bible unena pangala pa “muYudea umo wa dijina dya bu-Apolosa, umbutwilwe mu Alekesandala, wa ñeni byamalwa wafikile mu Efisesa,” amba wadi “ne mutyima wandi wadi umutēma, wisamba ne kufundija biyampe byonka umbintu bya Yesu.” (Bil. 18:24, 25) Shi twikale na “mutyima wa kininga [ku mushipiditu],” tukalombola bukankamane buvule mu mwingilo wetu wa ku njibo ne njibo ne potusapula bya kiponka na ponka.—Loma 12:11, MB.

15. Lelo i byabuyabuya’ka byotumwena mu kwisamba pa kubulwa moyo?

¹⁵ Kutamija kubulwa moyo mu busapudi kukwashanga. Mumweno otumona busapudi ulumbulukanga mwanda tusangelanga ne pa mfulo mvubu ne bipa bitamba mu mwingilo. Buzanzamuke bwetu buvulanga mwanda tutananga nsangaji mivule kitatyi kyotwingila senene mwingilo. Kadi bupyasakane bwetu buvudilanga’ko mwanda tujingulwile kampeja-bukidi ka mwingilo wa kusapula.

16. Le tukalonga bika shi bupyasakane mu mwingilo bubatyepa?

¹⁶ Le bikekala namani shi tubajimija bupyasakane bwetu mu mwingilo ne ketukiningilepo na mobyadi bikadile ku ngalwilo? Nankyo tufwaninwe kwibandaula pampikwa budimbidimbi. Polo wāsonekele amba: “Mwibandululei bānwe bene, shi mudi monka mu lwitabijo; mwitompei bānwe bene.” (2 Kod. 13:5) Wiipangule amba: ‘Lelo nekidi ne mutyima wa kutunta? Lelo nombanga Yehova mushipiditu wandi? Lelo milombelo yami ilombolanga amba mukulupile mwa kulongela kiswa-mutyima kyandi? Lelo mu milombelo yami mudi binenwa bilombola kufwija’ko pa mwingilo otupelwe? Le bibidiji byami bya kwifunda kasuku bidi namani? I bitatyi binga byonetūdile’ko bya kulangulukila pa byontanga ne byongimvwana? Lelo monanga namani kupwila?’ Kulangulukila pa bipangujo bya uno muswelo kukokeja kwitukwasha tuyuke bitukomene ne kulonga’po kintu.

Leka Mushipiditu wa Leza Ukukankamike

17, 18. (a) Mwingilo wa kusapula i musambakane namani dyalelo? (b) Le i muswelo’ka otukekala na “bukankamane” bwa kunena potusapula myanda miyampe ya Bulopwe bwa Leza?

¹⁷ Yesu musanguke wālombwele bana bandi ba bwanga amba: “Bānwe mukapebwa bukomo bwa Mushipiditu Sandu ukemwīla ko mudi, mukēkale basapudi bami bakusapula mu Yelusalema, ne monso mu Yudea, ne mu Samadia, ne kulampe kwine kumfulo kwa ntanda.” (Bil. 1:8) Uno mwingilo wāshilwile tamba kala i musambakane dyalelo mu muswelo kewamwekele kashā! Kubwipi kwa Batumoni ba Yehova 7000000, basapulanga musapu wa Bulopwe mu matanda 230 ne kupita, ne kupityija pa mwaka mansaa mudiyala umo ne kipindi mu mwingilo. Buya’byopo kwingila na bupyasakane mu uno mwingilo keukengilwapo dikwabo!

¹⁸ Pamo’nka na mu myaka katwa kabajinji, dyalelo mwingilo wa kusapula wingilwanga ntanda yonso na buludiki bwa mushipiditu wa Leza. Shi twitabije kuludikwa na mushipiditu, tukekala na “bukankamane” bwa kunena mu mwingilo wetu. (Bil. 28:31) Shi ke pano, tuludikwei na mushipiditu potusapula myanda miyampe ya Bulopwe bwa Leza!

[Kunshi kwa dyani]

Lelo I Bika Byowefunda?

• Mwanda waka tusakilwa kubulwa moyo potwisamba mwanda wa Leza?

• I bika byākweshe bana ba bwanga babajinji besambe pakubulwa moyo?

• Lelo tukekala bakubulwa moyo namani?

• I bipa’ka bitamba ku kubulwa moyo?

[Bipangujo bya Kifundwa]

[Kifwatulo pa paje 16]

Le bambutwile bakakwasha namani babo bana babulwe moyo?

[Bifwatulo pa paje 17]

Milombelo mīpi ibwanya kukukwasha wikale wa kubulwa moyo mu mwingilo