Lelo Mūlu I Bika?

BAMO balañanga amba kebibwanikapo kuyuka myanda ya mūlu mwanda kekudipo utūkile’mo wa kwitulombola bitala mūlu. Padi abailwa byānene Yesu amba: “Natūkile mūlu naiya pano.” (Yoano 6:38) Kadi wānene bendeji bamo ba bipwilo amba: “Bānwe mwi bamunomunshi, ino ami ne wamūlu.” (Yoano 8:23) Le Yesu wānene bika pa bitala mūlu?

Yesu wānene’mba bine mūlu mo mwikalanga Yehova. Wātelele Leza bu “Tata wa mūlu” (Mateo 12:50) Ino Yesu wāingidije kishima “mūlu” mu buluji buvule. Kimfwa, wātelele lwelele bu “mūlu” paānene amba: “Nanshi talaipo bidi ne ku byoni bya mūlu.” (Mateo 6:26) Inoko, Yehova wikele kupita ne pa lwelele pene. Bible amba: “I aye’wa ushikete pa kifunda kya panopanshi.”—Isaya 40:22.

Lelo “Tata wa mūlu” udi mūlu mudi ñenyenye? Diulu dimweka na meso nadyo ditwanga bu “mūlu” mu Bible. Kimfwa, mulembi umo wa mitōto wāsonekele’mba: “Po nañanga madiulu obe, mīngilo ya minwe yobe, ne kweji ne ñenyenye, byo watūdile; lelo muntu nandi i waka, ōlañanga?”—Mitōto 8:3, 4.

Leka leka, Yehova Leza kashikatangapo mu diulu dimweka na meso dyapangile, enka na kemwikadilangapo sendwe wa mbao munda mwa kabatyi kapopele. O mwanda, Mulopwe Solomone pa kufikijija kudi Yehova tempelo ya mu Yelusalema, wānene’mba: “Leza akekale binebine panopanshi’ni, a? Talapo bidi, diulu ne diulu dya madiulu kedikōkejepo kyaba kya kukwikadijamo abe; longapo ino njibo mityetye yo nashimika!” (1 Balopwe 8:27) Shi Yehova kekalangapo mūlu mumweka na meso, penepa i mūlu’ka mwine mwaikele?

Nansha bantu byo befundile madiulu amweka na meso na majimele a bukomo, bakwabo nabo bakananga ne mu lwelele; binenene Bible i bya bine nyeke amba: “Nansha umo wamwenepo Leza.” (Yoano 1:18) Yesu wāshintulwile kyakamwekela pa kunena’mba: “Aye Leza i mushipiditu.”—Yoano 4:24.

Mushipiditu i būmi bwa peulu kupita bantu. Mushipiditu keudipo na bipindi bya ngitu bikokeja kumonwa ne kutengwa na bantu, kimfwa misunya ne mashi. Nanshi Yesu paānene amba wādi wikele pamo na Shandi “mūlu,” wādi usaka kunena’mba wādi na būmi bwa ntumbo bupite bwa bantu. (Yoano 17:5; Fidipai 3:20, 21) Kino kīkalo kya ku mushipiditu mwādi mwikele Yesu ne Shandi kitelwa mu Bible bu “mūlu.” Le mūlu i bika? Le i bika bilongeka’mo?

 Kifuko kya Mingilo ya Nsangaji

Bible utela mūlu bu kifuko kya mingilo. Ulombola’mba mudi bipangwa bya ku mushipiditu bya kikōkeji bivulevule. (Danyele 7:9, 10) Bino bipangwa bya ku mushipiditu bidi na ngikadilo mishileshile. Le tubayuka namani? Mu bipangwa byonso bimweka, i mutupu bipangwa bibidi biifwene potō, nanshi tukulupila’mba mūlu mudi bipangwa bya miswelo ne miswelo. Kintu kya kutendelelwa, bonso badi mūlu bengidilanga pamo umbumo, kintu kishile kulampe na ntanda ya dyalelo, mudi bantu bakomenwe kwingidila pamo.

Tala Bible mwalombwela bilongwa mūlu. “Tōtai Yehova banwe bamwikeulu bandi; banwe ba bukomo bukatakata, bafikijanga mwanda wandi, kwivwana diwi dya mwanda wandi. Tōtai Yehova byanwe bibumbo byandi byonso; banwe bengidi bandi balongelanga muswidile mutyima wandi.” (Mitōto 103:20, 21) Nanshi mūlu mudi mingilo mivule. Tubwanya kwitabija’mba i mingilo isangaja.

Bamwikeulu bengilanga mwingilo wa nsangaji tamba kala ne ntanda mine keyapangilwe. Mungya Bisonekwa, Yehova pa kupanga ntanda, bana ba Leza ‘bāimbile na nsangaji’ kadi “baela nsadi ya tusepo.” (Yoba 38:4, 7) Mwanā Leza umo wa mūlu wāikele na dyese dya kwingila pamo na Leza pa kupanga bintu bikwabo byonso. (Kolose 1:15-17) Ino nsekununi isangaja ya mingilo miyampe ingilwa mūlu ikokeja kukulengeja wiipangule bipangujo bitala mūlu ne muzo wa muntu.

Le Bantu Bāpangīlwe Kwenda Mūlu?

Bamwikeulu badi bengidila kala Leza mūlu kumeso kwa ntanda kupangwa, mwana-mulume ne mwana-mukaji babajinji kebāpangilwepo mwanda wa kuyuja mūlu. Ino, Leza wānene bano ba mulume ne mukaji babajinji amba: “Butulai; mwivudijei, muyujei panopanshi.” (Ngalwilo 1:28; Bilongwa 17:26) Adama i muntu umbajinji wa būmi bwa muswelo mukwabo bwa pano panshi, ukokeja kuyuka Leza ne kumwingidila na kikōkeji. Wādi wa kubutula muzo wa muntu wadi wa kwikala pa ntanda. “Madiulu i madiulu a Yehova; ino panopanshi wapene kudi bāna ba bantu.”—Mitōto 115:16.

Bantu kebasakangapo kufwa; muntu kāpangilwepo mwanda wa kufwa. Leza wātelēle Adama lufu bu mfuto ya kubulwa kikōkeji. Shi Adama wākōkēle, longa kafwilepo.—Ngalwilo 2:17; Loma 5:12.

Nanshi ke kya kutulumukapo, shi Leza kāsapwidilepo Adama myanda ya kwenda mūlu. Kadi ntanda ke kifukopo kya bantu kutompelwa’po mwanda wa kuyuka shi i bafwaninwe kwenda mūlu. Muntu wāpangilwe amba ekale nyeke pano panshi, kadi ino mpango ya leza ikafikidilanga. Bible ulaya’mba: “Boloke bakapyananga ntanda, ne kwikala monka nyeke.” (Mitōto 37:29) I bimweke patōka’mba, ku ngalwilo bantu kebādipo ba kwenda mūlu. Penepa, mwanda waka Yesu wālaile batumibwa bandi būmi bwa mūlu? Lelo Yesu wādi usaka kunena’mba bayampe bonso bakenda mūlu?