Bine Bible I Kinenwa kya Leza kya ku Bukomo bwa Mushipiditu

LELO i bika byādi bisaka kunena mutumibwa Polo pa kunena amba Bible i wa “ku bukomo bwa mushipiditu wa Leza”? (2 Temote 3:16, New World Translation) Polo wādi usaka kunena’mba Leza wāludikile balembi ba Bible kupityila ku mushipiditu sandu wandi basoneke enka bintu byaādi usaka basoneke.

Mutumibwa Petelo wānene amba, bano balembi ba Bible “banenene monka mo batwadilwetwadilwe kudi Mushipiditu Sandu.” (2 Petelo 1:21) O mwanda mutumibwa  wātelele mikanda ya mu Bible bu “bisonekwa bikola, biyūkile ne mwakukupela ñeni ya ku lupandilo pa kwitabija kwa monka mudi Kidishitu Yesu.”—2 Temote 3:15.

Bantu bavule batatananga amba Leza ke mwinepo ulembeje Bible. Basantaudi i balwe pampikwa kafuku na bubinebine bwa Bible, na mwanenene Mukelenge Charles Marston, mufundi wa bintu bya kishiyekulu amba i “bafutulule mānga ya mu Bible.” Bangi bamupelula amba i “mfumo ya kala ne mānga ya kufwatakanya yobabungile’tu pamo.”

Jingulula Bukamoni

Lelo Bible i dibuku dikulupilwa? I biyampe uyuke bubine pa uno mwanda mwa kulondolwela. Mwanda waka? Mwanda shi Bible ekale na musapu utamba kudi Leza mwine, nankyo kupela’o, i bulembakane, shi bitupu i lufu. Muswelo oitabija’ye akuludike binebine mu bilongwa byobe ne kubunda nkulupilo yobe ukatyepa bininge shi umumwene bu binenwa bitupu bya bantu pa kyaba kya kumumona bu Kinenwa kya Leza.—1 Tesalonika 2:13.

Penepo unena’po namani? Biyampe, shi ubetana na bantu, ukayuka namani amba i bakulupilwa? Bubine i buno’mba, kikalanga kikomo kukulupila bantu bokuyukidijepo senene. Poso enka shi ubaikala na bantu kitatyi kampanda ne kwibayukidija senene, ebiya koyuka shi i bampikwa budimbidimbi ne bakulupilwa. Ubwanya kuyuka Bible uno muswelo umo. Koketabija pampikwa kulanguluka misapu nansha milangwe kampanda itatanwa ipēlula kikulupiji kya kukulupila Bible. Wilamije’ko kitatyi kya kubandaula bukamoni bubingija binena Bible amba i wa “ku bukomo bwa mushipiditu wa Leza.”

Bulwi bwa ‘Betela Kuswa’ye’

Kokavulaminwa bubine bwa amba nansha ke bantu betela bu ‘baswele’ Bible i bapatanye bubinebine ne kukulupilwa kwandi. Dibuku New Dictionary of Theology dinena’mba,  dyalelo bantu bavule bafundija Bible, nansha byobetela bu Bene Kidishitu “batelanga Bisonekwa amba i mānga ya bantu.”

Bantu bavule bafunda teoloji batatananga balembi ba mikanda ya mu Bible. Kimfwa, bamo bapatana amba mukanda wa Isaya kēwasonekelwepo na mupolofeto Isaya. Banena’mba, uno mukanda wa mu Bible, wālembelwe papo Isaya ke mufwe kala. Lowther Clarke mu dibuku dyandi Concise Bible Commentary, upatanya’mba i “mubundwe na milangwe ya bavule ne nkongo mivule.” Ino uno muneneno ubavulaminwa’ko amba Yesu ne bana bandi ba bwanga bādi batela kyaba kyonso amba Isaya ye mulembi wa mukanda wandi.—Mateo 3:3; 15:7; Luka 4:17; Yoano 12:38-41; Loma 9:27, 29.

Kadi kibi kutabuka, basantaudi ba Bible, pamo bwa J. R. Dummelow, banena amba bupolofeto budi mu mukanda wa Danyele “i mānga ya bintu bilongeke kala yaālamwinwe na balembi amba i bupolofeto.” Pa kunena uno muswelo napo, abailwa bukamoni bwa Yesu Kidishitu aye mwine. Yesu wāletele kidyumu kitala pa “kya munyanji kya musala kyokya kyanenenwe kudi Danyele mupolofeto, ke kīmene kadi po kijidikilwe kijila.” (Mateo 24:15) Lelo bidi na buluji Bene Kidishitu bakulupile amba Yesu Kidishitu nandi wābepele—pa kubingija mānga yalamwinwe bu bupolofeto? Nansha dimo.

Lelo Bilengeja Kwikale Kwishila?

Padi ubwanya kwipangula’mba, “Mwene kino kilengeja kwikale milangwe mishile mu bantu itala boba bālembele mikanda ya mu Bible? I amo kilengeja kwikale kwishila kukatampe. Le ukamona namani mukanda obanena’mba mo mudi milangwe ne myanda ya mfulo yanene mulunda nobe, shi ku mfulo ubajingulula’mba ke ayepo ulembele’o? Langa, bashayuka abakusapwila’mba byadi bya kufwatakanya bitupu—i bantu bamuswele bo basonekele byobya byobadi balanga’mba byobisaka mulunda nobe. Lelo kino kibulwe’po kutyepeja bulēme bwa mukanda? Le ukakulupila binebine amba uno mukanda ulombwele byobya bisaka mulunda nobe?

I muswelo umo onka ne Bible. Ke kya kutulumukapo shi bantu bavule—nansha ke boba betela bu Bene Kidishitu bene— bapumpunyanga ku kusaka byobya binena Bible pa kubulwa budimbidimbi, busekese, ne bikwabokwabo. Lelo kwaimvwene divule dine bantu banena na kafutululo binenwa pamo bwa bino amba, “Ī, kyakyo i Kipwanino kya Kala”—utala’mba kekidipo na mvubu mikatampe. Ne kino kipumpunya bubine bwa amba mutumibwa Polo wātelele kino kyobeta bu Kipwanino kya Kala amba i “bisonekwa bikola” bilembelwe ku “bukomo bwa mushipiditu wa Leza.”

Ukokeja padi kupatanya’mba, “i bikomo kupela bukamoni buletwa na bashayuka ne bafundi bonso.” Shako, eyo! Kimfwa, tufwijanga’ko, pa befundi bampikwa budimbidimbi betukweshe tuyuke bilembwa bibajinjibajinji bya Bible. I kimweke patōka amba, kudi tubilubo tutyetutye twādi tutwela’mo pa kutentula Bible misunsa mivule umbula bwa myaka tutwa na tutwa. Ino vuluka’mba: Kudi kwishila kukatampe pa  kwitabija amba kudi tubilubo tutyetutye twekujije mu Bible pa kutentulula’ye ne kufutulula Bible ense amba i milangwe ya bantu.

Lama Lwitabijo Lobe mu “Bisonekwa Bikola”

Polo kumeso kwa kunena’mba Bible i wa ku bukomo bwa mushipiditu wa Leza, wāsapwidile Temote mwanda waka bino bilembwa bya ku bukomo bwa mushipiditu i bya mvubu. Wānene amba: “Mu oa mafuku a kumfulo’a . . . babi, ne banzazangi, basa kwenda bavula ne kuvula ku kubipa, ne kongojana, ne kwiongola abo bene.” (2 Temote 3:1, 13) Bimweka’mba mu mafuku a Polo, ‘bantu bañeni, bakudyumuka’ bādi bakwingidija “mīsambo ya lushiñanya” mwanda wa kongola bantu ne kuzozeja lwitabijo lwabo kudi Yesu Kidishitu. (1 Kodinda 1:18, 19; Kolose 2:4, 8) Pa kwilama ku lupusa lwabo, mutumibwa Polo wāsoñenye Temote ‘endelele kūminina’tu mu bintu byaāfundijibwe, tamba pa bwanuke mu bisonekwa bikola’ biletele Leza.—2 Temote 3:14, 15.

I kya mvubu mikatampe nobe ūminine namino mu ano “mafuku a kumfulo’a.” Kokatyepeka kyaka kya kongolwa na ‘mīsambo ikalanga divule ya lushiñanya’ lukatampe iletwa na bantu badyumuke. Ino, pamo bwa Bene Kidishitu ba mu myaka katwa kabajinji, wilame na kukulupila ne pa mfulo byobya byowifunda mu Bible—kine Kinenwa kya Leza kya ku bukomo bwa mushipiditu wandi.

Batumoni ba Yehova bakasangela ku kukwasha utamije lwitabijo mu Bible. Kimfwa, bakakulombola muswelo wikele misoñanya ya mu Bible na lupusa lukatampe mu mānga ya bantu; mukwatañenine Bible na sianse paesambila pa myanda ya sianse; mwakwatañenine tamba ku ngalwilo kufika ne ku mfulo; mufikidila bupolofeto budi’mo—ne bikwabokwabo. Shi uswile, udi na bwanapabo bwa kusonekela balembi ba dino dipepala bakulombole myanda yakweshe bantu kebabadika ba mityima myoloke bamone amba bine Bible i Kinenwa kya Leza.

[Bushintuludi pa paje 5]

Shi ubetana na bantu, ukayuka namani amba i bakulupilwa?

[Bushintuludi pa paje 6]

Tufwijanga’ko, pa befundi bampikwa budimbidimbi betukweshe tuyuke bilembwa bibajinjibajinji bya Bible