Byāfundije Yesu Padi Leza

“Muntu umo kete uyukile biyampe Tata i Mwana. Kadi Mwana usakanga kusapwila bakwabo myanda ya Tata, amba nabo bamuyuke.”—LUKA 10:22, CONTEMPORARY ENGLISH VERSION.

MWANA umbedi wa Leza, kumeso kwa kwiya’ye pano panshi, wāikele mu kipwano na Shandi mu bula bwa myaka keibadika. (Kolose 1:15) Mu uno muswelo, Mwana wāyukile senene milangwe, malango, ne mashinda a Shandi. Mwenda myaka pāile uno Mwana bu muntu pano pa ntanda, wādi na mutyima wa kufundija bubinebine butala padi Shandi. Tukokeja kwifunda bivule padi Leza na kuteja byānene wandi Mwana.

Dijina dya Leza Dijina dya Leza, Yehova, i dya mvubu mikatampe kudi Yesu. Uno Mwana muswedibwe wādi usaka bantu bakwabo bayuke dijina dya Shandi ne kwiditela. Dijina dine dya Yesu dishintulula’mba, “Yehova I Lupandilo.” Mu bufuku bubadikila lufu lwandi, Yesu wāsapwidile Yehova mu milombelo amba: “Nebayūkija ne dijina dyobe.” (Yoano 17:26) Ke kya kutulumukapo shi Yesu wādi utela dijina dya Leza ne kuyukija’dyo bakwabo. Ne kadi bidi, le bemvwaniki ba Yesu bādi ba kwimvwana bubinebine butala padi Yehova namani kuyuka dijina dyandi ne modishintulwila mpika? *

Buswe bukatakata bwa Leza Yesu wānene kyaba kimo mu milombelo kudi Leza amba: “Abe Tata, . . . waunsanshilwe ne panopantanda pene kepapangilwepo.” (Yoano 17:24) Yesu pa kwimwena buswe bwa Leza momwa mūlu, wākimbile kusokola buno buswe mu miswelo mivule milumbuluke.

Yesu wālombwele amba buswe bwa Yehova i bukatampe. Wānene amba: “Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.” (Yoano 3:16) Kishima kya Kingidiki kyalamwinwe bu “bapanopantanda” kekidipo na buluji bwa “nshi.” Monka mokingidijibwe pano, kifunkila pa bantu—bine, i pa bantu bonso’tu. Nanshi buswe bwa Leza bwasenswe kisaka kya muntu i bukatampe bwa kupāna ne wandi Mwana mulēme mwanda wa bantu ba kikōkeji bakūlwe ku bupika bwa bubi ne lufu ne kwikala na lukulupilo lwa būmi bwa nyeke. Ketubwanyapo kupima bulampe ne nkulwe ya buno buswe bukatampe.—Loma 8:38, 39.

Yesu wāletele bubinebine bukulupilwa amba: Yehova usenswe mpata batōtyi bandi umo ne umo. Yesu wāfundije amba Yehova udi pamo bwa mukumbi udi na mikōko mishileshile kadi milēme. (Mateo 18:12-14) Kadi Yesu wānene amba kekudipo musolwe nansha umo upona panshi Yehova kuyuka mpika. Wābweja’ko amba: “Ne nywene mīne ya ku mutwe wenu nayo i mibalwe yonso.” (Mateo 10:29-31) Shi Yehova udi na bukomo bwa kuta mutyima uno musolwe umo upona pantu kampanda, lelo batōtyi bandi umo ne umo ke pepi, abulwe kwibamona ne kwibata mutyima? Shi Yehova ubwanya kubala ne kumona lunywene ne lunywene lwa ku mutwe wetu, lelo abulwe’po kuyuka kanda kamo ne kamo mu būmi bwetu ka byotusakilwa, byotulwa nabyo, ne bitukambakanya?

Tata wa Mūlu Enka na motwekimwenine mu kishinte kishele kunyuma, Yesu i Mwana wa bunka wa Leza. Ke kya kutulumukapo shi uno Mwana muswedibwe wādi wisamba divule na Yehova ne kusapwila bantu amba ye  “Shandi.” Mu binenwa bibajinji kulembwa bya Yesu, byaānene mu tempelo paādi na myaka 12, wātelele Yehova bu “Tata.” (Luka 2:49) Kishima “Tata” kitanwa mu Maevanjile misunsa kubwipi kwa 190. Divule dine Yesu wātelele Yehova amba “Shenu,” “Tata wetu,” ne bu “Tata.” (Mateo 5:16; 6:9; 7:21) Yesu pa kwingidija uno mutelelo pampikwa kwikaka, wālombwele amba ne bantu ba bubi ne bakubulwa kubwaninina, bakokeja kupwana na Yehova na mwapwanine nandi kipwano kityite ne kikulupilwa.

Wa mutyima wa lusa ne kulekela Yesu wāyukile amba bantu bakubulwa kubwaninina basakilwa kulekelwa bininge na Yehova. Mu lukindi lwandi lwa mwana mujimine, Yesu wādingakenye Yehova na mbutwile wa lusa ne wa kulekela ubāla kuboko kwandi ne kutambula mwana wisāsa. (Luka 15:11-32) Nanshi binenwa bya Yesu bitukulupija amba Yehova umonanga kushinta ko-konso kwa mutyima kushinta mubi ne kwikala ke kyalwilo kya kufwilwa lusa. Yehova ukimbanga kulekela kipya-mambo wisāsa. Yesu wānene amba: “Nemusapwila’mba: I enka namino kusepelela kukēkalanga mūlu pa umo kipya-mambo wakwalamuka pa mutyima mukile ne boba boloke makumi kitema ne bantumo kitema bakubulwa ne kyo basakila kwalamuka pa mutyima.” (Luka 15:7) Le i ani kabulwe’po kusangela kufwena kudi uno Leza wa lusa?

Wimvwana Milombelo Yesu paādi mūlu, wēmwenine amba Yehova ye “wivwananga kulombela,” ne amba usangelanga milombelo ya batōtyi bandi ba kikōkeji. (Mitōto 65:2) O mwanda, Yesu mu mwingilo wandi, wāfundije bemvwaniki bandi muswelo wa kulombela ne bine bya kulomba. Wēbadingile amba: “Kokipituluka bitupu bitupu, wa dimo kō dimo.” Wāsoñenye bemvwaniki bandi kulomba amba kiswa-mutyima kya Leza kilongeke “mūlu ne panopantanda pene.” Tubwanya kadi ne kulomba bidibwa bya mafuku onso, kulekelwa kwa bubi bwetu, ne kukomena matompo. (Mateo 6:5-13) Yesu wāfundije amba Yehova ulondololanga milombelo ya bengidi bandi pamo bwa Shabana ne kwibapa byobalomba na mutyima umo ne lwitabijo.—Mateo 7:7-11.

Ne kutatana mpika, Yesu wādi ukimba kufundija bubinebine butala padi Yehova ne mwaikadile. Ino kudi ne kintu kikwabo kitala padi Yehova kyadi kipyasakenine Yesu kufundija—kintu kikengidija Yehova mwanda wa kushinta ntanda amba afikidije mpango yandi itala ntanda ne bantu. Na bubine, kino kintu kyāsapwile Yesu kyadi bu mutwe wa mwanda mukatampe wa busapudi bwandi.

[Kunshi kwa dyani]