Byāfundije Yesu pa Bulopwe bwa Leza

“Wadi wenda upitapita monso mu bibundi bikata ne bityetye, kufundija . . . myanda-miyampe ya bulopwe bwa Leza.”—LUKA 8:1.

TUSAKANGA kunena bintu byotusaka, byobya bitudi ku mutyima. Enka na mwānene Yesu amba, “ke-bintu byōtambija mu kanwa i byōyujije kala ku mutyima.” (Mateo 12:34) Shi tutale bintu byānene Yesu mu mwingilo wandi, tukafula ku kunena’mba Bulopwe bwa Leza bwādi ku mutyima wandi.

Lelo Bulopwe bwa Leza i bika? Bulopwe i umbikalo wendejibwa na mulopwe. Nanshi Bulopwe bwa Leza i umbikalo utūdilwe’ko na Leza. Yesu wānenene bivule bitala pa Bulopwe bwa Leza, wēbutūla ke mutwe wa mwanda wa musapu wandi. Bulopwe i butelwe mu Maevanjile kupita ne pa misunsa 110. Yesu kādipo ufundija ku kanwa bitupu. Bilongwa byandi byāfundije bivule pa Bulopwe bwa Leza ne byobukalonga

Le Mulopwe i ani? Mulopwe wa Bulopwe bwa Leza kavotelwepo na bantu. Ino, uno Mulopwe i mutongwe na Leza mwine. Yesu wāsokwele mu bufundiji bwandi amba i aye utongelwe na Leza bu Mulopwe.

Yesu wādi uyukile amba bupolofeto bwa Bible bwālaile amba Meshiasa wālailwe ukabikala Bulopwe nyeke ne nyeke. (2 Samwele 7:12-14; Danyele 7:13, 14; Mateo 26:63, 64) Vuluka’mba Yesu wētelele patōkelela bu Meshiasa wālailwe. Mu uno muswelo Yesu wāyukilwe bu Mulopwe mutongwe na Leza. (Yoano 4:25, 26) Yesu wādi na bubinga bwa kutela divule amba “bulopwe bwami.”—Yoano 18:36.

Kadi Yesu wāfundije amba kudi bantu bakabikala nandi mu buno Bulopwe. (Luka 22:28-30) Wāityile bano ba kubikala nandi bu “kaluombe katyetye,” ke-pantu kibalwa kyabo i kityetye. Wēbasapwidile amba: “Shenu i mutōkwe pa mutyima kwimupa bulopwe.” (Luka 12:32) Mukanda wa mfulo wa mu Bible ulombola amba kukekalanga bantu 144000 bakekala na dyese dya kubikala na Kidishitu.—Kusokwelwa 5:9, 10; 14:1.

Lelo buno Bulopwe budi kwepi? Yesu wāsapwidile Pontyusa Pilato, mbikavu wa Loma amba: “Bulopwe bwami kebudipo bwa panopantanda, mhm.” (Yoano 18:36) Bulopwe bupēlwe Kidishitu kebukaludikwapo na bantu. Divule dine Yesu wātelele Bulopwe bwa Leza bu “bulopwe bwa mūlu.” * (Mateo 4:17; 5:3, 10, 19, 20) Nanshi Bulopwe bwa Leza i umbikalo wa momwa mūlu.

Yesu wādi ukulupile kujokela mūlu kupwa kwa mafuku matyetye pano pa ntanda. O mwanda, wānene amba “Naenda kwimulongolwela  kuntu,” kushitwila ba kubikala nandi dishinda dya ku mulonda.—Yoano 14:2, 3.

I bika bisa kulonga Bulopwe? Yesu wāfundije bemvwaniki bandi kulomba Leza’mba: “Bulopwe bobe bufike. Muswidile mutyima obe mūlu ne panopantanda pene i monka.” (Mateo 6:9, 10) kiswa-mutyima kya Leza kilongekanga mūlu. Bulopwe i kingidilwa kikafikidija nakyo Leza mpango yandi itala ntanda. Pa kufikidija’yo, Bulopwe bukashinta bintu pano pa ntanda.

I bika bikalonga Bulopwe bwa Leza pa ntanda? Yesu wāfundije amba Bulopwe bwa Leza bukapwija bibi na kufundula’ko boba bonso bendelela kulonga’byo. (Mateo 25:31-34, 46) Ino ikekala mfulo ya bukobakane ne bibi bya miswelo yonso. Yesu wāfundije amba, ntanda ikayula bantu “bakōkele,” boloke, ba lusa, “ba mutyima wakutōka to-ō,” ne bakupwanya.—Mateo 5:5-9.

Lelo bano bantu ba kikōkeji bakekala mu umbuo wa ntanda myoneke? Nansha dimo! Yesu wālaile amba ntanda ikalumbulukila’ko mu Bulopwe bwa Leza. Muntu umo wādi wa kwipaibwa pamo na Yesu wānene amba: “Umvuluka Mfumwami, popa pōkāya mu bulopwe bobe.” Yesu kishima-tentu amba: “Dyalelo dino’di ukēkalanga nami mu Paladisa.” (Luka 23:42, 43) Bine, Bulopwe bwa Leza bukalamuna ino ntanda ke paladisa konso konso—ikele pamo’nka na yoya yādi’ko mu budimi bwa Edena.

Le Bulopwe bukalongela bantu bika bikwabo? Yesu kākadikilepo’tu enka pa kulaya byobya bikalonga Bulopwe bwa Leza. Ino kadi wālombwele’byo ne mu bilongwa. Yesu wālongele bingelengele bivule bya kubelula, ino bino bityetye’tu byaālongele, bilombola byobya bikatampe byakalonga mu Bulopwe bwa Leza. Nsekununi ya Evanjile ya ku bukomo bwa mushipiditu inena padi Yesu amba:  “Wadi wenda ujokoloka monso mu Ngadilea kufundija mu mashinakoka abo, ne kusapula myanda-miyampe ya bobwa bulopwe, kadi ne kūndapa miswelo yonso ya mbá, ne miswelo yonso ya bulema bwa bantu.”—Mateo 4:23.

Yesu wābelwile miswelo ne miswelo ya mbá. ‘Wāpūtwile meso a mpofu wa tamba munda mwa inandi.’ (Yoano 9:1-7, 32, 33) Yesu wābelwile muntu wādi ususuka na luba lubi lwa makopo, na kumutenga na kanye. (Mako 1:40-42) Kitatyi kyobāmuletele muntu “mujikematwi ne kukukumina ponka,” Yesu wālombwele amba ubwanya kulonga “bajikematwi ke bēvwana, ne bakamama’tu ke banena.”—Mako 7:31-37.

Tala nansha ke lufu lwine keludipo na lupusa pa Mulopwe mutongwe na Leza. Kudi misunsa isatu, yāsangwile Yesu bantu bafwe. Wāsangwile mwana umo wa mukaja-mufu, mwana mwana-mukaji wa myaka 12, ne mulunda nandi Lazalasa.—Luka 7:11-15; 8:41-55; Yoano 11:38-44.

Yesu pa kulombola būmi bulumbuluke butengele babikalwa ba Bulopwe bwa Leza, wālaile kupityila kudi mutumibwa Yoano amba: “Talaipo bidi, kipema kya Leza byo kidi pa bantu, ne ukēkalanga nabo, nabo bakēkala bantu bandi, ne Leza mwine ukēkala nabo, ke Leza wabo kadi. Kadi Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.” (Kusokwelwa 1:1; 21:3, 4) Langa’po bidi—ntanda yampikwa’mo impolo ya bulanda, misongo, nansha lufu! Penepo ye po pakafikidila ne pa mfulo milombelo ya kulongeka kwa kiswa-mutyima kya Leza pano pa ntanda na mokilongelwa mūlu.

Lelo Bulopwe bwa Leza bukafika kitatyi’ka? Yesu wāfundije amba kitatyi kya kubikala kwandi kikekala kimo kyonka na kitatyi kya myanda ya binkumenkume kyaātelele bu “kwikala’po” kwandi. Yesu wāletele bupolofeto bulombola kitatyi kikashilula kwikala’po kwandi bu Mulopwe. Kino kitatyi kikekala kya tuvutakanya ntanda yonso, kubadila’mo mavita, bimpengele bya nzala, kutenkana kwa ntanda, bipupo bya mbá, ne kwilundila’ko kwa kujila kwa bijila. (Mateo 24:3, 7-12; Luka 21:10, 11) Bino ne myanda mikwabo yālaile Yesu i bimweke nakampata tamba mu 1914, mwaka mwine washilwile Divita dya I dya ntanda. Nanshi Yesu pano i Mulopwe. Panopano ponka kitatyi kisa kufika kya Bulopwe kwiya ne kulonga kiswa-mutyima kya Leza pano pa ntanda. *

Le kwiya kwa Bulopwe bwa Leza kukashintulula bika kodi? Byonso bilondanga muswelo olondolola ku musapu wa Yesu.

[Kunshi kwa dyani]