Le Leza Ukilonga’ka?

“Abe Yehova, lelo i kika kyo waimanina kulampe? Le i kika kyo wifila mu myaka ya kususuka, a?” *—MITŌTO 10:1.

SHI wele’tu diso pa myanda imweka, ukamona’mba tudi mu “myaka ya kususuka.” Shi kinkumbulu kibetuponena—bupolapola, akishida mikata, nansha kufwilwa muntu otusenswe—tubwanya padi kwiipangula’mba, Le Leza umwene? Le utele’ko mutyima? Lelo aye uno udi’ko ne kudi?

Inoko, le kodi mujingulule amba tukokeja ne kwikala na milangwe mifwe pa byobya byotusaka Leza etulongele? Tulete kimfwa: Langa’po bidi mwana mutyetye wafītwa mwanda wa shandi waenda ku kaji. Mwana washibwa na shandi ne usaka ajokele kwinjibo. Mwana wemone bu mwelwe. Kawiipangula dyuba dyonso amba, “Le Tata udi kwepi?”

Tubamone kala milangwe mifwe idi na mwana. Shandi bidi wingilanga mwa kulelela kisaka, ne usa kujoka kitatyi kampanda. Lelo milangwe yetu ibulwe padi kwikala mifwe pamo bwa ya uno mwana kitatyi kyotwiipangula amba “Le Leza udi kwepi le”?

Kimfwa, bamo bakokeja kufwatakenya Leza amba i ntapañani wikadile enka kupa bantu mfuto pa kilubo kyo-kyonso kyobalonga. Bakwabo nabo bamonanga Leza bu dila dimo, kadi kankonye na byandi—upāna twaji, bakaji nansha balume, ne dyese dya kubwina ku makayo.

Kufwatakenya Leza uno muswelo kumumwekeja bu kaloñangapo byoloke ne amba shi ketumwenepo byotumulomba, nabya i wa mutyima mūmu kabangilepo masusu etu ne kayukilepo bisakibwa byetu. Bino byonso ke bya binepo! Bubine i buno, amba kudi kitatyi kiyukile Yehova Leza kya kulonga bintu mu muswelo umwena’mo kisaka kyonso kya bantu, ke mu muswelopo umusakila bavule alonge.

Shi ke pano, Lelo Leza ukilonga’ka? Pa kulondolola kino kipangujo, i biyampe tujokele ku ngalwilo kwa mānga ya muntu pāonenwe mpata kipwano kya Leza na bantu—inoko ke mu muswelopo o kikoma kulongoloka.

Bibi Bitambile ku Bubi

Langa’po bidi njibo mishibwe masala myaka mivule. Mutenge i mukuluke, binjilo bityumuke, kadi panja pa njibo napo i pasalakane. Kudi kitatyi kyadi njibo biyampe—ino pano ke myoneke. Shi utale moyonekele, kwiilongolola ke mwandapo mutyetye; mwanda keikapupo mu difuku dimo.

Pano tala monekele muzo wa muntu ke padi myaka 6000, tamba Satana, mushipiditu keumweka, ongola ba Adama ne Eva batombokele  Leza. Kumeso kwa uno mwanda kulongeka, ba mulume ne mukaji babajinji bādi na būmi bubwaninine ne kyepelo kya kwikala na būmi bwa nyeke pamo na nkongo ya babo bana yadi ya kulonda’ko. (Ngalwilo 1:28) Inoko, pobājilwile, ba Adama ne Eva bādi pamo bwa abo bāonene kisaka kya bantu papo akyo kekyaikele’ko.

Kokapēlula bibi bilupukile ku buno butomboki. Bible unena’mba: “Monka mwatwelele bubi panopantanda ku muntu umo, ne lufu nalo ponka pa bubi.” (Loma 5:12) Kutentekela pa kuleta lufu, bubi i buvutakanye kipwano kyetu na Umpangi wetu ne kona ngitu, ñeni, ne malango etu mene. O mwanda mwine ngikadilo yetu idi pamo bwa ya ino njibo mishibwe masala. Yoba muntu moloke wānene bya bine bitala ngikadilo yetu paētelele muntu amba “i wa mafuku matyetye, muyule tusuwa.”—Yoba 14:1.

Ino le Leza wāelele muzo wa muntu kupwa kwa ba Adama ne Eva kujilula? Mhm, nansha dimo! Na bubine, tamba penepa kutūla ne dyalelo, Tata wetu wa mūlu wingilanga mwanda wa kamweno ka kisaka kya bantu. Pa kumona bukatampe bwa byetulongela, tutale matabula asatu alombwa pa kulongolola njibo ne mukwatañenine ditabula ne ditabula na byobya bilongele Leza pa kulongolola muzo wa muntu.

1 Pa kupwa kutala monekele njibo, mwine’yo ufwaninwe kukwata butyibi, shi bwa kwiilongolola, shi bwa kwiitūta.

Kinondanonda na butomboki bwa mu Edena, Yehova Leza wātūdile’ko mpango ya kulongolola muzo wa muntu. Wānene Satana, mushipiditu wakubulwa kumweka mwine wāshilwile butomboki amba: “Nkabikanga nshikani padi abe ne padi mwana-mukaji, kadi ne ntundu yobe ne yandi; aye ukakusanshija ku mutwe obe, nobe ukamusanshija ku kapondo kandi.”—Ngalwilo 3:15.

Na bino binenwa, Yehova wālaile konakanya kalenga-byanzwe wa butomboki bwa mu Edena. (Loma 16:20; Kusokwelwa 12:9) Kadi Yehova wālaile kwikala’ko kwa “lukunwa” lwa kukūla bantu ku bubi. * (1 Yoano 3:8) Ino milao ilombola bubine bukatampe bwa amba: Leza usa kulongolola bipangwa byandi, ke kwibitūtapo. Inoko kulongololwa kwa muzo wa muntu kwadi kwa kulomba kitatyi; kekwadipo kwa kupwa difuku dimo.

2 Sendwe mu lūbako wafwatula kalata kalombola patōka musa kupwila mingilo ya kulongolola.

Yehova Leza wāpēle Bene Isalela bijila bilembwe ne kulombola mwa kushimikila tempelo ya kukamutōtela’ko. Bible unena’mba: “Byobya bidi mujiñininya wa bintu bīya.” (Kolose 2:17) Pamo bwa kalata kashike, bino nabyo byādi bilombola kintu kikatampe.

Kimfwa, Bene Isalela bādi bela bitapwa bya banyema mwanda wa  kulekelwa bubi. (Levi 17:11) Kino kyādi kyelekeja kitapwa kikatampe kyādi kya kwelwa myaka tutwa pa kupita’po—kitapwa kine kyādi kya kukūla bantu bya binebine. * Mūbakilo mwine wa tabenakulo ne tempelo kwine kwādi kutōta Bene Isalela welekeja matabula ādi a kupita’mo Meshiasa, tamba ku lufu lwandi lwa bu kitapwa kufika ne ku kukanda mūlu.—Tala  kapango pa paje 7.

3 Mushimiki watongwe, mwine ukavuija bilembelwe pa kalata ne kulongolola.

Yesu i Meshiasa wālailwe wa kufikidija byobya byelekejibwe na bitapwa bya Bene Isalela ne kupāna būmi bwandi bu kikūlwa kya kukūla bantu. Na bubine, Yoano Mubatyiji wātelele Yesu bu “Mwana-mukōko wa Leza wakushikuna bubi bwa panopantanda.” (Yoano 1:29) Yesu wāitabije mwingilo na mutyima tō. Wānene amba: “Natūkile mūlu naiya pano nkyaīdile kulonga muswidile mutyima wami, poso monka muswidile mutyima wa yewa wantumine.”—Yoano 6:38.

Kiswa-mutyima kya Leza padi Yesu kyādi kya “kupana muya wandi ke kikūlwa kya bavule bene,” ne kusamba na balondi bandi kipwano kya Bulopwe. (Mateo 20:28; Luka 22:29, 30) Buno Bulopwe dyo dishinda disa kufikidijija’mo Leza mpango yandi itala bantu. Musapu wa Bulopwe bwa Leza witwanga bu “myanda miyampe” mwanda ushintulula amba Leza i mushimike umbikalo mūlu wa kuludika myanda ya bantu!—Mateo 24:14; Danyele 2:44. *

Mwingilo wa Kulongolola Ukyendelela

Yesu kumeso kwa kwenda mūlu, wāsoñenye balondi bandi amba: “Endai nanshi mukafundijei mizo yonso ya bantu nabo ke bāna-babwanga, kwibabatyija mu dijina dya Tata, ne dya Mwana, ne dya mushipiditu sandu. Kadi ne kwibalombola balaminine byonso byo nemulaīle ami mwine. Ebiya, ami nami kadi, ngidi nenu mafuku onso nyeke, ne kumfulo kwine kwa panopantanda. Amena.”—Mateo 28:19, 20.

Nanshi kulongololwa kwa muzo wa muntu ke kwāfudilepo pāfwile Yesu. Kwadi kwa kwendelela kufika ne “kumfulo kwine kwa panopantanda”—kitatyi kine kikashilula Bulopwe bwa Leza kuludika pano pa ntanda yetu. Kino kitatyi kibafwena pabwipi. Tuyukile kino mwanda kiyukeno kyālaile Yesu kitala “kuvuika kwa ngikadilo ya bintu” kyo kyenda kifikidila. *—Mateo 24:3-14, New World Translation; Luka 21:7-11; 2 Temote 3:1-5.

Dyalelo Batumoni ba Yehova bakōkelanga musoñanya wa Yesu wa kusapula myanda miyampe ya Bulopwe bwa Leza mu matanda 236. Dino dipepala dyotanga i dilupulwe mwanda wa kukukwasha wifunde bivule bitala pa buno Bulopwe ne pa byobukalonga. Pa paje 2 wa Kiteba kya Mulami kyo-kyonso, ukatana’po bino binenwa bya amba: “Dino dipepala . . . disenga bantu bonso na myanda miyampe amba panopano ponka Bulopwe bwa Leza busa konakanya boba basusula bakwabo, ne kukālamuna ntanda ke paladisa. Dikankamikanga bantu bekale na lwitabijo mudi Yesu Kidishitu wētufwidile amba netu tukamone būmi bwa nyeke, kadi pano ke mubikale bu Mulopwe wa Bulopwe bwa Leza.”

Shako, pano ukimvwana myanda ya kutambwa na batumbula ne bimpengele bya kipangila, padi ubwanya ne kutanwa nabyo. Inoko kwifunda Bible kukakulengeja witabije amba Leza kelelepo bantu. Ino, amba “aye kadipo ne kulampe kwine na bātwe bonso, mhm.” (Bilongwa 17:27) Kadi mulao wandi wa kulongolola byobya byājimije bambutwile babajinji, usa kufikidila.—Isaya 55:11.

[Kunshi kwa dyani]

 [Tabulo/Bifwatulo pa paje 7]

 (Pa kuyukila’ko bikwabo, tala dibuku)

“Kyelekejo Kya Kyokya Kya Binebine”—Bintu Byāelekejibwe mu Tabenakulo

MADABAHU

Mutyima wa Leza wa kwitabija kitapwa kya Yesu.—BAHEBELU 13:10-12.

MUPIDISHITU MUKATAMPE

Yesu.—BAHEBELU 9:11.

1 Mu Difuku dya Kipwanyo, mupidishitu mukatampe wādi wela kitapwa pa mwanda wa bubi bwa bantu.—LEVI 16:15, 29-31.

1 Mu mafuku 14 Kweji wa Nisane, 33 K.K., Yesu wāpēne būmi bwandi pa mwanda wetu.—BAHEBELU 10:5-10; 1 YOANO 2:1, 2.

KIKOLA

Būmi bwa Yesu bwa bu Mwana wa bunka wa ku mushipiditu.—MATEO 3:16, 17; LOMA 8:14-17; BAHEBELU 5:4-6.

KIDIMBO

Ngitu ya bumuntu ya Yesu, kijika kijikakenye būmi bwa panshi na bwa mūlu.—1 KODINDA 15:44, 50; BAHEBELU 6:19, 20; 10:19, 20.

2 Mupidishitu mukatampe wādi upityila bukila bukwabo bwa kidimbo kikalañenye Kikola na Kikola Nakampata.

2 Yesu pa kupwa kusanguka, ‘wāpityīle bukila bukwabo bwa kidimbo’ na kukanda mūlu “kwitumwekela ponka pano bātwe pa mpala ya Leza.”—BAHEBELU 9:24-28.

KIKOLA NAKAMPATA

Mūlu.—BAHEBELU 9:24.

3 Shi mupidishitu mukatampe watwela mu Kikola Nakampata, wādi ukusa mashi amo a kitapwa kumeso kwa dikumbo dya kipwano.—LEVI 16:12-14.

3 Yesu pa kufikija mvubu ya mashi andi āmwangikile, wālongele kipwano kya binebine kya pa bubi bwetu.—BAHEBELU 9:12, 24; 1 PETELO 3:21, 22.