Mwa Kushikatyila na Mwinē Petu Mubomboke

MARGARITA ne wandi mulume Raúl, badi bengidila Yehova bu bengidi ba kitatyi kyonso mu myaka mivule. * Ino kitatyi kityetye pa kupwa kubutula wabo mwana umbajinji, Raúl washilula kupaluka Yehova. Bityebitye, Raúl washilula kulonga busekese ne kupangwa wapangwa mu kipwilo kya Bene Kidishitu. Margarita unena: “Bino byonso pa kulongeka, neimvwene’nka na wa kufwa. Mutyima wantyumukile, kya kulonga kyampwa.”

Mafuku matyetye kupwa kwa Jane kusongwa, mulumyandi waonene kikulupiji ne buswe bwa mukaji mu miswelo palapala. Washilula kumususula. Jane unena’mba: “Musunsa umbajinji waunkupile, natapilwe ku mutyima, ñeni yamvutakana, kadi nafwijibwe bumvu. Wadi na kisela ku kunomba lusa. Nadi nanga shako amba kiselwa kya Mwine Kidishitu i kufwila nyeke lusa ne kwilwa’byo. Nandi nanga’mba shi nombole muntu mukwabo ino myanda—nansha ke bakulumpe pa kipwilo bene—nankyo nabulwe kikōkeji. Kisela kya kunsusula ne kunomba lusa kyalēle myaka mivule. Kyaba kyonso, nandi nanga’mba kudi kintu kyombudilwe  kulonga amba wami mulume answe. Kitatyi kyaunshile na mwana wetu mwana-mukaji, nemwene bu nakomenwa, nadi mfwaninwe kulonga nansha kunena kintu kampanda pa kusaka’mba twikale nyeke pamo.”

Pamo bwa ba Margarita ne Jane, ukokeja padi kususuka mu ñeni, kubulwa muswelo, ne kukambakanibwa ku mushipiditu mwanda wa mulumyobe ukubombokele. Padi wi mulume udi na kilonda ku mutyima ne makambakano pa mwanda wa obe mukaji ulonga makoji. Ne kutatana mpika, Bible unena’mba tudi mu “myaka ya malwa.” Buno bupolofeto bulombola’mba, mu “mafuku a kumfulo’a,” bumo bwa kisaka bukapalakanibwa, na kubulwa’mo kwa lusa lwa bubutule mu miswelo mivule. Ne bantu bamo bakedingakanya bitupu bu bengidi ba Leza. (2 Tem. 3:1-5) Bene Kidishitu ba bine kebashīkilwe ku ano makambakano; penepo, i kika kikakukwasha ūminine shi ibakubomboke?

Wimone Mukumwena Yehova

Ku ngalwilo bikakukomena padi kukulupila amba muntu osenswe ubwanya kukusanshija binebine. Kyaba kimo ukashilula ne kwitopeka pa mwiendelejo wandi mubi.

Ino, vuluka’mba, nansha ke Yesu muntu mubwaninine waābilwe na muntu waādi ukulupile ne wasenswe. Yesu Kidishitu wālombele bininge ne kulanguluka kumeso kwa kutonga bengidi nandi batumibwa. Bonso 12 bādi bengidi bakulupilwa ba Yehova. O mwanda pambulwa ne kutatana kwine, Yesu mutyima wāmusense Yudasa pa “wālamukile ke musokodi.” (Luka 6:12-16) Inoko, Yehova kātopekelepo Yesu pa bilongwa bya Yudasa.

Bine dyalelo kekudipo mwikadi nansha umo mubwaninine. Bonso besongele baloñanga bilubo. Mulembi wa mitōto wāsonekele bya bine ku bukomo bwa mushipiditu amba: “Shi abe, Yehova, ubangile mambo nankyo le i ani, a Mfumwami, ukēmananga?” (Mit. 130:3) Pa kwiula Yehova, ba mulume ne mukaji bafwaninwe kwilekela kutupatupa kwabo.—1 Pet. 4:8.

Inoko “bātwe bonsololo, kuno ko tudi, tukēshintulwila kudi Leza, muntu pandi, muntu pandi.” (Loma 14:12) Shi mwinē pobe udi na muneneno ne bilongwa bityani, i aye ukeshintulwila kudi Yehova. Yehova i mupeleje butapani, muneneno mubi, o mwanda kekudipo bubinga nansha bumo bwa kususwila mwinē pobe na bilongwa byakubulwa buswe ne bulēme. (Mit. 11:5; Ef. 5:33; Kol. 3:6-8) Na bubine, shi Mwine Kidishitu udi na kibidiji kya kukalabala kitatyi ne kitatyi kwisāsa nansha kushinta mpika, ufwaninwe kupangwa mu kipwilo kya Bwine Kidishitu. (Ngat. 5:19-21; 2 Yoa. 9, 10) Mwinē pandi kadipo ne kya kwitopekela shi walombola bakulumpe uno mwiendelejo wakubulwa kufwaninwa. Bine, Yehova wimvwaninanga lusa boba basusulwa uno muswelo.

Shi mwinē pobe walonga makoji, kakulubilepo enka abe wampikwa mambo ino walubila ne Yehova. (Mat. 19:4-9; Bah. 13:4) Shi mwikadi wampikwa mambo wikankila’ko kulonda misoñanya ya Bible mu būmi, kadipo kyawitopekela pangala pa mubi ubombokele na makoji.

Yehova uyukile mowiimvwanina. Witelanga aye mwine bu mulumya muzo wa Isalela, ne mu Kinenwa kyandi mudi bisonekwa bivule bitenga mutyima bilombola mobyādi bimusanshila mwanda wa bilongwa bya makoji a ku mushipiditu bya uno muzo. (Is. 54:5, 6; Yel. 3:1, 6-10) Kulupila amba, shi mwinē pobe i mukubomboke, Yehova umwene mipolo yobe. (Mal. 2:13, 14) Uyukile amba usakilwa kusengibwa ne kukankamikwa.

Muswelo Upāna Yehova Busengi

Muswelo umo upāna Yehova busengi i kupityila ku kipwilo kya Bwine Kidishitu. Jane wātambwile buno bukwashi. Uvuluka’mba: “Bupempudi bwa mutadi wa kipindi bwafikile kitatyi kyonadi mutyumukwe mutyima. Wadi uyukile amba njia yami itambanga  ku kwilubula na wami mulume. Wakimbile’ko kitatyi kya kunkwasha nangulukile pa bisonekwa pamo bwa kya 1 Kodinda 7:15. Mavese a mu Bible ne binenwa byandi bya kanye byankweshe ntalule milangwe yami ya kwitopeka kadi byampele ndoe ya mutyima.” *

Margarita utelelwe kūlu’u, wayukile amba Yehova upānanga bukwashi bulumbuluke kupityila ku kipwilo kya Bwine Kidishitu. Unena’mba: “Pokyamwekele amba wami mulume kadipo na mutyima wa kwisāsa, naselele bami bana ne kuvilukila ku kibundi kikwabo. Ami pa kufika, nandi mbwanya kufutyila byumba bibidi. Difuku dyalondele’po natādilwa na bulanda, ami nkyakutulwile ne byonselele, naimvwana bakokola ku mulango. Nalanga’mba i mwinē njibo udi mu kyumba kikwabo. Natulumuka’tu nanshi i kaka wadi ufundija mama Bible ne kukwasha kisaka kyetu kiyuke bubinebine. Kadipo wiila kuntala, ino wadi wiila mwinē njibo obadi befunda nandi Bible. Ne mutyima wauntūka—kadi impolo yaunsuma. Namushintulwila bintene, ketudila. Wansela kukatanwa ku kupwila mu dine difuku’dya. Kipwilo kyetutundaila, kadi bakulumpe batūla’ko mpangiko ya kunkwasha mu bisakibwa byami bya ku mushipiditu ne bya kyami kisaka.”

Muswelo Ubwanya Kukwasha Bakwabo

Bine, bantu ba mu kipwilo kya Bwine Kidishitu babwanya kuleta bukwashi bulumbuluke mu miswelo mivule. Kimfwa, Margarita pano wadi ufwaninwe kukimba kaji. Kisaka kimo mu kipwilo kyamukweshe kufutyila bana ku masomo mu kitatyi kimokimo.

Margarita unena’mba: “Bine kintu kyonasangedile i kwipāna kwepēne batutu ne bakaka kwenda nami ne bami bana mu mwingilo wa budimi.” Kupityila ku buno bukwashi, banabetu mu kipwilo bankweshe ‘twiselele bya kwitulēmenena batwe bene na bene’ kadi na kulonga uno muswelo, bafikidije “mukanda-wabijila wa Kidishitu.”—Ngat. 6:2.

Boba basusuka pa mwanda wa bubi bwa bakwabo basangelanga bukwashi bwa uno muswelo. Monique, watantukilwe na mulumyandi ne kumushiya na mapu a madolala 15000 ne bana baná ba kulela, unena’mba: “Batutu ne bakaka mu kipwilo badi na buswe bwa binebine. Nkibwanyapo kufwatakanya monadi wa kwikadila kwampikwa bukwashi bwabo. Namwene amba Yehova wakunkile mityima ya banabetu bavule batendelwa, bepānine bami bana. Nasangele pa kumona bami bana batama ku mushipiditu kupityila ku buno bukwashi. Shi  nkesake madingi, bakulumpe badi bankwasha. Kadi shi kensake kwisamba, badi banteja.”—Mako 10:29, 30.

Shako, balunda ba buswe batalanga ne kitatyi kya kwisambila pa mwanda wa bulanda utene bakwabo. (Mus. 3:7) Margarita unena’mba, “Divule, nadi nsangela kwisamba na bakaka mu kipwilo kyonavilukile’mo pa mwanda utala mwingilo wa busapudi, bifundwa byetu bya Bible, betu bana—ne pa byonso’tu kutalula’mo enka makambakano ami. Nadi nsaka bandeka navulaminwa kulanga bipityile ne kunkwasha nshilule bintu bipya.”

Komena Mutyima wa Kwaluja Kinongo

Kitatyi kimo, pa kyaba kya kwitopeka pa mwanda wa bubi bwa mwinē pobe, wimone bu ususukanga pangala pa bibi bilupuka ku bilubo byandi. Shi uleke ino milangwe itame mu mutyima obe, ikokeja kuzozeja kusumininwa kosumininwe kukōkela nyeke Yehova. Kimfwa, kwije nobe kopima kukimba miswelo ya kwalwija kinongo mwinē pobe wa makoji.

Shi ubamone amba ino milangwe keitama mu mutyima obe, langulukila pa kimfwa kya ba Yoshua ne Kalebu. Bano bana-balume ba kikōkeji bātūdile būmi bwabo mu kyaka pa kukabela Ntanda ya Mulao. Tubedibedi tukwabo twābudilwe lwitabijo ne kubombola bantu baleke kukōkela Yehova. Bamo mu Bene Isalela bāsakile kwasa ba Yoshua ne Kalebu mabwe pobātompele kukankamika muzo ushale nyeke mukōkele. (Umb. 13:25–14:10) Pa mwanda wa Bilongwa bya Isalela, ba Yoshua ne Kalebu nabo bājokolokele mu ntanda mutuputupu myaka 40, ke pa mwandapo wa kilubo kyabo, ino i kya bakwabo.

Nansha padi ba Yoshua ne Kalebu bātyumukilwe mutyima, ino kebālekelepo bubi bwa banababo bwibakalabaje. Bātele mutyima ku kulama bujalale bwabo bwa ku mushipiditu. Ku mfulo kwa myaka 40 mu ntanda mutuputupu, abo ne Bene Levi bāpadilwe mpalo ya kupanda mu luno lukongo ne kutwejibwa mu Ntanda ya Mulao.—Umb. 14:28-30; Yos. 14:6-12.

Bilongwa bya mwinē pobe wampikwa kikōkeji bibwanya kukususula kitatyi kampanda. Buluo bukokeja kupwa, ke bikususula mu ñeni kupwa kadi ne lupeto lwakoma. Inoko, pa kyaba kya kuleka milangwe mibi itādile ñeni yobe, vuluka’mba Yehova uyukile biyampe mwa kulongela na boba batyumuna misoñanya yandi ku kusaka, na mwālongēle Bene Isalela bampikwa kikōkeji mu ntanda mutuputupu.—Bah. 10:30, 31; 13:4.

Ubwanya Kunekenya

Pa kyaba kya kuleka milangwe mifwe ikutyintyidile, dinga milangwe ya Yehova mu ñeni yobe. Jane unena’mba: “Kwimvwana mabande a Kiteba kya Mulami ne Réveillez-vous ! byankweshe nekenye. Kupwila nako i nsulo mikatampe ya bukankamane. Kulondolola ku kupwila na bupyasakane kwankweshe ntalule ñeni yami ku myanda. Mwingilo wa kusapula nao wankweshe. Nakomeje lwitabijo lwami na kukwasha bakwabo betabije Yehova. Kadi kwendeja bifundwa bya Bible kwankweshe ndame bintu bya mvubu mpata mu ñeni yami.”

Monique utelelwe kūlu, unena’mba: “Nabwenye kūminina kupityila ku kutanwa kyaba ne kyaba ku kupwila, ne kutambila mu mwingilo wa budimi mungya bukomo bwami. Kisaka kyami kyelamete bininge ne kulamata ku kipwilo. Makambakano ami ankweshe ndyuke bukōkekōke bwami. Natompelwe, ino nanekenye na bukwashi bwa Yehova.”

Nobe ubwanya kunekenya matompo a uno muswelo. Nansha shi wi musanshijibwe na kubomkwa, wikankile’ko kulonda madingi a Polo a ku bukomo bwa mushipiditu, anena’mba: “Ketukikōkai mu kulonga bilumbuluke; ke-twi-bantu tukāngulanga mwaka pa kufikila ponka, wivwane ne kupungila mpika.”—Ngat. 6:9.

[Kunshi kwa dyani]

[Kifwatulo pa paje 31]

Boba babombokelwe na benē pabo, bafwijanga’ko boba bebakwasha mu mwingilo wa budimi