Lelo Mufwaninwe “Kwikala Muswelo wa Bu-bantu ka?”
Lelo Mufwaninwe “Kwikala Muswelo wa Bu-bantu ka?”
“Ebiya pa kumona’byo byobya byonso bikasunguluka namino, lelo kitufwaninwa kwikala muswelo wa bu-bantu ka? wakwikalamo bu-bakola ba bwine-Leza.” —2 PET. 3:11.
1. Mwanda waka mukanda wa bubidi wa Petelo wāpele Bene Kidishitu ba mu andi mafuku madingi pa kitatyi kifwaninwe?
MUTUMIBWA Petelo pa kusoneka mukanda wandi wa bubidi wa ku bukomo bwa mushipiditu, kipwilo kya Bwine Kidishitu kyādi kala ke kyūminine kupangwapangwa kuvule, ino kuno kupangwapangwa kekwāimikilepo bupyasakane bwa kipwilo nansha kuzozeja’kyo. O mwanda Dyabola wāingidije manwa makwabo āmwendekele senene mafuku kunyuma. Pamo enka na mwānenene’kyo Petelo, Satana utompanga kulubija bantu ba Leza kupityila ku bafundiji ba bubela badi na “meso abo . . . mayūle bonka busekese” ne “mutyima wa kwibidila mu makomwameso.” (2 Pet. 2:1-3, 14; Yude 4) Nanshi, mukanda wa bubidi wa Petelo udi na madingi atonona bantu bekale na kikōkeji.
2. Lelo 2 Petelo shapita 3 wisambilanga pa bika, ne i bipangujo’ka byotufwaninwe kwiipangula?
2 Petelo wāsonekele amba: “Mfwatakanya, na’mba, ponso po nkikidi mu dino dipema, i kyendelemo, kwimutulumuna pa kwimuvulula; pa kuyūka’mba pakutūla dipema dyami ke pāye lubilo lonka . . . I binebine, nkemupyasakene’mba, muyūke kuvuluka bino bintu bino’bi mafuku onso o nkafundukapo.” (2 Pet. 1:13-15) Bine, Petelo wāyukile amba kādi kubwipi na lufu, ino wādi usaka amba bivulujo byandi bya pa kitatyi kifwaninwe bivulukwe. Ne i bya bine, byāikele kubadilwa mu mikanda ya mu Bible ne bikokeja kutangwa na bonso dyalelo. Shapita 3 wa mukanda wa bubidi wa Petelo i wa mvubu nakampata kotudi, mwanda wisambilanga pa “mafuku a kumfulo” a ngikadilo imbi ya bintu ya dyalelo ne pa bonakani bwa madiulu ne ntanda ya kyelekejo. (2 Pet. 3:3, 7, 10) Lelo Petelo witupa madingi’ka? Lelo kulonda andi madingi kuketukwasha namani twitabijibwe na Yehova?
3, 4. (a) I binenwa’ka byānene Petelo, ne wāletele kidyumu’ka? (b) I myanda’ka isatu yotusa kubandaula?
3 Petelo pa kupwa kutela kusungululwa kwa ntanda ya Satana, wānene amba: “Lelo kitufwaninwa kwikala muswelo wa bu-bantu ka? wakwikalamo bu-bakola ba bwine-Leza.” (2 Pet. 3:11, 12) Petelo wāyukile amba enka boba balonga kiswa-mutyima kya Yehova ne badi na ngikadilo ya bwine Leza bo bakapanda ku “difuku dya kulubwila kinongo” dīya’di. (Is. 61:2) O mwanda mutumibwa Petelo wābwejeje’ko amba: “Bānwe baswedibwe, byo umbapu kuyūka kala bīne bino’bi, dyumukai mwanda wa kutyina’mba, pa kuselwa kwa kutūpatūpa kwa babi [bafundiji ba bubela], mwakapona ku bukankamane bwenu.”—2 Pet. 3:17.
4 Petelo byaādi umbukata mwa boba ‘bayuke kala,’ wayukile amba mu mafuku a mfulo, Bene Kidishitu bafwaninwe kudyumuka nakampata mwanda wa kulama bululame bwabo. Mwenda mafuku, mutumibwa Yoano wāshintulwile patōkelela kyobafwaninwe kudyumukila. Wāmwene mu kimonwa kupangwa kwa Satana mūlu ne “bukalabale bukatampe” ku boba “balamine bijila bya Leza, ne kulamata ku busapudi bwa Yesu.” (Kus. 12:9, 12, 17) Bengidi ba Leza bashingwe māni ba kikōkeji ne bapwani nabo “mikōko mikwabo” bakatambula bushindañani. (Yoa. 10:16) Le batwe netu umo ne umo? Le tukalama bululame bwetu? Tubwanya kwibulama shi tulonge bukomo bwa (1) kutamija ngikadilo ya bwine Leza, (2) kushala bampikwa kiko nansha kakoba mu ngikadilo ne ku mushipiditu, ne (3) kwikala na mumweno muyampe pa matompo. Tubandaulei ino myanda.
Tamijai Ngikadilo ya Bwine Leza
5, 6. Lelo i ngikadilo’ka yotufwaninwe kulonga bukomo bwa kutamija, ne mwanda waka kino kilomba kwikala na “mutyima wa kupyasakana”?
5 Petelo wāsonekele ku ngalwilo kwa mukanda wandi wa bubidi amba: “I binebine, po pene pa mwanda o mukyelelako, ku mutamba wenu, mutyima wa kupyasakana, mu kwitabija kwenu tūlaimo ne bulumbuluke; ne mu bulumbuluke namo tūlaimo ñeni; kadi ne mu ñeni namo tūlaimo kwibeja; ne mu kwibeja namo kadi tūlaimo kutūkija mutyima; ne mu kutūkija mutyima namo tūlaimo bwine-Leza; kadi ne mu bwine-Leza bwenu tūlaimo lusa lwa bu-mwana na mwanabo; kadi ne mu lusa lwa bu-mwana na mwanabo tūlaimo ne kanye. Ke-bintu bino namino shi i byenu, bivule ne kuvula, nankyo bikemulonga, ino bānwe mulele mpika, nansha bakubulwa bipa bya ku ñeni ya Mfumwetu Yesu Kidishitu.”—2 Pet. 1:5-8.
6 I bine, kwingila mingilo itukwasha tutamije ngikadilo ya bwine Leza, kulomba “mutyima wa kupyasakana.” Kimfwa, kilomba kulonga bukomo pa kutanwa ku kupwila konso, pa kutanga Bible difuku ne difuku, ne pa kulonda mpangiko milumbuluke ya kifundwa kya kasuku. Kadi padi kilomba kulonga bukomo bukatampe pa kusaka’mba Butōtyi bwa Kisaka bwa kyolwa bwikale, bwa kitatyi ne kitatyi, busangaja, ne bwa kamweno. Ino shi twibidile bino bibidiji biyampe, biketupēlela—nakampata kitatyi kyotukamona’mo byabuyabuya.
7, 8. (a) Lelo i bika binenene bamo pangala pa Butōtyi bwa Kisaka bwa kyolwa? (b) Lelo umwenanga namani mu bwenu butōtyi bwa kisaka?
7 Kaka umo walembele pangala pa mpangiko ya butōtyi bwa kisaka amba: “I mitukwashe twifunde myanda mivule.” Mukwabo amba: “Kunena na bubine, nkyadipo nsaka mpangiko ya kifundwa kya kitabo ifwe. I kupwila konadi nsenswe. Ino pano, byotudi na Butōtyi bwa Kisaka bwa kyolwa, nayuka’mba Yehova uyukile byotusakilwa ne kitatyi kyotusakilwa’byo.” Mutwe umo wa kisaka unena’mba: “Butōtyi bwa kisaka i bwitukwashe bya binebine. Kwikala na butōtyi bukwatañene na bisakibwa byetubyetu bya mu busongi i kintu kiyampe mpata! Batwe bonso twimonanga amba twi bashilule kulumbuluka mu kumwekeja kipa kya mushipiditu sandu, ne tutananga nsangaji mivule kutabuka mu mwingilo wetu.” Mutwe mukwabo wa kisaka unena’mba: “Bana baloñanga bukimbi abo bene ne kwifunda bivule—kadi bebusangelanga. Ino mpangiko itukulupija amba Yehova uyukile bisakibwa byetu ne amba ubwanya kulondolola milombelo yetu.” Lelo nobe wiimvwananga uno muswelo pa ino mpangiko ya kutendelwa ya ku mushipiditu?
8 Kokaleka tuntu tutyetye tudye mponye butōtyi bwa kisaka. Ba mulume ne mukaji bamo banene amba: “Mu mayenga aná apityile, kudi kintu kyadi kifika mu Dya Buná dyonso ku kyolwa kyadi kikimba kuvutakanya kifundwa kyetu, ino ketwadipo twikileka kivutakanye’kyo.” Shako, mu bitatyi bimo mukokeja kusendulula mpangiko yenu. Ino, kemwakipayai nansha dimo Butōtyi bwa Kisaka bwa kyolwa—kemukakolwa kupityija nansha’tu yenga umo!
9. Lelo Yehova wākwatakenye Yelemia namani, ne i ñeni’ka yotuboila ku kimfwa kyandi?
9 Mupolofeto Yelemia i kimfwa kilumbuluke kotudi. Wādi usakilwa kukwatakanibwa ku mushipiditu na Yehova ne wēkusangedile. Bino byakudya byāmukweshe ominine na kusapwila bantu bapela musapu. Wānene amba: “Kinenwa kya Yehova . . . umutyima wami [kidi] pamo bwa mudilo utēma, ushityilwa mu bikupa byami.” (Yel. 20:8, 9) Byāmukweshe kadi ominine bitatyi bikomo byāikele kunana pa konakanibwa kwa Yelusalema. Dyalelo tudi na Kinenwa kya Leza kyonso kituntulu. Shi twifunda’kyo na kininga ne kulamika milangwe ya Leza mu ñeni yetu, tukōminina ne nsangaji yetu mu mwingilo pamo bwa Yelemia, tukalama kikōkeji kyetu mu matompo, ne kushala batōka mu mwikadilo ne ku mushipiditu.—Yak. 5:10.
Shalai “Bakubulwa Kiko, Nansha Kakoba”
10, 11. Mwanda waka tufwaninwe kwielela’ko pa kushala “bampikwa kiko, nansha kakoba,” ne kino kilomba bika ne bika?
10 Batwe Bene Kidishitu, tuyukile amba tudi mu kitatyi kya mfulo. O mwanda, ketutulumukangapo kumona ntanda itādilwa na bintu bishikilwe Yehova, kimfwa lwiso, busekese bwa munyanji, ne butapani. Milangwe ya Satana idi bwa aye unena’mba: ‘Shi bengidi ba Leza kebabwanyapo kuzakajibwa, ino bakokeja kusubijibwa.’ (Kus. 2:13, 14) Nanshi, tufwaninwe kulama ne mu ñeni kidyumu kiletele Petelo na buswe amba: “Taimo mityima’mba mukatānwe mu talala, nyā, bakubulwa kiko, nansha kakoba kēne.”—2 Pet. 3:14.
11 Bishima “taimo mityima’mba” i biifwane na musoñanya wa Petelo ubadikile wa kwikala na “mutyima wa kupyasakana.” I kimweke patōka’mba, Yehova—mwine wāpele Petelo bukomo bwa kuleta ino milangwe—uyukile amba tusakilwa kwielela’ko pa kushala “bakubulwa kiko, nansha kakoba kēne,” kwampikwa kusubijibwa na ntanda ya Satana. Kwielelela’ko kulomba kulama mutyima wetu wakalēmenenwa na bilokoloko bibi. (Tanga Nkindi 4:23; Yakoba 1:14, 15.) Kadi kulomba ne kukomena boba bashikilwe mwiendelejo wetu batwe Bene Kidishitu ne boba “[betunena] bibibibi.”—1 Pet. 4:4.
12. Le i kikulupiji’ka kyotutana mu Luka 11:13?
12 Kulonga byoloke i bulwi bukatampe, mwanda twi bakubulwa kubwaninina. (Loma 7:21-25) Tubwanya kunekenya enka shi tuvundamukile kudi Yehova, mwine upāna ku buntu bitupu mushipiditu sandu ku boba bamulomba’o bya binebine. (Luka 11:13) Uno mushipiditu nao, utamijanga motudi ngikadila ya bantu betabijibwe na Leza ne kwitukwasha tulwe na bikoleja bya umbūmi ne matompo enda elundila’ko pano pafwena difuku dya Yehova.
Lekai Matompo Emukomeje
13. Lelo i bika biketukwasha tūminine kitatyi kyotutanwa na matompo?
13 Pano potudi mu ino ngikadilo minunu ya bintu, kudi matompo a miswelo yonso keadi mwa kwepukila. Ino pa kyaba kya kutyumukwa mutyima, mubulwe’po kumona matompo bu mukenga wa kukomeja buswe bwenu kudi Leza ne kulumbulula lwitabijo lwenu mwadi ne mu Kinenwa kyandi? Mwana wa bwanga Yakoba wāsonekele amba: “Bānwe bāna betu, po muponena mu byakutompibwa mwibitela bu-bya tusepo tonka; pa kuyūka’mba kutompibwa kwa kwitabija kwenu kuleta kutūkija mutyima.” (Yak. 1:2-4) Vulukai kadi amba, “Yehova uyūkile mwakunyongolwela boba ba bwine-Leza mo batompibwa.”—2 Pet. 2:9.
14. Lelo kimfwa kya Yosefa kikukankamika namani?
14 Tala kimfwa kya Yosefa mwanā Yakoba, wāpotolojibwe na bana babo bu mupika. (Ngal. 37:23-28; 42:21) Lelo lwitabijo lwa Yosefa lwāmutyepele mwanda wa kino kilongwa kibi mpata? Le wāfityilwe Leza mutyima pa kuleka bibi bimufikile? Kinenwa kya Leza kilondolola patōka’mba, mhm! Pakwabo kadi matompo a Yosefa keāfudilepo pano. Kadi wābepelwe bubela’mba wadi usaka kujilulañana ne kukutwa wākutwa. Nansha ke pano pene kājininepo mu lulamato lwandi kudi Leza. (Ngal. 39:9-21) Wālekele matompo amukomeje, ne kadi wāeselwe mpata.
15. Le i ñeni’ka yotukokeja kuboila ku kimfwa kya Naomi?
15 Shako, matompo abwanya kwituletela bulanda nansha njia. Kepabulwe padi kyaba kimo Yosefa wēivwene uno muswelo. Bengidi bakwabo ba Leza ba kikōkeji bēimvwene namino. Tala kimfwa Naomi, wāfwidilwe mulume ne bana bandi babidi bana-balume. Wānene amba: “Kemukintela bu-Naomi, mhm, muntela bu-Mala; mwanda Mwinebukomobonso wandyuja bululu.” (Luta 1:20, 21) Naomi wēivwene mwiivwaninanga bonso kadi kepadipo kya kumutopekela. Inoko nandi pamo bwa Yosefa, kākukelepo nansha dimo ku mushipiditu nansha kujina mu bululame bwandi. Yehova nandi wāesele uno mwana-mukaji wa bulēme. (Luta 4:13-17, 22) Kadi kikatampe kutabuka, Yehova ukalongolola byonso byonenwe na Satana ne ntanda yandi imbi mu Paladisa pano pa ntanda. “Bintu bya kala kebikavulukwapo, nansha kwikalapo ku-mutyima kwine mpika.”—Is. 65:17.
16. Lelo tufwaninwe kumona milombelo namani, ne mwanda waka?
16 Nansha shi tubatanwa na matompo’ka, buswe bwa Leza budi’ko mwanda wa kwitukwatakanya. (Tanga Loma 8:35-39.) Satana kakalekapo kutompa kwitutyumuna umbidyoma, ino ukakomenwa shi twikale “kukomeja mutyima” ne kutūkija ne “milombelo ponka.” (1 Pet. 4:7) Yesu wānene amba: “Kesyai, lombelai kitaci kyonso, mwa kumwena mwa kusombolokela ku byonso binenwe kufika ne mwa kukemanina bwimwa kumeso a Mwana muntu.” (Luka 21:36, Bisonekwa Bitokele) Ubamone amba Yesu watela bishima “Lombelai kitaci kyonso,” kintu kilombola kulombela na kininga. Yesu pa kwitusoñanya tulombele, wādi unena ukoma amba kino ke kitatyipo kya kujinajina mu mwimanino wetu kwadi ne kudi Shandi. Enka boba badi mu ngikadilo mitabijibwe bo bakokeja kukulupila kupanda ku difuku dya Yehova.
Takamanai mu Mwingilo wa Yehova
17. Shi kusapula mu mwaba obe ke kukukoleja, le i muswelo’ka okamwena mu kimfwa kiyampe kya bapolofeto ba pa kala?
17 Kwingila mingilo ya ku mushipiditu kwituseñanga pa mutyima. Kino kituvuluja binenwa bya Petelo bya amba: “Lelo kitufwaninwa kwikala muswelo wa bu-bantu ka? wakwikalamo bu-bakola ba [bilongwa bya] bwine-Leza.” (2 Pet. 3:11) Kikatampe mu bino bilongwa i busapudi bwa myanda miyampe. (Mat. 24:14) Bine, mu myaba imo mwingilo wa busapudi ukokeja kwikala kikoleja, padi i mwanda wa mityima myūmu ya bantu nansha kukankajibwa nansha padi i bantu’ko bo batele mutyima ku byobasakasaka mu būmi. Bantu ba Yehova ba mu myaka ya kala bātene ngikadilo ya uno muswelo. Kēbazozelepo ino bāendelele kutwala musapu wabo wēbapele Leza “kukēlela lubanga’tu bwē.” (Tanga 2 Bilongwa 36:15, 16; Yel. 7:24-26) Le i bika byēbakweshe bōminine? Bādi bamwene mwingilo wabo monka mwādi mwiumwenine Yehova, ke mwiumwena ntandapo. Kadi bādi bamwene kusapula dijina dya Leza bu kintu kya bulēme bukatampe.—Yel. 15:16.
18. Lelo mwingilo wa kusapula Bulopwe ukatumbija namani dijina dya Leza mu mafuku āya kumeso?
18 Batwe netu tudi na dyese dya kusapula dijina dya Yehova ne mpango yandi. Langa’po bidi: Shi tusapule, balwana na Leza kebakebingijapo kumeso a Leza mu difuku dyandi dikatakata amba ketwadipo tuyukile. Ino na bubine, bakayuka pamo na mwāyukile Felo wa pa kala amba i Yehova obalwa nandi. (Div. 8:1, 20; 14:25) Kadi ponka pa kitatyi’kya, Yehova ukatumbija bengidi bandi ba kikōkeji na kwibamwekeja patōka amba badi bantunguluji bandi ba bine.—Tanga Ezekyele 2:5; 33:33.
19. Le tukokeja kulombola namani amba tusakanga kumwena mu kitūkijetyima kya Yehova?
19 Petelo, dya ku mfulo kwa mukanda wandi wa bubidi, wālembēle banababo betabije amba: “Telai bitupu amba, kutūkija mutyima kwa Mfumwetu lo lupandilo.” (2 Pet. 3:15) I amo, twendelelei kumwena biyampe mu kitūkijetyima kya Yehova. Namani? Na kutamija ngikadilo imusangaja, na kushala “bakubulwa kiko, nansha kakoba,” na kwikala ne mumweno muyampe pa matompo, ne na kutakamana mu mwingilo wa Bulopwe. Shi tulonge namino, tubetūla mu mulongo wa bantu bakeselwa madyese keadi mfulo badingakanibwe na “madiulu mapya, ne ntanda īngi mipya.”—2 Pet. 3:13.
Lelo Ukivulukile?
• I muswelo’ka otubwanya kutamija ngikadilo ya bwine Leza?
• I muswelo’ka otubwanya kushala “bakubulwa kiko, nansha kakoba kēne”?
• Le i ñeni’ka yotuboila kudi Yosefa ne Naomi?
• Mwanda waka kutanwa mu mwingilo wa busapudi i dyese dikatampe?
[Bipangujo bya Kifundwa]
[Kifwatulo pa paje 21]
I bika bikemukwasha balume batamije ngikadilo ya bwine Leza mu būmi bwabo ne bwa kyabo kisaka?
[Bifwatulo pa paje 23]
Lelo i ñeni’ka yotukokeja kuboila ku muswelo wālwile Yosefa na matompo?