Bine Bilombwa pa Kuyuka Dijina dya Leza

LELO dyobe dijina didi na shintulwilo ya pa bula? Mu bipindi bimo bya ntanda mudi bibidiji bya kwinika mwana dijina didi na shintulwilo. Dijina dyatongwa’dya dibwanya kulombola nkulupilo ya bambutwile ne mvubu yadyo nansha byobakulupile ne byobalota pa mukekadila mwana mu mafuku a kumeso.

Kisela kya kwinika majina adi na nshintulwilo mivule ke kyenipo. Mu bitatyi byāsonekelwe Bible, majina a muntu ādi enikwa mungya ngikadilo yobadi’mo. Majina abwanya kulombola bikalonga muntu mu būmi. Kimfwa, Yehova pa kusapwila Davida mwingilo ukengila wandi mwana Solomone, wānene amba: “Dijina dyandi dikekalanga bu Solomone [kokunena’mba “Muntu wa ndoe,”] penepo nkapana ndoe ne kutalaja she-e kudi Isalela mu mafuku andi.”—1 Bilongwa 22:9.

Kyaba kimo Yehova wādi winika muntu dijina dipya pa kumupa mwingilo mupya. Ñumba mukaja Abalahama wāinikilwe bu Sala, kushintulula kokunena’mba, “Mwana mulopwe.” Mwanda waka? Yehova wāshintulwile amba: “Ino nami nkamwesela dyese aye, kabidi nkakupa mwana mwana-mulume kudi aye, eyo, nkamwesela ukālamuka ke inandya mizo ne mizo; balopwe ba bantu bakalupuka mudi aye.” (Ngalwilo 17:16) Bine, kwivwanija kine kyāpedilwe Sala dijina dipya kulomba ne kwivwanija mwingilo wandi mupya.

Lelo dijina Yehova dya mvubu kutabuka majina onso nadyo’le? Lelo dishintulula bika? Mosesa pa kwipangula Leza dijina dyandi, Yehova wāmulondolwele amba: “Ami ngidi enka aye udi.” (Divilu 3:14) Bisonekwa Bitokele binena’po amba: “Nne yewa nkekala.” Dijina Yehova dilombola amba i Leza udi na mingilo keibadika. Tala’tu kimfwa kipela: Inabana ubwanya kusakilwa kwingila mingilo mivule difuku ne difuku mwa kulelela bandi bana—pamo bwa kundapa, kuteka, kufundija—ponso pobasakilwa’byo. Ne Yehova nandi mo monka, aye i mupite ne inabana mwine. Ubwanya kwikala byonso byasaka kwikala, ne kuvuija mwingilo o-onso wasaka kwingila, mwanda wa kufikidija mpango yandi ya buswe pa muzo wa muntu. Kuyuka dijina Yehova kulomba kwivwanija ne kufwija’ko pangala pa mingilo yandi mivule.

I kya bulanda mwanda ngikadilo ya Leza milumbuluke i mifibwe ku boba kebayukilepo dyandi dijina. Inoko na kwifunda Bible, ukokeja kufwija’ko pa byepelo bya Yehova bya bu Mudingidi wa tunangu, Mupandiji mwine bukomo, Mwine wa kupana ku buntu, ne bikwabo’po. Bine nshintulwilo minemine ya dijina Yehova ileta’nka ne nzuba.

Inoko kuyuka binebine dijina dya Leza kekupēlangapo. Kishinte kilonda’ko kikalombola kine kyokekupēlelapo.