Bipangujo Biná Bitala pa Mfulo Bilondolwelwe

YESU KIDISHITU wālaile amba mu mafuku āya kumeso ‘mfulo isa kufika.’ Aye pa kwisambila pa kino kitatyi wānene amba: “kukēkalanga kyamalwa kibūke kya kubulwa, nansha kingi kikwabo kidingakene nakyo, kushilwila konka kungalwilo kwāpangile mwine Leza, ne kutūla ku dyalelo kuno’ku, nansha kumeso kwine.”—Mateo 24:14, 21.

Binenwa bya Yesu bitala pa mfulo kubadila’mo ne mikanda mikwabo ya mu Bible bilengeja bipangujo bivule bya mvubu pa uno mwanda. Ubulwe’po kuputula Bible obe ne kutanga malondololo aleta ku bino bipangujo?

1 Lelo I Bika Bikafula?

Bible kafundijangapo amba ino nshi ikonakanibwa. Kaimba wa mitōto wāsonekele amba: “[Leza]wādije byalwilo bya panopanshi, amba kepakikajinapo nyeke.” (Mitōto 104:5) Bible kafundijangapo nansha dimo amba būmi bonso bukakubijibwa mu mudilo wa nyeke. (Isaya 45:18) Nansha ke Yesu wālombwele amba pakafika mfulo bantu bamo bakapandanga. (Mateo 24:21, 22) Ino, le i bika bisambila’po Bible bikafula?

Imbikalo mikomenwe ya bantu ikafula. Leza wāpele mupolofeto Danyele bukomo bwa mushipiditu asoneke amba: “Leza wa mūlu ukemika bulopwe kebukōnakanibwapo nansha patyetye, nansha bulopwe bwine bwabo kupityila ku bantu bangi, ehe; ino bukatyumuna bipindibipindi ne kukubija malopwe ano’a onsololo, kadi bukemananga nyeke.”—Danyele 2:44.

Mavita ne koneka kwa luvula. Mitōto 46:9 wisambila pa byobya bikalonga Leza amba: “Watukija mavita ne ku mfulo ya ntanda; utyumunanga buta, ne mukobe nao watempula’o bipindi bibidi; wasōka makalo pa mudilo.” Kadi Bible ufundija amba Leza “ukonakanya boba bonakanya panopanshi.”—Kusokwelwa 11:18, Myanda Miyampe ku Bonso.

Bupolapola ne Bukondame Bikafula. Kinenwa kya Leza kilaile amba: “Babuluji bakekalanga mu ntanda’ya, kadi babwaninine bakekadidilanga monka; ino nanshi bapupakane  bakatyibibwa ku ntanda’ya, kadi banzazangi bakatukunwamo.”—Nkindi 2:21, 22.

2 Lelo Mfulo Ikafika Kitatyi’ka?

Yehova Leza i mutūle’ko “kitatyi” kya kufudija bibi ne kushimika Bulopwe bwandi. (Mako 13:33) Ino Bible ulombola patōkelela amba ketubwanyapo kupikula bipotoloke difuku dya mfulo. Yesu wānenene amba: “Ne dyodya difuku nadyo kekudi muntu widiyūkile, nansha umo, shi dyuba ka, kadi shi dyuba pi? ehe, nansha bamwikeulu ba mūlu bene, poso’nka Tata.” (Mateo 24:36) Yesu ne bandi bana ba bwanga nabo kebādipo bediyukile, inoko bālaile ngikadilo ikamweka pano pa ntanda kumeso kwa Leza kufudija’yo. Mfulo ikapapamuka shi bino binkumenkume bilonda’ko’bi byonso bibalongeka mu kitatyi kimo kadi kujokoloka ntanda yonso.

Koneka kukatampe kwa politike, kwa ntanda, ne kwa bantu mu muswelo kewamwekele kashā mu mānga. Yesu pa kulondolola ku bipangujo bya bandi bana ba bwanga bitala pa mfulo wānene amba: “Muzo ungi ukatamba muzo mukwabo, kadi bulopwe bungi nabo bukatamba bulopwe bukwabo, ebiya kadi kukatetukanga bikomo byakwendeja ne nshi kungi kungi konso, ne kimpengele kya bipupo bya nzala nabyo bibafikanga, byobya byonso byo byangalwilo bidi ya misongo mīne mikata.” (Mako 13:8) Polo nandi wāsonekele amba: “Myaka ya malwa īkāyangako mu oa mafuku a kumfulo’a. Mwanda bantu bakēsanswa abo bene, ne bupeta kumo, ne ba bikandangobo, ne bakapuni ka kwitatula, ne babutukani, ne bampikwa kukōkela bakwibabutula, ne kufwija kwine mpika, ne bampikwa bu-ujila, ne bampikwa lusa lwa bu-butule, ne bakubulwa kanye kulekela bakwabo myanda, ne babepabepa bubela, ne bakubulwa kwifula, ne ba bukalabale bwa malwa, ne bampikwa kusanswa būmuntu. Ne banzazangi, ne ba lupata lubilubi, ne bakwitatula; bakusanswa byamazua pakatampe kudi Leza mpika.”—2 Temote 3:1-5.

Kampanye ka busapudi busapulwa mu ndimi mivule ntanda yonso kabashilula. Yesu wānene amba: “Īno myanda-miyampe ya buno bulopwe īkasapwila panopantanda ponso, ke kiyūkeno kya kuyūkila pa kusapwila’yo ku mizo yonso. Penepo nankyo po pakafikidila ne pamfulo pene.”—Mateo 24:14.

3 Le Kupwa Mfulo Ke Bika?

Bible kafundijangapo amba bantu bayampe bonso bakendanga mūlu mo bakekala na būmi bwa nyeke. Ino, Yesu wāfundije amba mpango mibajinjibajinji ya Leza itala bantu ikafikidila. Wānene’mba: “Dyese dyo dyabo bakōkele, ke-bantu boba bakapyana ntanda yonso.” (Mateo 5:5; 6:9, 10) Ku boba bafwa kumeso kwa mfulo kufika, Bible i mulaye mulao wa lusangukilo lwiya kumeso. (Yoba 14:14, 15; Yoano 5:28, 29) Lelo kupwa mfulo ke bika?

Yesu ukaludika momwa mūlu bu Mulopwe wa Bulopwe bwa Leza. Mupolofeto Danyele wāsonekele amba: “Namona mu bimonwa bya bufuku, ino talapo, pa makumbi a mūlu paiya umo wifwene’nka na mwana muntu [Yesu musanguke], nandi wafika kudi Kafulamoba [Yehova Leza], penepo bamufwenya kumeso andi. Penepa kadi kwamupebwa [aye Yesu] bufumu, ne ntumbo, ne bulopwe, amba bantu bonsololo, ne mizo, ne ndimi, bakamwingidile; bufumu bwandi i bufumu bwa kulādilamo nyeke, kebukapitepo, ne bulopwe bwandi i bwampikwa kukōnakanibwa.”—Danyele 7:13, 14; Luka 1:31, 32; Yoano 3:13-16.

Babikalwa ba Bulopwe bwa Leza bakekala na bukomo bubwaninine, mutyima-ntenke, ne būmi bwa nyeke-ke. Mupolofeto Isaya wāsonekele amba: “Penepa kadi bakōbaka mobo ne kwikala monka; kadi bakadima madimi a mañanza ne kudya bipa byayo. Kebakōbakapo amba ungi ekalemo, ehe; kadi kebakadimapo amba ungi adyeko, ehe.” (Isaya 65:21-23) Mutumibwa Yoano wāsonekele pangala pa kino kitatyi amba: “Talaipo bidi, kipema kya Leza  byo kidi pa bantu, ne ukēkalanga nabo, nabo bakēkala bantu bandi, ne Leza mwine ukēkala nabo, ke Leza wabo kadi. Kadi Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.”—Kusokwelwa 21:3, 4.

4 Lelo I Bika Byofwaninwe Kulonga pa Kupanda Pakafika Mfulo?

Mutumibwa Petelo wāyukile amba bantu bamo ba mu kino kitatyi kya mfulo bakafutulula mulangwe wa amba Leza ukapwija myanda ya bantu ne kufudija bibi pano pa ntanda. (2 Petelo 3:3, 4) Nansha nabya, Petelo usoñanya bantu ba mu ano etu mafuku kulonga bino bilondako’bi.

Boila ñeni ku mānga. Petelo wāsonekele’mba, Leza “byākalekelelepo ntanda ya pa kalā, poso enka Noa, mwedi wa mbila ya boloke ye walamine, ne bakwabopo basamba-babidi, pāletele dilobe panopantanda pa bakubulwa Leza.” (2 Petelo 2:5) Petelo wānene pangala pa boba bafutulula amba: “Ke-kintu kino namino bavulaminwe’kyo ne mutyima ponka’mba, kwadi ne madiulu a pa kalā, ne ntanda nayo ya kubumbwa ku mema, ne umbukata mwa mema, konka ku kinenwa kya Leza. Ko konka kwaonekele ne yoya ntanda yadiko’ya pa kulobelwa’yo mu mema. Ino madiulu  akidipo ne pano, ne ntanda * mīne kumo, ku kinenwa kimo kyonka, nabyo i bibīkilwe mudilo, bilaminwe ku difuku dya kidye kya konakanya bantu bakubulwa bwine-Leza.”—2 Petelo 3:5-7.

Londa mu būmi misoñanya ya Leza ya mu mwikadilo. Petelo wāsonekele’mba boba basaka kupanda pakafika mfulo bafwaninwe kwikala “bajila, balamatyidile kudi Leza.” (2 Petelo 3:11, MB) Yuka amba Petelo wakomeneja kwikala “bajila” ne “balamatyidile kudi Leza.” Nanshi kudi bivule bya kulonga kupita’ko kukimba kwikala na lwitabijo bitupu lwa kūlukūlu nansha kulonga bukomo ke ku mfulo bwa kupwana na Leza mwanda wa kupanda.

Lelo i mingilo ne bilongwa’ka bipotoloke bitabijibwanga na Leza? Ubulwe’po kudingakanya byobya byoyukile na byobya bifundija Bible mu uno mwanda? Batumoni ba Yehova bakasangela kukukwasha. Wibepangule bakulombole mu obe Bible pene pemanine malondololo abo. Kulonga namino kukakukwasha utengele na bukankamane ne kikulupiji būmi bwa kumeso nansha byokudi bintu bilenga moyo bitujokolokele.

[Kunshi kwa dyani]

[Bushintuludi pa paje 7]

Ino nshi keisapo kufula, ino boba beyonakanya bo basa kutukila