Mfumu Wetu Mukankamane Dyalelo
Mfumu Wetu Mukankamane Dyalelo
“Kaenda munekenye wakunekenya.”—KUS. 6:2.
1, 2. (a) Lelo Bible unena bika pa bukankamane bwa Kidishitu kitatyi kyabikele mu 1914? (b) Lelo i bika byalongele Kidishitu pa kupwa kutūlwa pa lupona?
KIDISHITU wābikikilwe bu Mulopwe wa Bulopwe bwa Yehova bwa Kimeshiasa mu 1914. Le pano tumumonanga namani mu ñeni yetu? Le i pamo bwa mulopwe ubandila bitupu ushikete pa lupona lwandi, utadila kulampe ntanda kyaba ne kyaba mwanda wa kumona mwendela kipwilo kyandi? Shi ye motumumwena, nankyo tufwaninwe kushinta milangwe. Mukanda wa Mitōto ne wa Kusokwelwa umutelanga bu mulopwe mukankamane utentamine pa kabalwe “kaenda munekenye wakunekenya,” wendelela’nka na kumona “biyampe” byonka.—Kus. 6:2; Mit. 2:6-9; 45:1-4.
2 Kilongwa kibajinji kya Kidishitu pa kupwa kubikikwa kyadi kya kunekenya “mukishi . . . ne bamwikeulu bandi.” Kidishitu, Mikele mwikeulu mukatampe wendeja bamwikeulu bandi, waelele Satana ne bademona bandi kufulakufula kwa pano panshi. (Rev. 12:7-9) Kupwa Yesu byaingila bu “mukendi wa kipwano” wa Yehova, waile pamo na Shandi kupempula tempelo ya ku mushipiditu. (Mal. 3:1) Watyibile bipwilo bya Kine Kidishitu mambo, kine kipindi kikatampe kitopekwa kya “Babiloni Mukatampe,” ne kilambikwa mashi amwangilwe ne makoji a ku mushipiditu alonga na ngikadilo ya politike ya ino ntanda.—Kus. 18:2, 3, 24.
Kutōkeja Umpika Wandi wa Pano Panshi
3, 4. (a) Kidishitu byadi “mukendi” wa Yehova, le i mwingilo’ka waingile? (b) Kupempulwa kwa tempelo kwasokwele bika, ne Yesu byadi Mutwe wa kipwilo, le i mutonge bāni pa kino?
3 Bupempudi bwa Yehova ne “mukendi” wandi bwasokwele kwikala’ko kwa kisumpi kya Bene Kidishitu ba bine mu kipango kya pano panshi kya ino tempelo ya ku mushipiditu, kyampikwa kubadilwa mu bipwilo bya Kine Kidishitu. Inoko, nansha ke bano Bene Kidishitu bashingwe māni, nansha amba “bāna ba Levi,” nabo badi basakilwa nyeke kutōkejibwa. Mupolofeto Malaki udi na aye wālaile amba: “Ebiyampe [Yehova] ukashikata’nka na musunguludi ne mutōkeji wa ndalama, kadi ukatokeja bāna ba Levi ne kwibakendeja pamo’nka na nsahabu ne ndalama; penepo bakela byakwela kudi Yehova mu boloke.” (Mal. 3:3) Yehova waingidije Kidishitu Yesu “mukendi wa kipwano” mwanda wa kutōkeja Bene Isalela ba ku mushipiditu.
4 Ino, Kidishitu watene bano Bene Kidishitu bashingwe māni ba kikōkeji balonga bukomo bwabo bonso mwanda kupāna bidibwa bya ku mushipiditu pa kitatyi kifwaninwe ku bantu ba mu njibo yandi ya lwitabijo. Tamba mu 1879 ne kwenda kumeso, mwikale mu bitatyi bya nsangaji ne bya makambakano, abo balupulanga bubinebine bwa mu Bible butala pa Bulopwe bwa Leza mu dino dipepala. Yesu wālaile mu bupolofeto amba aye pa “kujoka” kupempula kipango kyandi mu “kuvuika kwa ngikadilo ya bintu,” ukatana umpika wibapa “bidibwa pa kitatyi kifwaninwe.” Ukatela uno umpika bu wa nsangaji ne “ukamutūla pa bintu byandi byonso” bidi pano pa ntanda. (Mat. 24:3, 45-47, New World Translation) Kidishitu, byadi Mutwe wa kipwilo kya Bwine Kidishitu wingidije uno “umpika wa binebine, udi na manwa” endeleje kumeso tumweno twa Bulopwe tudi pano pa ntanda. Upānanga bwendeji ku ba mu “kipango” bashingwe māni ne “mikōko mikwabo” ya bapwani nabo kupityila ku Kitango Kyendeji.—Yoa. 10:16.
Mwangulo pa Ntanda
5. Lelo i mwingilo’ka wa Mulopwe wāmwenwe na mutumibwa Yoano mu kimonwa?
5 Mutumibwa Yoano wāmwene mu kimonwa kintu kikwabo kyadi kya kulonga Mulopwe Meshiasa mu “difuku dya Mfumwetu” pa kupwa kubikikwa’ye pa lupona mu 1914. Yoano wāsonekele amba: “Kadi na’mba, ntale, namona dikumbi ditōka, ino pa dikumbi’pa padi pashikete umo, wifwene Mwana muntu, ne kilukwa kya nsahabu ku mutwe wandi, ne lupete lwa kunoa nalo lwa būi ku kuboko kwandi.” (Kus. 1:10; 14:14) Yoano wāimvwene mwikeulu wa Yehova ulombola uno Munoi akulumune lupete mwanda “pakunoa pa panopanshi pabaume.”—Kus. 14:15, 16.
6. Le Yesu wānene bika byadi bya kulongeka mwenda mafuku?
6 Pano “pakwangula pa panopanshi” petuvuluja lukindi lwa Yesu lwa ñano ne bityani. Yesu wēdingakenye bu muntu ukusa nkunwa ya ñano na mutyima wa kwangula ñano milumbuluke, yelekeja “bāna ba bulopwe,” Bene Kidishitu ba bine bashingwe māni ba kukabikala nandi mu Bulopwe bwandi. Ino mu bufuku, walwana, “dyabola,” wakusulula bityani mu budimi, ke bo “bāna ba yewa mubi” kadi. Mukushi walombola ba mingilo bandi kuleka ñano itamine pamo na bityani kufika ne ku kitatyi kya mwangulo, ku ‘kuvuika kwa ngikadilo ya bintu.’ Pa kitatyi’kya, ukatuma bamwikeulu bandi kusansanya ñano ne bityani.—Mat. 13:24-30, 36-41.
7. Lelo Kidishitu wendejanga namani mwingilo wa “pakunoa pa panopanshi”?
7 Yesu, pa kufikidija kimonwa kyāpelwe Yoano, wendejanga mwingilo wa mwangulo kujokoloka ntanda yonso. “Pakunoa pa panopanshi” pāshilwile na kubungakanibwa kwa basheleshele ba mu ba 144000, “bāna ba bulopwe,” “ñano” ya mu lukindi lwa Yesu. Kwishila kudi pa bukata bwa Bene Kidishitu ba bine ne ba bubela kwamwekele patōkelela pa kupwa kwa Divita I dya Ntanda, ne kino kyakweshe bininge mu kipindi kya bubidi kya “pakunoa pa panopanshi”—kubungakanibwa kwa mikōko mikwabo. Bano kebadipo “bāna ba bulopwe” ino, i “kibumbo kikatampe” kya babikalwa ba na mutyima tō ba buno Bulopwe. I bangulwe mu “bantu bonsololo, ne mizo, ne ndimi.” Bakōkelelele Bulopwe bwa Meshiasa, bubundilwe na Yesu Kidishitu ne “bapandulwemo” 144000 bakabikala nandi mu umbikalo wa momwa mūlu.—Kus. 7:9, 10; Dan. 7:13, 14, 18.
Mfumu wa Bipwilo
8, 9. (a) I bika bilombola amba Kidishitu umonanga mwiendelejo wa bipwilo byonso ne būmi bwa muntu ne muntu udi’mo? (b) Monka mokilombwedilwe pa paje 26, i bintu’ka “bya palampe bya Satana” byotufwaninwe kwepuka?
8 Twamwene mu shapita ubadikile muswelo wādi utala Kidishitu kamo ne kamo ka mwādi mwendela kipwilo ne kipwilo ku mushipiditu mu myaka katwa kabajinji K.K. Mu ano etu mafuku, Kidishitu Mfumwetu, Mulopwe ubikele byapelwe “lupusa lonso . . . lwa mūlu ne panopantanda pene,” wendejanga na bukankamane bipwilo ne batadi bandi kujokoloka ntanda yonso. (Mat. 28:18; Kol. 1:18) Yehova “wamupe kādi mutwe wa bintu byonso ku kipwilo” kya bashingwe māni. (Ef. 1:22) Mu uno muswelo, i kutupu kintu nansha kimo kilongeka mu bipwilo bya Batumoni ba Yehova 100000 ne musubu kya kabwanyapo kumona.
9 Yesu wātumine musapu wandi ku kipwilo kya Tyiataila wa kala amba: “Aye Mwana Leza, wa meso bwa lubimbi lwa mudilo, . . . wanena bino namino’mba: Ndyūkile bilongwa byobe.” (Kus. 2:18, 19) Wādingile bantu ba mu kino kipwilo pangala pa busekese, mwikadila wa kubanga kintu mpika amba: “Ndi wakusāta munda mumfyo ne umatyima kadi nkemupa monka mwikadile mīngilo yenu, wa wandi, wa wandi.” (Kus. 2:23) Bino binenwa bilombola amba Kidishitu umonanga mwiendelejo wa kipwilo ne kipwilo ne būmi bwa muntu ne muntu udi’mo. Yesu wāfwijije’ko Bene Kidishitu ba mu Tyiataila “bakubulwa kuyūka bintu bya palampe bya Satana.” (Kus. 2:24) Dyalelo nadyo mo monka, witabijanga bankasampe ne batame bapela kwikuja mu “bintu bya palampe bya Satana” kupityila ku Entelenete, ku makayo a Video a bikandangobo nansha milangwe ya bantu ya kutala bubi bitupu. Bine usangalanga pa kumona bukomo ne kwipāna kwa Bene Kidishitu bavule dyalelo beelela’ko bininge kulonda buludiki bwandi mu būmi bwabo bonso!
10. Lelo i muswelo’ka wāelekejibwe bwendeji bwa Kidishitu bwaendeja bakulumpe mu kipwilo, ino i mpangiko’ka yobafwaninwe kuyuka?
10 Kidishitu utalanga na buswe bipwilo byandi pano panshi kupityila ku bakulumpe batongelwe. (Ef. 4:8, 11, 12) Mu myaka katwa kabajinji, batadi bonso bādi babutulwe ku mushipiditu. I batelwe mu Kusokwelwa bu ñenyenye idi mu kuboko kwa lundyo kwa Kidishitu. (Kus. 1:16, 20) Dyalelo, bakulumpe bavule mu kipwilo i ba mu mikōko mikwabo. Batoñwanga pa kupwa kwa kulombela ne kuludikwa na mushipiditu sandu, nanshi nabo bakokeja kumonwa amba badi mu buludiki bwa Kidishitu, nansha mu kuboko kwandi kwa bwendeji. (Bil. 20:28) Inoko bayukile amba Kidishitu wingidijanga kabumbo katyetye ka bana-balume Bene Kidishitu bashingwe māni ba mu Kitango Kyendeji mwanda wa kwendeja ne kuludika bana bandi ba bwanga pano pa ntanda.—Tanga Bilongwa 15:6, 28-30.
“Iya Mfumwetu Yesu”
11. Mwanda waka twabilanga kumona Mfumwetu wiya bukidibukidi?
11 Yesu i munene pavule pene mu kusokwelwa kwa kudi mutumibwa Yoano amba wiyanga bukidibukidi. (Kus. 2:16; 3:11; 22:7, 20) Ne kutatana kwine mpika, wādi wisambila pa kwiya kwandi kwa kutyibila Babiloni Mukatakata mambo ne basheleshele ba ngikadilo imbi ya bintu ya Satana. (2 Tes. 1:7, 8) Yoano, mutumibwa mununu byaādi wabila kufikidila kwa binkumenkume bya kutendelwa byālailwe, wānene amba: “Amena; iya Mfumwetu Yesu.” Batwe netu batenwe ku mfulo ya ino ngikadilo imbi ya bintu twabilanga kumona Mfumwetu Mulopwe wiya na lupusa lwa Bulopwe mwanda wa kuyukanya buujila bwa dijina dya Shandi ne kubingija bubikadi bwandi.
12. I mwingilo’ka ukavuya Kidishitu kumeso kwa kulekelela luvula lwa bonakani?
12 Kumeso kwa Yesu kwiya konakanya bulongolodi bwa Satana bumweka na meso, bifwaninwe bidi muntu wa mfulo mu ba 144000 ba Isalela wa ku mushipiditu atūlwe kiyukeno kya mfulo. Bible unena patōkelela amba luvula lwa konakanya ngikadilo ya Satana lukalekelelwa enka shi ba 144000 abapu kutūlwa biyukeno.—Kus. 7:1-4.
13. Lelo Kidishitu ukamwekeja kwikala’po kwandi namani umbula bwa kipindi kibajinji kya “kyamalwa kibūke”?
13 “Kwikala’po” kwa Kidishitu tamba mu 1914 ke kwayukilwepo na bekadi bavule ba pano panshi. (2 Pet. 3:3, 4, NW) Inoko, panopano ponka usa kumwekeja kwikala’po kwandi na kufikidija butyibi bwa Yehova pa byonso bya ngikadilo ya bintu ya Satana. Konakanibwa kwa “mwine bupondo,” bendeji ba bipwilo bya Kine Kidishitu, ko “kumwekelela tō [kwa] kwikala’po kwandi.” (Tanga 2 Tesalonika 2:3, 8, NW.) Kino kikekala kilomboji kimwekelele kilombola amba Kidishitu wingilanga bu Mutyibi mutongwe na Yehova. (Tanga 2 Temote 4:1.) Kufundulwa kwa kipindi kikatampe kitopekwa kya Babiloni Mukatampe kukekala bu ngalwilo ibadikila konakanibwa kwa uno umbikalo wa ntanda wa mutōtelo wa bubela. Yehova ukatutuna mityima ya bendeji ba kipolitike basale uno wabwitwa wa ku mushipiditu. (Kus. 17:15-18) Kino kikekala kipindi kibajinji kya “kyamalwa kibūke.”—Mat. 24:21.
14. (a) Mwanda waka kipindi kibajinji kya kyamalwa kikatampe kikepipijibwa? (b) Lelo “kiyūkeno kya Mwanā muntu” kishintulula bika ku bantu ba Yehova?
14 Yesu wānene amba mafuku a kino kyamalwa akepipijibwa pa mwanda wa “batongwe,” basheleshele’ko ba Bene Kidishitu bashingwe māni pano pa ntanda. (Mat. 24:22) Yehova kaketabijapo luno lwana lwa kyonakanya lwa bipwilo bya bubela lukubije Bene Kidishitu bashingwe māni ne bapwani nabo mikōko kikwabo. Yesu wābwejeje’ko amba, “kyamalwa kikatampe pa kupita’kyo’tu,” kukekala biyukeno mu dyuba, kweji ne ñenyenye, “penepo po pakamweka ne mūlu kiyūkeno kya Mwanā muntu.” Kino kikalengeja mizo ya pano panshi ke “īyoyokota miyoa.” Ino bashingwe māni, badi na lukulupilo lwa kwenda mulu, ne bapwani nabo badi na lwa pano panshi kebakayoyokotapo ino miyoa. ino abo ‘bakabandula, ne kutalula mitwe yabo ke-pantu kukūlwa kwabo kubafwena.’—Mat. 24:29, 30; Luka 21:25-28.
15. Lelo i mwingilo’ka ukengila Kidishitu pakāya?
15 Mwanā muntu, kumeso kwa kufudija bushindañani bwandi, ukāya bidi mu muswelo mukwabo. Wānenene mu bupolofeto amba: “Ebiya pākaya Mwanā muntu mu ntumbo yandi, ne bamwikeulu bandi bonso bakukola pamo, ukashikata pa kipona kya ntumbo yandi. Ebiya mizo yonso īkabungakanibwa kwādi mu kifuko kyandi, ukebakalañanya’bo palapala bwa mukumbi ukalañanya mikōko umbambuji. Ukatūla mikōko ku lundyo, bambuji nabo ku lunkuso.” (Mat. 25:31-33) Kino kifunkila pa kwiya kwa Kidishitu bu Mutyibi wa kusansanya bantu ba “mizo yonso” mu bisumpi bibidi: “mikōko,” boba bakakwatakanya na bukankamane banababo ba ku mushipiditu (Bene Kidishitu bashingwe māni badi pano panshi) ne “bambuji,” boba “bampikwa kukōkela myanda-miyampe ya Mfumwetu Yesu.” (2 Tes. 1:7, 8) Mikōko, itelelwe bu “boloke,” bakamona “būmi bwa kulādila nyeke ne nyeke” pano pa ntanda, ino bambuji “bakendelela monka mu malwa a nyeke ne nyeke.”—Mat. 25:34, 40, 41, 45, 46.
Yesu Wavuija Bushindañani Bwandi
16. Lelo Mfumwetu Kidishitu ukavuija bushindañani bwandi namani?
16 Kidishitu pamo na kibalwa kyonso kituntulu kya balopwe bapidishitu batūdilwe kiyukeno belungile nandi ne mikōko ipwile kusansanibwa idi mu kuboko kwandi kwa lundyo mwanda wa lupandilo, bakenda ‘banekenye ba kunekenya.’ (Kus. 5:9, 10; 6:2) Byadi mutwe utangidile kibumbo kya bulwi kya bamwikeulu ba bukomo, kubadila’mo bine ne banababo basangulwe, ukonakanya ngikadilo yonso yendejibwa na Satana ya politike, ya bibumbo bya bulwi ne ya bansunga idi pano panshi. (Kus. 2:26, 27; 19:11-21) Bushindañani bwa Kidishitu bukavuika kitatyi kya konakanya ngikadilo mibi ya Satana. Penepa ukela Satana ne bademona bandi mu lupongo mu bula bwa myaka kanunu.—Kus. 20:1-3.
17. Lelo Kidishitu ukatwala kwepi mikōko mikwabo umbula bwa Umbikalo wandi wa Myaka Kanunu, ne batwe netu tufwaninwe kusumininwa kulonga bika?
17 Mutumibwa Yoano pa kwisambila pa “kibumbo kikatampe” kya mikōko mikwabo kikapanda ku kya kyamalwa kibūke, wānene bupolofeto bwa amba “Kāna-ka-mukōko ka umbukata mwa lupona ukēkalanga mukumbi wabo, wakwibalombola ku nsulo ya mema a būmi.” (Kus. 7:9, 17) Bine, umbula bwa Umbikalo wandi wa Myaka Kanunu, Kidishitu ukendelela na kwendeja mikōko mikwabo, ikateja bya binebine diwi dyandi, ne kwiitwala ku būmi bwa nyeke. (Tanga Yoano 10:16, 26, 28.) Nanshi tulondei bine na dikōkeji Mfumu Mulopwe wetu—tamba’nka pano kutūla ne mu ntanda impya ilaile Yehova!
Tupitulukei’mo
• I bika byalongele Kidishitu pa kupwa kubikikwa pa lupona?
• I kingidilwa’ka kimweka na meso kingidija Kidishitu pa kuludika kipwilo?
• I muswelo’ka mukwabo usa kwiya Mfumwetu Kidishitu?
• I muswelo’ka ukendelela Kidishitu kwitutwala mu ntanda impya?
[Bipangujo bya Kifundwa]
[Kifwatulo pa paje 32]
Konakanibwa kwa ngikadilo imbi ya ntanda ya Satana kukamwekeja patōkelela kwikala’po kwa Kidishitu