Lelo Leza Usakanga Bantu Besāse Bubi?

Kwisāsa bubi kumeso a mumpe nansha mwingidi kampanda kukibadilwa dyalelo mu bisela bya kipwilo ne mu mitōtelo mivule. Ino, le kwisāsa kukidi kadi na mvubu mu ino ntanda ya bantu batala bintu kilomonyeka?

BANTU badi na milangwe mishileshile pa uno mwanda. Kimfwa, julunale umo wa mu Kanada, National Post, wisambila pa muntu umo waitabije amba nansha shi i bikomo kusapwila muntu mukwabo kibi kyolongele, ino “ukasengwa ku mutyima pa kulombola’kyo muntu, nandi walombela nobe ne kukulombola byofwaninwe kulonga.” Dibuku Bénissez-moi mon Père, parce que j’ai péché, dya mu Angele, nadyo ditela muntu wanene amba: “Kwisāsa kwa muntu kubadilwa mu bipindi bikatampe bya mu bibidiji bya kipwilo. Kukankamika bantu batyine bibi.” Ino le i bika binena Bible pa uno mwanda?

Byobya Binena Bible

Mu Mukanda wa Bijila wāpelwe muzo wa Isalela na Leza, tutana’mo bulombodi bupotoloke bwa bifwaninwe kulonga shi muntu walonga bubi. Kimfwa shi muntu walubila mukwabo nansha kutyumuna bijila bya Leza, wādi unenwe kwisāsa kudi mupidishitu mutongwe wa mu kisaka kya Levi, wādi wa kumulongela kipwanyo na kwela kitapwa kya kulekelwa kwa bubi kudi Leza.​—Levi 5:1-6.

Tutwa twa myaka pa kupita’po, kitatyi kyāile mupolofeto Natana kudingila Mulopwe Davida pa bubi bwandi, lelo Davida wālongele’po namani? Wāitabije kiponka na ponka amba: “Napi mambo padi Yehova.” (2 Samwele 12:13) Kadi walombela, mwanda wa kuzenza Leza buntu bwandi. Byafula namani? Mwenda mafuku, Davida wasoneka amba: “Naitabije kudi abe mwanda wami, ne bubi bwami nabo nkyafīle’bopo; kwivwana ko nadi na’mba, nasabe kujilula kwami kudi Yehova; kadi abe wandekele bubi bwa bupya-mambo bwami.”​—Mitōto 32:5; 51:1-4.

Mpangiko ya kwisāsa bubi yātudile’ko Leza yāendelele kwikala’ko mu kipwilo kya Bwine Kidishitu kya mu myaka katwa kabajinji mu kino Kyetu Kitatyi. Yakoba mwanabo na Yesu wa munda mwa inandi ubadilwa mu bantu bādi batangidile kipwilo kya mu Yelusalema, wāsoñenye banababo Bene Kidishitu amba: “Mwikale kwisabila myanda bānwe bene na bene, ne kwilombelela’mba mukomejibwe.” (Yakoba 5:16) Penepo, i kika kisakilwa Bene Kidishitu kwisāsa, ne bakesāsa kudi ani?

Lelo I Bika Bifwaninwe Kwisāsa?

Batwe bantu bakubulwa kubwaninina tuponenanga mu bilongwa bya kubulwa kufwaninwa nansha kwingidija bibi ludimi lwetu ne kulubila bakwetu difuku ne difuku. (Loma 3:23) Lelo kino kishintulula amba tufwaninwe kukesāsa bilubo bya uno muswelo ku meso a muntu upelwe lupusa nansha a mwingidi kampanda?

Nansha bubi bonso byo bufityijanga mutyima wa Leza, ino aye witufwilanga lusa na  kubanga bukōkekōke bwetu bwa kubulwa kubwaninina kotupyene. Nanshi kaimba wa mitōto wanene bya bine amba: “Shi abe, Yehova, ubangile mambo nankyo le i ani, a Mfumwami, ukēmananga? Ino kudi abe ko ku kulekelwa kwa mambo, amba wakamibwe.” (Mitōto 130:3, 4) Ino, le tufwaninwe kulonga bika shi tubaluba nansha kulubila bakwetu, padi kwakubulwa kusaka? Vuluka amba mu lulombelo lwa kimfwa lwāfundije Yesu balondi bandi, wēbanene ne kulomba amba: “Kadi bēkale kwitulekelapo myanda yetu mwanda bātwe tulekelanga bonso bakwitudilamo.” (Luka 11:4) Bine, Leza uketulekela shi tufwena kwadi ne kumulomba lulekelo mu dijina dya Yesu.​—Yoano 14:13, 14.

Yuka amba Yesu wānene amba pa kulekelwa netu tufwaninwe kulekela boba “bakwitudilamo.” Mutumibwa Polo wāvulwije banababo mu lwitabijo amba: “Mwikale ne kanye bānwe bene na bene, ne mutyima wa kukōka, mwikale kwilekela bānwe bene, monka mwemulekele aye Leza mudi Kidishitu.” (Efisesa 4:32) Tukekala na bubinga bwa kutengela kulekelwa na Leza bilubo byetu shi netu tulekela bakwetu bilubo byabo.

Ino le tunena namani pa bubi bukatampe, kimfwa bwivi, bubela bwa ku kusaka, busekese, bunkolwankolwa, ne bikwabokwabo? Muntu ulonga bubi bwa uno muswelo utyumunanga bijila bya Leza, ne i Leza walubila. Lelo ufwaninwe kulonga bika?

Lelo Bifwaninwe Kwisāsa Kudi Ani?

Leza kapelepo bantu lupusa lwa kulekela muntu bubi bwamulubile, mwanda i aye mwine wa kumulekela. Bible witusapwila patōkelela amba: “Ino wivwane tulupule myanda yetu, nankyo aye i wabinebine wa boloke bwa kwitulekela myanda, ne kwitutōkeja ku bukondame bonso.” (1 Yoano 1:9) Ino, i kudi ani kufwaninwe kwisāsa bubi bwa uno muswelo?

Lulekelo byo lutambanga’nka kudi Leza, nanshi bubi bufwaninwe kwisāsa enka ku aye. Mo mwalongele Davida, monka motwamwenanga. Ino, le kulekelwa kwetu kwimanine pa bika? Bible witulombola amba: “Ebiya bānwe alamukai pa mutyima, muvundamukile kwādi, nankyo ne myanda yenu ījimankanibwe, ebiya kukāyanga kokwa kudi aye Yehova myaka ya kupunguluka kwa mutyima.” (Bilongwa 3:19) Bine, lulekelo kelwimaninepo enka pa kwitabija bubi ne kwisāsa’bo, ino kadi i ne pa mutyima wa kwijiba ku bilongwa bibi. Divule kwijiba’ko i kukomo. Inoko kudi kintu kibwanya kwitukwasha.

Vuluka binenwa bya mwana bwanga Yakoba byotwatelanga dibajinji bya amba: “Mwikale kwisabila myanda bānwe bene na bene, ne kwilombelela’mba mukomejibwe.” Kadi Yakoba ubweja ku bino binenwa amba: “Lulombelo lwa kininga lwa moloke lo lwine lutabukile buleme.” (Yakoba 5:16) “Moloke” ubwanya kwikala “bakulumpe ba kipwilo,” batelele Yakoba mu vese 14. Mu kipwilo kya Bwine Kidishitu mudi “bakulumpe” batame ku mushipiditu, batongelwe mwanda wa kukwasha boba basaka kulekelwa na Leza. Bano “bakulumpe” kebakokejapo kutōkeja bubi, mwanda kekudipo muntu nansha umo upelwe lupusa lwa kulekela mukwabo bubi bwalubile Leza. * Inoko i babwanye bisakibwa bya ku mushipiditu bya kudingila  ne kolola muntu ulongele bubi bukatampe, kumukwasha ajingulule bukatampe bwa bubi bwandi ne kine kisakilwa kwisāsa.​—Ngalatea 6:1.

I Kika Kine Kisāshilanga Muntu Bubi?

Bubi, bwikale bukatampe nansha butyetye, muntu ulongele’bo i mone kipwano kyandi na bakwabo ne na Leza. O mwanda ubwanya kukambakanibwa nansha kwiivwana bibi. Uno o mwingilo wa mutyima wa mundamunda witupele umpangi wetu. (Loma 2:14, 15) Le i bika byotubwanya kulonga?

Tujokelei monka ku mukanda wa Yakoba, tutana’mo bino binenwa bikankamika amba: “Lelo kudi umo ubela umbukata mwenu’ni? Nabya bēte bakulumpe ba kipwilo; nabo bamulombelele, ne kumushinga mani ponka, mu dijina dya Mfumwetu; kadi ne lulombelo lwa kwitabija lukamupandija ubela, ne Mfumwetu ukamulangula; nansha wapīle mambo akamulekelwa.”​—Yakoba 5:14, 15.

Pano napo, bakulumpe i betwe kuvuija bisakibwa bya luombe. Namani? Ke na kwivwanapo bitupu muntu wisāsa. Ino shi kudi misongo ya ku mushipiditu, bafwaninwe kulonga’po kintu mwanda wa ‘kupandija ubela.’ Kudi bintu bibidi bitelele Yakoba bifwaninwe kulonga.

Kibajinji, i ‘kushinga māni.’ Kino kifunkila pa bukomo budi na kinenwa kya Leza bwa kundapa. Mutumibwa Polo wānene amba: “Mwanda wa Leza i wa būmi ne bukomo . . . kadi i wa kampeja bukidi kakuyūkidila kufwatakanya ne kukanina kwa mutyima,” ukokeja kutenga ne mu nkulwe ya ñeni ne ya mutyima. (Bahebelu 4:12) Shi Bakulumpe bengidije Bible na bwino, babwanya kukwasha ubela ku mushipiditu ayuke kine kyalengeje misongo ne kutabula matabula mafwaninwe mwa kolwela myanda ku meso a Leza.

Kya bubidi, i “lulombelo lwa kwitabija.” Nansha milombelo ya bakulumpe byokeikokejapo kushinta boloke bwa Leza, ino milombelo idi na mvubu ku meso a Leza, mwanda udi na mutyima wa kulekela bantu bubi kupityila ku kitapwa kya kikūlwa kya Kidishitu. (1 Yoano 2:2) Leza usenswe kukwasha kipya-mambo yense wisāsa bya binebine ne ulonga “mīngilo ya kufwaninwa kwalamuka pa mutyima.”​—Bilongwa 26:20.

Bubinga bukatampe bwa kwisāshila bubi​—botulubile mukwetu nansha Leza—i kukimba kwitabijibwa na Leza. Yesu Kidishitu wālombwele amba tufwaninwe bidi kupwija mwanda na mwanetu ne kwikala nandi mu ndoe pa kutōta Leza na mutyima wa mundamunda muyampe. (Mateo 5:23, 24) Nkindi 28:13 unena amba: “Yewa upūtanga kujilula kwandi kakamonepo dyese, ehe; ino yewa usaba ne kwijiba’ko ukafwilwa lusa.” Shi twityepeja kumeso a Yehova Leza ne kulomba kulekelwa, nabya uketwitabija ne kwituzunzula pa kitatyi kifwaninwe.​—1 Petelo 5:6.

[Kunshi kwa dyani]

[Bushintuludi pa paje 30]

Leza ukajimankanya kutupatupa kwetu ne kwitulekela shi twiya kwadi ne kumulomba kulekelwa mu dijina dya Yesu

[Kifwatulo pa paje 31]

Bubinga bukatampe bwa kwisāshila bubi i kukimba kwitabijibwa na Leza