Milombelo

1 Mwanda Waka?

MILOMBELO. Kudi mitwe ya myanda mityetye mu Bible ikokanga ne kusangaja bantu mpata. Tubandaulei bipangujo bisamba-bibidi biipangulwanga divule bitala milombelo; kupwa bandaula netu pamo malondololo adi mu Bible. Bino bishinte i bilupwilwe kukukwasha ulombele—ushilule kulombela nansha kulumbulula milombelo yobe.

KUJOKOLOKA ntanda yonso, bantu ba bibidiji ne mitōtelo yonso balombelanga. Balombelanga pa bunka ne mu kibumbo. Balombelanga ku bipwilo, mu matempelo, mu mashinakoka, mu moshiké ne ku mikishi. Bakokeja kwingidija tubyata tutyetutye, mashapele, milombelo ya kupitulukapituluka’mo, bankishi, mabuku a milombelo, nansha milombelo milembwe pa tumbao tuyeyeke.

Milombelo ishiyañanyanga bantu na bintu bikwabo byonso byūmi. Shako, kudi bintu bivule byotwiifwene na banyema. Pamo bwa abo, tusakilwanga byakudya, luvula, ne mema. Tubutulwanga, twaikala bōmi kupwa twafwa enka mobafwila. (Musapudi 3:19) Ino enka bantu kete bo balombelanga. Mwanda waka?

Padi malondololo apēla i mwanda tusakanga kulombela. Kadi milombelo imonwanga divule bu kwisamba na boba badi mu kīkalo kya mishipiditu, na bintu bimonwa bu bijila nansha bikola ne bya nyeke. Bible unena’mba twapangilwe na mutyima wabila bino bintu. (Musapudi 3:11) Yesu wānene amba: “Dyese dyo dyabo bakulandapala pa mutyima.”—Mateo 5:3.

‘Kulandapala pa mutyima’—le kudi kikwabo kilengeja bantu bobake bifuko bya kutōtela’mo ne kupityija mansaa mavule balombela? Na bubine, bantu bamo bekulupilanga abo bene nansha kukulupila bantu bakwabo pa kupwa bulanda bwabo bwa ku mushipiditu. Ino le kujingulwilepo’mba bantu kebabwanyapo kukwasha ne pa mfulo? Tudi na bukomo butyetye, būmi bwetu nabo i bwīpi, ketumonepo bya kulampe. Enka Yewa wa ñeni kutabuka, wa bukomo bukatampe ne kūminina kwitupita ye ukokeja kwitupa byotusakilwa. Penepa buno bulanda bwa ku mushipiditu bwitufikija ku kulombela i bulanda’ka?

Langa’po bidi: Le kodi mukimbe buludiki, tunangu nansha malondololo ku bipangujo bimweka’mba bitabukile buyuki bwa bantu? Le kodi mwiivwane amba usakilwa kusengwa kitatyi kyowatenwe na bushiyena bukatampe, usakilwa buludiki kitatyi kya kukwata butyibi bukatampe nansha usakilwa kulekelwa mambo kitatyi kyotyumunwa na mutyima wa kwitopeka?

Kukwatañana na Bible, buno i bubinga bwendele’mo kulombela. Bible i dibuku dikulupilwa kupita onso mu uno mwanda, kadi i dilembwe’mo milombelo ya bana-balume ne bana-bakaji ba kikōkeji bangi. Bālombele busengi, bwendeji, kulekelwa ne malondololo ku bipangujo bikutakane.—Mitōto 23:3; 71:21; Danyele 9:4, 5, 19; Habakuka 1:3.

Ino milombelo, nansha byo yādi mishile, yādi miifwane ku kintu kimo. Bantu bādi balombela’ba bādi na kintu kimo kya mvubu kilumbulula milombelo, kibudilwe nansha kufutululwa divule mu ntanda ya dyalelo. Bādi bayukile mwine ufwaninwe kulombwa.