Milombelo

6 Le Ikakwasha?

LELO kulombela kwitukwashanga? Bible ulombola’mba kukwashanga; milombelo ya bengidi ba Leza ba kikōkeji idi na kamweno kobadi. (Luka 22:40; Yakoba 5:13) Kadi kulombela kukokeja kwitukwasha bininge ku mushipiditu, mu malango nansha ke ku ngitu kwine. Muswelo’ka?

Langa’po shi udi na mwana wapebwa kyabuntu. Le ukamufundija’mba i biyampe kwikala’tu na mutyima wa kufwija’ko’ni? Nansha ukamufundija’mba i biyampe anene patōka amba wafwa’ko? Shi tunena bintu bya mvubu byotulanga, po pene tutanga’ko mutyima ne kwibikomeja. Le ye mobikadile ne kitatyi kyotwisamba na Leza? I amo! Tutalei bimfwa bimobimo.

Milombelo ya kufwija’ko. Kitatyi kyotufwija Tata wetu pa bintu biyampe byaetulongela, tutanga mutyima ku madyese etu. Mfulo-mfulo, tukakunkwa mutyima wa kumufwija’ko monka, kwikala na nsangaji, ne kukankamana.—Fidipai 4:6.

Kimfwa: Yesu wāfwijije’ko Shandi pa muswelo waāmwivwene ne kulondolola milombelo yandi.—Yoano 11:41.

Milombelo ya kulekelwa: Kitatyi kyotulomba Leza etulekele, tukomejanga mutyima wetu wa mundamunda, tutyityija kwisāsa kwetu, ne kulombola’mba tuyukile bukatampe bwa bubi. Kadi tutalulwanga bulēmi bwa kwitopeka.

Kimfwa: Davida wālombele milombelo ya kwisāsa ne kwialakanya.—Mitōto 51.

Kulomba buludiki ne tunangu. Kulomba Yehova etuludike nansha kwitupa tunangu totusakilwa pa kukwata butyibi buyampe kuketukwasha twikale betyepeje binebine. Kino kikokeja kwituvuluja bukōkekōke bwetu ne kwitukwasha tutamije kikulupiji kyetu mudi Tata wetu wa mūlu.—Nkindi 3:5, 6.

Kimfwa: Solomone wālombele na kwityepeja buludiki ne tunangu pa kuludika Isalela.—1 Balopwe 3:5-12.

Milombelo ya tusua. Shi tupungulwila mityima yetu kudi Leza kitatyi kyotuvutakanibwa milangwe, mutyima wetu ukatūkijibwa ne kukulupila mudi Yehova pa kyaba kya batwe bene.—Mitōto 62:8.

Kimfwa: Mulopwe Asa wālombele kitatyi kyaātambilwe ne balwana.—2 Bilongwa 14:11.

Kulombela mwanda wa kamweno ka bakwabo. Ino milombelo itukwashanga tulwe na kwisakila, tutamije lusa ne kinyenye.

Kimfwa: Yesu wālombele mwanda wa balondi bandi.—Yoano 17:9-17.

Milombelo ya kutendela. Kitatyi kyotutendela Yehova pa mingilo ne ngikadilo yandi ya kwanwa, bulēme ne mutyima wetu wa kumufwija’ko ukatama. Ino milombelo itukwashanga kadi tufwene pabwipi na Tata wetu Leza.

Kimfwa: Davida wātendele Leza pa bupangi bwandi.—Mitōto 8.

Madyese makwabo atamba ku milombelo i “ndoe ya Leza, ya kutabuka ñeni yonso.” (Fidipai 4:7) Kutana ndoe ya mutyima mu ino ntanda ya kavutakanya i dyese disakane. Idi ne na byabuyabuya ku ngitu. (Nkindi 14:30) Ino, le itambanga enka ku bukomo bwetu kete? Nansha kudi kintu kikwabo kya mvubu kisakilwa?

[Bushintuludi pa paje 10]

Milombelo iletanga byabuyabuya bivule—ku ngitu, mu malango, kutabukidila ku mushipiditu