Ikala na Mutyima wa Kufwija’ko
Kintu 3
Ikala na Mutyima wa Kufwija’ko
I BIKA BIFUNDIJA BIBLE? “Mufwijeiko umbyonsololo.”—1 Tesalonika 5:18.
I BIKA BIKOLEJA? Tujokolokelwe na bantu ba kwitatula ne kufwija kwine mpika, ngikadilo ikokeja kwitusambukila netu. (2 Temote 3:1, 2) Kadi, padi tumona’mba tutononwanga kutenteka mingilo pa mingilo mikwabo itutyininye kala umbūmi. Tubwanya kulēmenenwa na myanda nansha kupuakanibwa na kulondalonda tumweno twa batwe bene twabulwa ne kitatyi kya kusangela byotudi nabyo nansha kufwija’ko bakwabo pa byobetulongela.
I BIKA BYOKALONGA’PO? Ikala na kitatyi kya kulanguluka pa bintu biyampe byodi nabyo. Shako, ubwanya kwimona bu mulēmenenwe na myanda. Ino tala kimfwa kya Mulopwe Davida. Kyaba kimo wēmwene na aye mukupilwe, mutyima wandi musadibwe na matompo. Nansha nankyo, wālombele Leza amba: “Mfwatakanyanga bilongwa byobe byonso; nañanga mīngilo ya makasa obe.” (Mitōto 143:3-5) Davida wālamine mutyima wa kufwija’ko ne kuloelelwa nansha byaādi mu matompo.
Langa pa byobya ke bikulongele bakwenu mwanda wa kukukwasha, kadi wibafwije’ko pa bukomo bobalonga. Yesu wāshile kimfwa kya kutendelwa mu uno mwanda. Kimfwa, mulunda nandi Madia paāmupungulwidile māni a lupoto ku mutwe ne ku maulu, bamo ke bēpangula’mba: “Lelo i mwanda ka le, ōdi ne kyonakanya kya mani nenki?” * Bano bantu batompola bādi basaka’mba māni’a longa apotolojibwe ne kupa balanda lupeto’lwa. Yesu wālondolwele amba: “Mulekei, lelo i bika byo mumupuñenya?” Kupwa wābweja’ko amba: “Walongela monka mwāyūkile aye mwine kulongela.” (Mako 14:3-8; Yoano 12:3) Pa kyaba kya kuta mutyima ku bintu kebyalongelepo Madia, Yesu wāfwijije’ko pa byaālongele.
Bamo bayukanga mvubu ya kisaka, balunda, nansha madyese makwabo obadi nao enka shi ke kutupu’bo. Ubwanya kwepuka kino shi ulanguluke pa bintu bilumbuluke byodi nabyo pano! Le wabulwa’po kujingulula mu ñeni nansha kulemba bintu byowasangedile?
Mwanda “byonso byakupanwa bilumbuluke” bitambanga kudi Leza, tufwaninwe kumufwija’ko mu milombelo. (Yakoba 1:17) Kulonga namino kyaba ne kyaba kukokeja kukukwasha ulame mutyima wa kufwija’ko ne kutamija kuloelelwa.—Fidipai 4:6, 7.
[Kunshi kwa dyani]
^ Mu myaka katwa kabajinji, kupungulwila mweni māni ku mutwe i kilomboji kya kizaji; kadi kwiapungulwila ku maulu i kilomboji kya kwityepeja.
[Kifwatulo pa paje 6]
Le ufwijanga bakwabo pa byo bakulongela?