Le Bikokejika Kuloelelwa?

“Kuloelelwa kwikadijanga balanda ke bampeta; kubulwa kuloelelwa nako kwikadija bampeta ke balanda.” —Benjamin Franklin.

MUNGYA luno lukindi, bavule i bajingulule amba kuloelelwa kekupotwengapo pamo bwa bya busunga. Ke kya kutulumukapo shi kuloelelwa—kwimvwana nsangaji munda—kumweka bu kusakane mu ino ntanda ikankamikanga mutyima wa kungwija bituntwa, kulonga bintu bya nkuo, nansha kwabila būmi bwa bakwabo! Le myanda ilondako’i ikuteñanga nobe?

• Bantu basumbija bya busunga bakulombola kyaba ne kyaba’mba pa kuloelelwa poso enka upotele’ko kikwabo.

• Kwitaka ku kaji ne ku masomo kukukankamika widingakanye na bakwenu.

• Bantu babulwanga kufwija’ko pa byowibalongela.

• Balunda bakubeleñenya byobadi nabyo.

• Wiipangula bipangujo bikatampe bitala pa būmi, kulondololwa’byo mpika.

Shi ulwanga na makambakano a uno muswelo, le bikokejika kuloelelwa? Mutumibwa Polo wēsambile pa muswelo wa “mwakwikutyila,” nansha kuloelelwa. Kyaba kimo, wādi uvudilwa bintu, kyaba kikwabo nakyo, wabulwa’byo. Wādi utendelwa na balunda nandi, kadi upunikwa na bakwabo. Ino wānene amba, “mu byonso na byonso nafundijibwa, ne mwakwikutyila.”—I batwe basendeka; Fidipai 4:11, 12.

Kuloelelwa kekuyukenepo ku boba kebalongele nansha dimo bukomo bwa kufikila’po, ino enka na mwānene’kyo Polo, tubwanya kwifunda’ko. Pano tukulomba ubandaule bintu bitano bileta kuloelelwa bidi mu Kinenwa kya Leza, Bible.