Kintu 1

Sanswa Bantu, Kokasanswa Lupeto ne Bituntwa

I BIKA BIFUNDIJA BIBLE? “Kusanswa kwa lupeto kyo kitako kya bubi bonso miswelo ne miswelo.”—1 Temote 6:10.

I BIKA BIKOLEJA? Bantu basumbija bintu betuningilanga tuleke kuloelelwa mu byotudi nabyo. Basaka twingile bu bapika mwa kumwena lupeto lwa kusupakanya ku bintu bipya, biyampe bininge, ne bikatakata. Lupeto lukokañananga, kadi ubwanya ne kwija mpika welusanswa. Inoko, Bible udyumuna’mba yewa usenswe bupeta kakaloelelwapo nansha dimo. Mulopwe Solomone wāsonekele amba: “Yewa usanshilwe ndalama kakekutapo ku ayo, ehe, nansha wa kusanswa bungibungi ne ntundubuko; kine kino’ki nakyo i kyabitupu.”—Musapudi 5:10.

I BIKA BYOKALONGA’PO? Iula Yesu, kadi wifunde kusanswa bantu pakatampe kupita’ko bintu. Yesu wādi witabije kupāna byonso byaādi nabyo—nansha ke būmi bwandi bwine—mwanda wādi uswile bantu. (Yoano 15:13) Wānene amba: “Dyese dya kupana ditabukile dya kupebwa.” (Bilongwa 20:35) Shi twikale na kibidiji kya kupa bantu bakwabo kitatyi ne bintu byetu, nabo baketupa’byo. Yesu amba, “mwikale kupanapo, ebiya bikemupebwapo.” (Luka 6:38) Boba balondalonda lupeto ne bituntwa betapanga abo bene ku misongo ne masusu. (1 Temote 6:9, 10) Ku mutamba mukwabo, kuloelelwa kwa binebine kutambanga mu kusanswa bantu ne kuswedibwa.

Wabulwa’po kubandaula shi ukokeja kupēleja būmi bobe? Le ukokeja kutyepeja bungi bwa bituntwa byodi nabyo nansha byokimba kwikala nabyo? Nankyo, ukamona’mba udi na kitatyi ne bukomo bwa kulonga bintu bya mvubu mpata mu būmi—kukwasha bantu ne kwingidila Leza, ukupele byonso byodi nabyo.—Mateo 6:24; Bilongwa 17:28.

[Kifwatulo pa paje 4]

“Mwikale kupanapo, ebiya bikemupebwapo”