Kintu 2

Tyina Kwidingakanya na Bakwabo

I BIKA BIFUNDIJA BIBLE? “Muntu yense abandaule bilongwa byandi aye mwine, shi ukokeja kwitumbija nabyo, etumbije nabyo aye mwine, kakidingakenya ku bakwabo.”—Ngalatea 6:4, Myanda Miyampe ku Bonso.

I BIKA BIKOLEJA? Padi tusenswe kwidingakanya na bakwetu—kyaba kimo na boba badi na bityetye, ino divule i na boba badi na bukomo, bupeta, nansha na bwino kwitupita. Nanshi byonso i bibi. Tulubanga pa kulanga amba bulēme bwa muntu i bintu byadi nabyo nansha byabwanya kulonga. Tubwanya kutamija mu ñeni makomwa-meso ne mushipiditu wa kwitāka.—Musapudi 4:4.

I BIKA BYOKALONGA’PO? Tompa kwimona mukumwena Leza. Leka mumweno wandi utādile muswelo omona bulēme bwa muntu. “Muntu ubandila ponka paelele meso, ino Yehova * ubandilanga pa mutyima.” (1 Samwele 16:7) Yehova utompanga bulēme bobe, ke na kukudingakanyapo na muntu mukwabo, mhm, ino i na kutanga obe mutyima kubandaula milangwe yobe, mwimvwanino, ne kukanina kwa mutyima obe. (Bahebelu 4:12, 13) Yehova uyukile mikalo yobe kadi usakanga amba wiilēmeke. Shi udingakanye bulēme bobe na bwa bantu bakwabo, ukafula ku kwianya nansha ku kubulwa kuloelelwa divule. Nanshi, itabija na kwityepeja’mba ke bintupo byonso byobwanya kufikila’po.—Nkindi 11:2.

Le i bika bine byofwaninwe kulonga pa kwikala na mvubu kumeso a Leza? Yehova wāpele mupolofeto Mika mushipiditu asoneke amba: “Wakulaija abe muntu kyokya kilumbuluke; lelo i kika kyaswele Yehova kodi, a? Poso’nka kulonga buluji, ne kusanswa kanye, ne kunanga mu kwiubija na Leza obe.” (Mika 6:8) Shi ulonde ano madingi, Leza ukakuta mutyima. (1 Petelo 5:6, 7) Le kudi bubinga bwa kuloelelwa bupityile buno?

[Kunshi kwa dyani]

[Kifwatulo pa paje 5]

Yehova utompanga bulēme bwetu na bidi mu mityima