Bapebwe Bukomo Bwa Kunekenya Matompo ne Kulwa na Kutyumukwa Mutyima

“Mukapebwa bukomo bwa Mushipiditu Sandu ukemwīla ko mudi.”—BIL. 1:8.

1, 2. Lelo Yesu wālaile balondi bandi bukwashi’ka, ne mwanda waka bādi basakilwa’bo?

 YESU wādi uyukile amba bandi bana ba bwanga kebādipo ba kubwanya kulama byonso byēbalaile na bukomo bwa abo bene. Shi tubandaule mwine mwādi mwikadile bukata bwa mwingilo wabo wa busapudi, bukomo bwa bakinkwa nabo, ne kutupatupa kwa ngitu ya bu muntu, i kimweke patōka amba bādi basakilwa bukomo butabukile bwikalwanga nabo. O mwanda, Yesu kumeso’tu kwa kwenda mūlu, wākulupije bandi bana ba bwanga amba: “Ino bānwe mukapebwa bukomo bwa Mushipiditu Sandu ukemwīla ko mudi, mukēkale basapudi bami bakusapula mu Yelusalema, ne monso mu Yudea, ne mu Samadia, ne kulampe kwine kumfulo kwa ntanda.”—Bil. 1:8.

² Uno mulao wāshilwile kufikidila mu mwaka wa Pentekosa 33 K.K. kitatyi kyāpelwe balondi ba Yesu Kidishitu bukomo bwa kuyuja Yelusalema yense na lufundijo lwabo. Kekwādipo kukankajibwa kwadi kubwanya kwimika uno mwingilo. (Bil. 4:20) Balondi ba Yesu ba kikōkeji, kubadila’mo ne batwe, tusakilwa bukidibukidi buno bukomo bonka butamba kudi Leza “mafuku onso nyeke, ne kumfulo kwine kwa panopantanda.”—Mat. 28:20.

3. (a) Shintulula kwishila kudi pa bukata bwa mushipiditu sandu ne bukomo. (b) Lelo bukomo bwa Leza bukokeja kwitukwasha tulonge bika?

³ Yesu wālaile bandi bana ba bwanga amba: “Mukapebwa bukomo bwa Mushipiditu Sandu ukemwīla ko mudi.” Bino bishima bibidi, “bukomo” ne “mushipiditu” bidi na nshintulwilo mishile. Mushipiditu wa Leza, bukomo bwandi bwingila, i bukomo bwatūkijanga ne kupungulwila mu muntu nansha mu kintu mwanda wa kufikidija kiswa-mutyima kyandi. Ino bukomo, bukokeja kushintululwa bu “mukanka wa kwingila nansha kulonga kintu.” Bukokeja kwikala mu muntu nansha mu kintu kufika ne pobukafikidija kitungo kyabo. Nanshi mushipiditu sandu  ukokeja kwelekejibwa na mudilo wa nshinga uletela batedi bukomo, ino bukomo budi pamo bwa mudilo uyudile mu batedi. Bukomo bupanga Yehova bengidi bandi kupityila ku mushipiditu sandu bwitupanga buninge bwa kufikidija kwipāna kwetu kwa Bwine Kidishitu ne kukomena lupusa lubi lwitufikila.—Tanga Mika 3:8; Kolose 1:29.

4. Le i bika byotusa kubandaula mu kino kishite, ne mwanda waka?

⁴ Lelo bukomo bwitupelwe kupityila ku mushipiditu sandu bumwekelanga ku bika? Le i bilongwa’ka biyampe byotukokeja kulonga na bukwashi bwa mushipiditu? Potukimba kwingidila Leza na kikōkeji, tutananga bikoleja bivule—biletwa shi na Satana, shi na ngikadilo yandi ya bintu, nansha na ngitu yetu yampikwa kubwaninina. Batwe Bene Kidishitu pa kūminina, i biyampe kunekenya bino bikoleja, kutambila kitatyi ne kitatyi mu mwingilo ne kulama kipwano kilumbuluke na Yehova. Tubandaulei muswelo witukwasha mushipiditu sandu tunekenye matompo ne kulwa na mpungiji ne kutyumukwa mutyima.

Bapebwe Bukomo bwa Kulwa na Matompo

5. Lelo milombelo ibwanya kwitupa bukomo namani?

⁵ Yesu Kidishitu wāfundije balondi bandi kulombela amba: “Kebaketutwala mu kutompibwa, ehe, nanshi betunyongolole kudi yewa mubi.” (Mat. 6:13) Yehova kakelapo bengidi bandi ba kikōkeji bamulomba namino. Pakwabo kadi, Yesu wānene amba: “Shenu wa mūlu ke pepi, keye mwine ukakija kupana Mushipiditu Sandu ku bakumulomba.” (Luka 11:13) Bine i bikulupija’po kashā, Yehova kulaya kwitupa bukomo bwandi mwanda wa kulonga byoloke! Na bubine kino kekishintululapo amba kiswa-mutyima kya Yehova kikakankaja matompo aleke kwitufikila. (1 Kod. 10:13) Ino kitatyi kyotutanwa na matompo, kyo kitatyi kya kulombela bininge.—Mat. 26:42.

6. Lelo malondololo a Yesu ku matompo a Satana ādi emanine pa bika?

⁶ Yesu pa kulondolola ku matompo a Dyabola, wāpitulukile mu bisonekwa. Kinenwa kya Leza kyādi bine mu ñeni ya Yesu kitatyi kyaālondolwele amba: “Kisonekelwe’mba . . . Nanshi kisonekelwe’mba . . . Funduka papo abe Satana ke-kintu kisonekelwe’mba: Ukafukatyila kutōta’nka Yehova Leza obe. E yenka ōkēngidila mīngilo.” (Mat. 4:1-10) Kuswa Yehova ne Kinenwa kyandi ko kwātonwene Yesu apele bintu byāmubeleñenye yewa Wakumutompa. Yesu pa kupwa kukomena ano matompo misunsa mivule, Satana wāmuleka.

7. Lelo Bible witukwasha namani pa kukomena matompo?

⁷ Shi Yesu wāimanine pa Kinenwa kya Leza pa kukomena matompo, lelo batwe ke pepi! Bine, bukomo bwetu bwa kukomena Dyabola ne bengidi bandi bushilulanga na kusumininwa kuyuka misoñanya ya Leza ne kwiilonda ne pa mfulo. Bantu bavule bakankamikilwe kulonda misoñanya ya mu Bible mu būmi kitatyi kyobadi befunda Bisonekwa, kwivwanija tunangu twa Leza ne boloke bwandi. Kadi, “Mwanda wa Leza” upānanga bukomo bubwanya kuyukidila “kufwatakanya ne kukanina kwa mutyima.” (Bah. 4:12) Shi muntu utanga ne kulangulukila pa Bisonekwa, ukokeja kwikala na “kuyukidija bu-binebine” bwa Yehova. (Dan. 9:13) Pa kwikala na kuno kuyukidija, i biyampe tulangulukile pa bisonekwa bisambila pa bukōkekōke bwetu.

8. Lelo tukokeja kwikala na mushipiditu sandu muswelo’ka?

⁸ Yesu wābwenye kukomena matompo mwanda, wādi muyuke Bisonekwa, kadi wādi ‘muyule mushipiditu sandu.’ (Luka 4:1) Pa kusaka twikale na bukankamane ne bukomo bwa uno muswelo, tufwaninwe kufwena kudi Yehova na kumwena ne pa mfulo mu mpangiko yonso yatūdile’ko mwanda wa kwitudinga mushipiditu wandi. (Yak. 4:7, 8) Mu ino mpangiko mubadilwa kwifunda Bible, milombelo, ne kupwana na banabetu mu lwitabijo. Bavule nabo basangelanga byabuyabuya bimwenwa mu kulēmeka mpangiko yonso ya mingilo ya Bwine Kidishitu, mine ikwasha mwa kwimikila ñeni pa milangwe ya kutama ku mushipiditu.

9, 10. (a) Lelo i matompo’ka avudile kumweka mu wenu mwaba? (b) Le kulanguluka ne kulombela kukupanga namani bukomo bwa kulwa na matompo nansha ke kitatyi kyoivwene mpungiji?

 ⁹ Le i matompo’ka ofwaninwe kukomena? Lelo kodi mutanwe na matompo a kwiselembeja na muntu okwisongele nandi? Shi kwasongele nansha kusongwa, lelo kashā mutyima ke wakukunkile kwitabija kwisonga na muntu wakubulwa kwitabija? Bene Kidishitu bakokeja kutompibwa mu kitulumukila kubandila bintu bya disubi, kitatyi kyo batala ku televijo nansha ku Entelenete. Le bino ke bikufikile, shi kebikufikile, lelo walongele’po namani? Bikekala biyampe kulangulukila pa muswelo ukokeja ditabula dimo dibi kutwala ku dikwabo, ne ku kulonga bubi bukatampe ku mfulo. (Yak. 1:14, 15) Langa’po bidi kilongwa kibi mokisanshilanga Yehova, kipwilo, ne kyenu kisaka. Pakwabo kadi, mutyima wa mundamunda utōka utambanga ku kukōkela misoñanya ya Leza. (Tanga Mitōto 119:37; Nkindi 22:3.) Kitatyi kyonso kyotanwa na matompo, lomba na kusumininwa bukomo bwa kwiakomena.

¹⁰ Kudi kintu kikwabo kyotufwaninwe kuvuluka pa mwanda utala matompo a Dyabola. Satana wāfwenene Yesu kitatyi kyaāshikilwe na nzala mafuku 40 mu ntanda mutuputupu. Pambulwa ne kutatana kwine, Dyabola wāmwene amba kino kyadi “kitatyi” kifwaninwe kya kutompa bululame bwa Yesu. (Luka 4:13) Satana ukimbanga kitatyi kifwaninwe kya kutompa bululame bwetu. Nanshi, i biyampe tulame bukomo bwetu bwa ku mushipiditu. Pavule, Satana utambanga muntu kitatyi kyamona amba yewa wakimba kufyutukila kadipo na bukomo. O mwanda kitatyi kyonso kyotwivwana mpungiji nansha kutyumukwa mutyima, tufwaninwe kulomba Yehova na kusuminwa etulame ne kwitupa mushipiditu wandi.—2 Kod. 12:8-10.

Bapebwe Bukomo bwa Kulwa na Mpungiji ne Kutyumukwa Mutyima

11, 12. (a) Mwanda waka bavule batyumukwanga mutyima dyalelo? (b) Lelo i bika bikokeja kwitupa bukomo bwa kukomena kutyumukwa mutyima?

¹¹ Tutyumukwanga mutyima kitatyi ne kitatyi, mwanda twi bantu bampikwa kubwaninina. Dyalelo dyo dine, ke-pantu kitatyi kyotudi’mo i kya kuzumbazumba mutyima mpata. Mobimwekela, bino bitatyi byotudi’mo i bitatyi bya malwa kutabuka byonso tamba kwikala’ko kwa muntu. (2 Tem. 3:1-5) Pano potwenda tufwena ku Amakedona, mitabakano ya misokwe, kujingwa mutyima, ne bikoleja bikwabo byenda bivudila’ko. O mwanda, ke kya kutulumukapo shi bantu bakwabo bakolelwanga pa kiselwa kyabo kya kusasakatyila bisaka ne kuvuija bisakibwa byabo. Bevwananga mpungiji, balēmenenwe, batyumuke, pakwabo bapotakane. Shi nobe ye mowiivwaninanga, le i muswelo’ka okokeja kunekenya ino mitabakano?

 ¹² Vuluka amba, Yesu wākulupije bandi bana ba bwanga kwibapa nsenga-mukwashi—ke mushipiditu sandu kadi. (Tanga Yoano 14:16, 17.) Buno i bukomo butabuke bonso mūlu ne panshi pene. Yehova ukokeja kwitupa bukomo bwitusakilwa pa kūminina matompo o-onso “monka mwikadile bukomo bwandi.” (Ef. 3:20) Mutumibwa Polo wānene amba, shi tweyamine pa buno bukomo tukatambula ‘bukomo bwa Leza’ nansha byo “tubakalakanyibwa ku mitamba yonso.” (2 Kod. 4:7, 8) Yehova kalailepo kutalula’ko kuzumbija mutyima dyalelo, ino witukulupija amba kupityila ku mushipiditu, uketupa bukomo bwa kunekenya’ko.—Fid. 4:13.

13. (a) I muswelo’ka wapelwe nkasampe umo bukomo bwa kulwa na ngikadilo mikomo? (b) Le uyukile’ko bimfwa bya uno muswelo?

¹³ Tala kimfwa kya Stephanie, pania wa lonso wa myaka 19. Paadi na myaka 12 wabelele misongo ya bulebe kadi bamupimine amba udi na kimenwa mu bongolo. Tamba penepa, ke mupasulwe misunsa ibidi, kupimwa ku ladiyo, ne kubela monka bulebe misunsa ibidi, bwine bwamushile mutamba wa kuboko kukaji mufwe ne kubulwa kumona senene. Stephanie wadi unenwe kulama bukomo bwandi mwanda wa kulonga bintu byaadi umwene bu bya mvubu mpata, pamo bwa kupwila, ne mwingilo wa budimi. Kadi wamwene amba Yehova mwine ukomeja, umukwashanga ominine mu miswelo mivule. Mu mabuku esambila pa Bible mudi bimfwa bya banabetu Bene Kidishitu byamukankamikile kitatyi kyatyumukilwe mutyima. Batutu ne bakaka badi bamukwatakanya na kumutumina mikanda nansha kwisamba nandi mīsambo ikankamika kumeso nansha kupwa kwa kupwila. Bantu ba kusangela nabo badi bafwija’ko Stephanie pa byadi wibafundija kitatyi kyo badi benda ku njibo yandi mwanda wa kwibafundija Bible. Pa bino byonso, Stephanie wamwene amba udi na māpu makatampe a kufwija’ko Yehova. Wadi usenswe kisonekwa kya Mitōto 41:3 kyadi ukulupile amba kifikidilanga pādi.

14. Le i bika byotufwaninwe kwepuka shi tubatyumukwa mutyima, ne mwanda waka?

¹⁴ Shi tubapungila nansha kuningilwa, ketufwaninwepo kulanga nansha dimo amba muswelo wa kunekenya kuzumbija mutyima i kutyepeja mingilo ya ku mushipiditu. Kino kyo kintu kibi mpata kyotukokeja padi kulonga. Mwanda waka? Mwanda ino mingilo pamo bwa kifundwa kya Bible kya kasuku ne kya kisaka, mwingilo wa budimi, ne kutanwa ku kupwila yo miswelo yotutambwilanga’mo mushipiditu wa kwitukomeja. Mingilo ya Bwine Kidishitu itūkijanga nyeke mityima. (Tanga Mateo 11:28, 29.) Bine, divule dine batutu ne bakaka bafikanga ku kupwila bakōke, ino shi kitatyi kya kwenda ku mobo kibabwana, bekalanga pamo bwa abo baalujibwa bukomo, batedi wabo wa ku mushipiditu muyule mudilo!

15. (a) Lelo Yehova i mulaye kulepeja būmi bwa Mwine Kidishitu? Shintulula mungya bisonekwa. (b) Le Leza i mwitulaye bika, ne bitutwala ku kipangujo’ka?

¹⁵ Na bubine, kino kekilombolapo amba kiselwa kya kwikala mwanā bwanga Mwine Kidishitu kekilēmangapo. Pa kwikala Mwine Kidishitu wa kikōkeji bilomba kulonga bukomo. (Mat. 16:24-26; Luka 13:24) Inoko, Yehova ukokeja kupa boba ba mpungiji bukomo kupityila ku mushipiditu sandu. Mupolofeto Isaya wāsonekele amba: “Boba bakungila Yehova bakasangula bukomo bwabo; bakalelemba na mapapa’nka bwa mukebo; bakanyema, ne kukōkapo kwine mpika; bakananga, ne kupungilapo kwine mpikila.” (Is. 40:29-31) Shi bidi uno muswelo, i biyampe twiipangule amba, i bika bine bitulengejanga tupungile ku mushipiditu?

16. Lelo i bika byotubwanya kulonga pa kufundwila kulampe bintu bibwanya kwitupungija ne kwitutyumuna mutyima?

¹⁶ Kinenwa kya Yehova kitusoñanya “kutonga kyokya kitabukile kunengela.” (Fid. 1:10, Myanda Miyampe ku Bonso) Polo pa  kudingakanya būmi bwa Bwine Kidishitu na lwendo lulampe lwa nshi, wānene ku bukomo bwa mushipiditu amba: “Tuvule byonso byakwitulemenena, shi bika, shi bika . . . , tunyeme ne bukankamane ponka luno lubilo lo tutungilwe.” (Bah. 12:1) wādi usaka kunena amba tufwaninwe kuleka kulondalonda bintu bya bitupu, bya kwitulēmena bitupu, biketupungija. Padi bavule motudi bevudidijanga byakulonga mu būmi abo papo na bikwabo bivulevule. O mwanda shi wivwananga divule mpungiji ne kutyinibwa, ukamwena mu kubandaula bukomo bojimijanga ku kaji, misunsa yoendanga mwanda wa kwisangaja, bukomo bojimijanga mu bya mazua nansha bikwabokwabo. Bujalale ne butūkanye biketutonona batwe bonso tuyuke mikalo yetu ne kutyepeja bintu byampikwa kamweno.

17. Mwanda waka bamobamo batyumukwanga mutyima, ino Yehova witupa kikulupiji’ka mu uno mwanda?

¹⁷ Kadi bikokejika padi bamo motudi i batyumukwe mutyima mwanda wa ino ngikadilo ya bintu keifudile bukidi motwadi tulangila. (Nk. 13:12) Inoko, yense ulanga namino ukokeja kukankamikwa na binenwa bidi mu Habakuka 2:3 bya amba: “Kimonwa kikidi kya kitatyi kitūngwe, kadi kipelakana ne kumfulo ne kukabepapo mpika; nansha kīja, kunga’kyo; ke-kintu kikāya binebine, kekikejepo, mhm.” Bine Yehova witukulupija amba mfulo ya ino ngikadilo ya bintu ikafika pa kitatyi kitungwe!

18. (a) Lelo i milao’ka ikukankamikanga? (b) Lelo kishinte kilonda’ko kiketukwasha namani?

¹⁸ Na bubine, bengidi ba Yehova ba kikōkeji bonso batengele na kipyupyu difuku dikapwa mpungiji ne kutyumukwa mutyima, kitatyi kine kikajokela bantu bonso ku “busongwalume” nansha busongwakaji. (Yoba 33:25) Ne dyalelo nadyo tukokeja kupebwa bukomo na mushipiditu sandu kitatyi kyotwingila mingilo ya ku mushipiditu ikankamika. (2 Kod. 4:16; Ef. 3:16) Kokaleka mpungiji ikubudije madyese a nyeke. Matompo onso—atamba ku kutompibwa, mpungiji, nansha kutyumukwa mutyima—asa kupita, shi ke panopo, batwe twilaije’tu mu ntanda mipya ya Leza. Mu kishinte kilonda’ko, tusa kubandaula muswelo upebwanga Bene Kidishitu bukomo na mushipiditu sandu bwa kunekenya kupangwapangwa, kukomena kuningilwa ne kūminina bikoleja bikwabo palapala.

Usa Kulondolola Namani?

• Lelo kutanga Bible kwitupanga bukomo namani?

• Le milombelo ne kulanguluka bitupanga bukomo namani?

• I muswelo’ka otukafundwila kulampe bintu bikokeja kwitutyumuna mutyima?

[Bipangujo bya Kifundwa]

[Kifwatulo pa paje 26]

Kupwila kwa Bwine Kidishitu kukokeja kwitukomeja ku mushipiditu