Bimonwa bya Kīkalo kya Mishipiditu

BAMBILA meso sō mūlu, ino kusapo kumona’mo muntu wa ku mushipiditu. Kadi shi uteje, kusapo kwivwana’mo diwi dya muntu. Inoko, kulupila amba mudi mishipiditu. Badi’mo ba bukomo ne ñeni mikatampe, kadi badi ne majina ne ngikadilo ya kwibashiyañanya. Bamo betulonga biyampe; bakwabo nabo basaka kwitulonga bibi. Bonso betutalanga.

Leza wa bine mwine i Mushipiditu. (Yoano 4:24) Udi na dijina dya bunka dimushiyañanya na baleza ba bubela. Dijina dyandi i Yehova. (Mitōto 83:18) Mulembi wa mitōto wāsonekele amba: “Yehova i mukatampe, wakutendelwa pakatampe pene; Utabukile baleza bonso kwakamibwa. Ke-bantu baleza bonso ba bantu i bankishi; ino Yehova aye wapangile madiulu. Buleme ne bulopwe bidi mu kifuko kyandi; bukomo ne buya bidi mu njibo mipandulwemo yandi.”—Mitōto 96:4-6.

Bimonwa bya Leza wa Bine

Bible witusapwila amba: “Nansha umo wamwenepo Leza, nansha patyetye.” (Yoano 1:18) Mumwekelo wandi ne ntumbo yandi ke twibivwanijapo, enka na kemukokejikilapo mpofu wa tamba ubutulwa kwivwanija misombelo ya bintu. Inoko monka mushintulwilanga mufundiji muyampe myanda mikutakane kudi boba bafundija mu bishima byobabwanya nabo kushintulula, Leza nandi, kupityila ku Bible, Kinenwa kyandi witushintulwilanga bintu byoketubwanyapo kumona kupityila ku byobya byotukokeja kumona. Yehova witukwashanga tumone kipango kya momwa mūlu ne kwivwanija mwikadile kipwano kyetu na boba badi’mo kupityila ku bimonwa bya bantu ba pa kala ba kikōkeji.

Kimfwa, kimonwa kyāpelwe mupolofeto Ezekyele, kidingakanya ntumbo ya Yehova na mudilo, mikejima, dibwe dya safile, ne na nkongolo. Mu kimonwa kikwabo, mutumibwa Yoano pa kumona Yehova ushikete pa lupona wanene amba Leza “wifwene bwa dibwe dya yasepe ne dya saladwane,” ubweja’ko kadi amba, “nkongolo, ujokolokele lupona wīfwene na zumadidi.” Bino bilomboji bitulombola amba kifuko kya Yehova kekyamwekele kashā, kinengele mpata, kisangaja, kadi kya ndoe.—Kusokwelwa 4:2, 3; Ezekyele 1:26-28.

Mupolofeto Danyele nandi wāpelwe kimonwa kya Yehova, wāmona “misungu dikumi dya tununu ya tununu dikumi [twa bamwikeulu] baimana kumeso andi [Yehova].” (Danyele 7:10) Bine, kino i kimonwa kitulumuja! Kumona, nansha ke mu kimonwa, mwikeulu’tu umo i kintu kilenga nzuba, ino langa’po tununu ne tununu twa bamwikeulu babwaninine!

Bamwikeulu i batelwe mu Bible misunsa isenselela ku 400, kadi mobadi mubadilwa baselafimi  ne bakelubi. Kishima kya Kingidiki ne kya Kihebelu kyalamwinwe bu “mwikeulu” mu Bible kishintulula amba “mukendi.” Nanshi bamwikeulu babwanya kwisamba abo bene na bene, kadi bēsambile ne na bantu pa kala. Bamwikeulu ke bantupo ba kala bādi pano panshi. Yehova wāpangile bino bipangwa bya ku mushipiditu kumeso kwa kupanga muntu.—Yoba 38:4-7.

Mu kimonwa kya Danyele, bibumbo bya bamwikeulu byābungīlwe pamo mwanda wa kwimwena kinkumenkume kya kutendelwa. Penepa Danyele wamona “wifwene’nka na mwana muntu” wafwena ku lupona lwa Yehova kupebwa “bufumu, ne ntumbo, ne bulopwe, amba bantu bonsololo, ne mizo, ne ndimi, bakamwingidile; bufumu bwandi i bufumu bwa kulādilamo nyeke, kebukapitepo, ne bulopwe bwandi i bwampikwa kukōnakanibwa.” (Danyele 7:13, 14) “Mwana muntu,” udi na mwingilo mukatampe mu kīkalo kya mishipiditu, i Yesu Kidishitu musanguke, upelwe kubikela ntanda yonso. Bubikadi bwandi busa kupingakena panopano ponka pa imbikalo yonso ya bantu ne kufudija misongo, kuyoyokota, kasusu, bulanda, ne lufu.—Danyele 2:44.

Kubikikwa kwa Yesu i kuletele bibumbo bya bamwikeulu ba kikōkeji nsangaji mikatampe, bene basakila bantu biyampe. Ino yō, ke bipangwapo byonso bya ku mushipiditu bisakila bantu biyampe.

Balwana na Leza ne Muntu

Ku ngalwilo’tu kwa mānga ya muntu, mwikeulu umo wātonwenwe na kilokoloko kya kusaka kutōtwa, wāvundamina Yehova ne kwilonga aye mwine ke Satana, kushintulula ko kunena amba “Kinkwa.” Satana, mubi  mukatakata i mwimane na bululu kulwa Yehova, buswe bwisokwele bu muntu. Bamwikeulu bakwabo bēlungile ku butomboki bwa Satana. Bible wibatela bu bademona. Pamo bwa Satana, bademona bēlongele abo bene ke balwana na muzo wa muntu. Masusu mavule adi’ko pano pa ntanda, bukondame, misongo, bulanda, ne mavita i bipa bilupuka ku lupusa lwabo.

Nansha bipwilo bya Kine Kidishitu bivule byo kebikisambilangapo padi Satana, inoko mukanda wa mu Bible wa Yoba witukwasha tujingulule ngikadilo ne kukanina kwa mutyima kwa uno mwikeulu ntomboki. Unena amba: “Ino pano namino kwādi difuku pa kwiya bāna ba Leza bana-balume kwilombola ku meso a Yehova, ino Satana nandi waiya umbukata mwabo.” Mu binenwa bilonda’ko, Satana wātopekele Yoba na kibengo amba wingidilanga Leza enka’tu pa mwanda wa byāmupele. Pa kusaka kubingija matope andi, Satana wāletela Yoba malwa makatakata, waipaya bimunanwa byandi ne bandi bana bonso dikumi. Kupwa Satana wāmumeneja mpusu isansa ngitu yonso. Bulwi bonso bwa Satana bwākankelwe kufikila pa kitungo kyandi.—Yoba 1:6-19; 2:7.

Kudi bubinga bulumbuluke bwine Yehova bwalekele’ko Satana kitatyi kilampe, ino kakamulekapo lonso. Panopano ponka Dyabola usa kufundulwa’ko. Ditabula dibajinji ke ditabulwe kala ne i dilombolwe mu mukanda wa Kusokwelwa, mwine mobetusokwela patōka mwanda mukwabo wa mvubu ulongekele mu kīkalo kya mishipiditu oketwadipo tukokeja kumona. Tutanga’mo amba: “Ino mwadi ne divita monka mūlu; Mikele [Yesu musanguke] ne bamwikeulu bandi bakamutamba mukishi [Satana] ne mukishi nandi ne bamwikeulu bandi balwile nabo. Penepo, abo ne kwibanekenya mpika, ino kebamwenepo mwakwikadila mūlu dikwabo, mhm. Ponkapo yewa mukishi mukatakata waelwa panshi; yewa nyoka wa kala na kalā, wakutelwa dya bu-dyabola ne dya bu-Satana, ñongoji wa panopantanda ponso, waelwa panopanshi, ne bamwikeulu bandi bēne kumo baelwa panshi.”—Kusokwelwa 12:7-9.

Tala pano Satana i mutelwe bu “ñongoji wa panopantanda ponso.” Ongolanga bantu na kusonshila bubela bwa bipwilo mwanda wa kwibabombola kudi Yehova ne ku Kinenwa kyandi. Buno bubela i bwa amba shi muntu wafu wendanga mu kīkalo kya mishipiditu. Kudi milangwe palapala ya uno muswelo. Kimfwa, mu Afrika ne mu Azia, bavule bakulupile amba bantu bafwa bendanga mu kīkalo kya mishipiditu mudi bankambo babo. Lufundijo lwa kikungilo ne kalunganyembo nalo lwimanine pa mulangwe wa amba muntu wendelelanga na kwikala mūmi pa kupwa kufwa.

Pa Kupwa Kufwa—Le Ke Kwenda Mūlu?

Ino, mwanda waka midiyo ya bantu kujokoloka ntanda yonso ikulupile amba bantu bonso bayampe bendanga mūlu? Eyo bantu bamo bayampe bendanga mūlu, ino kibalwa kyabo i kityetye shi twikidingakanye na midiyala ya bantu bafwile. Bible ulombola amba bantu 144000 “bakūdilwe panopanshi,” bakengila bu “bapidishitu,” “bakukabikala panopantanda.” (Kusokwelwa 5:9, 10; 14:1, 3) Abo pamo na Yesu Kidishitu Mwanā muntu, bakabunda umbikalo wa mūlu, ke Bulopwe bwa Leza kadi. Uno umbikalo ukafundula’ko Satana ne bademona bandi, kadi ukalamuna ntanda ke paladisa. Boba bonso bafwile bakalujibwa ku būmi mu kitatyi kīya kumeso ne kwikala na kyepelo kya būmi bwa nyeke mu paladisa pano pa ntanda.—Luka 23:43.

Mu kīpi nanshi, mu kīkalo kya mishipiditu mudi bibumbo ne bibumbo. Kadi utabukile bonso i Yehova Leza, Umpangi wa byonso byūmi. Bamwikeulu midiyala ne midiyala bamwingidilanga na kikōkeji. Bamwikeulu bakwabo nabo, bendejibwa na Satana, bavundamine Yehova ne kulonga bukomo bwa kongola bantu. Kadi, i bantu batyetye kete “bakudilwe” nansha batongelwe pano pa ntanda kusela biselwa bya pa bula momwa mūlu. Pampikwa kuvulaminwa kino, tubandaulei bidi i bāni babwanya kwisambwa nabo mu kīkalo kya mishipiditu ne muswelo’ka.